1 ታን አማንያዋንታ ካለꬅያ ጭማይ፥ ቱሙ ሲቅያ ታ ሲቁዋ ጋዮሳዉ ሀ ዳብዳቢያ ጻፋይ። ኪታ 19:29፤ ሮመ 16:23፤ 1 ቆሮ. 1:14 2 ታ ሲቆ፥ ኔን ጾሳና ደእያ ደኡ ሎአ ግድያዋ ታን ኤርያዋዳን፥ ኔና አያይነ ዋይሰና ማላነ ቃይ ነ አሳተꬃይ ፓጻ ግዳና ማላ፥ ጾሳ ዎሳይ። 3 አያዉ ጎፐ፥ አማሬዳ እሻቱ ዪደ፥ ኡባ ዎደ ኔን ቱማተꬃን ደእያዋነ ነ ቱማተꬃባ ማርካቴዳ ዎደ፥ ታን ዳሮ ናሸታድ። 4 ታ ናናይ *ታ ናናይ፦ ጎዳ አማኒደ ካልያዋንታ ጉሳ። ቱማተꬃን ደእያዋ ስስያዋፐ አꬊደ፥ ታና ናሸችያባይ ባዋ።

5 ታ ሲቆ፥ ኑ እሻቱ እማꬃ ግዶፐካ፥ ኔን ኡንቱንቶ ኦꬅያ ኦሱዋ ኡባን አማነቴዳ ኦሱዋ ኦꬃዳ። 6 ቃይ ኡንቱንቱ ነ ሲቁዋባ አማንያ አሳቶ ማርካቴድኖ፤ ኡንቱንቱ ቃንጸናን ባረ ኦግያ ባና ማላ ጾሳይ ዶስያዋዳን፥ ኔን ሎኦባ ኦꬃደ ኡንቱንታ ማዳርኪ። 7 አያዉ ጎፐ፥ ጾሳ አማነናዉንቱፐ አይነ አከናን፥ ክርስቶሳ ሱንꬃ ድራዉ ከሴድኖ። 8 ሄዋ ድራዉ፥ ኑን ቱማተꬃ ኡንቱንቱና እትፐ ኦꬃና ማላ፥ ሀዋንቱ ማላ አሳቱዋ ማዳናዉ በሴ።

9 ታን አማንያዋንቶ፥ ዳብዳቢያ ጻፋድ፤ ሽን ኡንቱንቱ ካፑዋ ግዳናዉ ኮይያ ድዮትራፍሰ ኑን ግያዋ አከና። 10 ሄዋ ድራዉ፥ ታን ያ ብያ ዎደ፥ እ ኑ ቦላን ሃሳይያ ኢታ ሃሳያነ እ ኦꬄዳ ኦሱዋ ህንተንቶ ኦዳና፤ ቃይ እ ሄዌ ጉጼዳ ጊደ፥ ኑ እሻቱ ይያ ዎደ ሞከና፤ ሀራይ አቶ ኡንቱንታ ሞካናዉ ኮይያዋንታካ ድጊደ፥ አማንያዋንቱ ግዶፐ ከሴ።

11 ታ ሲቆ፥ ሎኦባፐ አትን፥ ኢታባ ማላቶፓ። ሎኦባ ኦꬅያ ኦንነ ጾሳ አሳ፤ ሽን ኢታባ ኦꬅያ ኦንነ ጾሳ ኤረና።

12 ድመጽሮስ ሎአ ግድያዋ አሳይ ኡባይ ማርካቴ፤ ቱማተꬃይ ባረ ሁጲያንካ አባ ማርካቴ። ኑንካ ቃይ አባ ማርካቴቶ፤ ኑ ማርካተꬃይ ቱማ ግድያዋ ህንተካ ኤሪታ።

13 ታን ነዉ ጻፋናዉ ኮዬዳ ዳሮባይ ደኤ፤ ሽን ዋራቃታንነ ቃላምያን ጻፋናዉ ኮይከ። 14 ሽን ታን ማታን ኔናና ጋከታናዉ ቆፓይ፤ ሄ ዎደ ኑን ጋከቲደ ሃሳያና።

15 ሳሮተꬃይ ኔናና ግዶ።

ነ ዳባቱ ኔና ሳሮ ሳሮ ያጊኖ። ኑ ዳባቱዋ ኡባ ኡንቱንቱ ሱንꬃ ሱንꬃ ጼሳደ፥ ታና ሳሮ ሳሮ ጌዳ ያጋ።