1 ሲና ደርያ ቦላን መꬍና ጎዳይ ሙሴዉ ሀዋዳን ያጌዳ፤ ከሳ 23:10-11 2 “ኔን እስራኤልያ አሳዉ ሀዋዳን ያጋደ ኦዳ፤ ‘ታን ህንተንቶ እምያ ቢታ ህንተ ገልያ ዎደ፥ ቢታይካ መꬍና ጎዳ ሳምባታ ቦንቾ። 3 ኡሱፑን ላይꬃ ኩመንꬃ ህንተ ሾይቃን ዘርተ፤ ቃይ ኡሱፑን ላይꬃ ኩመንꬃካ ህንተ ዎይንያ ቱራ ጼራ ጹንቂተ፤ አ አይፍያካ ማጽ አክተ። 4 ሽን ላፑንꬃ ላይꬃይ ቢታዉ ሸምፖ ሳምባታ፤ ሄዌ መꬍና ጎዳዉካ ሳምባታ። ሄ ላፑንꬃ ላይꬃን ህንተ ሾይቃን ዘሮፕተ፤ ህንተ ዎይንያ ጼራካ ጹንቆፕተ። 5 ህንተ ጋድያን አዛባ ግዲደ ሞክያዋካ ጫኮፕተ፤ ቃይ ጹንቀናን ደእሽን ጮ አይፌዳ ዎይንያካ ሺሾፕተ። ሄ ላይꬃይ ቢታዉ ኡባና ሸምፖ ላይꬃ ግዶ። 6-7 ሄ ሳምባታ ላይꬃን ቢታይ ኦሰታና ꬋዮፐ ህንተንቶ፥ ህንተ ማጫነ አቱማ ቆማቶ፥ ህንተንቶ ከራ ኦꬅያዋንቶ፥ በቲደ ዪደ ህንተናና ደእያዋንቶ፥ ህንተ መህያዉነ ህንተ ጋድያን ደእያ ዶአቶ ግድያ ቁማ እማና፤ ቢታይ ሞክያባይ ኡባይ ሜተቶ።

8 “ ‘ላይꬃቱዋ ግዶን ደእያ ላፑን ሳምባታቱዋ ፓይዳ፤ ላፑን ሳምባታቱዋ ላይꬃ ፓይዱ ላፑ ገደ ላፑና፤ ሄዌካ ኦይታማነ ኡዱፑን ላይꬃ። 9 ሄዋፐ ጉይያን፥ ላፑንꬃ አግናን፥ ታማንꬃ ጋላሳን ቦንቼትያ ናጋራ አቶ ጊስያ ጋላሳን ማላካታ ፑንያ አሳ ህንተ ጋድያን ኡባን ኪትተ። 10 እሻታማንꬆ ላይꬃ ዱማዪደ፥ ሄ ጋድያን ደእያ ኡባዉ ላአተꬃ አዋይተ። ሄዌ ህንተንቶ እሻታማንꬆ ላይꬃ ባላ። ሄ ዎድያን ህንተ ኡባይካ ህንተ ጋድያዉነ ህንተ ያራዉ ያራዉ ስምተ። 11 ሄ ላይꬃይ ህንተንቶ እሻታማንꬆ ላይꬃ ባላ። ሄ ላይꬃን ዘሮፕተ፤ አዛባ ግዲደ ሞኬዳዋካ ጫኮፕተ፤ ቃይ ህንተ አ ጼራ ጹንቀናን አይፌዳ ዎይንያ አይፍያካ ሺሾፕተ። 12 ሄዌ እሻታማንꬆ ላይꬃ ባላ ግድያ ድራዉ፥ እ ህንተንቶ ጌሻ፤ ጎሸናን ጮ ደምባን ሞኬዳዋ ሚተ።

