1 ጾሳይ ሀዋዳን ያጌ፤ “ህንተኖ አባ ዶናን ደእያ ቢታቶ፥ ጮኡ ጊደ፥ ታን ኦድያዋ ስስተ! አሳይ ባረንቱ ምኖተꬃ ኦራጽስኖ፤ ኡንቱንቱ ሃ ሺቂደ ሃሳዪኖ። አነ ኑን ፕርደታናዉ እትፐ ሺቆይተ።

2 “ብያሳ ኡባን ጾንያ እቱዋ አዋይ ዶልያ ባጋፐ ደንꬄዳዌ ኦኔ? እ ካዉተꬃቱዋ አ ስንꬃን አꬂደ እሜ፤ ያትና፥ እ ካተቱዋ ገድያፐ ጋርሳና የꬌ። እ ኡንቱንታ ባረ ማሻን ባናዳን ኦꬄ፤ ቃይ ባረ ዎንዳፍያን ሱላዳን ኦꬄ። 3 እ ኡንቱንታ የደርሲደ፥ አ ገዲ ካሰ የꬍቤና ኦግያናካ ሳሮ አꬌ። 4 ሀዋ ኦꬄዳዌነ ፖሌዳዌ ቃይ የለታቱዋካ ኮይሮፐ ጼሴዳዌ ኦኔ? ታን መꬍና ጎዳይ፥ ኮይሩ፥ ዉርሰꬃዋንቱናካ ደእያዌ፥ ታን አ” ያጌ። 5 አባ ዶናን ደእያ ቢታቱ በኢደ ያዬድኖ፤ ሳኣ ጋጻቱካ ኮኮሬድኖ። ኡንቱንቱ እትፐ ሺቂደ፥ ታኮ ዬድኖ። 6 አሳ ኡባይ ባረ ሾሩዋ ሾሩዋ ማዴ፤ ቃይ ባረ እሻ፥ “ምና” ያጌ። 7 ኩሽያ ሂላንቻይ ዎርቃ ትግያዋ ምንꬄ፤ ማዶሻን ሌእስያዌ ባቻን ብራታ ሴርስያዋ፥ “ምና” ያጌ። እ ብራታ እትፐ ጋꬅያዋ፥ “ሀዌ ሎአ” ያጌ፤ ቃይ ሄ ኤቃይ ቃጸናዳን፥ ኡንቱንቱ ምስማርያን ꬎጊኖ።

8 ጾሳይ ሀዋዳን ያጌ፥ “ሽን ነኖ እስራኤልያዉ፥ ታ ቆማዉ፥ 2 ኦዱዋ 20:7፤ ያቆባ 2:23 ታን ዶሬዳ ያቆባ፥ ታ ዳቡዋ አብራሃማ ዛርያዉ፥ 9 ታን ኔና ቢታ ጋጻፐ አካደ፥ ቃይ ዉርሰꬃ ሃኮ ሳፐ ጼሳደ፥ ‘ኔን ታ ቆማ’ ያጌዳዎ፥ ታን ኔና ዶራድ፤ ቃይ ታን ኔና ኦልከ። 10 ታን ኔናና ደእያ ድራዉ ያዮፓ፤ ታን ነ ጾሳ ግድያ ድራዉ ዳጋሞፓ። ታን ኔና ምንሳና፤ ቃይ ታን ኔና ማዳና። ታን ኔና ታ ጾንያ ኡሸቻ ኩሽያን ዘምፕሳደ ኦይቃና።

11 “በአ፥ ኔና ሀንቀትያ ኡባይ ዬላቲደ ካዉሻና፤ ኔናና ኤቀትያዋንቱ ካሰካ ባይናዋዳን ሀኒደ ꬋያና። 12 ኔናና ዋላቀትያዋንታ ኔን ኮያና፤ ሽን ኔን ኡንቱንታ ደማካ። ኔናና ኦለትያዋንቱ ካሰካ ባይናባዳን፥ ሹፉሮ ግዲደ ꬋያና። 13 አያዉ ጎፐ፥ ታን መꬍና ጎዳይ፥ ነ ጾሳይ፥ ነ ኡሸቻ ኩሽያ ኦይቃና። ኔና፥ ‘ያዮፓ፥ ታን ኔና ማዳና። 14 ኔኖ ጉጹንያዉ፥ ያቆባ፥ ህንተኖ እስራኤልያ አሳዉ፥ ያዮፕተ፤ ታን ህንተና ማዳና። መꬍና ጎዳይ፥ ህንተና ዎዝያዌ፥ እስራኤልያ ጌሻ’ ያጋይ። 15 በአ፥ ታን ኔና ኦራꬃ፥ ቃራነ አቻና ደእያ፥ ቆጻናዉ ጎኤትያ ሚሻ ኦꬃድ። ኔን ደረቱዋ ቆጻደ ሊቅሳና፤ ዞዘቱዋካ ሱላዳን ኦꬃና። 16 ኔን ኡንቱንታ ፑናና፤ ጫርኩ ኡንቱንታ አፋና፤ ጎቲካ ኡንቱንታ ላላና። ሽን ኔን መꬍና ጎዳን ናሸታና፤ ቃይ እስራኤልያ ጌሻን ቦንቼታና።

