1 መꬍና ጎዳይ ሀዋዳን ያጌ፤ “ህንተ ኡንቱንቶ ጎይናናዉ ኤቃቱዋ መꬎፕተ፤ ቃይ ሀዉልትያ፥ ማሰቴዳ ምስልያ ዎይ ማሰቴዳ ሹቻ ኤሶፕተ። ታን፥ መꬍና ጎዳይ፥ ህንተ ጾሳ። 2 ታ ሳምባታቱዋ ናግተ፤ ታ ዱንካንያ ቦንችተ፤ ታን መꬍና ጎዳ።

3 “ህንተ ታ ህግያን ቦፐ፥ ታ አዛዞቱዋካ ናጎፐነ ኦꬆፐ፥ዛረ. 11:13-15፤ 28:1-14 4 ታን ህንተንቶ እራ ዎድያን ቡክሳና፤ ቢታይካ ካꬃ ዳርሲደ ሞካና፤ ደምባ ምꬃቱካ አይፍያ አይፋና። 5 ህንተ ካꬃ ቡክያ ዎድያፐ ቢደ ዎይንያ አይፍያ ማጽያ ዎዲ ጋካናዉ ካꬃ ቆጻና፤ ቃይ ዎይንያ አይፍያ ማጹካ ቢደ ካꬃ ዘርያ ዎዲ ጋካናዉ ዉረና። ህንተ ካላና ጋካናዉ ቁማ ማና፤ ቃይ ህንተ ህንተ ቢታንካ ሳሩዋን ደአና።

6 “ታን ቢታዉ ሳሮተꬃ እማና፤ ኦንነ ያሽሰናን ህንተ ግሳና። ኢታ ዶአቱዋ ታን ጋድያፐ ꬋይሳና፤ ህንተ ጋድያን ላኤንꬆ ኦላይ ደንደና። 7 ህንተ ሞርከቱዋ ህንተ የደርሳና፤ ህንተ ስንꬃን ኡንቱንቱ ማሻን ሀይቃና። 8 ህንተፐ እቼሹ ጼቱዋ የደርሳና፤ ቃይ ጼቱ ታሙ ሻኣ የደርሳና። ህንተ ሞርከቱ ህንተ ስንꬃን ማሻን ሀይቃና።

9 “ታን ታ ዴሙዋ ህንተኮ ዛራና፤ ህንተና አይፍሳና፤ ህንተና ዳርሳና። ቃይ ታን ታ ጫቁዋ ህንተናና ምንሳና። 10 ህንተ ሻቻ ካꬃ ማና፤ ቃይ ሀ ላይꬃ ካꬃ ዎꬃናዉ፥ ሻቻ ካꬃ ድጊደ ሳኣ ከሳና። 11 ታን ታ ደእያ ሳኣ ህንተ ግዶን ኦꬃና፤ ታን ህንተና ሻትከ። 12 ታን ህንተ ግዱዋን ሀመታና፤ ቃይ ህንተ ጾሳ ግዳና፤ ህንተካ ታ አሳ ግዳንታ። 2 ቆሮ. 6:16 13 ህንተ ግብጼቶ አይልያ ግደናዳን፥ ግብጼ ጋድያፐ ህንተና ከሴዳዌ ታን መꬍና ጎዳይ ህንተ ጾሳ። ታን ህንተ አይለተꬃ ሞርገ ምꬃ መንꬃድ፤ ቃይ ህንተካ ꬎቁ ጊደ ሄመታናዳን ኦꬃድ።

14 “ሽን ህንተ ታን ግያዋ ስሰናን እጾፐነ፥ ሀ አዛዞቱዋ ኡባካ ኦናን እጾፐ፥ 15 ታ ዎጋ ህንተ ካꬎኦፐ፥ ቃይ ታ አዛዞቱዋ ኡባ ኦናን እጺደ ታ ጫቁዋ መንꬃናዉ ህንተ ታ ህግያ ሻቶፐ፥ 16 ሄ ዎደ ታን ህንተ ቦላ ሀዋ ኦꬃና: ህንተ አኬከናን ደእሽን ያሻ፥ ግልቃተꬃ፥ ህንተ አይፍያ ጆልስያነ ህንተና ሎይꬅ ሀርግስያ ምሹዋ ህንተ ቦላ አሀና። ህንተ ዘረꬃ ዘራና፤ ሽን እ ሀዳ፤ አያዉ ጎፐ፥ ሄዋ ህንተ ሞርከቱ ማና። 17 ታን ታ ሶምኡዋ ህንተ ቦላ ቱካና፤ ህንተ ሞርከቱዋ ስንꬃን ህንተ ኩንዳና፤ ህንተና እጺያዋንቱ ህንተና ሞዳና፤ ቃይ ኦንነ የደርሰናን ህንተ ባቃታና።