13 “ ‘ሀ እሻታማንꬆ ላይꬃ ባላ ዎደ አሳይ ኡባይ ባረ ጋድያ ስሞ።

14 “ ‘ህንተ ህንተ ሾሩዋፐ ጋድያ ሻሞፐ፥ ዎይ ቃይ አዉ ዛልኦፐ፥ እቱ እቱዋ ጭሞፕተ። 15 ህንተ እሻታማንꬆ ላይꬃ ባላፐ ጉይያን ደእያ ላይꬃቱዋ ፓይዱዋዳን ህንተ ሾሩዋፐ ሻምተ፤ ህንተ ሾሩካ ቃይ ጋዲ ካꬃ ሞካናዉ ደእያ ላይꬃቱዋ ፓይዱዋዳን ዛልኦ። 16 ላይꬃቱዋ ፓይዱ ዳሮ ግዶፐ፥ ጋቲ ዳሬ፤ ላይꬃቱዋ ፓይዱ ጉጾፐ፥ ጋቲካ ጉጼ። አያዉ ጎፐ፥ ህንተ ጫካና ካꬃ ጫካ ፓይዱዋዳን ህንተ ሾሩ ህንተንቶ ዛልኤ። 17 ህንተ እቱ እቱዋ ጭሞፕተ፤ ሽን ህንተ ህንተ ጾሳዉ ያይተ። ታን መꬍና ጎዳይ፥ ህንተ ጾሳ።

18 “ ‘ታ አዛዙዋ ኦꬅተ፤ ታ ህግያካ ናግተነ ኦꬅተ፤ ያቶፐ ህንተ ሀ ጋድያን ሳሮተꬃን ደአና። 19 ቢታይ ባረ አይፍያ ህንተንቶ እማና፤ ህንተ ካላና ጋካናዉ ማና፤ ቃይ ሄ ቢታንካ ህንተ ሳሮተꬃን ደአና። 20 ህንተ፥ “ኑን ዘራና ꬋዮፐ፥ ቃይ ካꬃካ ጫኪደ ሺሻና ꬋዮፐ፥ ላፑንꬃ ላይꬃን አያ ማኔ?” ጎፐ፥ 21 ታን ኡሱፑንꬃ ላይꬃን ታ አንጁዋ ህንተ ቦላን ኪታና፤ ያቶፐ ቢታይ ሄዙ ላይꬃዉ ግድያ አይፍያ አይፋና። 22 ሆስፑንꬃ ላይꬃን ህንተ ህንተ ጋድያን ዘርያ ዎደካ፥ ካሰ ሻቻ ካꬃ ማና፤ ቃይ ህንተ ዘርያ ካꬃ አይፍያ ኡዱፑንꬃ ላይꬃን ሺሻና ጋካናዉካ፥ ሻቻ ካꬃ ማና።

23 “ ‘ቢታይ ታዋ ግድያ ድራዉነ ህንተካ ሀ ጋድያን እማꬃነ በተ ግዲደ ደእያ ድራዉ፥ ቢታ ላኤንꬆ ስመናዳን ባይዞፕተ። 24 ህንተ ኦይቄዳ ጋድያን ኡባን ደእያ ጋድያ ጎዳቱ ዎዛና ማላ፥ ኡንቱንቱ ማታ ናጋናዉ ኮሼ።

25 “ ‘ነ እሻይ ህዬሲደ ባረ ጋድያፐ ዛልኦፐ፥ አዉ ማታትያ ዳቡ ዪደ፥ ሄ ጋድያ አዉ ዎዞ። 26 አዉ ሄ ጋድያ ዎዝያ ዳቡ ꬋዮፐ፥ ቃይ እካ ስም ዱረቲደ ዎዝያ ሚሻ ደሞፐ፥ 27 ባረ ዛልኤዳ ዎድያፐ ዶሚደ ደእያ ላይꬃ ፓይዲደ፥ አቴዳ ላይꬃ ሚሻ ሻሜዳዎ ዛሮ፤ ያቲደ እ ባረ ጋድያዉ ስሞ። 28 ሽን አዉ ሄ ጋድያ ዎዛናዉ ግድያ ሻሉ ꬋዮፐ፥ እሻታማንꬆ ላይꬃ ባላይ ጋካናዉ ጋዲ ሻሜዳ ብታንያ ኩሽያን ጋምኦ፤ እሻታማንꬆ ላይꬃ ባላ ዎደ፥ አ ጋዲ አዉ ስሞ፤ እካ ባረ ጋድያዉ ስሞ።

