1 ካትያ ህዝቂያስ ካተቴዳ ታማነ ኦይደንꬆ ላይꬃን፥ አሶረ ካቲ ሳናክሬብ ግምበት ኡቴዳ ይሁዳ ካታማቱዋ ኡባ ኦሊደ ኦይቄዳ። 2 ሄዋፐ ጉይያን፥ አሶረ ጋድያ ካቲ ላክሻ ግያ ካታማፐ እት ዋናትያ ኦላ ጋዳዋ ጮራ ኦላንቻቱዋና ካትያ ህዝቂያሳኮ የሩሳላመ የዴዳ። ቢደ፥ ማዩዋ ሜጭያዋ ጋደ አፍያ ኦግያፐ ቆሞ ባጋና ደእያ ዳጋቴዳ ሃꬃይ ጎግያ ሃꬃ ማታን ኤቄዳ። 3 ያትና፥ ህልቂያ ናአይ ካትያ ጎልያን አዎትያ ኤልያቂመ፥ ዋና ጻፊ ሼብንነ አሳፋ ናአይ ታርክያ ጻፍያ ዮኣህ አኮ ካረ ከሴድኖ።

4 አሶረቱዋ ጋዳዋይ ኡንቱንታ፥ “ህዝቂያሳዉ ሀዋዳን ያጊደ ኦድተ፤ አሶረ ካቲ፥ ዎልቃማይ ኔና ሀዋዳን ያጌ፤ ‘ኔን ሀዋ ኬሻ አያን አማነታዲ? 5 ኔን ጮ መላ፥ ኦላ ኦለታናዉ ታዉ አꬌዳ ኤራይነ ዎልቃይ ደኤ ያጋሳ። ሽን ኔን ኦናን አማነታደ ታ ቦላ ሀዋ ማካላዲ? 6 ኔን ግብጼ ካቲ ማዳና ጋደ ቆፔዳዋ ግዶፐ፥ መኤዳ ማቃ ጋትማን ጉፈትያ አሳ ማላ። አያዉ ጎፐ፥ ጻምአይ መእና፥ ፕንጩ ኩሽያ ጫዴነ ማዱጽሴ። ግብጼ ካቲ ባረናን አማነትያ አሳ ኡባዉ ሄዋ ማላ።’ ”ህዝ. 29:6-7

7 ሽን ኔን ታዉ፥ “ኑን መꬍና ጎዳን፥ ኑ ጾሳን፥ አማነቴቶ” ያጎፐ፥ ህዝቂያስ ይሁዳ አሳነ የሩሳላመ አሳ፥ “ህንተ የሩሳላመን ደእያ ያርሽያሳን ጎይናናዉ ኮሼ” ጊደ፥ አዉ ጎይንያ ꬎቃ ሳአቱዋነ ያርሽያ ሳኣ ድጌዳ ጾሳ እ ግደኔ?

8 አነ ሀእ ሃያ! ታ ጎዳ አሶረ ካትያና ናሰታ። ኔን ቶጋናዉ ዳንዳይያ፥ ግድያ አሳ ደሞፐ፥ ላኡ ሻአ ፓራቱዋ ታን ነዉ እማና። 9 ኔን፥ “ግብጼቱ ፓራ አሳቱዋነ ፓራ ጋረቱዋ ታዉ የዳና” ጋደ አማኖፐነ፥ ታ ጎዳ ኦላንቻቱዋ ካፓቱዋፐ እት ላፍያዋካ ዛራናዉ ዳንዳያካ። 10 ሄዋ ቦላካ ቃይ፥ ታን ሀእ ቱሙ መꬍና ጎዳ አዛዙ ባይናን ሀ ጋድያ ꬋይሳናዉ ከሳድታ? መꬍና ጎዳይ ባረ ሁጲያን ታና፥ “ኔረ፥ ሄ ጋድያ ባደ፥ ኦላደ ባይዛ” ያጊደ ኦዴዳ ያጌ ያግተ ያጌዳ።

11 ሄዋፐ ጉይያን ኤልያቂመ፥ ሼብንነ ዮኣህ አሶረቱዋ ጋዳዋ ሀዋዳን ያጌድኖ፤ “ኑን ብለꬃ ኤርያ ድራዉ፥ ሀያና ኔን ኑዉ ነ ቆማቶ ሶርያ ቃላን ኦዳ። ድርሳ ግምቢያ ሁጲያን ደእያ አሳይ ስሰና ማላ፥ እብራይስጸ ቃላን ኦዶፓ” ያጌድኖ።

