1 መꬍና ጎዳይ ሲና ደርያ ቦላን ሙሴና ሃሳዬዳ ዎደ ደእያ አሮናነ ሙሴ ጎልያ አሳይ ሀዋፐ ካሊደ ጻፈቴዳዋ። 2 አሮና አቱማ ናናቱዋ ሱንꬃይ ባይራይ ናዳባ፥ አቢሀ፥ ኤልኣዛራነ እታማራ። ፓይ. 26:60 3 ሄ አሮና አቱማ ናናይ ኡባይ ቄሰ ግዲደ ኦꬃናዉ ኦከቲደ ሱንቴድኖ። 4 ሽን ኡንቱንቱ ግዶፐ ናዳብነ አብሁ ሲና መላ ቢታን ጾሳይ አዛዝቤና ታማ ያርሺደ፥ መꬍና ጎዳ ስንꬃን ሀይቄድኖ፤ ኡንቱንቶ ናእ ባዋ። ሄዋ ድራዉ፥ ኡንቱንቱ አዉ አሮን ፓጻ ደኤዳ ላይꬃ ኡባን ኤልኣዛራነ እታማራ ጻላላይ ቄሰ ግዲደ ኦꬄድኖ።ዎጋ 10:1-2፤ ፓይ. 26:61

5 መꬍና ጎዳይ ሙሳ ሀዋዳን ያጌዳ፤ 6 “ሌዋቱዋ ሃ አካ ያደ ቄስያ አሮና ማዳና ማላ፥ ኡንቱንታ አ ስንꬃ ሺሻ። 7 ኡንቱንቱ አሮናዉነ እስራኤልያ ማባራዉ ኡባዉ ጾሳ ዱንካንያ ስንꬃን ዱማ ዱማ ኦሱዋ ኦꬅኖ። 8 ኡንቱንቱ ጾሳ ዱንካንያን ደእያ ሚሻ ኡባ አዎተꬃ አክኖ፤ እስራኤልያ አሳ ድራዉ ጾሳ ዱንካንያን ኦሶ ኡባ ኡንቱንቱ ኦꬅኖ። 9 ኔን ሌዋቱዋ አሮናነ አ አቱማ ናናቱዋ ማዳናዳን ሱንꬃ፤ ኡንቱንቱ እስራኤልያ ግዶፐ ኡባና አሮናዉ እመቴድኖ። 10 አሮናነ አ አቱማ ናናቱዋ ቄሰ ኦꬃደ ሱንꬃ። ኡንቱንቱፐ ሀራ አሳይ ኦንነ ጾሳ ዱንካንያኮ ሺቆፐ፥ ሀይቆ” ያጌዳ።

11 ቃይ መꬍና ጎዳይ ሙሳ ሀዋዳን ያጌዳ፤ 12 “ታን እስራኤላቱዋ ማጫ አሳይ ባይራ የልያ አቱማ ናናቱዋ ኡባ ድራዉ እስራኤላቱዋ ግዶፐ ሌዋቱዋ አካድ። ሌዋቱ ታዋ፤ 13 አያዉ ጎፐ፥ ባይራ የለቴዳ ኡባይ ታዋ። ታን ግብጼ ጋድያን ባይራ የለቴዳዋ ኡባ ዎꬌዳ ጋላሳን፥ እስራኤላቱዋን ባይራ የለቴዳዋ ኡባ፥ አሳ ግድና፥ መህያ ግድና፥ ታዉ ዱማያድ፤ ኡንቱንቱ ታዋ ግዳና። ታን መꬍና ጎዳ” ያጌዳ። ከሳ 13:2

14 ቃይካ መꬍና ጎዳይ ሙሳ ሲና መላ ቢታን፥ 15 “ኔን ሌዋቱዋ ኡንቱንቱ ሶ አሳን አሳንነ ኡንቱንቱ ያራን ያራን ፓይዳ፤ የለቶደፐ እት አግናነ ሄዋፐ ቦላና ደእያ አቱማዋንታ ኡባ ፓይዳ” ያጌዳ። 16 መꬍና ጎዳይ አዛዜዳዋዳን፥ ሙሴ ኡንቱንታ ፓይዴዳ።