18 “ሀዋ ኡባ ኦꬅናካ ህንተ ታና ስሰናን እጾፐ፥ ታን ህንተ ናጋራ ድራዉ ህንተ ሙራ ላፑን ዳኩዋ ጉጃና። 19 ህንተ ዎልቃ ኦቶሩዋ ታን መንꬃና፤ ሳሉዋ ብራታ ማላ ኦꬃና፤ ህንተ ቢታካ ናሃስያ ግያ ብራታ ማላ ኦꬃና። 20 ህንተ ዎልቃይ ሀዳሳን ዉራና፤ አያዉ ጎፐ፥ ህንተ ቢታይ ካꬃ ሞከና፤ ጋድያን ደእያ ምꬃቱካ አይፍያ አይፍክኖ።

21 “ህንተ ታዉ እጼዶ ጎፐነ ታን ግያዋካ ስሰናን እጾፐ፥ ህንተ ናጋራ ኬሻ ላፑን ዳኩዋ ቦሻ ታን ህንተ ቦላን አሀና። 22 ታን ህንተ ቦላ ባዙዋ ዶአቱዋ የዳና፤ ኡንቱንቱ ህንተ ናናቱዋ ቦንቃና፤ ህንተ መሄቱዋ ꬋይሳና፤ ህንተ ፓይዱዋካ ጉꬃና፤ ሄዋ ጋሱዋን ህንተ ሀመትያ ኦጊ ባዙዋ ግዳናዋ።

23 “ሀ ኡባ ሙራንካ ህንተ ታኮ ስመናን እጻድ ጊደ ቦፐ፥ 24 ሄ ዎደ ታንካ ህንተንቶ እጻድ ጋና፤ ቃይ ህንተ ናጋራ ድራዉ ታን ታ ሁጲያዉ ህንተና ላፑን ዳኩዋ ሙራና። 25 ታ ጫቁዋ መንꬄዳ ሀሉዋ ከስያ ማሻ ታን ህንተ ቦላ አሀና፤ ህንተ ህንተ ካታማቱዋን ሺቆፐካ፥ ታን ህንተ ቦላን ኢታ ሀርግያ የዳና። ቃይ ህንተካ ህንተ ሞርከቱዋ ኩሽያን አꬊደ እመታና። 26 ህንተ ካꬃ ታን ꬋይስያ ዎደ፥ ታሙ ማጫ አሳቱ እት ባሽያን ኡክꬃ ኡካና፤ ሄዋካ ሚዛናን ልኪደ ሻካና፤ ህንተ ሄዋ ማና፥ ሽን ካልክታ።

27 “ሀ ኡባንካ ህንተ ታን ግያዋ ስሰናን እጻድ ጊደ ቦፐ፥ 28 ሄ ዎደ ታንካ ህንተ ቦላ ሀንቁዋን ደንዳና፤ ህንተ ናጋራ ድራዉ ታን ታ ሁጲያዉ ህንተና ላፑን ዳኩዋ ሙራን። 29 ህንተ ህንተ አቱማ ናናቱዋነ ህንተ ማጫ ናናቱዋ አሹዋ ማና። 30 ህንተ ጎይንያ ꬎቃ ሳኣ ታን ኮላና፤ ህንተ እጻና ያርሽያ ሳኣካ ꬋይሳና። ታን ህንተ አሃ ህንተ ኤቃቱዋ አሃ ቦላን ኦላና፤ ታን ህንተና ሙለ ሻታና። 31 ታን ህንተ ካታማቱዋ መላ ኦꬃና፤ ህንተ ጎይንያ ሳአቱዋካ ኮለሬꬃና፤ ህንተ ሳዊያ ያርሹዋካ ስንግከ።

32 “ታን ህንተ ቢታ ꬋይሳና፤ ያቶፐ ሄ ህንተ ጋድያን ዪደ ኡትያ ሞርከቱካ ሄዋን ማላለታና። 33 ታን ህንተና ካዉተꬃቱዋ ግዶን ላላና፤ ህንተ ቦላንካ ታ ማሻ ሾዳና። ህንተ ቢታይ ባያና፤ ህንተ ካታማቱካ መላ ግዳና። 34 ሄ ህንተ ህንተ ሞርከቱዋ ጋድያን ደእያ ዎደ፥ ባዪደ ጮ ደእያ ህንተ ቢታይ ባረ ሳምባታቱዋ ቦንቺደ ናሸታና። ሄ ዎደ ህንተ ቢታይ ሸምፓናነ ባረ ሳምባታቱዋ ቦንቺደ ናሸታና። 35 ህንተ ሄ ጋድያን ደኤዳ ዎድያን ኡባን ህንተ ሳምባታቱዋን ደምቤና ሸምፑዋ ሀእ ባዪደ ጮ ደእያ ዎድያን ደማና።

