21
አምአትባነ እዝ እሞታ
(ማር. 12:41-44)
1 የሱስ ꬎቁ ጊደ ጼልያ ዎደ፥ ዱረ አሳይ ጌሻ ጎልያን እሞታ ሺሽያ ሚሻ ግዶን ባረንቶ ደእያዋፐ ኡንቱንቱ የግያ ዎደ በኤዳ። 2 ቃይካ እት ህዬሳ አምኤ ምሽራታ ላኡ ሰምበርያ ሄዋን የግያ ዎደ በኢደ፥ 3 “ታ ህንተዉ ቱሙዋ ጋይ፥ ሀ ህዬሳ አምኤ ምሽራታ፥ ኦፐነ ዳሩዋ እማዱ። 4 ሀ አሳይ ኡባይ ባረንቶ ፓላሆዋፐ እሜድኖ፤ ሽን እዛ ባረ ህዬሳተትሃ ዎልቃን ባረዉ ደእያዋ ኡባ እማዱ” ያጌዳ።
ጌሻ ጎሊ ኮለታናዋ የሱስ ካሰቲደ ኦዴዳ
(ማቶሳ 24:1-2፤ ማር. 13:1-2)
5 አ ካልያዋንቱፐ እቱ እቱ፥ “ጌሻ ጎሊ ሎኦ ሹቻንነ ባላ ሺቁዋ እሞታን ሎኤዳዋ” ያግ ሃሳይያ ዎደ የሱስ፥ 6 “ሀዌ ህንተንቱ በእያዌ ኡባይ ኮለተናን፥ ሹቻይ ሹቻ ቦላን ኬለቲደ አተና ዎዲ ያናዋ” ያጌዳ። 7 ኡንቱንቱካ፥ “ታማርስያዎ፥ ስም ሀዌ ሀናናዌ አዉዴ? ቃይካ ሀዌ ሀናናዉ ማላይ አዬ?” ያጊድ ኦቼድኖ።
የሱስ መቱዋ ዎዲነ ናሸቻ ዎዲ ያናዋ ኦዴዳ
(ማቶሳ 24:3-13፤ ማር. 13:3-13)
8 እካ፥ “ኦንነ ባለናዳን ናገትተ፤ ጮራ አሳይ፥ ‘ታን ክርስቶሳ’ ያጊደ ቃይካ፥ ‘ዎዲ ማቴዳ’ ያጊደ ታ ሱንꬃን ያናዋንታ፤ ህንተንቱ ቃይ ኡንቱንታ ካሎፕተ። 9 ኦላ የዉዋነ አሳ ማካላባ ስስያ ዎደ ዳጋሞፕተ፤ ሀዌ ኮይሮ ሀናናዉ በስያዋ ግዶ ድራፐ አትን ዉርሰꬃይ ብራ” ያጌዳ።
10 ሄዋፐ ካሊደ አሳዉ፥ “አሳይ አሳ ቦላ፥ ካዉተꬃይካ ካዉተꬃ ቦላ፥ ደንዳናዋ፤ 11 ዎልቃማ ቢታ ቃꬃይ ሀናናዋ፤ ኮሻይነ ሀርጊ፥ ዱማ ዱማሳን መታናዋ፤ ያሽያ የዉነ ኡባካ ዎልቃማ ማላታይ ሳሉዋፐ ሀናናዋ።
12 “ሀዌ ኡባይ ሀናናፐ ካስያን ቃይ አሳይ ህንተንታ ኦይቃናዋንታ፥ መቶꬃናዋንታ፤ ህን አይሁዳቱዋ ዎሳ ጎለ አሳዉ አꬅ እማናዋንታ፤ ቃሾ ጎለካ ገልሳናዋንታ፤ ካታቱዋ ስንꬃንነ ሞድያዋንቱ ስንꬃን ሺሻናዋንታ፤ ሀዌ ኡባይ ታ ሱንꬃ ጋሱዋን ህንተንታ ጋካናዋ። 13 ሀዌካ ማርካታናዉ ህንተዉ ሎኦ ካጫ ግዳናዋ። 14 ሀዋ ግድያ ድራዉ፥ አይ ዛሩዋ እማኔ ጊደ ኮይሮቲደ ህንተንቱ ኡንኤተና ማላ ሀዋ ዎዛና አꬅተ። 15 ኤቀትያዋንቱ ኡባይ፥ ኤቀታናዉነ ላካናዉ ዳንዳየና ቃላነ አꬎ ጭንጫተꬃ ታን ህንተንቶ እማና። ሉቃሳ 12:11-12 16 ህንተንታ የሌዳዋንቱነ ህንተንቱ እሻቱ፥ ህንተንቱ ዳባቱነ ህንተንቱ ላገꬃቱካ አተናን ህንተንታ አꬅ እማናዋንታ፤ ህንተንቱፐካ እቱዋ እቱዋ ዎꬋናዋንታ። 17 ታ ሱንꬃ ድራዉ አሳ ኡባ ማታን እጸቴዳዋንታ ግዳንታ። 18 የዉዋን ቃይ ህንተንቱ ሁጲያ ብናናፐካ እትናነ ባዩኩ። 19 ምን ኤቂደ ህንተንቱ ሸምፑዋ አሺታ።
የሱስ የሩሳላመ ባየꬃባ ኦዴዳ
