1 አብራሃመ ሎይꬅ ላይꬃ ሱጊደ ጭሜዳ፤ መꬍና ጎዳይ አ ኡባባንካ አንጄዳ። 2 አብራሃመ ባረ ቆማ፥ ባረ ሶ አሳ ኡባዉ ካፖትያ፥ ባረ አሳ ኡባዉ ጎዳትያዋ ሀዋዳን ያጌዳ፤ “ነ ኩሽያን ታ ጉልባታ ኦይቃ፤ *ነ ኩሽያን ታ ጉልባታ ኦይቃ፦ ሀዋ ጉሳይ ጫቁ ፖሎ ላመተናዋ በሴ። 3 ታን ኡንቱንቱ ግዶን ደእያ ካናነቱዋ ማጫ ናናቱዋፐ ታ ናአዉ ማቻቶ ኦቼና ማላ፥ መꬍና ጎዳን፥ ሳሉዋ ጾሳንነ ሳኣ ጾሳን ታን ኔና ጫቀꬃይ፤ 4 ሽን ኔን ታ የለቴዳ ቢታ፥ ታ ዳቦቱዋኮ ባደ፥ ታ ናኣ ይሳቃዉ ማቻቶ ኦቻ” ያጌዳ።

5 አ ቆማይ፥ “ማጫውና ታናና ያናዉ ዶሰናባ ግዶፐ፥ ነ ናኣ ኔን ዬዳ ጋድያ ጉየ አፎ?” ያጊደ ኦቼዳ።

6 አብራሃመ፥ “ታ ናኣ ያ አፈናዳን ኔና ኤራ! 7 መꬍና ጎዳይ፥ ሳሉዋ ጾሳይ፥ ታና ታ አዉዋ ሶፐነ ታ የለቴዳ ቢታፐ ከሴዳዌ ታዉ፥ ‘ነ ዛርያዉ ታን ሀ ቢታ እማና’ ያጊደ ጫቄዳዌ፥ ኔን ታ ናአዉ ያፐ ማቻቶ ደማና ማላ፥ እ ባረ ኪታንቻ ኔፐ ስንꬃዉ ኪታና። 8 ምሽራታ ኔናና ጉየ ያናዉ ዶሰናባ ግዶፐ፥ ሀ ታን ኔና ጫቀꬄዳ ጫቁ ነዉ ጎመተና፤ ሽን ታ ናኣ ያ ጉየ ኡባካ አፎፓ” ያጌዳ። 9 ቆማይ ባረ ጎዳ አብራሃመ ጉልባታ ኦይቄዳ፤ ሀ የዎ ጫቄዳ።

10 ሄዋፐ ጉየ፥ ቆማይ ባረ ጎዳ ጋሎቱዋፐ ታሙዋ አኪደ፥ ባረ ጎዳ ሚሻፐካ ሙሩታ ሙሩታ አኪደ ቤዳ፤ ማስጰጾምያ ግያ ጋድያን ናኮራ ካታማ ጋኬዳ። 11 ኦማርስ፥ ማጫ አሳይ ሃꬃ ትካናዉ ይያ ዎድያን፥ ካታማፐ ጋጻን ሃꬃ ኦላ ማታን ባረ ጋሎቱዋ ጉልባትሴዳ።

12 ያቲደ እ ሀዋዳን ያጊደ ዎሴዳ፤ “መꬍና ጎዳዉ፥ ታ ጎዳ አብራሃመ ጾሳዉ፥ ሀቼ ታን ቆፓደ ዬዳባ ታዉ እንጀያ፤ ቃይ ታ ጎዳ አብራሃመዉ ሎኦባ ኦꬃ። 13 በአ! ታን ሀ ሃꬃ ፑልትያ ማታን ኤቃይ፤ ሀ ካታማ አሳ ማጫ ናናይ ሃꬃ ትካናዉ ሃ ያና። 14 ታን፥ ‘አነ ኦቱዋ ሆክሳደ ታና ሃꬃ ኡሻ’ ግያ ዎደ፥ እዛካ፥ ‘ሄይ ኡሻ፤ ቃይ ነ ጋሉዋ ታን ኡሻና’ ያግያና፥ ሄና ነ ቆማ ይሳቃዉ ኔን ዶሬዳኖ ግዱ፤ ኔን ታ ጎዳዉ ሎኦባ ኦꬄዳዋ ታን ሄዋን ኤራና” ያጌዳ።

