ፓይዱዋ ማጻፋ
ገሉዋ
ፓይዱዋ ጌተቴዳ ሀ ማጻፋይ፥ እስራኤልያ አሳ ያራቱዋ ሙሴ ፓይዴዳዋ በስያ ድራሳ። ሲና ደርያፐ ደንዴዳ ዎድያፐ ዶሚደ፥ ጾሳይ ኡንቱንቶ እማና ጌዳ፥ ህዶታ ቢታዉ አዋይ ዉልያ ባጋ ዛዋ ጋካና ጋካናዉ፥ ኦይታሙ ላይꬃ ኡንቱንቱ ደኤዳ ታርክያ ኦዴ። ማጻፋ ሱንꬃይ፥ ግዶን ደእያ ታርከቱዋፐ ዳርያ ክፍልያ በሰ። ሄዌነ እስራኤልያ አሳይ ሲና ደርያፐ ደንዲደ ባናፐ ካሰቲደ፥ ቃይ እት የለታፐ ስምና ዮርዳኖሳ ሻፋፐ አዋይ ዶልያ ባጋና ሞኣበን፥ ሙሴ አሳ ፓይዴዳ ፓይዱዋባ በሰ። ላኡ ፓይዳቱዋፐ ግዱዋን ደእያ ዎደቱዋን እስራኤልያ አሳይ ካናነዉ ገድሳ ባጋ ዛዋ ግድያ ቃዴሳ-ባርነ ጋክ ኡቴዳ። ግዶፐነ ኡንቱንቱ ሄዋና ህዶታ ቢታ ገላናዉ ዳንዳይበይክኖ። ሄዋ ድራዉ፥ ኡንቱንቱ ሄዋ ሄራን ዳሮ ላይꬃ አꬂደ፥ ጉየፐ ዮርዳኖሳ ሻፋፐ አዋይ ዶልያ ባጋና ደእያ ቢታ ቤድኖ። ኡንቱንቱፐ ባጋይ ያን ደአናዉ ቆፋ ቃችና፥ አቴዳ አሳይ ዮርዳኖሳ ፕኒደ፥ ካናነ ባናዉ ባረና ጊግሴዳ።
ፓይዱዋባይ ዳሮ መቱ ጋክያ ዎደ ያይያነ ህዶታ ቃንጽያ አሳቱ ታርክያ፥ ጾሳ ቦላነ ኡንቱንታ ካለꬃና ማላ ጾሳይ ኡንቱንቶ ዶሬዳ ሙሴ ቦላ ማካሊደ ደንዴዳ አሳቱ ታርክያ ኦይቄዳዋ። አሳይ ዳቡራንቻነ ꬍባ ግዶፐነ ጾሳይ ኡንቱንቶ አማነትያዋ ግዲደ፥ ኡንቱንታ ካቦዪደ ዎꬄዳዋ ታርኪ ኦዴ። ሄዋዳንካ ሙሴ እት እቶደን ገንጫ ꬋዮፐ፥ አዉ ምኖ አማኑ ደእያዌ ጾሳዉነ አሳዉ አማነቲደ ኦꬄዳ አሳ እ ግድያዌ ቤቴዳ።
ሸምፓቱዋ ኡባቶ እመቴዳ ቃንꬃ ቆፋቱዋ
እስራኤላቱ ሲና ደርያፐ ባናዉ ጊጉሳ 1:1—9:23
ሀ. ኮይሮ አሳ ፓይዱዋ 1:1—4:49
ለ. ዱማ ዱማ ህግያነ ዎጋ 5:1—8:26
ሐ. ላኤንꬆ ፓስጋ 9:1-23
ሲና ደርያፐ ሞኣበ ቡሳ 10:1—21:35
ሞኣበን ኦሰቴዳ ሀኖታቱዋ 22:1—32:42
ግብጼፐ ሞኣባ ጋካናዉ ደእያ ሀመሳይ ቃንꬃን 33:1-49
ዮርዳኖሳ ፕናናፐ ካሰት እመቴዳ አዛዙዋ 33:50—36:13