36 “ህንተ ህንተ ሞርከቱዋ ጋድያን ደእያ ዎደ፥ ህንተፐ ሻከቲደ ጉየ አቲደ ደእያዋንቱ ዎዛናን ታን ያሻ የዳና፤ ጫርኩ ቃꬅያ ቦንጭያ ኮሻይ ኡንቱንታ ሻቢራና፤ ኡንቱንቱ ማሻፐ ባቃትያዋዳን ባቃታና፤ ቃይ ኡንቱንቱ ኦንነ የደርሰናን ኩንዳና። 37 ህንተና የደርስያዌ ባይናን ደእሽን፥ ህንተ ኦላፐ ባቃትያዋዳን እቱ እቱዋና ꬉበታና፤ ቃይ ህንተ ህንተ ሞርከቱዋ ስንꬃን ኤቃናዉካ ህንተንቶ አያ ዎልቂነ ደኤና። 38 ህንተ ካዉተꬃቱዋ ግዶን ባያና፤ ህንተ ሞርከቱዋ ቢታይካ ህንተና ምታና። 39 ህንተፐ ሻከቲደ ህንተ ሞርከቱዋ ጋድያን አቴዳዋንቱ ባረንቱ ናጋራ ጋሱዋንነ ባረንቱ አዎቱዋ ናጋራ ጋሱዋን ግልቃና።

40 “ሽን ኡንቱንቱ ታን ኡንቱንቶ እጼዳ ጋናዳንነ ኡንቱንቱ ሞርከቱዋ ቢታዉ ኡንቱንታ የዳናዳን ኦꬄዳ ባረንቱ ናጋራ፥ ባረንቱ ማይዛ አዎቱዋ ናጋራ፥ ኡንቱንቱ ታና ጭሜዳ ጭሙዋነ ኡንቱንቱ ታዉ እጻድ ጌዳዋ ፓጾፐ፥ 41 ሄዋን ቃይ ኡንቱንቱ አዛዘተና ዎዛናይካ ዝቂ ጎፐነ ኡንቱንቱ ባረንቱ ናጋራ ሙራ አኮፐ፥ 42 ሄ ዎደ ታን ያቆባና ጫቀቴዳ ታ ጫቁዋ ሀሳያና፤ ቃይ ይሳቃናነ አብራሃመና ጫቀቴዳ ታ ጫቁዋ ሀሳያና፤ ቢታካ ሀሳያና። ዶመꬃ 17:7-8፤ 26:3-4፤ 28:13-14 43 ኡንቱንቱ ꬋይ ድግና፥ ኡንቱንቱ ቢታይ መላ አታና፤ ሄ ኡንቱንቱ ꬋይና ባይያዋ ግዲደ ጮ ደእያ ዎድያን ቢታይ ባረ ሳምባታቱዋ ቦንቺደ ናሸታና። ኡንቱንቱ ታ አዛዙዋ ካꬌዳ ድራዉነ ኡንቱንቱ ሸምፑካ ታ ዎጋ ሻቴዳ ድራዉ፥ ኡንቱንቱ ባረንቱ ናጋራ ሙራ አካና።

44 “ግዶፐነ ኡንቱንቱ ባረንቱ ሞርከቱዋ ጋድያን ደእያ ዎደ፥ ኡንቱንቱ ኡባና ꬋያና ጋካናዉነ ኡንቱንቱና ደእያ ታ ጫቁዋካ መንꬃና ጋካናዉ፥ ታን ኡንቱንታ ኦልከ፤ ቃይ ሻትከ። ታን፥ መꬍና ጎዳይ፥ ኡንቱንቱ ጾሳ። 45 ታን ኡንቱንቱ ጾሳ ግዳናዉ፥ ካዉተꬃቱ ጼልሽን፥ ግብጼ ጋድያፐ ከሴዳ ኡንቱንቱ ማይዛ አዎቱዋና ታን ጫቀቴዳ ጫቁዋ ኡንቱንቱ ድራዉ ሀሳያና። ታን መꬍና ጎዳ።

46 “መꬍና ጎዳይ ሲና ደርያ ቦላን ሙሴ ባጋና ባረፐነ እስራኤልያ አሳፐ ግዱዋን ዎꬄዳ ዎጋቱ፥ አዛዞቱነ ህገቱ ሀዋንታ” ያጌዳ።