1 መꬍና ጎዳይ ሙሳ ሀዋዳን ያጌዳ፤ 2 “እስራኤልያ አሳዉ ሀዋዳን ያጋደ ኦዳ፤ ‘እት አሳይ መꬍና ጎዳዉ እማናዉ ሺቆፐ፥ ኔን ቆፕያዋዳን ሄ አሳ ድራዉ ሚሻ ጭጎ። 3 ሄዌነ ላታሙ ላይꬃፐ ቢደ ኡሱፑን ታሙ ላይꬃ ጋካናዉ ደእያ አቱማዎ ኡሱፑን ጼቱ ግራምያ ዴጽያ ጻጋራ ብራ ጭጎ። 4 ማጫ አሳ ግዶፐ ቃይ ሀታሙ ጻጋራ ብራ ጭጎ። 5 ቃይ እቼሹ ላይꬃፐ ቢደ ላታሙ ላይꬃ ጋካናዉ ደእያ አቱማዎ ላታሙ ጻጋራ ብራነ ማጫንዉ ታሙ ጻጋራ ብራ ጭጎ። 6 ቃይካ እት አግናፐ ቢደ እቼሹ ላይꬃ ጋካናዉ ደእያ አቱማዎ እቼሹ ጻጋራ ብራነ ማጫንዉ ሄዙ ጻጋራ ብራ ጭጎ። 7 ሄዋዳንካ ቃይ ኡሱፑን ታሙ ላይꬃነ ሄዋፐ ቦላና ደእያ አቱማዎ ታማነ እቼሹ ጻጋራ ብራነ ማጫንዉ ታሙ ጻጋራ ብራ ጭጎ። 8 ቃይ ሺቄዳ ብታኒ ኔን ቆፕዳዋ ጭጋናዉ ዳንዳየና ዳሮ ማንቆ ግዶፐ፥ እ ባረ ሺቁዋ ጋꬃናዉ እሜዳ አሳ አሂደ ቄስያ ስንꬃን ኤሶፐ ሺቄዳ ብታኒ ጭጋናዉ ዳንዳይያዋ ኬና ቆፒደ ቄሲ ጋማቶ።

9 “ ‘እ ሺቀቴዳዌ አሳይ መꬍና ጎዳዉ ያርሽያ ሳኣ ማላ መህያ ያርሻናዉ ግዶፐ፥ ሄዋ ማላ አሳይ መꬍና ጎዳዉ እምያ መሂ ኡባይ ጌሻ። 10 እ ሄ መህያ ድራዉ ሀራ መህያ እሞፖ፤ ዎይ አ ሀራ መህያና ላሞፖ። ሎኡዋ ኢታና ዎይ ቃይ ኢታካ ሎኡዋና ላሞፖ፤ ሽን እ ላሞፐ፥ ኮይሮ መህያነ ላምያ እሜዳ መሂ ላኡካ ጌሻ። 11 እ ሺቀቴዳ መሂ መꬍና ጎዳዉ ያርሹዋ ኦꬂደ ሺሻናዉ ጌሻ ግደና መህያ ግዶፐ፥ ሄ ብታኒ ሄ መህያ ቄስያ ስንꬃ አሆ። 12 ሎኦ ግድና ኢታ ግድና፥ ቄሲ ሄ መህያ ጋማቶ፤ ያቶፐ ቄሲ ጋማቴዳዌ አ ጋትያ ግዶ። 13 ሽን ሄ መህያ ጎዳይ አ ዛሪደ ዎዛናዉ ኮዮፐ፥ ሄ መህያ ጋትያ ቦላ ጼቱዋፐ ላታሙ ኩሽያ ጉጆ።

14 “ ‘እት አሳይ ባረ ጎልያ ጌሻ ግዳናዳን መꬍና ጎዳዉ ዱማዮፐ፥ ሎኦ ግድና ኢታ ግድና፥ ቄሲ ሄ ጎልያ ጋማቶ። ያቶፐ ቄሲ ጋማቴዳዋዳን አ ጋቲ ሄዋዳንካ ግዶ። 15 ቃይ ባረ ጎልያ ጾሳዉ ጌሻ ኦꬅ ዱማዬዳ አሳይ ዛረꬂደ ዎዛናዉ ኮዮፐ፥ ሄ ጎልያ ጋትያ ቦላን ጼቱዋፐ ላታሙ ኩሽያ ጉጆ፤ ያቶፐ ጎሊ አሳ ግዴ።

