1 መꬍና ጎዳይ ሙሳ ሀዋዳን ያጌዳ፦ 2 “ኔን እስራኤላቱዋ፥ ‘ህንተ ግዶን ዎልቃማ ጋልባ ሀርጊ ኦይቄዳ ኡራ፥ ዎይ ቦላፐ አያይኔካ ጎግያ ኡራ፥ ዎይ አሃ ኦይቂደ ቱኔዳ ኡራ ኦናካ ህንተ ዱንካኔዳ ሳኣፐ ከስ ድግተ’ ያጋደ አዛዛ። 3 ሄዌ ማጫዋ አቱማዋ ግድናካ ከስኖ። ታን ኡንቱንቱ ግዱዋን ደእያ ኡንቱንቱ ዱንካኔዳሳ ሄዋንቱ ቱንሰና ማላ፥ ኡንቱንቱ ዱንካኔዳ ሳኣፐ ከሳ የዳ” ያጌዳ። 4 መꬍና ጎዳይ ሙሳ አዛዜዳዋዳን፥ እስራኤላቱ ኡንቱንቱ ኡባ ዱንካኔዳ ሳኣፐ ከሲደ የዴድኖ።

5 ሄዋፐ ጉይያን፥ መꬍና ጎዳይ ሙሳ ሀዋዳን ያጌዳ፤ ዎጋ 6:1-7 6 “ኔን እስራኤላቱዋ ሀዋዳን ያጋ፤ ‘እት አቱማ አሳይ ዎይ እት ማጫ አሳይ አይ ኦግያንነ ሀራ አሳ ናቆፐነ ሄዋን መꬍና ጎዳዉ አማነተናን እጾፐ፥ ሄ ኡራይ ባይዛንቻ። 7 ሄዋ ድራዉ፥ እ ባረ ኦꬄዳ ናጋራ ፓጾ፤ ባረ ባይዜዳዋ ኩመንꬃ ዛሪደ ጭጎ፤ ሄዋ ቦላካ እቼሸንꬆ ኩሽያ ጉጂደ፥ ባረ ናቄዳ ኡራዉ አጮ። 8 ሽን ሄ ናቀቴዳ ኡራይ ሀይቄዳዋ ግዶፐነ፥ አጫ አካናዉ አዉ ማታ ዳቡ ꬋዮፐ፥ ሄ አጫይ መꬍና ጎዳሳ። ሄ አጭያ አጫይ ናቄዳ ኡራይ ማረታናዉ ያርሾ እምያ ዶርሳ ኦርግያና እትፐ ቄስያዉ እመቶ። 9 ቃይ እስራኤላቱ ቄስያዉ እምያ ጌሻ እሙዋ ኡባይ ሄ ቄስያሳ። 10 እት እት አሳይ እምያ እሞታይ ሄ እሜዳ ኡራባ፤ ሽን ቄስያዉ እ እምያ እሞታይ ሄ ቄስያሳ’ ያጋ” ያጌዳ።

11 ሄዋፐ ጉይያን መꬍና ጎዳይ ሙሳ፥ 12 “ኔን እስራኤላቶ ሀዋዳን ያጋደ ኦዳ፤ ‘እት ኡራ ማቻታ ካረ ሀመታደ፥ አዉ አማነተናን እጻደ፥ 13 ሀራ አቱማ አሳና ግሶፐ፥ ቃይ ሄዋ እዛ ባረ አስናፐ ቆሶፐ፥ ማርካይ ባይናዋ ግዶፐነ፥ እዛ ሻርሙጻደ ኦይቀተናን አቶፐ፥ 14 እዛ ቱኔዳ ድራዉ፥ እ ጎልያዉ እዞ ስꬍያዋ ግዳናዉ ዳንዳዬ፤ ዎይ እዛ ቱነናን ደእሽን፥ እ ባረ ማቻቶ ስꬍያዋ ግዳናዉ ዳንዳዬ። 15 ያቶፐ፥ ሄ ብታኒ ባረ ማቻቶ ቄስያኮ አፎ፤ ቃይ እዝ ድራዉ ያርሻናዉ እት ኪሎ ግራመ ባንጋ ꬊልያ አፎ። ሽን ꬊልያ ቦላ ዛይትያ ትጎፖ፥ ዎይ እጻና አ ቦላ ዎꬆፖ፤ አያዉ ጎፐ፥ ሄ ꬊሊ እ ባረ ማቻቶ ስꬌዳ ድራዉ ያርሽያ ካꬃ ያርሾ፤ ቃይ ሄዌ ባይዙዋ ቆንጭስያ ያርሹዋ።

