1 ህንተ ጾሳይ ሀዋዳን ያጌ፤ “ታ አሳ ምንꬅተ! ምንꬅተ! 2 የሩሳላመዉካ፥ እዛ ኦሞዱዋን ደኤዳ ዎዲ ፖለቴዳዋ፥ እዝ ናጋራይ አቶ ጌተቴዳዋ ኦድተ፤ እዝ ናጋራ ድራዉ፥ መꬍና ጎዳይ እዞ ላኡ ዳኩዋ ሙሬዳዋ ኦድተ” ያጌ።

3 እት ሀዋዳን ያግያ ኮሻ ስሰቴ፤ ማቶሳ 3:3፤ ማር. 1:3፤ ዮሃ. 1:23ሉቃሳ 3:4-6 “መላ ቢታን መꬍና ጎዳ ኦግያ ጊግስተ፤ ኑ ጾሳዉ መላ ጋድያን አኮ ኦግያ ስት ኦꬅተ። 4 ዎምባ ኡባይ ꬎቁ ጋና፤ ደሪ ኡባይነ የዉ ኡባይ ዝቂ ጋና። ባዬዳ ኦጊ ሳላላና፤ ኮርጱኮርጳ ቢታይካ ደምባታና። 5 ሄ ዎደ፥ መꬍና ጎዳ ቦንቹ ቆንጫና፤ አሹዋ ማዬዳ ኡባይ ሄዋ እትፐ በአና። አያዉ ጎፐ፥ መꬍና ጎዳ ዶናይ ሄዋ ሃሳዬዳ” ያጌ።

6 እት ኮሻይ፥ “ዋሳ!” ያግያዋ ስሳድ። ያቆባ 1:10-11፤ 1 ጰጽ. 1:24-25

ታን፥ “ዋጋደ ዋሶ?” ያጋድ።

“አሳይ ኡባይ ማታ ማላ፤ አ ቦንቹ ኡባይካ ደምባ ጪሻ ማላ። 7 መꬍና ጎዳይ ባረ ሸምፑዋ አ ቦላን ሸምፕያ ዎደ፥ ማታይ መሌ፤ ጪሻይካ ቆቆፈቴ። አሳይ ቱሙ ማታ ማላ። 8 ማታይ መሌ፤ ጪሻይካ ቆቆፈቴ፤ ሽን ኑ ጾሳ ቃላይ መꬍናዉ ኤቂደ ደኤ” ያጋ ዋሳ።

9 ኔኖ ምሽራቹዋ ኦድያ ጽዮኔ፥ ꬎቃ ደርያ ፑደ ከሳ፤ ነኖ ምሽራቹዋ ኦድያ የሩሳላመ፥ ነ ኮሻ ዎልቃፐ ꬎቁ ኦꬃ፤ ያዮፓ፤ ꬎቁ ኦꬃ፤ ያታደ ይሁዳ ካታማቶ፥ “ህንተ ጾሳይ ሀዌኮ” ያጋ ኦዳ። 10 በእተ፥ ኡባ ሞድያ መꬍና ጎዳይ ዎልቃና ዬ፤ ኢሳ. 62:11፤ ሳፃ 22:12 አ ቀሲ አዉ ሞዳና። በእተ፥ አ ዎይታይ አናና ደኤ፤ አ ኦሱዋ ጋቲካ አ ስንꬃና። 11 እ ባረ ዉድያ ሄንꬃንቻዳን ምዜ፤ ህዝ. 34:15፤ ዮሃ. 10:11 ባረ ዶርሳ ማራቱዋካ ባረ ቀስያን ሺሺደ፥ ባረ ክዉዋን እድማና። ꬋንꬅያዋንታካ ሎዳን ካለꬃና።

12 ሃꬃቱዋ ባረ ኩሽያ ኮጵያን ማኬዳዌ፥ ሳሎቱዋ ታካꬍያን ልኬዳዌ፥ ቢታ ባና ቁንኣን ማኬዳዌ፥ ቃይ ደረቱዋነ ዞዘቱዋካ ሚዛናን ልኬዳዌ ኦኔ? 13 መꬍና ጎዳ አያና አዛዜዳዌ፥ ዎይ አ ዞርያዋ ግዲደ ታማርሴዳዌ ኦኔ?ሮመ 11:34፤ 1 ቆሮ. 2:16 14 እ ባረዉ ቆንጫናዳን፥ መꬍና ጎዳይ ኦናና ዞረቴዴ? ዎይ አ ሱረ ፕርዳ ኦግያ ታማርሴዳዌ ኦኔ? ዎይ አ አꬌዳ ኤራተꬃ ታማርሴዳዌ ዎይ አ አኬካ ኦግያ በሴዳዌ ኦኔ?

