1 መꬍና ጎዳይ ሙሳ ሀዋዳን ያጌዳ፤ 2 “ታ ጌሻ ሱንꬃ ኡንቱንቱ ቱንሰና ማላ፥ እስራኤልያ አሳይ ታዉ ዱማዬዳ እሞታ አሮንነ አ አቱማ ናናይ ቦንቹዋን አኪደ፥ ጌሻተꬃን ናጋና ማላ፥ ኡንቱንቶ ኦዳ። ታን መꬍና ጎዳ።

3 “ኡንቱንቶ ሀዋዳን ያጋ፤ ‘ስንꬃና ይያ የለታ ኡባን ህንተ ዛርያፐ ኦንነ ቱን ኡቲደ፥ እስራኤልያ አሳይ መꬍና ጎዳዉ ዱማዬዳ ጌሻ ያርሹዋኮ ሺቆፐ፥ ሄ አሳይ ታ ስንꬃፐ ቦሄቶ። ታን መꬍና ጎዳ።

4 “ ‘አሮና ዛርያፐ ዎልቃማ ጋልባ ሀርጊ ደእያ፥ ዎይ ቦላፐ አያይኔካ ጎግያ ኦንነ ጌያና ጋካናዉ፥ ጌሻ ያርሹዋፐ ሞፖ። አሃ ቦቺደ ቱኔዳዋ ዎይ አ አቱማተꬃፐ ዘረꬃይ ጉኬዳ ኡራ ቦችያ ኦንነ ቱና። 5 ዎይ ቃይ ሳኣና ጎሸትያ፥ ቱንስያዋንታ፥ ዎይ አይ ማላ ቱናተꬃ ግዶፐነ ቱንስያ አሳ ቦችያ ኡራይ፥ 6 ዎይ ሄዋ ማላባ አያነ ቦችያ አሳይ፥ ኦማርስ ጋካናዉ እ ቱና፤ ባረ ቦላ ሃꬃን ሜጨተናን ደኢደ፥ ሄ ጌሻ ያርሹዋፐ እ ማናዉ ኮሸና። 7 አዋይ ዉልያ ዎደ እ ጌሻ ግዴ፤ ሄዋፐ ጉይያን፥ ሄ ጌሻ ያርሹዋፐ ባረና ጋክያዋ ሞ ጋሱካ ሄዌ አ ቁማ። 8 ባረዉ ሀይቄዳዋ ዎይ ዶአይ ዎꬌዳ መህያ አሹዋ ሞፖ፤ ሄዌ ቱንስያባ። ታን መꬍና ጎዳ።

9 “ ‘ቄሳቱ ታ ዎጋ፤ ናገናን እጾፐ፥ ኡንቱንቱ አ ቱንሲደ አ ናጋራን ሀይቃና። ኡንቱንታ ጌሽያዌ ታና መꬍና ጎዳ።

10 “ ‘ሄ ጌሻ ያርሹዋ ቄስያ ሶ አሳፐ አትና፥ ሀራ አሳይ ሞፖ፤ ቄስያ ሶ ዬዳ እማꬃ ግድና፥ ዎይ ቃጻረቲደ ኦꬅያ ቆማ ግድናካ ሞፖ። 11 ሽን ቄሲ ባረ ብራን ሻሜዳ አይልያ ዎይ አ ሶን የለቴዳ አይሊ ሄ ቁማፐ ሞ። 12 ቄስያ ግደና ሀራ አሳ ገሌዳ ቄስያ ናታ ሄ ጌሻ ያርሹዋፐ ሙፑ። 13 ሽን ቄስያ ናታ አስናይ ሀይቂና፥ ዎይ አስናይ የድና፥ ናኣ የለናን ካሰ ባረ ዎዶሮተꬃን ደእያዋዳን ስማደ ባረ አዉዋ ጎለ ዮፐ፥ አ ባረ አዉዋ ጋክያ ቁማፐ ሙ። ሽን ሀራ አሳይ ኦንነ ሄዋፐ ሞፖ።

14 “ ‘እት አሳይ ኤረናን ደኢደ ጌሻ ያርሹዋፐ ሞፐ፥ ሄ እ ሜዳ ቁማ ጋትያ ቦላ ጼቱዋፐ ላታሙ ኩሽያ ጉጂደ ቄስያዉ እሞ። 15 እስራኤልያ አሳይ መꬍና ጎዳዉ ያርሽያ ጌሻ ያርሹዋ ቄሳቱ ቱንሶፕኖ። 16 ኡንቱንቱ ባረንቱ አሄዳ ጌሻ ያርሹዋ ባረዉ ሚደ፥ ባረንቱ ናጋራን ኦሸታናዳን፥ ቄሳቱ ኦꬃናዉ ኮሸና። አያዉ ጎፐ፥ ኡንቱንታ ጌሽያዌ፥ ታን መꬍና ጎዳ ያጋ’ ” ያጌዳ።