29 “ ‘ግምበት ኡቴዳ ካታማ ግዶን እት አሳይ ደእያ ጎልያ ሀራ ኡራዉ ዛልኦፐ፥ እ ዛልኦሳፐ ቢደ እት ላይꬃ ጋካናዉ ደእያ ዎድያን ዛሪደ ዎዛናዉ አዉ ማታይ ደኤ። 30 እት ላይꬃ ኩመንꬃ ግዶን ዎዛና ꬋዮፐ፥ ሄ ግምበቴዳ ካታማ ግዶን ደእያ ጎሊ ሻሜዳዎ ናኣ ናአዉ መꬍናዉ አዋ ግዴ። እሻታማንꬆ ላይꬃ ባላ ዎደካ ስመና። 31 ሽን ግምበትቤና ሄራቱዋን ደእያ ጎለቱ ሾይቃ ማላ። ኡንቱንቱ ዎዘቲኖ፤ እሻታማንꬆ ላይꬃ ባላ ዎደካ ዛልኤዳዎ ስሚኖ።

32 “ ‘ግዶፐነ ሌዋቱዋ ካታማቱዋን ደእያ ባረንቱ ጎልያ ሌዋቱ ባረንቱ ኮዬዳ ዎድያን ዎዝ አካናዉ ዳንዳዪኖ። 33 ሌዋቱዋፐ እት አሳይ ኡንቱንቱ ካታማ ግዶን ደእያ ጎልያ ዛልኢደ ዎዛና ꬋዮፐ፥ ሄ ኡንቱንቱ ካታማ ግዶን ደእያ ጎሊ እሻታማንꬆ ላይꬃ ባላ ዎደ ስሜ። አያዉ ጎፐ፥ ሌዋቱዋ ካታማ ግዶን ደእያ ጎለቱ እስራኤልያ አሳ ግዶን ሌዋቶ አቆ። 34 ሽን ኡንቱንቱ ካታማ ዩሹዋን ኡንቱንቱ ኡባዉ እትፐ ደእያ ቢታይ ኡንቱንቶ መꬍናዉ አቆ ግድያ ድራዉ ዛልኤተና።

35 “ ‘ቃይ ነ እሻይ ህዬሲደ ባረና ዳንዳያና ꬋዮፐ፥ እማꬃዳንነ በትያዳን እ ኔናና ደአና ማላ፥ ኔን አ ማዳ። ዛረ. 15:7-8 36 ነ እሻ ኔናና ዎꬃናዉ አፐ ድቻ አኮፓ፤ ዎይ ዎꬍያ ሞፓ። ሽን ኔን ነ ጾሳዉ ያያ። 37 ነ ብራ አዉ ድቻዉ ታልኦፓ፤ ነ ቁማካ አዉ ዎꬍያን ዛልኦፓ። ከሳ 22:25፤ ዛረ. 23:19-20 38 ህንተዉ ካናነ ቢታ እማናዉነ ህንተ ጾሳ ግዳናዉ፥ ህንተና ግብጼ ጋድያፐ ከሴዳዌ፥ ታን መꬍና ጎዳይ፥ ህንተ ጾሳ።

39 “ ‘ነዉ ዳቦ ግድያ እስራኤልያ አሳይ ማንቂደ፥ ባረና ነዉ አይለተꬃዉ ዛልኦፐ፥ ኔን አ አይልያዳን ኦስሶፓ። ከሳ 21:2-6፤ ዛረ. 15:12-18 40 እ ከራ ኦꬅያ አሳዳንነ በትያዳን ኔናና ደኦ፤ እሻታማንꬆ ላይꬃ ባላይ ጋካናዉ እ ነዉ ኦꬆ። 41 ሄ ዎደ እ ባረ ናናቱዋናካ እትፐ ነ ጎለፐ ከሲደ ባረ ጎልያ አሳኮ ቦ፤ ባረ አዉዋ ጋድያኮካ ስሞ። 42 እስራኤላቱ ታን ግብጼ ጋድያፐ ከሴዳ ታ አይለቱዋ ግድያ ድራዉ፥ ኡንቱንቱ አይለተꬃዉ ዛልኤቶፕኖ። 43 ኔን ኡንቱንቶ መቀꬃ ኢታደ ሞዶፓ፤ ሽን ኔን ነ ጾሳዉ ያያ።

