1 መꬍና ጎዳይ ሙሳነ አሮና ሀዋዳን ያጌዳ፤ 2 “ሌዊያ ዛራቱዋን ቃሃታ ያራቱዋ ኡንቱንቱ ዳቡዋን ዳቡዋንነ ኡንቱንቱ ሶ አሳን አሳን ሻካደ ፓይዳ፤ 3 የለቶደፐ ላይꬃይ ሀታሙዋፐ ቢደ እሻታሙዋ ጋኬዳ አቱማ አሳ ኡባ፥ ጾሳ ዱንካንያ ግዶን ኦꬃናዉ ይያዋንታ ፓይዳ። 4 ቃሃታ ያራቱ ጾሳ ዱንካንያ ግዶን ኦꬃና ኦሱ ሀዋ: ኡንቱንቱ ኡባፐ አꬌዳ ጌሻ ሚሻቱዋን አዎቲኖ።

5 “አሳይ ዱንካኔዳ ሳፐ ባናዉ ሀንያ ዎደ፥ አሮንነ አ አቱማ ናናይ ጾሳ ዱንካንያ ግዶ ገሊደ፥ ታቦታ ስንꬃ ጋርዱዋ ካቁዋፐ ዎꬅኖ፤ ሄ ጫቁዋ ታቦታ አን ካምኖ። 6 ሄ ካሜዳዋ ቦላካ ዎꬍያ እርባንያ ካምኖ፤ ሄዋ ቦላካ ቃይ ጉጂደ፥ ሳሉዋ ማላትያ ጫርቂያ ካምኖ፤ ቶክያ ካሶቱዋ ኡንቱንቱ ሳጋየቱዋን አꬅኖ።

7 “ጾሳ ስንꬃ ሺሽያ ኡክꬃ ዎꬅያ ጻራጴዛ ቦላን ሳሉዋ ማላትያ ጫርቂያ ሂጽኖ፤ አ ቦላ ሳነቱዋ፥ ጭልፓቱዋ፥ ጹአቱዋነ ኡሻ ያርሾ ጎኤትያ ኦቶቱዋ ዎꬅኖ፤ ቃይ ኡክꬃይ ኡባ ዎደካ አ ቦላፐ ꬋዮፖ። 8 ሄዋ ቦላን ዞኦ ጫርቂያ ሂጺደ፥ እርባንያ ቃይ አ ቦላ ካምኖ፤ ቶክያ ካሶቱዋ ሳጋየቱዋን አꬅኖ።

9 “ኡንቱንቱ ሳሉዋ ማላትያ ጫርቂያ አኪደ፥ ጾምፕያ ዎꬅያ ባላቱዋ ጾምፐቱዋና፥ ቶይስያ ቃጰቱዋና፥ ኡንቱንታ ዎꬅያባቱዋናነ ዛይትያ ትግያ ጻሮቱዋናካ ኡባ ካምኖ። 10 ያቲደ አካ ሚሻቱዋ ኡባካ እርባንያን ካሚደ፥ ቶክያ ሻንቻማ ቦላን ዎꬅኖ።

11 “እጻና ጩውስያ ዎርቃ ሳጽንያ ቦላን ሳሉዋ ማላትያ ጫርቂያ ሂጼዳዋ ቃይ እርባንያን ካምኖ፤ ቶክያ ካሶቱዋ ኡንቱንቱ ሳጋየቱዋን አꬅኖ። 12 ሄዋዳንካ፥ ቃይ ጾሳ ዱንካንያ ግዶን ጎኤትያ ሚሻቱዋ ኡባ አኪደ፥ ሳሉዋ ማላትያ ጫርቂያን ጻጽኖ፤ እርባንያን ካሚደ፥ ቶክያ ሻንቻማ ቦላን ዎꬅኖ።

13 “ያቲደ ናሃስያፐ ኦꬄዳ ያርሽያ ሳኣ ቦላ ደእያ ብድንꬃ ድጊደ አ ቦላ ኦቻ ቴራ ማላትያ ጫርቂያ ሂጽኖ። 14 አ ቦላ ያርሽያሳን ጎኤትያ ሚሻቱዋ ኡባ፥ ታማ ጮጨቱዋ፥ አሹዋ ቃጲያ ቃጰቱዋ፥ አካፋቱዋነ ካሽያ ኩይጻሮቱዋ ዎꬅኖ። እርባንያን ካምኖ፤ ቶክያ ካሶቱዋ ኡንቱንቱ ሳጋየቱዋን አꬅኖ።

15 “አሮንነ አ አቱማ ናናይ፥ ጌሻባቱዋነ ጌሻ ሚሻቱዋ ኡባ ካሚደ ማኮፐነ ዱንካኔዳ ሳኣፐ ደንድያ ዎዲ ጋኮፐ፥ ሄዋ ኡባ ቶካናዉ ቃሃታ ያራቱ ዪኖ። ሽን ጌሻ ሚሻቱዋ ኡንቱንቱ ቦቾፐ ሀይቂኖ። ጾሳ ዱንካንያ ግዶን ደእያ ሄ ሚሻ ቃሃታ ያራቱ ቶክኖ።

