1 መꬍና ጎዳይ ሙሳ ሀዋዳን ያጌዳ፤ 2 “እስራኤልያ አሳዉ ሀዋዳን ያጋደ ኦዳ፤ ‘ጌሻ ሺቁዋ ግ አዋዪደ፥ ህንተ ቦንቻናዉ በስያ ኬረቴዳ መꬍና ጎዳ ባላቱ ሀዋንታ።

3 “ ‘ህንተ ኡሱፑን ጋላሳ ኦሱዋ ኦꬂታ፤ ሽን ላፑንꬃ ጋላስ ህንተ ሸምፕያ ሳምባታ ጋላሳ፤ ሄ ጋላሳን ጌሻ ሺቁዋ ሺቅተ፤ አያ ኦሶነ ኦꬆፕተ፤ ህንተ ደእያ ሳኣን ኡባን ሄዌ መꬍና ጎዳዉ ሳምባታ። ከሳ 20:8-10፤ 23:12፤ 31:15፤ 34:21፤ 35:2፤ ዛረ. 5:12-14

4 “ ‘ኡንቱንቱ ዎድያን ዎድያን ጌሻ ሺቁዋ ኦꬅ አዋዪደ ህንተ ቦንቻናዉ በስያ መꬍና ጎዳ ባላቱ ሀዋንታ። 5 ኮይሮ አግናን ታማነ ኦይደንꬆ ጋላስ ሳአይ ኦማርስያ ዎደ፥ መꬍና ጎዳ ፓስጋይ ዶሜ። ከሳ 12:1-13፤ ዛረ. 16:1-2

6 “ ‘ቃይ ሄ አግናንካ ታማነ እቼሸንꬆ ጋላሳይ መꬍና ጎዳ ማጋገ ኡክꬃ ባላ ጋላሳ፤ ሄዋ ድራዉ ላፑን ጋላሳቱዋን እርሹ ገልቤና ኡክꬃ ሚተ። ከሳ 12:14-20፤ 23:15፤ 34:18፤ ዛረ. 16:3-8 7 ሄ ጋላሳቱዋፐ ኮይሮ ጋላሳን ጌሻ ሺቁዋ ሺቅተ፤ ዳቡርስያ ኦሱዋ አያነ ኦꬆፕተ። 8 ላፑን ጋላሳ ኡባ መꬍና ጎዳዉ ታማን ጹግያ ያርሹዋ ሺሽተ፤ ላፑንꬃ ጋላሳን ቃይ ጌሻ ሺቁዋ ሺቅተ፤ ዳቡርስያ ኦሱዋ አያነ ኦꬆፕተ’ ያጋ” ያጌዳ።

9 መꬍና ጎዳይ ሙሳ ሀዋዳን ያጌዳ፤ 10 “እስራኤልያ አሳዉ ሀዋዳን ያጋደ ኦዳ፤ ‘ታን ህንተንቶ እምያ ቢታ ገሊደ፥ ህንተ ካꬃ ጫክያ ዎደ፥ ሄ ካꬃዉ ኮይሮ አይፍያ ምርቂያ ቄስያኮ አክ ዪተ። 11 መꬍና ጎዳይ ህንተዋ አካና ማላ፥ ሳምባታ ዎንተꬃ ጋላስ ቄሲ ሄ ምርቂያ ጾሳ ስንꬃን ቃꬆ። 12 ሄ ህንተ ምርቂያ ቃꬄዳ ጋላስ ትላ ቦላና ደእያ እት ላይꬃ ዶርሳ ኦርግያ ጹግያ ያርሹዋ ኦꬂደ መꬍና ጎዳዉ ሺሽተ። 13 ሄ ያርሹዋና እትፐ ዎጋራ ዛይትያን ሙናቀቴዳ ላኡ ኪሎ ግራመ ሎኦ ꬊልያ ካꬃ ያርሹዋ ኦꬂደ ሺሽተ፤ ሄዌ መꬍና ጎዳዉ ታማን ጹግያ፥ ሳዉዋ ቶሹኩ ግያ ያርሹዋ ግዳናዋ፤ ሄዋናካ ቃይ እትፐ እት ሊትሮ ግድያ ዎይንያ ኤሳ ሺሽተ። 14 ሀ ያርሹዋ ህንተ ህንተ ጾሳዉ ሺሽያ ጋላሳይ ጋካናዉ፥ ኦራꬃ ጋኬዳ ካꬃፐ ኡክꬃ፥ ዎይ ጺጻ ግድና፥ ቃይያ ግድናካ ሞፕተ። ሀዌ ህንተ ደእያ ሳኣን ኡባን ስንꬃና ይያ የለታዉ ኡባዉ መꬍናዉ ዎጋ።

