20
የሱሳ ማታ ቦላ ደንዴዳ ኦሻ
(ማቶሳ 21:23-27፤ ማር. 11:27-33)
1 እት ጋላስ የሱስ አሳ ጌሻ ጎልያን ታማርሲደነ ምሽራቹዋ ቃላ ኦዲደ ደእያ ዎደ፥ ቄሳቱዋ ካፓቱነ ሙሴ ህግያ ታማርስያዋንቱ ጋድያ ጭማቱዋና እትፐ የሱሳኮ ዬድኖ። 2 ኡንቱንቱካ፥ “ሀ የዉዋ ኔን ኦꬅያዌ አይ ማታነንቶ ኦዳ፤ ሀ ማታካ ነዉ እሜዳዌ እ ኦኔ?” ያጊደ ኦቼድኖ። 3 እካ፥ “ታ ህንተና እት ኦሻ ኦችያዌ ደእያዋ አነ ዛርተ። 4 ዮሃንሳ ጽንቃታይ ጾሳፔ ዎይ አሳፔ?” ያግ ኦቼዳ።
5 ኡንቱንቱ ባረ ግዶን ማቀቲደ፥ “ጾሳፐ ጎፐ፥ ሄዋ ግዶፐ ‘አያዉ አማንበይክቴ’ ኑና ያጋናዋ፤ 6 ‘አሳፐ’ ጎፐ፥ አሳይ ኡባይ ዮሃንስ ናብያ ግድያዋ አማንያ ድራዉ ሹቻን ኑና ደቻናዋንታ” ያጌድኖ። 7 ሀዋስ፥ “ሀቃፐ ዬደንቶ ኤሮኮ” ጊደ አዉ ዛሬድኖ። 8 የሱስካ፥ “ሀዋ ግዶፐ ታንካ፥ ታን ኦ ማታን ሀ የዉዋ ኦꬃይታንቶ ህንተንቶ ኦድከ” ያጌዳ።
9 ሀዋፐ ስሚደ የሱስ አሳዉ ሀ ሌምሱዋ ያግ ኦዱዋ ዶሜዳ:ኢሳ. 5:1 “እት ብታኒ ዳሮ ዎይንያ ቱራቱዋ ቶኬዳ። ጎሻንቻቶ ኮꬃዉ እሚደ፥ እ ህን ሀራ ጋድያ ቢደ ጮራ ዎድያ ጋምኤዳ። 10 ዎይኒ አይፍያ አይፎ ዎደ፥ ዎይንያ ጎሻ ጎዳይ ባረና ጋክያዋ አሀናዳን እት ቆማ ኮꬃዋቱዋኮ ኪቴዳ። ኪተት ቤዳዋካ ꬎኦቢደ፥ መላ ኩሽያ የዴድኖ። 11 ሄዋፐ ሀራ ቆማ ኪቴዳ። ኡንቱንቱ ሄዋካ ቃይ ꬎኦቢደ፥ ቶቺደ፥ መላ ኩሽያ የዴድኖ። 12 ሀእካ ሀራ ሄዘንꬅያ ቆማ ኪቴዳ። ኡንቱንቱካ ቃይ አ ማሱንꬂደ፥ ህን ካረ ኦሌድኖ።
13 “ሄ ዎይንያ ቱራ ጎዳይካ፥ ‘ስም አያ ኦꬆ? አነ ሀእ ታ ዶስያ ናኣ ኪታና፤ ኦን ኤር አ ቦንቾፐነ’ ጌዳ። 14 ጎሻንቻቱ ቃይ ናኣ በኤዳ ዎደ፥ ‘ሀዌ አ ላትያዋ ግዶ ድራዉ፥ ሀይተ ዎꬎይተ፤ ሄዋፐ ጉየ፥ ቢታይ ኑሳ ግዳናዋ’ ጊደ ዞረቴድኖ። 15 ዎይንያ ቱራ ሳኣፐ፥ ህን ካረዉ ከሲደ አ ዎꬌድኖ።
“ዎይንያ ቱራ ጎዳይካ ኡንቱንታ አያ ኦꬃንዴሻ? 16 ዮፐ ሄ ጎሻንቻቱዋ፥ ዎꬋናዋ፤ ዎይንያ ቱራ ሳኣካ ሀራንቶ እማናዋ” ያጌድኖ።