16 “ቄስያ አሮና ናአይ ኤልኣዛር ጾምፕያ ዛይትያዉ፥ ሳዊያ እጻናዉ፥ ሀች ሀች ያርሽያ ካꬃ ያርሹዋነ ኦክያ ዛይትያዉ፥ ቃይ ጾሳ ዱንካንያ ሙልያነ አ ግዶን ደእያ ዱማ ጌሻ ሚሻቱዋ ኡባ ቦላ አዋቶ” ያጌዳ።

17 ቃይ መꬍና ጎዳይ ሙሳነ አሮና ሀዋዳን ያጌዳ፤ 18 “ቃሃታ ያራቱ ሌዊያ ዛራቱዋፐ ሀይቂደ ꬋየና ማላ ጼልተ። 19 ኡባፐ አꬌዳ ጌሻ ሚሻ ማታ ሺቅያ ዎደ፥ ኡንቱንቱ ሀይቀናን ፓጻ አቲደ ደአና ማላ፥ ኡንቱንቶ ሀዋዳን ኦꬅተ: አሮንነ አ አቱማ ናናይ ጾሳ ዱንካንያ ግዶ ገሊደ ቃሃታ ያራቱ ኡባይ ሁጲያን ሁጲያን ኦꬃና ኦሱዋነ ቶካና ቶኩዋ ሻክ ሻኪደ ግሽኖ። 20 ቃሃታ ያራቱ ሀይቀናዳን፥ ኡባፐ አꬍያ ጌሻቱዋ ቄሳቱ ጻጽሽን በአናዉ ግዱዋ ገሎፕኖ” ያጌዳ።

21 መꬍና ጎዳይ ሙሳ ሀዋዳን ያጌዳ፤ 22 “ገርሾና ያራቱዋካ ኡንቱንቱ ዳቡዋን ዳቡዋንነ ኡንቱንቱ ሶ አሳን አሳን ሻካደ ፓይዳ፤ 23 የለቶደፐ ላይꬃይ ሀታሙዋፐ ቢደ እሻታሙዋ ጋኬዳ አቱማ አሳ ኡባ፥ ጾሳ ዱንካንያ ግዶን ኦꬃናዉ ይያዋንታ ፓይዳ።

24 “ገርሾና ያራቱ ኦꬅያ ኦሱነ ቶክያ ቶኩ ሀዋ: 25 ኡንቱንቱ ጾሳ ዱንካንያ ጋርዳቱዋ፥ ጾሳ ዱንካንያ፥ አ ካምያባቱዋነ ቦላና ካምያ እርባንያ፥ ጾሳ ዱንካንያ ገልያሳን ሶትያ ጋርዱዋ ቶክኖ፤ 26 ቃይ ጾሳ ዱንካንያነ ያርሽያ ሳኣ ዩይ አꬌዳ ዳባባ ጋርዳቱዋ፥ ዳባባ ገልያሳ ጋርዱዋ፥ ዎዶሮቱዋነ ኡንቱንቶ ጎእያ ሚሻቱዋ ኡባ ቶክኖ። ገርሾና ያራቱ ሀ ሚሻቱዋን ኦꬃናዉ በስያ ኦሱዋ ኡባ ኦꬅኖ። 27 ቶክያዋ ግድና፥ ሀራ ኦሱዋ ግድናካ ኡንቱንቱ ኦꬅያ ኦሱዋ ኡባይ አሮንነ አ አቱማ ናናይ ኡንቱንታ አዛዝና ኦሰትኖ። ኔን ኡንቱንቱ ቶካናዉ በስያባቱዋ ኡባ ኡንቱንቱ አዎተꬃ አዎተꬃዳን ኡንቱንቶ ግሻ። 28 ጾሳ ዱንካንያ ግዶን ገርሾና ያራቱ ኦꬃና ኦሱ ኡባይ ሀዋ። ኡንቱንቱ ኦꬃና ኦሱዋ ኡባይ ቄስያ አሮና ናኣ እታማራ አዎተꬃ ጋርሳና ግዳናዋ።

29 “ማራራ ያራቱዋ ኡንቱንቱ ዳቡዋን ዳቡዋንነ ኡንቱንቱ ሶ አሳን አሳን ሻካደ ፓይዳ፤ 30 የለቶደፐ ላይꬃይ ሀታሙዋፐ ቢደ እሻታሙዋ ጋኬዳ አቱማ አሳ ኡባ፥ ጾሳ ዱንካንያ ግዶን ኦꬃናዉ ይያዋንታ ፓይዳ።