15 “ ‘ህንተ ቃꬅያ ያርሹዋ ምርቂያ አሄዳ ሳምባታ ዎንተꬃፐ ዶሚደ፥ ላፑን ሳምንታ ኩመንꬃ ፓይድተ። ከሳ 23:16፤ 34:22፤ ዛረ. 16:9-12 16 ላፑንꬃ ሳምባታ ዎንተꬃ ጋላሳይ ጋካናዉ፥ እሻታሙ ጋላሳ ፓይዲደ፥ ኦራꬃ ጋኬዳ ካꬃ ያርሹዋ መꬍና ጎዳዉ ሺሽተ። 17 ህንተ አቅያ ሳኣፐ ላኡ ኪሎ ግራመ ግድያ ሎኦ ꬊልያፐ እርሹዋ የጊደ ኡኬዳ ላኡ ኡክꬃ ቃꬃናዉ አክ ዪተ። ሄዌ ኮይሮ ጋኬዳ ካꬃ አይፍያፐ መꬍና ጎዳዉ ያርሹዋ ግዴ። 18 ሄ ኡክꬃና እትፐ ትላ ቦላና ደእያ እት ላይꬃ ግዴዳ ላፑን ዶርሳ ማራቱዋ፥ እት ኮሩማነ ላኡ ዶርሳ ኦርገቱዋ ሺሽተ። ካꬃ ያርሹዋናነ ኡሻ ያርሹዋና እትፐ መꬍና ጎዳዉ ታማን ጹግያ፥ ሳዉዋ ቶሹኩ ግያ ያርሹዋ ኦꬂደ ያርሽተ። 19 ቃይ እት ዴሻ ኦርግያ ናጋራ ያርሾ፥ እት ላይꬃ ግዴዳ ላኡ ዶርሳ ኦርገቱዋካ እትፐተꬃ ያርሾ ሺሽተ።

20 “ ‘ቄሲ ሄ ኮይሮ ጋኬዳ ካꬃ አይፍያ ኡክꬃነ ሄ ላኡ ዶርሳቱዋ ቃꬅያ ያርሹዋ ኦꬂደ፥ መꬍና ጎዳ ስንꬃን ቃꬄ፤ ሄዋንቱ መꬍና ጎዳዉ ጌሻ፤ ቃይ ቄስያዉካ ግሹዋ። 21 ሄ ጋላስካ አዋዪደ ጌሻ ሺቁዋ ሺቅተ፤ ዳቡርስያ ኦሶ አያነ ኦꬆፕተ። ሀዌ ህንተ ደእያ ሳን ኡባን ስንꬃና ይያ የለታዉ ኡባዉ መꬍናዉ ዎጋ።

22 “ ‘ህንተ ጋድያን ሞኬዳ ካꬃ ህንተ ጫክያ ዎደ፥ ህንተ ሾይቃ ጋጻ ጋካናዉ ጫኮፕተ፤ ጫክሽን አትያ ቃርምያካ ቆሮፕተ፤ ሄዋ ህዬሳቶነ በተቶ አግ ባሽተ። ታን፥ መꬍና ጎዳይ፥ ህንተ ጾሳ’ ያጋ” ያጌዳ። ዎጋ 19:9-10፤ ዛረ. 24:19-22

23 መꬍና ጎዳይ ሙሳ ሀዋዳን ያጌዳ፥ 24 “እስራኤልያ አሳዉ ሀዋዳን ያጋደ ኦዳ፤ ‘ላፑንꬃ አግናን ኮይሮ ጋላሳ ሸምፖ ጋላሳ ኦꬂደ ቦንችተ፤ ሀሳይሱዋ ማላካታይካ ፑነትያ ዎደ፥ ጌሻ ሺቁዋ ሺቅተ። 25 ሄ ጋላሳን መꬍና ጎዳዉ ታማን ጹግያ ያርሹዋ ሺሽተፐ አትና፥ ዳቡርስያ ኦሱዋ አያነ ኦꬆፕተ’ ያጋ” ያጌዳ።

26 መꬍና ጎዳይ ሙሳ ሀዋዳን ያጌዳ፥ ዎጋ 16:29-34 27 “ሀ ላፑንꬃ አግናዉ ታማንꬃ ጋላሳይ ናጋራ አቶ ጊስያ ጋላሳ፤ ሄ ጋላስ ጌሻ ሺቁዋ ሺቅተ፤ ቃይ ህንተ ሁጲያ ካዉሽተ፤ ያቲደ መꬍና ጎዳዉ ታማን ጹግያ ያርሹዋ ሺሽተ። 28 ሄ ጋላሳይ መꬍና ጎዳ ህንተ ጾሳ ስንꬃን ህንተ ናጋራይ አቶ ጌተታና ማላ፥ ህንተ ናጋራ አቶ ጊስያ ጋላሳ ግድያ ድራዉ፥ ሄ ጋላስ አይ ኦሱዋነ ኦꬆፕተ። 29 ሄ ጋላስ ባረናተꬃ ካዉሸና አሳይ ኦንነ ባረ አሳ ግዶፐ ቦሄቶ። 30 ሄ ጋላስ አያ ኦሱዋ ግዶፐነ ኦꬅያ አሳ ታን አ አሳ ግዶፐ ꬋይሳና። 31 ሄ ጋላስ አይ ኦሱዋነ ኦꬆፕተ። ሀዌ ህንተ ደእያ ሳን ኡባን ስንꬃና ይያ የለታዉ ኡባዉ መꬍናዉ ዎጋ። 32 ሄዌ ህንተ ዋና ሸምፑዋ ሸምፕያ ሳምባታ ጋላሳ። ሄ ጋላሳን ህንተ ሁጲያ ካዉሽተ። ሄ አግናን ኡዱፑንꬃ ጋላሳን ኦማርሳፐ ዶሚደ፥ ታማንꬃ ጋላሳ ኦማርሳይ ጋካናዉ፥ ህንተ ሳምባታ ቦንችተ” ያጌዳ።