እስራኤላቱ ሲና ደርያፐ ባናዉ ጊጉሳ
1
(1:1—9:23)
ኮይሮ እስራኤልያ አሳ ፓይዱዋባ
(1:1—4:49)
1 ሲና መላ ቢታ፥ መꬍና ጎዳ ዱንካንያ ግዶን፥ እስራኤልያ አሳይ ግብጼ ጋድያፐ ከሴዳ ላኤንꬆ ላይꬃን፥ ላኤንꬆ አግናን፥ ሄ አግናዉ ኮይሮ ጋላሳን፥ መꬍና ጎዳይ ሙሳ ሀዋዳን ያጌዳ፤ ፓይ. 26:1-51 2 “እስራኤልያ አሳ ኡባ ኡንቱንቱ ያራን ያራንነ ጎልያን ጎልያን ፓይዳደ፥ አቱማ አሳ ኡንቱንቱ ሱንꬃን ሱንꬃን ጻፋ። 3 ኔንነ አሮን የለቶደፐ ላታሙ ላይꬃነ ሄዋፐ ቦላና ደእያ እስራኤላቱዋ፥ ኦላ ባናዉ ዳንዳይያዋንታ ኡባቱዋ፥ ኡንቱንቱ ጭታን ጭታን ፓይድተ። 4 ዛርያፐ ዛርያፐ እት እት አሳይ ባረ ጎልያ አሳዉ ካፑዋ ግዲደ፥ ህንተና ማዶ። 5 ህንተና ማዳና አሳቱ ሱንꬃይ ሀዋፐ ካሊደ ደእያዋ:
ዛርያ ጎልያ አሳ ካፑዋ
ሮቤላ ሻደኡራ ናኣ ኤሊጹራ፥
6 ስሞና ጹሪሻዳያ ናኣ ሻሉምኤላ፥
7 ይሁዳ አምናዳባ ናኣ ናአሶና፥
8 ይሳኮራ ጹኣራ ናኣ ናታንኤላ፥
9 ዛብሎና ሄሎና ናኣ ኤልኣባ፥
10 ዮሴፎ ናናፐ ኤፍሬማ አምሁዳ ናኣ ኤልሻማአ፥
ምናሰ ፓዳጹራ ናኣ ጋማልኤላ፥
11 ቢንያማ ጊድኦና ናኣ አብዳና፥
12 ዳና አምሻዳያ ናኣ አህኤዘራ፥
13 አሴራ ኦክራና ናኣ ፓግኤላ፥
14 ጋዳ ዳኡኤላ ናኣ ኤልያሳፋ፥
15 ንፍታሌማ ኤናና ናኣ አህራአ፤
16 ሀ አሳቱ ባረንቱ አዎቱዋ ጎልያ አሳቱዋፐ ካለꬃናዉ፥ ዶረቴዳዋንታ፤ ኡንቱንቱ እስራኤልያ ያራቶ ካፓቱዋ” ያጌዳ።
17 ሙሴነ አሮን ሱንꬃይ ጼሰቴዳ ሀ አሳቱዋ አፌድኖ። 18 ላኤንꬃ አግናን ኮይሮ ጋላስ ኩመንꬃ ማባራ ጼሲደ፥ እትፐ ሺሼድኖ። አሳይ ባረ ያራን ያራንነ ባረ ጎልያን ጎልያን ኦዲደ፥ የለቶደፐ ላታሙ ላይꬃነ ሄዋፐ ቦላና ደእያ አቱማ አሳቱዋ ኡባ ሱንꬃይ ኡባና ጻፈቴዳ። 19 መꬍና ጎዳይ አ አዛዜዳዋዳን፥ ሙሴ ኡንቱንታ ሲና መላ ቢታን ፓይዴዳ።