(ማቶሳ 24:15-21፤ ማር. 13:14-19)
20 “የሩሳላመ ኦላ አሳን ዶደቴዳ ዎደ፥ እዝ ባየꬃይ ማቴዳዋ ኤርተ። 21 ሄ ዎደ ይሁዳን ደእያዋንቱ ደርያኮ ባቃትኖ፤ ካታማን ደእያዋንቱ ቃይ ሄዋፐ ከስኖ፤ ባላጋርያን ደእያዋንቱካ ያ ካታማኮ ገሎፕኖ፤ 22 ጾሳ ቃላን ጻፈቴዳዌ ኡባይ ፖለታናዳን ሀዌ ሀሉዋ ከስያ ዎድያ። ሆሰ 9:7 23 ቢታ ቦላን ዎልቃማ መቱ ሀናናዋ፤ ሀእ ደእያ አሳ ቦላን ሀንቁ ያናዋ፤ ሄዋ ድራዉ ሄ ዎድያን ሻሃሮዋንቶነ ꬋንꬅያዋንቶ አየ! 24 አሳይ ኡባይ ማሻን ሀይቃናዋንታ፤ ጾሳ ኤረና ጋድያ ኡባቱካ ኦሞዱዋን ባናዋንታ፤ የሩሳላመካ አይሁዳ ግደናዋንቱ ዎዲ ፖለታና ጋካናዉ፥ ኡንቱንቱን የቴዳዉኖ ግዳናዉኑ።
ክርስቶሳ ላኤንꬆ ዩሳ
(ማቶሳ 24:29-31፤ ማር. 13:24-27)
25 “አዋ፥ አገናንነ ጾልንትያ ቦላ ማላታይ ሀናናዋ፤ አባፐነ ቤታ ኮሻፐ ደንዶ ጋሱዋን ቢታ ቦላን ደእያ አሳይ ኡባይ ኡንኤታናዋንታ፤ ህርጋናዋንታ። ኢሳ. 13:10፤ ህዝ. 32:7፤ ኢዩ. 2:31፤ ሳፃ 6:12፣ 13 26 ሳሉዋ ዎልቃይ ኡባይ ቃጽያ *ሳሉዋ ዎልቃይ ኡባይ ቃጼ፦ ሀዋ ጉሳይ፥ በን ዎደ አሳይ፥ ሳሉዋን ደእያ ጾልንቲ ኡባይ አያና ዎልቃና ደኤ ጊደ ቆፔ። ድራዉ አሳይ ያሻንነ አላምያ ቦላ አዬ ያናዌሻ ያጊደ ናጉዋን ዳቡራናዋንታ። 27 ሄ ዎደ አሳ ናአይ ዎልቃንነ ዎልቃማ ቦንቹዋን ሻርያን ይያ ዎደ በአናዋንታ። ዳኔላ 7:13፤ ሳፃ 1:7 28 ህንተንቱካ፥ ሀ የዉ ፖለቱሳ ዶምያ ዎደ፥ ዎዙ ጼቱዋ ድራዉ ስት ጊደ ኤቂተ፤ ፑደ ꬎቁ ጊደ ጼልተ” ጌዳ።
ባላስያ ጌተትያ ምꬃ ሌምሱዋ
(ማቶሳ 24:32-35፤ ማር. 13:28-31)
29 ካሊደካ፥ ሀዋ ያግ ሌምሱዋ ኦዴዳ፥ “ዎደንꬃፐነ ሀራ ምꬃ ኡባፐ ጼልተ፤ 30 ሀይꬃይ አጭና በእያ ዎደ፥ ሄ ዎደ ቦኒ ማቴዳዋ ህንተንቱ ኤሪታ። 31 ሄዋዳንካ ቃይ የዋቱ ፖለትያዋ በእያ ዎደ፥ ጾሳ ካዉተꬃታ ማቴዳዉኖ ኤርተ።
32 “ታን ህንተዉ ቱሙዋ ጋይ፤ ሀዌ ኡባይ ፖለታና ጋካናዉ ሀ የለታይ አና። 33 ሳሉነ ሳአይ አꬋና፤ ሽን ታ ቃላይ አና። 34 ስም ዛዋይ ባይና ደኡዋን፥ ኡሻ ዳሩዋነ ደኡዋባን ኡንኤትሽን ህንተንቱ ዎዛናይ ለፐናዳንነ ሄ ጋላሳይ ጲርያዳን ቆፐናን ህንተና ጋከናዳን ናገትተ፤ 35 ሀዌ ቢታ ኡባን ደእያዋንቱ ኡባቱዋ ቦላን ጋካናዋ። 36 ስም ይያ ኢታባ ኡባፐ ህንተንቱ አታናዳንነ አሳ ናኣ ስንꬃንካ ኤቃናዉ ዳንዳያና ማላ፥ ኡባ ዎደ ምን ዎስተ” ያጌዳ።
37 የሱስ ጋላስ ጋላስ ጌሻ ጎልያን ታማርሲደ፥ ቃማ ቃማ ደብረ ዛይተ ያገትያ ደርያኮ ከሲደ አቄ። 38 አሳይ ኡባይ አ ስሳናዉ ጉራን ያ ጌሻ ጎልያ አኮ ዪኖ።