17 “ህዬሳቱነ መቶታንቻቱ ሃꬃ ኮይና ኡንቱንቶ ꬋይያ ዎደ፥ ቃይ ኡንቱንቱ ኮኪካ ሳሙዋን መልያ ዎደ፥ ታን መꬍና ጎዳይ ኡንቱንታ ስሳና፤ ታን፥ እስራኤልያ ጾሳይ ኡንቱንታ አግከ። 18 ታን መላ ꬎቃ ሳአቱዋን ሻፋ፥ ቃይ ዎምባቱዋ ግዶንካ ፑልቱዋ ꬉሳና። መላ ቢታይ ሃꬃይ ኤልያሳ፥ ቃይ መላ ቢታካ ሃꬃይ ꬉቂያሳ ኦꬃና። 19 ባዙዋን ዝጋነ ጉጋንꬃ፥ ባርሴነትያነ ዛይትያ ዎጋራ ዶልሳና። ቃይካ ባዙዋን ጽድያ፥ ኦዶሩዋነ ዎጋራ እትፐ ዎꬃና ያጌ። 20 እስራኤልያ ጌሻይ ሄዋ መꬌዳዋ፥ ቃይ መꬍና ጎዳ ኩሺ ሄዋ ኦꬄዳዋ አሳይ በአናነ ኤራና ማላ፥ ቃይ ቆፓናነ እትፐካ አኬካና ማላ፥ ታን ሄዋ ኦꬃድ።

21 “መꬍና ጎዳይ፥ ‘አነ ህንተ ሞቱዋ ሃ አꬅተ’ ያጌ። ያቆባ ካቲ፥ ‘አነ ህንተ ጋሱዋካ ሃ አህተ’ ያጌ። 22 አነ ኡንቱንቱ ባረንቱ ምስለቱዋ ሃ አይና፥ አያይ ሀናናዉ ደእንቶ፥ ኡንቱንቱ ምስለቱ ኑዉ ኦድኖ። ኑን አኬካና ማላነ ኡንቱንቱ ዉርሰꬃካ ኤራና ማላ፥ ካሰ የዎቱ አየንቶ ኑዉ ኦድተ፤ ዎይ ቃይ ስንꬃፐ ትምቢትያ ኑዉ አዋይተ። 23 ህንተ ጾሳቱዋ ግድያዋ ኑን ኤራና ማላ፥ ስንꬃፐ ያናዉ ደእያዋ ኑዉ ኦድተ። ኑን ዳጋማና ማላነ ያያና ማላ፥ ሎኦ ግድና ኢታ ግድና፥ አነ እትባ ኦꬅተ። 24 በእተ፥ ህንተ ባይናዋ ማላ፤ ህንተ ኦሱካ ሀዳ። ህንተና ዶርያ አሳይካ ባረዉ ሸነይያዋ።

25 “ታን ሁጲሳ ባጋፐ እቱዋ ደንꬃድ፤ እ ዬዳ። ቃይ ታ ሱንꬃ ጼስያ እቱ አዋይ ዶልያ ባጋፐ ያና። ኡርቃ መꬍያዌ ኡርቃ የꬍያዋዳን፥ እ ካለꬅያዋንታ የꬋና።

26 “ሀዋ ኑን ኤራና ማላ፥ ኮይሮ ኑዉ አዋዬዳዌ ኦኔ? ዎይ ኑን፥ ‘እ ልከ’ ጋና ማላ፥ ካሰቲደ ኑዉ ኦዴዳዌ ኦኔ? ኦንነ ሀዋ ኦዴዳዌ ባዋ፤ ኦንነ ትምቢትያ ኦድቤና። ቃይ ህንተ ቃላካ ስሴዳዌ ባዋ። 27 ታን ሀዋ ካሰታደ ጽዮንዉ አዋያድ፤ ቃይ ታን የሩሳላመዉካ ምሽራቹዋ ኦድያዋ እማድ። 28 ሽን ታን ጼሌዳ ዎደ እቱነ ባዋ፤ ታን ዞርያ ኦችያ ዎደ፥ ኡንቱንቱ ምስለቱዋ ግዶን ዛሩዋ እምያ እቱነ ባዋ። 29 በእተ፥ ኡንቱንቱ ኡባይካ ሀዳ፤ ኡንቱንቱ ኦሱካ መላ፤ ሲልሲደ መꬌዳ ኡንቱንቱ ምስለቱ መላ ጫርኩዋ” ያጌ።