15 ብሮ እ ዎሳ ዉርሰናን ደእሽን፥ ርብቃ ሃꬃ ኦቱዋ ቶካደ ፑቱ ጋዱ። እዞ ባቱኤል የሌዳ፤ ባቱኤል ምልካ ናኣ፤ ምልካ አብራሃመ እሻ ናኮራ ማቻቶ። 16 ርብቃ ሎይꬃ ፑላንቻነ አቱማ አሳይ ቦችቤና ዎዶራቶ። ፑልቱዋ ዱገ ዎꬋደ፥ ባረ ኦቱዋ ኩንꬃደ ከሳዱ። 17 ሄ ቆማይ ኢኮ ዎጽ ቢደ እዞ፥ “ነ ኦቱዋፐ ታና ጉꬃ ሃꬃ ኡሻርኪ!” ያጌዳ።

18 እዛ፥ “ኤኖ ታ ጎዳዉ፥ ኡሽኪ” ያጋዱ። ኤሌላደ ኦቱዋ ባረ ሀሽያፐ ዎꬃደ፥ ገደ ዛራ ኦይቃደ አ ኡሻዱ። 19 አ ኡሼዳዋፐ ጉየ፥ “ነ ጋላቱዋካ አላና ጋካናዉ ታን ኡንቱንቶ ሃꬃ ዱቃና” ያጋዱ። 20 አቴዳ ሃꬃ ኤሌላ ዎንግርያን ትጋደ፥ ሀራ ሃꬃ ዱቃናዉ ኦላ ዎጻዱ፤ ጋላቱ ኡባይ አላና ጋካናዉ፥ ሃꬃ ኦላፐ ዱቃ ዱቃደ አሃደ ዎንግርያን ትጋደ ኡሻዱ። 21 እ ቆፒደ ዬዳ ቆፋ መꬍና ጎዳይ እንጀዪደ ደእንቶ ኤራናዉ ብታኒ ጮኡ ጊደ እዞ ጼሌ።

22 ጋሎቱ ሃꬃ ኡሽ ስሚና፥ ብታኒ እቼሹ ግራመነ ባካ ግዴዳ ዎርቃ ምግዱዋነ፥ ጼታነ ታሙ ግራመ ግዴዳ ላኡ ዎርቃ ሳጋየቱዋ ከሴዳ፤ 23 እዞ፥ “ኔን ኦ ናት? አነ ታዉ ኦዳ፤ ነ አዉዋ ሶን ኑዉ አቅያ ሳአይ ደአኔ?” ያጌዳ።

24 እዛ፥ “ታን ባቱኤላ ናቶ፤ ባቱኤል ምልካ ናኮራዉ የሌዳ ናኣ። 25 ኑዋን ግድያ ዳላይነ ባሱ ደኤ፤ ቃይ ህንተንቱ አቃናዉካ ሳአይ ደኤ” ያጋዱ።

26 ብታኒ ጉልባት መꬍና ጎዳዉ ጎይኒደ፥ 27 ሀዋዳን ያጌዳ፤ “ታ ጎዳዉ ኬክያዋነ አማነትያዋ አግቤና መꬍና ጎዳይ፥ ታ ጎዳ አብራሃማ ጾሳይ ጋላተቶ! ታን ዪሽን፥ መꬍና ጎዳይ ታና ታ ጎዳ ዳባቱዋ ሶይ ካለꬄዳ” ያጌዳ።

28 ናታ ዎጻ ባደ፥ ባረ አት ሶን ደእያ አሳዉ ሀኔዳባ ኦዳዱ። 29 ርብቅዉ ላባና ግያ እሻይ ደኤ፤ ላባን ካረ ከሲደ፥ ሃꬃ ፑልቱዋ ማታን ደእያ ብታንያኮ ዎጼዳ። 30 ምግዱዋነ ባረ ምቻት ኩሽያን ደእያ ሳጋየቱዋ በኤዳሳና ርብቃ ብታኒ ባረና ጌዳዋ ኦድና ስሶሳና፥ ከሲደ ብታንያኮ ብ በኤዳ፤ ብታንያ ጋሎቱዋና ፑልቱዋ ማታን ኤቄዳዋ ደሜዳ። 31 አ፥ “መꬍና ጎዳይ ኔና አንጄዳዎ፥ ሃያ! ኔን ሀዋን ካረን አያዉ ኤቃይ? ታን ነዉ ጎልያነ ጋሎቶካ ሳኣ ጊግሳድ” ያጌዳ።

32 ብታኒ ሶ ገሌዳ፤ ላባን ጋሎቱዋ ጫና ብሌዳ፤ ዳላነ ባሱዋ ጋሎቶ የጌዳ። ገድያ ሜጫናዉ አስነ አናና ደእያ አሳቶ ሃꬃ አሄዳ፤ 33 ቁማይካ አ ስንꬃ አꬌዳ። ሽን እ፥ “ታን ታና አሄዳባ ህንተንቶ ኦደናን ደኣደ ቁማ ሚከ” ያጌዳ።