17 ሌዊያ አቱማ ናናይ ገርሾና፥ ቃሃታነ ማራራ። 18 ገርሾና አቱማ ናናይ ሊብናነ ሽምአ። 19 ቃሃታ አቱማ ናናይ አምራማ፥ ይጽሃራ፥ ከብሮናነ ኡዝኤላ። 20 ማራራ አቱማ ናናይ ቃይ ማህላነ ሙሻ። ሌዋቱዋ ማይዛ አዎቱ ሀዋንታ።

21 ሊብና ያራቱነ ሽምአ ያራቱ ገርሾና ዛራቱዋ። 22 ኡንቱንቱፐ ፓይድና፥ የለቶደፐ እት አግናነ ሄዋፐ ቦላና ደእያ አቱማዋንቱ ኡባና 7,500. 23 ገርሾና ያራቱ ጾሳ ዱንካንያፐ ጉየ አዋይ ዉልያ ባጋና ዱንካኒኖ። 24 ገርሾና ያራቱዋ ሶ አሳ ካፑ ላኤላ ናኣ ኤልያሳፋ። 25 ገርሾና ያራቱ ጾሳ ዱንካንያ፥ ዱንካንያ ካምያዋንታ ገልያሳ ጋርዱዋ፥ 26 ዳባባ ጋርዳቱዋ፥ ጾሳ ዱንካንያነ ያርሽያ ሳኣ ዩሹዋን ደእያ ዳባባ ገልያሳን ጋርዱዋ፥ ዎዶሮቱዋነ ኡንቱንቱ ጎኣና ጋከትያባቱዋ ኡባባ አዎተꬃ አኪኖ።

27 አምራማ ያራቱ፥ ይጽሃራ ያራቱ፥ ከብሮና ያራቱነ ኡዝኤላ ያራቱ ቃሃታ ዛራቱዋ። 28 የለቶደፐ እት አግናነ ሄዋፐ ቦላና ደእያ አቱማዋንቱ ኡባና 8,600. ቃሃታ ያራቱ ጾሳ ዱንካንያ አዎተꬃ አኪኖ። 29 ቃሃታ ያራቱ ጾሳ ዱንካንያፐ ገድሳ ባጋና ዱንካኒኖ። 30 ቃሃታ ያራቱዋ ሶ አሳ ካፑ ኡዝኤላ ናኣ ኤልጻፋና። 31 ኡንቱንቱ ታቦታ፥ ጻራጴዛ፥ ጾምፕያ ዎꬅያ ባላ፥ ያርሽያ ሳኣ፥ ኦꬅያ ዎደ ጎኤትያ ጾሳ ዱንካንያ ሚሻቱዋ፥ ጋርዱዋነ ኡንቱንቱ ጎኣና ጋከትያባቱዋ ኡባባ አዎተꬃ አኪኖ።

32 ሌዋቱዋ ካፓቱዋ ካፑ ቄስያ አሮና ናኣ ኤልኣዛራ፤ ጌሻ ሳኣ አዎትያዋንቱ ቦላ እ ሱንቴዳ።

33 ማህላ ያራቱነ ሙሻ ያራቱ ማራራ ዛራቱዋ። 34 ኡንቱንቱፐ ፓይድና፥ የለቶደፐ እት አግናነ ሄዋፐ ቦላና ደእያ አቱማዋንቱ ኡባና 6,200. 35 ማራራ ያራቱዋ ሶ አሳ ካፑ አብሀይላ ናኣ ጹሪኤላ። ማራራ ያራቱ ጾሳ ዱንካንያፐ ሁጲሳ ባጋና ዱንካኒኖ። 36 ማራራ ያራቱ ዱንካንያ ጻጋገቱዋ፥ ኩልቦቱዋ፥ ቱሳቱዋ፥ ገደቱዋ፥ ሄ ኦሶ ኮሽያ ሚሻቱዋ ኡባነ ኡንቱንቱ ጎኣና ጋከትያባቱዋ ኡባ አዎተꬃ አኪኖ። 37 ሄዋ ቦላካ ጉጂደ፥ ዩሹዋን ደእያ ዳባባ ቱሳቱዋነ ኡንቱንቱ ገደቱዋ፥ ሽካልያነ ዎዶሮቱዋ አዎተꬃ አኪኖ።