33 መꬍና ጎዳይ ሙሳ ሀዋዳን ያጌዳ፥ ዛረ. 16:13-15 34 “እስራኤልያ አሳዉ ሀዋዳን ያጋደ ኦዳ፤ ‘ሀ ላፑንꬃ አግናን ታማነ እቼሸንꬆ ጋላሳፐ ዶሚደ፥ ላፑን ጋላሳይ መꬍና ጎዳዉ ዳስያ ባላ። 35 ሄ ጋላሳቱዋፐ ኮይሮ ጋላሳን ጌሻ ሺቁዋ ሺቅተ፤ ዳቡርስያ ኦሱዋ አያነ ኦꬆፕተ። 36 ላፑን ጋላሳን ኡባን መꬍና ጎዳዉ ታማን ጹግያ ያርሹዋ ሺሽተ፤ ሆስፑንꬃ ጋላሳን ቃይ ጌሻ ሺቁዋ ሺቅተ፤ መꬍና ጎዳዉ ታማን ያርሽያ ያርሹዋካ ሺሽተ። ሄ ጋላሳይ ህንተ ሺቁዋ ፖልያ ጋላሳ ግድያ ድራዉ፥ ዳቡርስያ ኦሱዋ አያነ ኦꬆፕተ።

37 “ ‘ታማን ጹግያ ያርሹዋነ ካꬃ ያርሹዋ፥ ቃይ ሀራ ያርሾቱዋ ኡባነ ኡሻ ያርሹዋ፥ ኮሽያዋ ኬና ኬሬዳ ጋላሳን መꬍና ጎዳዉ ሺሻናዉ፥ ህንተ ጌሻ ሺቁዋ ኦꬂደ አዋያና መꬍና ጎዳ ባላቱ ሀዋንታ። 38 ሀ ባላቱ መꬍና ጎዳ ሳምባታቱዋፐ፥ ህንተ እሞታ ኦꬂደ መꬍና ጎዳዉ እምያዋንቱፐ፥ ሺቁዋ ጋꬅያዋንቱፐነ ህንተ ህንተ ዶሱዋን ጮ እምያዉንቱፐ ዱማ።

39 “ ‘ላፑንꬃ አግናን ታማነ እቼሸንꬆ ጋላሳን ህንተ ጋድያን ሞኬዳዋ ጫኪደ ሺሼዳዋፐ ጉይያን፥ መꬍና ጎዳ ባላ ላፑን ጋላሳ ቦንችተ፤ ኮይሮ ጋላሳይነ ሆስፑንꬃ ጋላሳይ ህንተንቶ ዋና ሸምፖ ጋላሳ። 40 ኮይሮ ጋላሳን ሎኦ ምꬃ አይፍያፐ፥ ዛምባ ታሽያፐ፥ እርጻ ሀይꬃና ደእያ ምꬃ ታሽያፐነ ሻፋ ማታን ድጭያ ሌኦ ታሽያፐ አኪደ፥ መꬍና ጎዳ ህንተ ጾሳ ስንꬃን ናሸቲደ፥ ላፑን ጋላሳ ባላ ቦንችተ። 41 ሄ ባላ ላይꬃን ላይꬃን ላፑን ጋላሳ መꬍና ጎዳዉ ቦንችተ። ሄዌ ስንꬃና ይያ የለታዉ ኡባዉ መꬍናዉ ዎጋ። ህንተ ሄዋ ላፑንꬃ አግናን ቦንችተ። 42 ሄ ላፑን ጋላሳ ህንተ ዳስያን ደእተ፤ እስራኤልያ ቢታ አሳ ግድያ ኡባይ ዳስያን ደእተ። 43 ሄዌ ስንꬃና ይያ የለታይ ኡባይ እስራኤልያ አሳ ታን ግብጼፐ ከሴዳ ዎደ፥ ኡንቱንቱ ዳስያን ደአናዳን ኦꬄዳዋ ኤራናሳ። ታን መꬍና ጎዳ ህንተ ጾሳ’ ያጋ” ያጌዳ።

44 ሄዋዳን ኦꬂደ፥ ሙሴ መꬍና ጎዳ ባላቱዋ ቦንችያ ዎጋ እስራኤልያ አሳዉ ኦዴዳ።