1 መꬍና ጎዳይ ሙሳ ሀዋዳን ያጌዳ፥ 2 “ጾምፒ ቶኤናን ኤጺደ ደአና ማላ፥ አሳይ ኮሽያ ዛይትያ ዎጋራ ቴራ ጫዲደ ጉምእና ከስያ ጌሻ ነዉ አሀና ማላ፥ እስራኤላቱዋ አዛዛ። 3 መꬍና ጎዳ ዱንካንያ ግዶን ደእያ ማርካተꬃ ጋርዱዋፐ ካረ ባጋና፥ ኦማርሳፐ ዎንታ ጋካናዉ፥ አሮን መꬍና ጎዳ ስንꬃን ሄ ጾምፕያ ኡባ ዎደ ኤꬆ። ስንꬃና ይያ የለታዉ ኡባዉ ሄዌ መꬍናዉ ዎጋ። 4 ጾምፕያ ዎꬅያ፥ ዋላካይ ባይና ዎርቃ ባላ ቦላ ደእያ ጾምፐቱ መꬍና ጎዳ ስንꬃን ኡባ ዎደ ኤጻናዳን አሮን ናጎ።

5 “ላታማነ ኦይዱ ኪሎ ግራመ ግድያ ሊቆ ꬊልያ አካደ ታማነ ላኡ ኡክꬃ ኡካ። ከሳ 25:30 6 ሄ ኡክꬃቱዋ ኡሱፑናቱዋ እቱዋ እቱዋ ቦላ ኡሱፑናቱዋ እቱዋ እቱዋ ቦላን መꬍና ጎዳ ስንꬃን ደእያ ዋላካይ ባይና ዎርቃ ጻራጴዛ ቦላን ዎꬃ። 7 መꬍና ጎዳዉ ታማን ጹጋናዉ ሺሼዳ ቁማ ያርሹዋ ግድያዋ ኤርሳናዉ፥ ላኡ ማራቱዋ ማታን ማታን ጌሻ እጻና ሀሳይስያዋ ኦꬃደ ዎꬃ። 8 ሀ ኡክꬃ ሳምባታን ሳምባታን ኡባ ዎደ አሮን መꬍና ጎዳ ስንꬃን እስራኤልያ አሳ ድራዉ ዎꬆ። ሄዌ እስራኤልያ አሳይ ኡባ ዎደ ኦꬃናዉ ኮሽያ ቃላ ጫቁዋ። 9 ሄዌ አሮናዉነ አ አቱማ ናናቶ እመቶ፤ እ መꬍና ጎዳዉ ታማን ጹግያ ያርሹዋፐ ዎጋዳን አሮናነ አ ናናቱዋ ጋክያ ኡባፐ ጌሻ ግዴዳ ያርሹዋፐ እቱዋ ግድያ ጌሻ ያርሹዋ ግድያ ድራዉ፥ ኡንቱንቱ ሄዋ ጌሻ ሳኣን ሚኖ” ያጌዳ። ማቶሳ 12:4፤ ማር. 2:26፤ ሉቃሳ 6:4

10 አታ እስራኤልያ አሳ፥ አዉ ቃይ ግብጼ አሳ ግድያ እት ብታኒ ደኤ። እት ጋላስ እ ሀራ እስራኤልያ አሳ ግድያ እቱዋና ዱንካኔዳ ሳኣን ዋቴዳ። 11 ሀ አዉ አታ እስራኤልያ አሳ ግዴዳ ብታኒ ዋታ ግዶን ጾሳ ሱንꬃ ሸቄዳ። ያትና አ ሙሴኮ አሄድኖ። ሄ ብታንያ አታ ዳና ያራ ግድያ ጺብራ ናቶ። እ ሱንꬃይካ ሻሎሚቶ። 12 ሀ ብታንያ ዋታነንቶ መꬍና ጎዳ ሸኒ ኡንቱንቶ ቆንጫና ጋካናዉ፥ ኡንቱንቱ አ ቃሾ ጎልያን ዎꬄድኖ።

13 መꬍና ጎዳይ ሙሳ ሀዋዳን ያጌዳ፥ 14 “ሄ ሸቀዳ ብታንያ ዱንካኔዳ ሳኣፐ ጋጻ ከሳ፤ እ ሸቅሽን ስሴዳ አሳይ ኡባይ ባረንቱ ኩሽያ አ ሁጲያ ቦላን ዎꬅኖ፤ ያቶፐ እስራኤልያ አሳ ማባራይ ኡባይ አ ሹቻን ጫዲደ ዎꬎ። 15 እስራኤልያ አሳዉ ሀዋዳን ያጋደ ኦዳ፤ አይ አሳይነ ባረ ጾሳ ሸቆፐ፥ እ ባረ ናጋራን ኦሸቴ። 16 መꬍና ጎዳ ሱንꬃ ሸቂያ አሳይ ሀይቆ፤ እስራኤልያ አሳ ማባራይ ኡባይ አ ሹቻን ጫዶ። በቲደ ዬዳዋ ግድና ዎይ ቢታ አሳ ግድናካ መꬍና ጎዳ ሱንꬃ ሸቆፐ ሀይቆ።

17 “ ‘አሳ ዎꬍያ አሳይ ሀይቆ። ከሳ 21:12 18 አሳ መህያ ዎꬍያ አሳይ ኦንነ ባረ ዎꬌዳ መህያ ድራዉ ፓጻ መህያ ጭጎ። 19 እት አሳይ ባረ ሾሩዋ ቆሆፐ፥ እ ኦꬄዳዋዳን አ ቦላንካ ኦሰቶ። 20 መንꬆፐ መኦ፤ አይፍያ ድራዉ አይፍያ፤ አቻ ድራዉ አቻ። አሳ ቦላን ቆሁዋ ጋꬄዳ ኦንካ እ ጋꬄዳ ቆሁዋ ማላይ አ ቦላንካ ጋኮ። ከሳ 21:23-25፤ ዛረ. 19:21፤ ማቶሳ 5:38 21 መህያ ዎꬌዳ አሳይ መህያ ጭጎ፤ ሽን አሳ ዎꬌዳ አሳይ ሀይቆ። 22 በትያዉካ እስራኤልያ አሳዉ ህጊ እት ማላ ግዶ፤ አያዉ ጎፐ ታን መꬍና ጎዳ ህንተ ጾሳ’ ያጋ” ያጌዳ። ፓይ. 15:16

23 ሄዋ ኡባ ሙሴ እስራኤልያ አሳዉ ኡባዉ ኦዴዳ፤ ኡንቱንቱ ሄ ሸቀዳ ብታንያ ዱንካኔዳ ሳኣፐ ጋጻ ከሲደ፥ ሹቻን ጫዲደ ዎꬌድኖ። ያቲደ እስራኤልያ አሳይ መꬍና ጎዳይ ሙሳ አዛዜዳዋዳን ኦꬄድኖ።