38 ቃይ ጾሳ ዱንካንያፐ ስንꬃ አዋይ ዶልያ ባጋና ሙሴ፥ አሮንነ አ አቱማ ናናይ ዱንካኒኖ። ኡንቱንቱ እስራኤላቱዋ ድራዉ ጾሳ ዱንካነ ግዶን ኦꬅያ ኦሱዋ አዎተꬃ አኪኖ። ሀራ አሳይ ጾሳ ዱንካንያኮ ሺቆፐ፥ ሀይቆ።

39 መꬍና ጎዳይ አዛዝና፥ ሙሴነ አሮን ፓይዴዳ አቱማ ሌዋቱ፥ የለቶደፐ እት አግናነ ሄዋፐ ቦላና ደእያ አቱማዋንቱ ኡባና 22,000.

40 መꬍና ጎዳይ ሙሳ፥ “እስራኤላቱዋ ባይራ አቱማ ናናቱዋ፥ የለቶደፐ እት አግናነ ሄዋፐ ቦላና ደእያዋንታ ኡባ ፓይዳደ ኡንቱንቱ ሱንꬃ ጻፋ። 41 እስራኤላቱዋን ባይራ የለቴዳ ኡባ ኮታዉ ሌዋቱዋ ታዉ አካ፤ ቃይ እስራኤላቱዋ መህያን ባይራ የለቴዳ ኡባ ኮታዉ ሌዋቱዋ መህያ ታዉ አካ። ታን መꬍና ጎዳ” ያጌዳ። 42 ሙሴ መꬍና ጎዳይ አ አዛዜዳዋዳን፥ እስራኤላቱዋን ባይራ የለቴዳ ኡባ ፓይዴዳ። 43 የለቶደፐ እት አግናነ ሄዋፐ ቦላና ደእያ ባይራ የለቴዳ አቱማዋንቱ፥ ሱንꬃይካ ጻፈቴዳዋንቱ ኡባና 22,273.

44 መꬍና ጎዳይ ሙሳ ቃይካ ሀዋዳን ያጌዳ፤ 45 “ሌዋቱዋ እስራኤልያ አቱማዋንቱ ኡባ ኮታዉ አካ፤ ሌዋቱዋ መሄቱዋ እስራኤላቱዋ መህያ ኮታዉ አካ፤ ሌዋቱ ታዋ ግዳናዋንታ። ታን መꬍና ጎዳ። 46 ሌዋቱዋ ፓይዱዋፐ ዳርያ 273 ባይራ ግዲደ የለቴዳ እስራኤልያ አቱማ ናናቱዋ ዎዛናዉ፥ 47 እቶ እቶ እቼሹ ጻጋራ ብራ ጾሳ ዱንካንያን ኤረቲያ ሚዛንያ ልክያን አካ፤ እት ጻጋራ ብራይ ላታሙ ጌራ ኬሻ። 48 ፓላሄዳ እስራኤላቱዋ ዎዝያ ሄ ሚሻ አሮናዉነ አ አቱማ ናናዉ እማ” ያጌዳ። 49 ሙሴ፥ ሌዋቱዋን ዎዘቴዳዋንቱፐ ፓላሄዳዋንታ ዎዝያ ሚሻ ሺሼዳ። 50 ባይራ የለቴዳ እስራኤላቱዋፐ 1,365 ጻጋራ ብራ ጾሳ ዱንካንያን ኤረቲያ ሚዛንያ ልክያን እ ሺሼዳ፤ 51 መꬍና ጎዳይ አዛዜዳ አዛዙዋዳን፥ ሙሴ ዎዝያ ሚሻ አሮናዉነ አ አቱማ ናናዉ እሜዳ።