15 በእተ፥ ካዉተꬃቱ ባሬታ ግዶን ደእያ እት ጾክያ ሃꬃ ማላ። ኡንቱንቱ ሚዛናን ደእያ ጉꬃ ባናዳን ፓይደቴድኖ። በእተ እ ዳጋቴዳ ሃꬃካ ሊቆ ባናዳን ማዛኔ። 16 ሊባኖሳ ምꬃይ አዉ ኤꬃናዉ ግደና፤ አን ደእያ ዶአቱካ ጹግያ ያርሾ ግድክኖ። 17 ካዉተꬃቱ ኡባይ አ ስንꬃን ባይናዋ ማላ፤ ኡንቱንቱ አ ስንꬃን ኡባ ባይናባፐካ ጉꬃዳን ፓይደቲኖ።

18 ያትና፥ ጾሳ ህንተ ኦናና ማላትሲቴ?ኪታ 17:29 ዎይ አይ ምስለቱዋና ልኪ ጼሊቴ? 19 ኤቃ ምስልያ ግዶፐ፥ ኩሽያ ሂላ ኤርያ አሳይ አ ማሴ፤ ሄዋ ቃይ ዎርቃ ትግያዌ ዎርቃን ሼሼ፤ ብራ ትግያዌካ አ ቦላ ብራ ሳንሳላታ መꬌ። 20 ሄዎ ሻሉ ባይና ህዬሳይ ያርሾ ዎቀና ምꬃ ዶሬ፤ ያቲደ፥ ሄ ምስሊ ቃጸናዳን ኤሳናዉ ኩሽያ ሂላ ኤርያ አሳ ኮዬ።

21 ኤርበይክቴ? ዎይ ስስበይክቴ? ሀዌ ህንተንቶ ኮይሮፐ ኦደትቤኔ? ዎይ ሳአይ መቶደፐ ሀዋ ህንተ አኬክበይክቴ? 22 እ ቢታ ዩሹዋፐ ቦላ ባጋን ባረ አራታን ኡቴ፤ ጋድያን ደእያዋንቱ አ ስንꬃን ቡምቡረꬃ ማላ። ሳሎቱዋ ጋርዱዋዳን ፕድ ኦꬅያዌ፥ ቃይ ደኢያሳ ኦꬂደ፥ ዱንካንያዳን ቶልያዌ፥ 23 ካፓቱዋ ባይናባዳን ኦꬅያዌ፥ ቢታ ካለꬅያዋንታካ ሀዳ ኦꬅያዌ አ። 24 ብሮ ኡንቱንቱ ቶከቶሳናነ ዘረቶሳና፥ ቃይ ጻጱዋካ ብሮ ጋድያን የዶሳና፥ ጾሳይ ኡንቱንቱ ቦላ ጫርኩዋ የድ አጌዳ፤ ኡንቱንቱካ መሌድኖ፤ ጎቲ ኡንቱንታ ሱላዳን አፌዳ።

25 ጌሻይ ኡንቱንታ፥ “ያትና፥ ታን አናና ልከታናዉ ታና ኦናና ማላትሲቴ?” ያጌ። 26 ህንተ አይፍያ ꬎቁ ኦꬂደ፥ ሳሉዋ ጼልተ፤ ሄ ጾልንተቱዋ መꬌዳዌ ኦኔ? እ ኡንቱንታ ኦላንቻዳን ካለꬄ፤ ኡንቱንቱ ፓይዱዋካ ኤሬ። እ ኡንቱንታ ኡባካ ኡንቱንቱ ሱንꬃን ሱንꬃን ጼሴ። አ አንጋ ግታተꬃፐነ አ ዎልቃ ምኖተꬃፐ ደንዴዳዋን፥ ኡንቱንቱፐ እቱነ ꬋየና።

27 ኔኖ ያቆባ፥ ነኖ እስራኤልያዉ፥ “ታ ኦጊ መꬍና ጎዳፐ ጌሜዳ፤ ጾሳይ ታ ፕርዳ ሸነኮ ጌዳ” ያጋ አያዉ አማሳላይ? ቃይ አያዉ ሀዋዳን ሃሳያይ? 28 ኤራበይኪ? ስሳበይኪ? መꬍና ጎዳይ መꬍና ጾሳ፤ እ ቢታ ኡባካ መꬌዳዋ። እ ዳቡረና፤ ዎይ ዎልቃይ አዉ ዉረና፤ ኦንነ አ ቆፋ ኤራናዉ ዳንዳየና። 29 ዳቡራንቻዉ ዎልቃ እሜ፤ ምኖተꬃይ ባይናዎካ ምኖተꬃ ጉጄ። 30 ሀራይ አቶ ያላጋ ናናይካ ዳቡሪኖ፤ ቃይ ዎልቃ ዉሪኖ። ዎዳላቱካ ኡባና ዳቡሪደ ኩንዲኖ። 31 ሽን መꬍና ጎዳ አማነቲደ ናግያዋንቱ፥ ባረንቱ ዎልቃ ኦራꬃና። ኡንቱንቱ አርጋንꬃቱዋዳን፥ ቀፍያን ፑደ ከሳና፤ ዎጺደ ዳቡርክኖ፤ ሀመቲደካ ዎልቃ ዉርክኖ።