ላባን፥ “ያቶፐ ኦዳ” ያጌዳ።

34 ሄዋ ድራዉ እ፥ “ታን አብራሃመ ቆማ። 35 መꬍና ጎዳይ ታ ጎዳ ሎይꬅ አንጅና፥ እ ዱረቴዳ፤ ዶርሳ፥ ሚዛ፥ ብራ፥ ዎርቃ፥ አቱማ ቆማቱዋ፥ ማጫ ቆማቱዋ፥ ጋሎቱዋነ ሀረቱዋ አዉ እሜዳ። 36 ታ ጎዳ ማቻታ ሳራ ባረ ጪማተꬃ ላይꬃን አዉ አቱማ ናኣ የላዱ፤ እ ባረዉ ደእያዋ ኡባ አዉ እሜዳ። 37 ታ ጎዳይ ታና ሀዋዳን ጫቂሴዳ፤ ‘ታን ደእያ ካናነ ቢታ ማጫ ናናቱዋፐ ታ ናአዉ ማቻቶ ኦቾፓ፤ 38 ሽን ታ አዉዋ አሳኮ፥ ታ ዛራቱዋኮ ባደ፥ ታ ናአዉ ማቻቶ ኦቻ’ ያጌዳ። 39 ታን ታ ጎዳ፥ ‘ናታ ታናና ያናዉ ዶሰናን አጎፐ ሽን?’ ያጋድ። 40 እ፥ ‘መꬍና ጎዳይ፥ ታን አ ስንꬃን ሀመቴዳዌ ኔናና ባረ ኪታንቻ ኪታና፤ ኔን ታ ናአዉ ታ አዉዋ አሳፐ፥ ታ ዛራቱዋፐ ማቻቶ ደማና ማላ፥ ነ ብያሳካ እንጀያና። 41 ኔን ታ ዛራቱዋኮ ቢና፥ ኡንቱንቱ ነዉ እዞ እመናን እጾፐ፥ ሄ ዎደ ነዉ ጫቁ ጎመተና’ ያጌዳ።

42 “ታን ሀቼ ሀ ፑልቱዋኮ ዬዳ ዎደ ያጋድ፤ ‘መꬍና ጎዳዉ፥ ታ ጎዳ አብራሃመ ጾሳዉ፥ ነ ሸነ ግዶፐ፥ ታን ብያ የዉዋ እንጀያ። 43 በአ፤ ታን ሀ ፑልቱዋ ማታን ኤቃይ፤ ወዶራታ እትና ሃꬃ ትካናዉ ዮፐ፥ ታን እዞ፥ “ታና ነ ኦቱዋፐ ጉꬃ ሃꬃ ኡሻርኪ!” ያጋና። 44 እዛ ታና፥ “ኤኖ ኡሻ፤ ቃይ ነ ጋሎቶካ ታን ሃꬃ ዱቃና” ያግያና፥ መꬍና ጎዳይ ታ ጎዳ ናአዉ ዶሬዳኖ ግዱ’ ያጋድ።

45 “ታን ታ ዎዛናን ዎስያዋ ዉርሰናን ደእሽን፥ ርብቃ ባረ ኦቱዋ ቶካ አካደ፥ ፑቱ ጋዱ፤ ፑልቱዋ ዱገ ዎꬋደ ሃꬃ ዱቃዱ፤ ታን እዞ፥ ‘ታና ሃꬃ ኡሻርኪ’ ያጋድ።

46 “እዛ ኤሌላ ባረ ሀሽያፐ ኦቱዋ ዎꬃደ፥ ‘ሄኮ ኡሻ፤ ቃይ ታን ነ ጋሎቱዋ ኡሻና’ ያጋዱ። ታን ኡሻድ፤ ቃይ ታ ጋሎቱዋ እዛ ኡሻዱ።

