1 ሄ ዎደ ካቲ ህዝቂያስ ሀርጊደ፥ ሀይቃና ማቴዳ። ያት ደእሽን አሞጻ ናአይ ትምቢትያ ኦድያ እስያስ አኮ ቢደ፥ “መꬍና ጎዳይ ኔና፥ ‘ኔን ሀይቃሳፐ አትና ፓጻካ፤ ሄዋ ድራዉ፥ ነ ጎልያ ጊግሳ’ ያጌ” ያጌዳ።

2 ህዝቂያስ ጎዳኮ ስም ግሲደ፥ መꬍና ጎዳ ዎሴዳ። 3 እ “አቤት መꬍና ጎዳዉ፥ ታን ነ ስንꬃን ቱማተꬃንነ ኩመንꬃ ዎዛናን ሄመቴዳዋነ ቃይ ኔና ናሸችያባ ኦꬄዳዋ ታዉ ኔን ሀሳያና ማላ፥ ታን ኔና ዎሳይ” ያጊደ ዎሴዳ፤ ህዝቂያስ ሎይꬅ ምሸቲደ ዬኬዳ።

4 ሄዋፐ ጉይያን፥ መꬍና ጎዳ ቃላይ ኢስያሳ ኮ ሀዋዳን ያጊድ ዬዳ። 5 “ባደ፤ ህዝቂያሳ፥ መꬍና ጎዳይ ነ ማይዛ አዉዋ ዳዊታ ጾሳይ ሀዋዳን ያጌ፤ ‘ታን ነ ዎሳ ስሳድ፤ ነ አፎꬃካ በኣድ። ነ ላይꬃ ቦላ ታን ነዉ ታማነ እቼሹ ላይꬃ ጉጃና። 6 ኔናነ ሀ ካታማ አሶረ ጋድያ ካትያ ኩሽያፐ አሻና፤ ታን ሀ ካታማዉ ኦለታደ አሻና ያጌ’ ” ያጋ ያጌዳ።

7 እስያስ ጉጂድካ ሀዋዳን ያጌዳ፤ “መꬍና ጎዳይ ባረ ጌዳ ቃላ ፖላናዉ መꬍና ጎዳዉ ማላታይ ሀዋ: 8 በአ፥ አካዝ ፑደ ከሳናዉ ጊግሴዳ ደꬃን ደእያ ኩዋይ ታሙ ታንጉዋ ጉየ ስሚደ ባናዳን፥ ታን ኦꬃና” ያጌዳ። ኩዋይ ታሙ ታንጉዋ ጉየ ስሚደ ቤዳ።

9 ይሁዳ ካቲ ህዝቂያስ ሀርግ ፓጼዳዋፐ ጉይያን፥ ጻፌዳ ማዝሙሪ ሀዋ: 10 ታን፥ “ታ ደኦ ላይꬃዉ ብሮ ባጋ ጋክያ ዎደ፥ ሀይቁዋ ፐንግያና ገላና ሀናይታ? ታ አቴዳ ላይꬃ ቦንቂ ድግና፥ መላ አታና ሀናይታ?” ያጋድ። 11 ሄዋዳንካ ቃይ፥ “ታን ፓጻ ደእያዋንቱ ጋድያን መꬍና ጎዳ በእከ፤ ሀ ሳኣን ደእያዋንቱ ግዶንካ ላኤንꬆ መꬍና ጎዳ በእከ። 12 ዶርሳ ሄምያዋ ዱንካንያዳን፥ ታ ደኡ ሾደቴዳ። ሸማይኒ አፍላ ሀርባን ጻጽያዋዳን፥ ታን ታ ደኡዋ ጻጻድ፤ እካ ታና ሸማይንያ ሀርባፐ ዱꬄዳ ጋላሳፐ ቃማ ጋካናዉ፥ ኔን ታና ꬋይሳዳ ያጋድ። 13 ሳአይ ዎንታና ጋካናዉ ታን ማዱዋ ደማናዉ ዋሳድ። ሽን ጋሙዋዳን እ ታ መቀꬃ ኡባ መንꬄዳ። ቃይ ጋላሳፐ ቃማ ጋካናዉ፥ ኔን ታና ꬋይሳዳ። 14 ታን ጭራሹዋዳንነ ሃꬃ ካፉዋዳን ዋሳድ፤ ሀራጵያዳንካ ዙዙማድ። ታ አይፈቱ ሳሉዋ ፑደ ጼሊደ ጼሊደ ዳቡሬድኖ። አቤት ጎዳዉ፥ ታን ኡንኤታድ፤ ኔን ታና ሀ ኡንኡዋፐ ከሳ!” ያጋድ።

15 ሀዋ ኡባ ጾሳይ እ ባረ ሁጲያን ኦꬄዳ፤ ያትና፥ ታን አያ ጋናዉ ዳንዳያይታ? ታ ሸምፑ ሎይꬅ ኡንኤቴዳ ድራዉ፥ ታ ላይꬃ ኡባን አሽከተꬃን ሀመታና። 16 አቤት ጎዳዉ፥ ሀዋንቱ ማላ የዎቱዋን አሳይ ፓጻ ደኤ። ሀይ ታ ፓጻተꬃ ዛራደ፥ ታና ፓጻ ዎꬃርኪ! 17 በአ፥ ታን ሀ ዎልቃማ ቱጋ ቱጋቴዳዌ ታዉ ሎአ ግዴዳ። ኔን ታ ሸምፑዋ ባሻ ኦላፐ ጉየ ዛራደ አሻዳ፤ ኔን ታ ናጋራ ኡባ ኔፐ ጉየ ዛራደ ኦላዳ። 18 አያዉ ጎፐ፥ ዱፉ ኔና ጋላተና፤ ሀይቁካ ኔና ሳበና። ጪማ ኦላዉ ዱገ ዎꬍያዋንቱ ኔና አማንꬄ ጊደ ህዶታ ኦꬅክኖ። 19 ታን ሀች ኔና ጋላትያዋዳን፥ ፓጻ ደእያዋንቱ ጻላላቱ ኔና ጋላቲኖ፤ ኔን አማንꬅያዋ አዉ ባረ ናናቶ ኦዴ።

20 መꬍና ጎዳይ ታና አሻና፤ ሄዋ ድራዉ፥ ኑን ኑ ደኡዋ ላይꬃ ኡባን፥ መꬍና ጎዳ ጎልያን ባቀቴዳ ክርያን ዋጸቴዳ ዲꬃን የጻና።

21 ሀዋፐ ካሰ እስያስ፥ “ባላስያ ቴራ ዳጺደ፥ አ ጋፉዋ ቦላ ዎꬅተ። ያቶፐ፥ እ ፓጻና” ያግ ዎꬄዳ።

22 ህዝቂያስካ፥ “ታን ፓጻደ መꬍና ጎዳ ጌሻ ጎልያ ፑደ ከሳናዎ ማላታይ አዬ” ያግ ኢስያሳ ኦች ዎꬄዳ።