አሳቱካ ሀዋ ስሶ ዎደ፥ “ሀዋ ማላባ አሆፖ” ያጌድኖ። 17 የሱስካ ህን ኡንቱንቱኮ ጼሊደ፥
“ ‘ስም ሹቻ ጎልያ ኬጽያዋንቱ ካꬌዳ ሹቻይ፥
እ ዋና ጎልያ ምንስያ ሁጰ ሹቻ ግዴዳ’
ጌተቲደ ጻፈቴዳዋ ብለꬃይ አዬ?ማዝ. 118:22 18 ሀ ሹቻ ቦላን ኩንድያ ኡባይ መኤረቴ፤ ሹቻይካ አ ቦላን ኩንድያ ኡባይ ቡንቼታናዋ” ያጌዳ።
ጊራ፥ ጊራኔ አጋኔ ግያ ኦሻ
(ማቶሳ 22:15-22፤ ማር. 12:13-17)
19 ሙሴ ህግያ ጻፍያዋንቱነ ቄሳቱዋ ካፓቱ የሱስ ሃሳዬዳ ሌምሱ፥ ኡንቱንቱ ቦላን ጌተቶዋ ኤሮ ድራዉ፥ ሄ ሳትያንካ አ ኦይቃናዉ ኮዬድኖ። ሽን አሳዉ ያዬድኖ። 20 የሱሳ፥ ሄ ጋድያ ሞድያዎነ አ ማታዉ አꬂደ እማናዉ አ ዶናፐ ከስያ ቃላን ኦይቃናዉ እንጀትያ ዎድያ ናጊኖ። ሄዋ ድራዉ ጌሻ ማላቲደ ኦይꬃናዉ ዎችያዋንታ ኪቴድኖ። 21 ሄ ኪተቶዋንቱካ የሱሳ፥ “ታማርስያዎ፥ ኔን ቱማ የዉዋ ሃሳይያዋነ ታማርስያዋ፥ ሄዋዳንካ ቃይ ጾሳ ኦግያ ቱማተꬃን ታማርስያዋነ ኦስነ ዱማየናዋ ኑን ኤሬቶ። 22 ቃይካ ኡንቱንቱ፥ ሮማ ካትያ ቄሳረዉ ጊራ ጭጋናዉ ኮሺ ዎይ ኮሸኔ?” ያግ ኦቼድኖ።
23 እ ቃይ ኡንቱንቱ ደሻተꬃ ኤሪደ፥ 24 “አነ ታና እት ዲናርያ *ድናርያ፦ ሄ ዎደ ሮማ ቢታ አሳይ ጎኤትያ ሚሻ። በስተ፤ ሄዋ ቦላን ደእያ ምስሊነ ጻፈቶዌ ኦና በሲ?” ጌዳ። 25 ኡንቱንቱካ፥ “ቄሳረዋ” ጊደ ዛሬድኖ። እኔካ፥ “ሄዋ ግዶፐ: ቄሳረዋ፥ ቄሳረዉ እምተ፤ ጾሳዋ፥ ጾሳዉ እምተ” ያጌዳ። 26 ኡንቱንቱካ፥ እ ሃሳዬዳ ቃላን አሳ ስንꬃን ኦይቃናዉ ዳንዳይበይክኖ። አ ዛሩዋን ማላለቲደ ጮኡ ጌድኖ።
ሀይቁዋፐ ደንዱዋባ ኦሻ
(ማቶሳ 22:23-33፤ ማር. 12:18-27)
27 ሳዱቃዋናቱፐ እቱ እቱ የሱሳኮ ዪደ፥ ኦሻ አዉ ሺሼድኖ። ኪታ 23:8 28 ኡንቱንቱካ የሱሳ፥ ዛረ. 25:5 “ታማርስያዎ፥ እት ብታኒ ማቻቶ አኪደ ናኣ የለናን ሀይያዋ ግዶፐ፥ ምሽራቶ ሄዋ እሻይ ላታ አክ ናኣ የሊደ ባረ እሻዉ ዘረꬃ ዎꬃና ማላ ሙሴ ኑዉ ጻፌዳ። 29 እት ዎድያን ላፑ እሻቱ ደእያዋንቱፐ፥ ባይራይ ማቻቶ አኪደ የለናን ሀይቂ አጌዳ። 30 ላኤንꬅያዌካ እዞ ላቴዳ። 31 ሄዘንꬅያዌካ ቃይ እዞ አኬዳ፤ ላፑናቱካ እዞ አኪደ ናኣ የለናን ሀይቄድኖ። 32 ዉርሰꬃን ምሽራታካ ሀይቃ አጋዱ። 33 ስም ላፑናቱካ ሄ ምሽራቶ አኬዳ ድራዉ፥ ሀይቁዋፐ ደንዴዳ ዎደ፥ እዛ ኦስ ማቼ ግዳኔ?” ያግ ኦቼድኖ።