47 “ታን እዞ፥ ‘ኔን ኦ ናት?’ ያጋድ።

“እዛ፥ ‘ታን ባቱኤላ ናቶ፤ ባቱኤል፥ ምልካ ናኮራዉ የሌዳ ናኣ’ ያጋዱ።

“ታን እዝዉ ምግዱዋ አꬃድ፤ እዝ ኩሽያንካ ሳጋየቱዋ ዎꬃድ። 48 ሄዋፐ ጉየ ታን ጉልባታደ፥ መꬍና ጎዳዉ ጎይናድ፤ ታን መꬍና ጎዳ፥ ታ ጎዳ አብራሃመ ጾሳ፥ ታ ጎዳ እሻ ናኣ ናቶ አ ናአዉ አካናዉ ታና ልከ ኦግያ ካለꬄዳዋ ጋላታይ። 49 ሀእካ ህንተንቱ ታ ጎዳዉ ኬካናባነ አማነታናዋ ግዶፐ፥ ታዉ ኦድተ፤ ግዳና ꬋይንቶነ ኦድተ፤ ሄዋፐ ስንꬃን ታን ሀናናዋ ኤራና” ያጌዳ።

50 ላባንነ ባቱኤል ዛሪደ ያጌድኖ፤ “ሀ የዉ መꬍና ጎዳፐ ዬዳ፤ ኑን ነዉ ያ ሃ ጋናዉ ዳንዳዮኮ። 51 ርብቆ ሀኖ በአ፤ አካደ ባ፤ መꬍና ጎዳይ ጌዳዋዳን ነ ጎዳ ናአዉ ማቻቶ ግዱ” ያጌድኖ።

52 አብራሃማ ቆማይ ኡንቱንቱ ግያዋ ስሴዳ ዎደ፥ ሳኣን ጉልባቲደ መꬍና ጎዳዉ ጎይኔዳ። 53 ቆማይ ብራ አሌቁዋነ ዎርቃ አሌቁዋ፥ ማዩዋካ ከሲደ፥ ርብቅዉ እሜዳ፤ ቃይ አልኦ ሚሻቱዋ እዝ እሻዉነ እዝ አትዉ እሜዳ።

54 ሄዋፐ ጉየ፥ እነ አናና ደእያዋንቱ ሜድኖነ ኡሼድኖ፤ ያቲደ ያን አቄድኖ፤ ኡንቱንቱ ጉራን ደንዲደ፥ “ታና ታ ጎዳኮ የድተ” ያጌዳ።

55 እዝ እሻይነ እዝ አታ፥ “ናታ እት ታሙ ጋላሳ ኬሻ ኑናና ታኩ፤ ሄዋፐ ጉየ እዛ ባና” ያጌድኖ።

56 ሽን እ፥ “መꬍና ጎዳይ ታን ዬዳዋ እንጀይ ድግና፥ ህንተንቱ ታና ጋምኤꬆፕተ፤ ታን ታ ጎዳኮ ባና ማላ ታና ሞይዝተ” ያጌዳ።

57 ኡንቱንቱ፥ “ናቶ ጼሲደ አነ እዞ ኦቾይተ” ያጌድኖ። 58 ርብቆ ጼሲደ፥ “ሀ ብታንያና ባኒ?” ያጊደ ኦቼድኖ።

እዛ፥ “ኤ፤ ታን ባና” ያጋዱ።

59 ኡንቱንቱ ባረንቱ ምቻቶ ርብቆ፥ እዞ ድችያንና፥ አብራሃማ ቆማናነ አ አሳቱዋና ሞይዜድኖ። 60 ኡንቱንቱ ርብቆ፥

62 ሄ ዎደ ይሳቅ፥ “ታና በእያ ደኡዋ ጾሳ ፑልቱዋ” ግያ ፑልቱዋ ማታ ቢደ፥ ኔጌባ ዎራን ደኤ። 63 እት ጋላስ ኦማርስ ይሳቅ ባረ ዎዛናን ቆፒደ ደምባ ከሲደ ዩዬ፤ እ ꬎቁ ጊደ ጼልያ ዎደ፥ ጋላቱ ይያዋንታ በኤዳ። 64 ርብቃካ ꬎቁ ጋደ ጼልያ ዎደ፥ ይሳቃ በኣዱ፤ ጋሉዋፐ ዎꬋዱ። 65 ቆማ፥ “ሀ ኑናና ጋከታናዉ ደምባና ይያ ብታኒ ኦኔ?” ያጋዱ።

ቆማይ፥ “እ ታ ጎዳቴ” ያጌዳ። እዛ ባረ ሻሽያ አካደ ጉሎታዱ።

66 ቃይ ቆማይ ባረ ኦꬄዳዋ ኡባ ይሳቃዉ ኦዴዳ። 67 ይሳቅ ርብቆ ባረ አት ሳር ዱንካንያ አፌዳ። እዞ አኬዳ፤ እዛካ አዉ ማቻቶ ግዳዱ። ያትና እ እዞ ሲቄዳነ ባረ አት ሀይቁዋን ካዮትያዋፐ ምነቴዳ።