12 ሽን ጋዳዋይ ዛረꬂደ፥ “ሀ ቃላቱዋ ታን ህንተዉነ ህንተ ጎዳ ጻላላዉ ኦዳናዉ ታና ታ ጎዳይ ኪቴዴየ? ህንተናና እትፐ ባረንቱ ኡርቃ ሼሻ ማናዉነ ባረንቱ ሃꬃ ሼሻ ኡሻናዉ ደእያ፥ ሀ ድርሳ ግምቢያ ቦላ ኡቴዳ አሳ ኡባዉ ኦዳናሳ ግደኔየ?” ያጌዳ።

13 ሄዋፐ ጉይያን አሶረቱዋ ጋዳዋይ ደንድ ኤቂደ፥ ባረ ቃላ ꬎቁ ኦꬂደ፥ እብራይስጸ ቃላን ሀዋዳን ያጌዳ፤ “አሶረ ካቲ ዎልቃማይ ህንተና ግያዋ ስስተ! 14 ካቲ ህንተና ሀዋዳን ያጌ፤ ‘ህዝቂያስ ህንተና ጭሞፖ፤ አያዉ ጎፐ፥ እ ህንተና ታ ኩሽያፐ ዎꬅ አካናዉ ዳንዳየና። 15 እ ህንተና፥ “መꬍና ጎዳይ ቱማ ኑና አሻና፤ ሀ ካታማይካ አሶረ ካትያ ኩሽያን ገለና” ጊደ ህንተ መꬍና ጎዳን አማነታና ማላ ኦꬆፖ’ ያጌ።

16 “ኤ፥ ህንተ ህዝቂያስ ኦድያዋ ስሶፕተ። አሶረ ካቲ ህንተና፥ ‘ታናና ስገትተ፤ ሃ ታኮ ከስተ። ያቶፐ፥ ህንተ ኡባይካ ህንተ ዎይንያ ቴራፐነ ህንተ ባላስያ ቴራፐ ማና፤ ህንተ ቦኬዳ ኦላፐካ ሃꬃ ኡሻና። 17 ሄዋፐ ጉይያን ታን ያደ፥ ህንተና ህንተ ቢታ ማላትያ ቢታ አካደ አፋና። ሄ ቢታይ ካꬃይነ ዎይንያ ኤሳይ፥ ኡክꬃይነ ዎይንያ አታክልቲ ኩሜዳ ቢታ’ ያጌ።

18 “ህዝቂያስ ህንተና፥ ‘መꬍና ጎዳይ ኑና አሻና’ ያጊደ ጭመናዳን ናገትተ። ጋድያ አሳቱዋ ጾሳቱዋፐ ባረ ቢታ አሶረ ካትያ ኩሽያፐ አሼዳ ጾስ ደኢየ? 19 ሀማታ ጾሳቱነ አርፋዳ ጾሳቱ ሀቃን ደኢኖ? ሳፋርዋይማ ግያ ካታማ ጾሳቱ ሀቃን ደኢኖ? ኡንቱንቱ ሳማርያ ታ ኩሽያፐ ዎꬅ አኬድኖ? 20 ሀ ቢታቱዋ ጾሳቱዋ ኡባ ግዶን ባረ ጋድያ ታ ኩሽያፐ አይ ጾስ አሼዳዋ ሽን፥ መꬍና ጎዳይ የሩሳላመ ታ ኩሽያፐ አሻኔ?” ያጌዳ።

21 ሽን አሳይ እት ቃላነ አዉ ዛረናን ጮኡ ጌዳ። አያዉ ጎፐ፥ ካቲ ኡንቱንታ፥ “አዉ አይነ ዛሪደ ኦዶፕተ” ያግ ዎꬄዳ። 22 ሄዋፐ ጉይያን ህልቂያ ናአይ ካትያ ጎልያን አዎትያ ኤልያቂመ፥ ዋና ጻፊ ሼብንነ ታርክያ ጻፊ አሳፋ ናአይ ዮኣህ ባረንቱ ማዩዋ ፔꬊደ፥ ህዝቂያሳኮ ቤድኖ፤ አሶረቱዋ ጋዳዋይ ጌዳዋ ኡባ አዉ ኦዴድኖ።