16 “ ‘ሄዋፐ ጉይያን፥ ቄሲ ሄ ምሽራቶ ሺሺደ፥ መꬍና ጎዳ ስንꬃን ኤሶ። 17 አንጀቴዳ ሃꬃ ኩይጻሩዋን አኮ። ሄዋፐ ጉይያን፥ ጾሳ ዱንካንያ ዉይግያን ደእያ ባና አኪደ፥ ሄ ሃꬃን ጉጆ። 18 ሄ ምሽራቶ መꬍና ጎዳ ስንꬃን ኤሶ፤ ሄዋፐ ጉይያን፥ ሄ ምሽራት ሁጲያ ብሎ፤ ስꬌዳ ድራዉ ያርሽያ እዝ ባይዙዋ ቆንጭስያ ካꬃ ያርሹዋ እዝ ኩሽያን ዎꬆ፤ ቃይ ሄ ቄሲ ባረ ኩሽያን ሸቃ አህያ ጫሞ ሃꬃ ኩይጻሩዋና ኦይቆ። 19 ምሽራቶ ሀዋዳን ያጊደ ጫቀꬆ፤ “ኔን ሀራ አቱማ አሳና ግሳቤናዋ ግዶፐነ፥ ነ አስና አጋደ ካረ ሀመታደ ቱናቤናዋ ግዶፐ፥ ሸቃ አህያ ሀ ጫሞ ሃꬃይ ነዉ ጎመቶፖ። 20 ሽን ኔን ነ አስና አጋደ ካረ ሀመታደ ቱኔዳዋ ግዶፐነ፥ ሀራ አቱማ አሳና ግሴዳዋ ግዶፐ፥ 21 መꬍና ጎዳይ ነ የሉዋ ጎልያ ጉንድስያዋንነ ነ ኡሉዋካ ጋፍስያዋን፥ ነ አሳን ኔና ሸቅሶ። 22 ሀ ሸቃ አህያ ሃꬃይ ነ ኡሎ ግዶ ገሊደ ነ ኡሉዋ ጋፍሶ፤ ነ የሉዋ ኬꬃካ ጉንድሶ” ያጊደ ጫቀꬆ።

“ ‘ምሽራታካ፥ “አመንእ፤ አመንእ” ያጉ።

23 “ ‘ሄዋፐ ጉይያን፥ ቄሲ ሀ ሸቃቱዋ ጻጸቴዳ ማጻፋን ጻፎ፤ ሸቃቱዋ ጫሞ ሃꬃ ግዶ ሜጮ። 24 ያቲደ ሸቃ አህያ ሄ ጫሞ ሃꬃ ምሽራቶ ኡሾ፤ ሸቃ አህያ ሃꬃይ ምሽራት ኡሉዋን ገሊደ፥ እዞ ጫሞ ሳኩዋ ሳካና። 25 ቄሲ ምሽራት ኩሽያፐ ስꬌዳ ድራዉ ያርሽያ ካꬃ ያርሹዋ አኪደ፥ ሄ ያርሹዋ መꬍና ጎዳ ስንꬃን ቃꬂደ፥ ያርሽያ ሳኣ አሆ። 26 ቄሲ ካꬃ ያርሹዋፐ ኮጵያዋ አኪደ ባይዛንቻ ግደከንቶ ቆንጭስያ ያርሹዋ ኦꬂደ፥ ያርሽያሳን ጹጎ። ሄዋፐ ጉይያን፥ ምሽራቶ ሄ ሃꬃ ኡሾ። 27 ሃꬃ እዞ ኡሼዳዋፐ ጉይያን፥ ሀዋዳን ሀናና: እዛ ባረ አስናዉ አማነታና ꬋያደ ቱኔዳዋ ግዶፐ፥ ሸቃ አህያ ሃꬃይ እ ኡሉዋን ገሊደ፥ እዞ ጫሞ ሳኩዋ ሳካና፤ እዝ ኡሉካ ጋፋና፤ እዝ የሉዋ ጎሊካ ጉንዳና። እዛ ባረ አሳን ሸቀቴዳኖ ግዳና። 28 ሽን እዛ ቱናቤና ጽሎ ማጫ አሳ ግዶፐ፥ አ ሳሮ አታደ ናናቱዋ የላና።

29-30 “ ‘እት አሳይ ባረ ማቻቶ ስꬍያ ዎደ ኦꬃና ዎጋይ ሀዋ። እዛ ካረ ሀመታደ ቱኖፐ፥ ዎይ እት አሳይ ባረ ማቻቶ ስꬎፐ፥ መꬍና ጎዳ ስንꬃን እዞ ኤሲደ ቄሲ ሀ ዎጋ ኡባ እዝ ቦላ ፖሎ። 31 አስናይ ባይዙዋ ኡባፐ ሳሮ አታና፤ ሽን ማጫውኖ ባረ ናጋራ ጋሱዋን ይያዋ ቶካና’ ያጋ” ያጌዳ።