31 “ኡንቱንቱ ጾሳ ዱንካንያ ግዶን ኦꬃና ኦሶቱ ሀዋንታ: ኡንቱንታ ዱንካንያ ጻጋገቱዋ፥ ኩልቦቱዋ፥ ቱሳቱዋነ ገደቱዋ፥ 32 ቃይካ ዳባባ ዩሹዋን ኤቂያ ቱሳቱዋ፥ ሄ ቱሳቱ ገደቱዋ፥ ቶልያ ጻጋገቱዋ፥ ዎዶሮቱዋ፥ ሄዋንቶ ኮሽያ ሚሻቱዋ ኡባነ ሄ ሚሻቱዋና ጋከትያባቱዋ ኡባ ቶክኖ። እት እት ኡራዉ እ ቶካናዋ ሻካደ ግሻ። 33 ጾሳ ዱንካንያ ግዶን ማራራ ያራቱ ኦꬃና ኦሱ ኡባና ሀዋ። ኡንቱንቱ ኦꬃና ኦሶ ኡባይ ቄስያ አሮና ናኣ እታማራ አዎተꬃ ጋርሳና ግዳናዋ” ያጌዳ።

34 ሙሴ አሮንነ ማባራ ካፓቱ ቃሃታ ያራቱዋ አቱማ አሳ ኡንቱንቱ ዳቡዋን ዳቡዋንነ ኡንቱንቱ ሶ አሳን አሳን ሻኪደ ፓይዴድኖ። 35 የለቶደፐ ላይꬃይ ሀታሙዋፐ ቢደ እሻታሙዋ ጋኬዳ አቱማ አሳቱ ኡባቱ፥ ጾሳ ዱንካንያ ግዶን ኦꬃናዉ ይያዋንቱ፥ 36 ኡንቱንቱ ሶ አሳን አሳን ፓይድና ኡባና 2,750. 37 ቃሃታ ያራቱዋን ጾሳ ዱንካንያ ግዶን ኦꬄዳ አሳ ፓይዱ ሀዋ። መꬍና ጎዳይ ሙሴ ባጋና አዛዜዳዋዳን፥ ሙሴነ አሮን ኡንቱንታ ፓይዴድኖ።

38 ገርሾና ያራቱካ ባረንቱ ዳቡዋን ዳቡዋንነ ባረንቱ ሶ አሳን አሳን ሻከቲደ ፓይደቴድኖ። 39 የለቶደፐ ላይꬃይ ሀታሙዋፐ ቢደ እሻታሙዋ ጋኬዳ አቱማ አሳቱ ኡባቱ፥ ጾሳ ዱንካንያ ግዶን ኦꬃናዉ ይያዋንቱ፥ 40 ኡንቱንቱ ሶ አሳን አሳን ፓይድና ኡባይ 2,630. 41 ገርሾና ያራቱዋን ጾሳ ዱንካንያ ግዶን ኦꬄዳ አሳ ፓይድና ሀዋ። መꬍና ጎዳይ ሙሴ ባጋና አዛዜዳዋዳን፥ ሙሴነ አሮን ኡንቱንታ ፓይዴድኖ።

42 ማራራ ያራቱካ ቃይ ዳቡዋን ዳቡዋንነ ባረንቱ ሶ አሳን አሳን ሻከቲደ ፓይደቴድኖ። 43 የለቶደፐ ላይꬃይ ሀታሙዋፐ ቢደ እሻታሙዋ ጋኬዳ አቱማ አሳቱ ኡባቱ፥ ጾሳ ዱንካንያ ግዶን ኦꬃናዉ ይያዋንቱ፥ 44 ኡንቱንቱ ሶ አሳን አሳን ፓይድና ኡባይ 3,200. 45 ማራራ ያራቱዋ ፓይዱ ሀዋ። መꬍና ጎዳይ ሙሴ ባጋና አዛዜዳዋዳን፥ ሙሴነ አሮን ኡንቱንታ ፓይዴድኖ።

46 ሄዋ ኦꬂደ ሙሴ፥ አሮንነ እስራኤልያ ካፓቱ ሌዋቱዋ ኡባ፥ ኡንቱንቱ ያራን ያራንነ ኡንቱንቱ ሶ አሳን አሳን ሻኪደ ፓይዴድኖ። 47 የለቶደፐ ላይꬃይ ሀታሙዋፐ ቢደ እሻታሙዋ ጋኬዳ አቱማ አሳቱ ኡባቱ፥ ጾሳ ዱንካንያ ግዶን ኦሱዋ ኦꬃናዉነ አዉ ጎእያ ሚሻቱዋ ኡባ ቶካናዉ ዬዳዋንቱ 48 ኡባይ 8,580. 49 መꬍና ጎዳይ ሙሴ ባጋና አዛዜዳዋዳን፥ ኡንቱንቱ ሁጲያን ሁጲያን ኦꬃና ኦሱ ዎይ ቶካና ቶኩካ ኡንቱንቶ ኦደቴዳ። መꬍና ጎዳይ ሙሳ አዛዜዳዋዳን፥ ኡንቱንቱ ኡባይካ ፓይደቴድኖ።