34 የሱስካ፥ “ሀ አላምያ ናናይ አኪኖነ አከቲኖ። 35 ሽን ሀይቁዋፐ ደንዲደ፥ ስንꬃፐ ይያ ዎድያን ደአናዉ በስያዋንቱ አክክኖነ አከትክኖ። 36 ኡንቱንቱ ጾሳ ኪታንቻ ማላቲደ ደእያ ድራዉ፥ ሄዋፐ ስሚደ ሀይቂክኖ። ሀይቁዋፐ ደንድያዋንታ ግድያ ድራዉ ኡንቱንቱ ጾሳ ናና። 37 ሙሴ፥ ጾሳይ አዉ ቆንጬዳ ዎራባ ጻፌዳ ታርክያ ጋርሳን፥ ጎዳ ጾሳ፥ ‘አብራሃሞ ጾሳ፥ ይሳቃ ጾሳ፥ ያቆባ ጾሳ’ ያጊደ ጼሱሳይ፥ ሀይቃዋንቱ ደንድያዋ በሴ። ከሳ 3:6 38 ኡባይካ አዉ ሀይቂ ቤናዋንታ ግድያ ድራዉ፥ እ ሀይቂቤናዋንቱ ጾሳፐ አትን፥ ሀይቆዋንቱዋ ግደና” ያጌዳ።
39 እት እት ሙሴ ህግያ ጻፌዳዋንቱካ፥ “ታማርስያዎ፥ ሎኡዋ ሃሳያዳ” ያጌድኖ። 40 ሀዋፐ ስሚደ፥ እቱካ አ ኦቻናዉ ጻሎዌ ባዋ።
የሱስ ኦኔ ግያ ኦሻ
(ማቶሳ 22:41-46፤ ማር. 12:35-37)
41 ሀዋፐ ካላ የሱስ ኡንቱንታ፥ “አሳይ ክርስቶሳ ዎት ‘ዳዊተ ናኣ’ ያጊኖ? 42-43 ጋሶተꬃይኔካ፥ ዳዊተ ባረ ሁጰዉ ማዝሙረ ማጻፋ ጋርሳን፥
“ ‘ጎዳይ ታ ጎዳ፥ “ታን ነ ሞርከቱዋ፥
ነ ገድያፐ ጋርሳና ደአናዳን ኦꬃና ጋካናዉ፥
ታ ኡሸቻን ኡታ” ጌዳ’
ያጌዳ።
44 “ስም ዳዊተ ክርስቶሳ፥ ‘ጎዳ’፥ ጊደ ጼስያዋ ግዶፐ፥ ዎት አዉ ናኣ ግዳና ዳንዳዪ?” ያጌዳ።
ሙሴ ህግያ ታማርስያዋንቱፐ ናገታና ማላ፥ የሱስ ሴሬዳ ሴራ
(ማቶሳ 23:1-36፤ ማር. 12:38-40)
45 አሳይ ኡባይ ስስሽን ባረና ካልያዋንቶ፥ 46 “ሙሴ ህግያ ታማርስያዋንቱፐ ናገትተ፤ ኡንቱንቱካ፥ አዱሳ ቃምሽያ ማዪደ ዩያናዉ፥ ገያይ ደእያ ሳን ቦንቾ ሳሮታ አካናዉ፥ ዎስያ ጎለን ቦንቾ ኦይድያን ኡታናዉ፥ ሾበቴዳሳን ቦንቾሳ ኮይያዋንታ። 47 ሄዋንቱካ አምአቱዋ ጎልያ ካሎይያዋንታ፤ ባረንታ በሳናዉ ዎሳ አዱስያዋንታ፤ ኡንቱንታ ኢታ ፕርዳይ ናገ” ያጌዳ።