44 “ ‘ነዉ አቱማነ ማጫ አይለቱ ደአና ማላ ኮዮፐ፥ ነ ዩሹዋን ደእያ ካዉተꬃቱዋፐ ሻማ። 45 ቃይ ህንተ ጋድያን ደእያ በተቱዋፐነ ህንተ ጋድያን ደእሽን የለቴዳ ኡንቱንቱ ሶ አሳፐ ሻማናዉ ዳንዳዪታ፤ ኡንቱንቱ ህንተንቶ አቆ ግድኖ። 46 ህንተፐ ጉይያን ህንተ ናናይ ኡንቱንታ መꬍናዉ ላታና ማላ፥ ህንተ ናናዉ እምተ። ህንተ ኡንቱንቱፐ ኡባ ዎደካ አይልያ ሻማናዉ ዳንዳዪታ፤ ሽን ህንተ እሻ ግድያ እስራኤልያ አሳ መቀꬃ ኢሲደ ሞዶፕተ።

47 “ ‘ነ ማታን ደእያ እማꬃ ዎይ በተ አሳይ ዱረትና፥ ቃይ አ ማታን ደእያ ነ እሻይ ማንቂደ፥ ሄ ነ ማታን ደእያ እማꬃዉ ዎይ በትያዉ ዎይ እማꬃ ብታንያ ዛርያፐ እቶ ባረና ዛልኦፐ፥ 48 እ ዛልኤት ስምና አ ዎዛናዉ ዳንዳየቴ፤ አ እሻቱዋፐ እቱ አ ዎዞ። 49 ዎይ አ አዉዋ እሻይ፥ ዎይ አ አዉዋ እሻ ናአይ አ ዎዞ፤ ዎይ አ ያራፐ አዉ ማታ ዳቦ ግድያ አሳይ አ ዎዞ፤ ዎይ ቃይ እ ባረ ሁጲያዉ ዱረቶፐ እ ባረና ዎዞ። 50 እ ባረና ሻሜዳ ብታንያና እትፐ ግዲደ፥ እ ባረና ዛልኤዳ ላይꬃፐ ዶሚደ እሻታማንꬆ ላይꬃ ባላይ ጋካናዉ ደእያ ላይꬃ ፓይዶ፤ አ ብልያ ጋቲ ሄ ላይꬃ ፓይዱዋ ኬሻ ግዶ። እ ባረና ሻሜዳዋና ጋምኤዳ ዎድያ ጋቲ እት አሳይ ከራ ኦꬂደ ደምያ ሚሻ ኬሻ ግዶ። 51 እሻታማንꬆ ላይꬃ ባላይ ጋካናዉ ብሮ ዳሮ ላይꬃይ አቴዳዋ ግዶፐ፥ ባረ ዛልኤቴዳ ጋትያፐ ሄ ላይꬃ ፓይዱዋን ባረና ዎዝያ ጋትያ ጭጎ። 52 ቃይ እሻታማንꬆ ላይꬃ ባላይ ጋካናዉ አቴዳ ላይꬃይ ጉꬃ ግዶፐ፥ ባረና ሻሜዳዋና እትፐ ፓይዲደ፥ ሄ ላይꬃ ፓይዱዋን ባረና ዎዝያ ጋትያ ጭጎ። 53 እ ላይꬃን ላይꬃን ከራ ኦꬅያ አሳዳን ባረና ሻሜዳዋና ደኦፐ አትና፥ ህንተ ጼሊደ እስራኤልያ አሳ ግድያ ብታንያ መቀꬃ ኢሲደ ሞዶፕተ።

54 “ ‘ሽን እ ሄዋ ማላ ኦግያን ዎዘታና ꬋዮፐ፥ እሻታማንꬆ ላይꬃ ባላይ ጋክያ ዎደ እነ አ ናናይ ቆማተꬃፐ ከስኖ። 55 አያዉ ጎፐ፥ እስራኤልያ አሳይ ታ ቆማቱዋቴ፤ ታን ግብጼ ጋድያፐ ከሴዳ ታ ቆማቱዋ። ታን፥ መꬍና ጎዳይ፥ ህንተ ጾሳ’ ያጋ” ያጌዳ።