2
እት እት ሻኩ ዱንካናና ሳኣ በስያዋ
1 መꬍና ጎዳይ ሙሳነ አሮና ሀዋዳን ያጌዳ፤ 2 “እስራኤልያ አሳይ ባረንቱ ባጋ ባጋ ኤርስያ አርማነ ባረንቱ ያራ ያራ ኤርስያ ባንድራ ካሊደ፥ ጾሳ ዱንካንያፐ ጉꬃ ሃኪደ፥ አ ዩሹዋን ዱንካንኖ።
3-4 “አዋይ ዶልያ ባጋና ይሁዳ ባጋይ ባረንቱ አርማ ካሊደ ዱንካንኖ። ኡንቱንቱ ዛራቱዋ ሱንꬃይ፥ ዛራቱዋ ካፓቱዋ ሱንꬃይነ ኦላንቻቱዋ ፓይዱ ሀዋፐ ካሌ:
ይሁዳ አምናዳባ ናኣ ናአሶና 74,600፤
5-6 ይሳኮራ ጹኣራ ናኣ ናታንኤላ 54,400፤
7-8 ዛብሎና ሄሎና ናኣ ኤልኣባ 57,400፤
9 ይሁዳ ባጋፐ ፓይደቴዳ ኦላንቻቱ ኡባና 186,400. ሀራ ሳኣ ብያ ዎደ ኡንቱንቱ ኮይሮ ከስያዋንታ።
10-11 “ቃይ ዱገሃ ባጋና ሮቤላ ባጋይ ባረንቱ አርማ ካሊደ ዱንካንኖ። ኡንቱንቱ ዛራቱ ሱንꬃይ፥ ዛራቱዋ ካፓቱዋ ሱንꬃይነ ኦላንቻቱዋ ፓይዱ ሀዋፐ ካሌ:
ሮቤላ ሻደኡራ ናኣ ኤሊጹራ 46,500፤
12-13 ስሞና ጹሪሻዳያ ናኣ ሻሉምኤላ 59,300፤
14-15 ጋዳ ረኡኤላ ናኣ ኤልያሳፋ 45,650።
16 ሮቤላ ባጋፐ ፓይደቴዳ ኦላንቻቱ ኡባና 151,450 ሀራ ሳኣ ብያ ዎደ ኡንቱንቱ ላኤንꬆ ከስያዋንታ።
17 “ሄዋፐ ጉይያን፥ ጾሳ ዱንካኒነ ሌዊያ ዛራቱ ኮይሮ ከሲደ ላኡ ባጋፐነ ጉየፐ ከስያ ላኡ ባጋፐ ግዱዋን ከስኖ፤ ያቲደ ባረንቱ ዱንካኔዳ ማራን ማራንነ ባረንቱ ባንድራ ባንድራ ካሊደ ከስኖ።
18-19 “ቃይ አዋይ ዉልያ ባጋና ኤፍሬማ ባጋይ ባረንቱ አርማ ካሊደ ዱንካንኖ። ኡንቱንቱ ዛራቱዋ ሱንꬃይ፥ ዛራቱዋ ካፓቱዋ ሱንꬃይነ ኦላንቻቱዋ ፓይዱ ሀዋፐ ካሌ:
ኤፍሬማ አምሁዳ ናኣ ኤልሻማአ 40,500፤
20-21 ምናሳ ፓዳጹራ ናኣ ጋማልኤላ 32,200፤
22-23 ቢንያማ ጊድኦና ናኣ አብዳና 35,400፤
24 ኤፍሬማ ባጋፐ ፓይደቴዳ ኦላንቻቱ ኡባና 108,100። ሀራ ሳኣ ብያ ዎደ፥ ኡንቱንቱ ሄዘንꬆ ከስያዋንታ።
25-26 “ቃይካ ሁጲሳ ባጋና ዳና ባጋይ ባረንቱ አርማ ካሊደ ዱንካንኖ። ኡንቱንቱ ዛራቱዋ ሱንꬃይ፥ ዛራቱዋ ካፓቱዋ ሱንꬃይነ ኦላንቻቱዋ ፓይዱ ሀዋፐ ካሌ:
ዳና አምሻዳያ ናኣ አህኤዘራ 62,700፤
27-28 አሴራ ኦክራና ናኣ ፓግኤላ 41,500፤
29-30 ንፍታሌማ ኤናና ናኣ አህራአ 53,400፤
31 ዳና ባጋፐ ፓይደቴዳ ኦላንቻቱ ኡባና 157,600፤ ሀራ ሳኣ ብያ ዎደ ኡንቱንቱ ዉርሰꬃን ባረ ባንድራን ከስያዋንታ” ያጌዳ።
32 ባረ ያራን ያራን ሻከቲደ ፓይደቴዳ እስራኤልያ ኦላንቻቱ ኡባና 603,550. 33 ሽን መꬍና ጎዳይ ሙሳ አዛዜዳዋዳን፥ ሌዋቱ ሀራ እስራኤላቱዋና ፓይደትበይክኖ። 34 እስራኤላቱ መꬍና ጎዳይ ሙሳ አዛዜዳዋ ኡባባ ኦꬄድኖ። ስም ኡንቱንቱ ባረንቱ ባንድራ ካሊደ፥ ሄዋዳን ዱንካኔድኖ፤ ቃይ ባረንቱ ያራ ያራነ ባረንቱ ሶ አሳ አሳ ካሊደ፥ ሄዋዳን ከሴድኖ።