20-21 ኦላዉ ባናዉ ዳንዳይያ አቱማ አሳቱ ኡባይ፥ ላታሙ ላይꬃነ ሄዋፐ ቦላና ደእያዋንቱ ፓይደቲደ፥ ሁጲያን ሁጲያን ጻፈቴድኖ። ኡንቱንቱ ባረንቱ ያራን ያራንነ ባረንቱ ጎልያን ጎልያን ሻከቲደ፥ ሀዋፐ ካሊደ ደእያ ፓይዱዋን ማዝጎበቴድኖ።
ዛርያ ኦላንቻቱዋ ፓይዱዋ፤
ሮቤላ (እስራኤልያ ናኣ ባይራ) 46,500
22-23 ስሞና 59,300፤
24-25 ጋዳ 45,650፤
26-27 ይሁዳ 74,600፤
28-29 ይሳኮራ 54,400፤
30-31 ዛብሎና 57,400፤
32-33 ዮሴፎ ናኣ ኤፍሬማ 40,500፤
34-35 ዮሴፎ ናኣ ምናሳ 32,200፤
36-37 ቢንያማ 35,400፤
38-39 ዳና 62,700፤
40-41 አሴራ 41,500፤
42-43 ንፍታሌማ 53,400፤
44 ሙሴ፥ አሮንነ ታማነ ላኡ እስራኤልያ ዛራቱ ካፓቱ ፓይዴዳ አሳይ ሀዋ። 45 ኦላዉ ባናዉ ዳንዳይያ አቱማ አሳቱ ኡባይ ላታሙ ላይꬃነ ሄዋፐ ቦላና ደእያዋንቱ ባረንቱ አዉዋ ጎልያን ጎልያን ፓይደቴድኖ። 46 ሄዋንቱ ኡባና 603,550.
47 ሽን ሌዊያ ዛራቱ ሀ ፓይደቴዳ አሳና ፓይደትበይክኖ። 48 አያዉ ጎፐ፥ መꬍና ጎዳይ ሙሳ ሀዋዳን ያጌዳ፤ 49 “ሌዊያ ዛራቱዋ ፓይዶፓ፤ ኡንቱንታ አቴዳ እስራኤላቱዋ ፓይዱዋን የጎፓ። 50 ሌዋቱዋ ጾሳ ዱንካንያ ቦላንነ አ ግዶን ደእያ ሚሻቱዋ ኡባ ቦላን ካፑዋ ኦꬃደ ሱንꬃ። ኡንቱንቱ ሄ ዱንካንያነ አ ግዶን ደእያ ሚሻቱዋ ቶክኖ፤ ኡንቱንቱ አ ግዶን ኦꬅኖነ አ ዩሹዋን ዱንካንኖ። 51 ጾሳ ዱንካኒ ሾደትያ ዎደ ሌዋቱ ሾድኖ፤ ጾሳ ዱንካኒ ኤቂያ ዎደካ ሌዋቱ ኤስኖ። ኡንቱንቱፐ ሀራይ ኦንነ አኮ ሺቆፐ፥ ሀይቆ። 52 እስራኤልያ አሳቱ ኡባይ ባረንቱ አርማን አርማንነ ባረንቱ ጭታን ጭታን ሻከቲደ፥ ባረንቱ ዱንካንያ ዱንካንኖ። 53 ሽን ጾሳ ሀንቁ እስራኤልያ ማባራ ቦላ ዎና ማላ፥ ሌዋቱ ጾሳ ማርካተꬃ ዱንካንያ ዩሹዋን ባረንቱ ዱንካንያ ዱንካንኖ፤ ሌዋቱ ጾሳ ዱንካንያን አዎትኖ” ያጌዳ።
54 እስራኤላቱ ሀዋ ኡባ መꬍና ጎዳይ ሙሳ አዛዜዳዋዳን ኦꬄድኖ።