17 መꬍና ጎዳይ ሙሳ ሀዋዳን ያጌዳ፥ 18 “አሮናዉ፥ አ ናናቶነ እስራኤልያ አሳ ኡባዉ ሀዋዳን ያጋደ ኦዳ፤ ‘እስራኤልያ አሳፐ ግድና ዎይ ኡንቱንቱ ግዶን ደእያ በትያፐ ኦንነ መꬍና ጎዳዉ ጹግያ ያርሹዋ ባረ ዶሱዋን ጮ እምያ ዎይ ባረ ሺቆዋ ጋꬃናዉ ያርሽያ ዎደ፥ 19 ሄ ያርሹ አከታና ማላ፥ ኮሩማፐ ዎይ ዶርሳፐ ዎይ ዴሻፐ ትላ ቦላና ደእያ አቱማዋ ግዶ። 20 ቦላይ ትላ ግደናዌ አያ ግዶፐነ አከተና ድራዉ፥ ሄዋ ሺሾፓ። ዛረ. 17:1

21 “ ‘ቃይ ኦና ግዶፐነ ባረ ሺቆዋ ጋꬃናዉ እትፐተꬃ ያርሹዋ ጾሳዉ ያርሽያ ዎደ፥ ዎይ ባረ መህያፐ ባረ ዶሱዋን ጮ እምያ እሞታ መꬍና ጎዳዉ ሺሽያ ዎደ፥ ሄዌ አከታና ማላ እ ትላ ቦላና ደእያዋ ግዶ። 22 ህንተ መህያፐ ቆቅያ፥ ዎይ መኡዋ፥ ዎይ ጉንዳ፥ ዎይ ጊይያ ማይꬃይ፥ ዎይ ፑሱ፥ ዎይ እላሁ ደእያዋ መꬍና ጎዳዉ ያርሾፕተ፤ ቃይ ታማን ጹግያ ያርሹዋ ኦꬂደካ ያርሽያ ሳኣ ቦላን መꬍና ጎዳዉ ሺሾፕተ። 23 አ ቦላን ፓጫ መታይ ዎይ ፓጫባይ ደእያ ኮሩማ ዎይ ዶርሳ እት አሳይ ባረ ዶሱዋን ጮ እምያ ያርሾ ሺሻናዉ ዳንዳዬ፤ ሽን ሺቁ ጋꬆ ግዶፐ፥ ሄዌ አከተና። 24 ሳንግሰቴዳዋ ዎይ ቆጸቴዳዋ ዎይ ካꬃይ ማይቴዳዋ ዎይ ቃንጸቴዳዋ መꬍና ጎዳዉ ያርሾፕተ። ህንተ ጋድያን ሄዋ ማላባ ኦꬆፕተ። 25 ህንተ ግዶን ደእያ አላጋ አሳቱዋፐ አኬዳ ሄዋ ማላ መህያካ ህንተ ጾሳዉ ቁማ ኦꬂደ ሺሾፕተ። ኡንቱንቱ ቦላይ ትላ ግደናዋ ጋሱዋን ኡንቱንቱን ፖኩ ደእያ ድራዉ፥ ኡንቱንቱ ህንተ ድራዉ አከትክኖ’ ያጋ” ያጌዳ።

26 ቃይካ መꬍና ጎዳይ ሙሳ ሀዋዳን ያጌዳ፥ 27 “ሚዛ ማራይ ዎይ ዶርሳ ማራይ ዎይ ዴሻ ማራይ የለትያ ዎደ፥ ላፑን ጋላሳ ባረ ዳይና ጋምኦ። ሆስፑንꬃ ጋላሳፐ ዶሚደ፥ መꬍና ጎዳዉ ታማን ጹጊደ ሺሽያ ያርሾ ኦꬂደ ሺሻናዉ ዳንዳየቴ። 28 ምያቶ፥ ዶርሳቶ፥ ዎይ ዴሻቶ እ ማራና እት ጋላስ ሹኮፕተ።

29 “ህንተ ጋላታ ያርሹዋ መꬍና ጎዳዉ ሺሽያ ዎደ፥ ህንተ ያርሹ አከታናዳን ያርሽተ። 30 ሄ ያርሹ ሄ ጋላስካ ሜተታናዉ ኮሼ፤ አፐ አያነ ዎንትዉ አሾፕተ። ታን መꬍና ጎዳ።

31 “ታ አዛዙዋ ናግተነ ኦꬅተ። ታን መꬍና ጎዳ። 32 ቃይ ታ ጌሻ ሱንꬃ ህንተ ቱንሶፕተ፤ እስራኤልያ አሳ ግዶን ታን ጌሻ ግድያዌ ኤረታናዉ በሴ። ህንተና ጌሽያዌ፥ ታን መꬍና ጎዳ። 33 ህንተዉ ጾሳ ግዳናዉ፥ ህንተና ግብጼ ጋድያፐ ከሴዳዌ ታና። ታን መꬍና ጎዳ” ያጌዳ።