16 “ ‘እት አሳይ ባረ ላታ ጋድያፐ ሻኪደ ጌሻ ኦꬅ መꬍና ጎዳዉ ዱማዮፐ፥ ሄ ጋድያ ጋቲ አን ዘርያ ዘረꬃን ቆፈቶ። ሄዌነ ላታሙ ኪሎ ግራመ ባንጋ ዘርያ ኬሻ ሾይቃ ግዶፐ፥ ታሙ ጻጋራ ብራ ጭጎ። 17 እ ባረ ጋድያ እሻታማንꬆ ላይꬃ ባላፐ ዶሚደ ጌሻ ኦꬅ ጾሳዉ ዱማዮፐ፥ ሄ ጋድያዉ ኩመንꬃ ጋትያ ጭጎ። 18 ሽን እ ባረ ጋድያ እሻታማንꬆ ላይꬃ ባላይ አꬍ ስምና ጌሻ ኦꬅ ጾሳዉ ዱማዮፐ፥ ካሊደ ደእያ እሻታማንꬆ ላይꬃ ባላይ ጋካናዉ ደእያ ዎድያ ቄሲ ፓይዶ፤ ያቶፐ አ ኩመንꬃ ጋትያፐ ዎꬌ። 19 ሄ ጋድያ ጌሻ ኦꬅ ጾሳዉ ዱማዬዳ አሳይ ዛረꬅ ዎዛናዉ ኮዮፐ፥ እ ጋማተቴዳ ሚሻ ቦላ ጼቱዋፐ ላታሙ ኩሽያ ጉጆ፤ ያቶፐ ጋዲ ስሚደ አዋ ግዴ። 20 ሽን እ ጋድያ ዛረꬂደ፥ ዎዛናፐ ካሰቲደ ሀራ አሳዉ ዛልኦፐ፥ ሄ ጋድያ ዎዛናዉ ዳንዳየና። 21 እሻታማንꬆ ላይꬃ ባላይ ጋክና ጋዲ የደቲያ ዎደ፥ ሄ ጋዲ ላኤንꬆ ጉየ አካናዋዳን መꬍና ጎዳዉ ጌሻ ግዴ። ሄ ግሹ ቄስያሳ።

22 “ ‘እት አሳይ ሀራ አሳፐ ሻሜዳ ጋድያ ጌሻ ኦꬅ መꬍና ጎዳዉ ዱማያናዉ ኮዮፐ፥ 23 ካልያ እሻታማንꬆ ላይꬃ ባላይ ጋካናዉ ደእያ ጋትያ ቄሲ ጋማቶ፤ ብታኒ ሄ ጋላስካ ሄ ግምትያ ጭጎ፤ ሄ ሚሻይ መꬍና ጎዳዉ ዱማቴዳ ሚሻ ግዳናዋ። 24 እሻታማንꬆ ላይꬃ ባላይ ጋክያ ዎደ፥ ሄ ጋዲ ኮይሮ ላታን አኪደ ዛልኤዳ ብታንያዉ ስሜ።

25 “ ‘አ ጋቲ ጾሳ ዱንካንያን ኤረቲያ ሚዛናን ጋማተቴ።

26 “ ‘ሽን ኦንነ ባይራ የለቴዳ መህያ መꬍና ጎዳዉ ዱማዪደ ሺሻናዉ ዳንዳየና፤ አያዉ ጎፐ፥ እ ካሰካ መꬍና ጎዳሳ። ሚዛ ማራ ግድና ዎይ ዶርሳ ማራ ግድናካ እ መꬍና ጎዳዋ። 27 ሄ መሂ ጌሻ ግዳና ꬋዮፐ፥ ነ ጋማቴዳ ጋትያ ቦላ ጼቱዋፐ ላታሙ ኩሽያ ጉጂደ አ ጎዳይ ዛረꬂደ ዎዞ። እ ዎዛና ꬋዮፐ፥ ነ ጋማቴዳ ጋትያን ሀራ አሳዉ ዛልኤቴዳ።

28 “ ‘እት አሳይ ባረዋፐ መꬍና ጎዳዉ እሜዳዌ አያ ግዶፐካ፥ አሳ ግድና መህያ ግድና፥ ዎይ አ ላታን ጋኬዳ ጋደ ግድናካ፥ ዛልኤተናነ ዎዘተና። ዱማዬዳዌ ኡባባይ መꬍና ጎዳዉ ጌሻ ኡባፐ እቱዋ ግዴዳ ጌሻ ያርሹዋ። ፓይ. 18:14 29 አሳ ግዶፐ ሻከቲደ ꬋያናዳን እመቴዳ አሳይ ዎዘቶፖ፤ ሄ አሳይ ሀይቆ።

30 “ ‘ቢታ አስራታይ ኡባይ ጋድያፐ ሞኬዳ ካꬃ ግድና ዎይ ምꬃ አይፍያ ግድናካ መꬍና ጎዳሳ። ሄዌ መꬍና ጎዳዉ ጌሻ። ፓይ. 18:21፤ ዛረ. 14:22-29 31 እት አሳይ ባረ አስራታ ዎዛናዉ ኮዮፐ፥ አ ጋትያ ቦላን ጼቱዋፐ ላታሙ ኩሽያ ጉጆ። 32 ሚዛ አስራታ ግድና፥ ዶርሳ አስራታ ግድና፥ ዎይ ዴሻ አስራታ ግድናካ፥ ሄንꬃንቻ ጋትማፐ ጋርሳና አꬍያ ሀቃዌነ ታሙንꬅ መꬍና ጎዳዉ ጌሻ። 33 ታሙንꬃ መህያ ኢታ ግድና ሎኦ ግድናካ ዶሮፖ፤ ዎይ አ ሀራና ላሞፖ። ላሞፐነ ኮይሮዌነ ላምያ እሜዳዌነ ላኡካ ጾሳዉ ጌሻ ግዲኖፐ አትና፥ ዛሪደ ዎዛናዉ ዳንዳየና’ ያጋ” ያጌዳ።

34 ሲና ደርያ ቦላን መꬍና ጎዳይ ሙሴ ባጋና እስራኤልያ አሳ አዛዜዳ አዛዞቱ ሀዋንታ።