1 ሄ ዎደ፥ ባላዳና ናአይ፥ ባብሎነ ካቲ ማሮዳክ ባላዳን፥ ህዝቂያስ ሀርጊደ ፓጼዳዋ ስሴዳ ድራዉ፥ ዳብዳቢያነ እሙዋ ህዝቂያሳዉ የዴዳ። 2 ህዝቂያስ ኪተቲደ ዬዳ አሳቱዋ ሞኬዳ። ያቲደ ባረ ሻሉዋ ምንጅያ ጎልያን ደእያ ብራ፥ ዎርቃ፥ ሳዉዋ፥ አልኦ ዛይትያ፥ ባረ ኦላ ሚሻነ ባረ ሻሉዋ ምንጅያ ጎልያን ደእያዋ ኡባ ኡንቱንታ በሴዳ። ባረ ሶን ዎይ ባረ ካዉተꬃ ግዶን ደእያዋ ኡባፐ ህዝቂያስ ኡንቱንታ በሰናን አጌዳባይ አያይነ ባዋ።

3 ሄዋፐ ጉይያን፥ ትምቢትያ ኦድያ እስያስ ካትያ ህዝቂያሳኮ ዪደ፥ “ሀ አሳቱ ዋጌድኖ? ኡንቱንቱ ሀቃፐ ዬድኖ?” ያግ ኦቼዳ።

ህዝቂያስ፥ “ኡንቱንቱ ታኮ ሃኮ ጋድያፐ፥ ባብሎነፐ ዬድኖ” ያጌዳ።

4 እስያስ ቃይካ፥ “ኡንቱንቱ ነ ሶን አያ አያ በኤድኖ?” ያጌዳ።

ህዝቂያስ፥ “ኡንቱንቱ ታ ሶን ደእያ ኡባባ በኤድኖ፤ ታ ሻሉዋ ምንጅያ ጎልያን ደእያባፐ ታን ኡንቱንታ በሳቤናባይ አያይነ ባዋ” ያጌዳ።

5 ሄዋፐ ጉይያን፥ እስያስ ህዝቂያሳ፥ “ኡባፐ ዎልቃማ መꬍና ጎዳይ ግያዋ ስሳ። 6 መꬍና ጎዳይ ሀዋዳን ያጌ፤ ‘ነ ካትያ ጎልያን ደእያባይ ኡባባይነ ነ ማይዛ አዎቱ ሀች ጋካናዉ ሺሼዳባይ ኡባባይ ኡባና ኦሞደቲደ፥ ባብሎነ ቢታ ባና ጋላሳቱ ያና፤ አፐ አያይነ አተና። 7 ቃይ ነዉ የለታና፥ ነ አሾነ ነ ሱꬃ ግድያ፥ ነ አቱማ ዛራቱዋፐካ ኦሞደቲደ ባና፤ ቢደ ባብሎነ ካትያ ጎልያን ጎይሮ ግዲደ ኦꬃና’ ያጌ” ያጌዳ።

8 ህዝቂያስ ዛሪደ፥ “ኔን ኦዴዳ መꬍና ጎዳ ቃላይ ሎአ” ያጌዳ። አያዉ ጎፐ፥ ህዝቂያስ፥ “ታን ደኤዳ ላይꬃን ሳሩነ ዎፓይ ደአና ግደኔ” ያግ ቆፔዳ።