ጌሻ ማጻፋ ማቶሳ ምሽራቹዋ 3

ጻማቅያ ዮሃንስ ቃላ ኦዴዳ

(ማር. 1:1-8፤ ሉቃሳ 3:1-18፤ ዮሃ. 1:19-28)

1-2 ሄ ዎደ ጻማቅያ ዮሃንስ አሳ፥ “ሳሉዋ ካዉተꬃይ ማታቴዳ ድራዉ፥ ህንተ ናጋራፐ ስምተ” ያጊደ፥ ይሁዳ መላ ቢታን ኦዲደ ዬዳ። 3 አያዉ ጎፐ፥ ናብያ ኢስያሰ፥ ዮሃንሳባ ኦዲደ፥

“እቱ መላ ቢታን ባረ ቃላ ꬎቁ ኦꬂደ፥

‘ጎዳ ኦግያ ጊግስተ።

እ ሄመታና ሎሱዋካ

አዉ ስት ኦꬅተ’ ጌዳ”

ያጌዳ።

4 ዮሃንሳዉ ጋሉዋ እስክያ ዳደቴዳ ማዩ ደኤ፤ ቃይ ባረ ጼሳን ዳፉዋ ዳንጬዳ፤ እ ምያ ቁማይካ ቦልያነ ባዙዋ ኤሳ። 5 አሳይ ሄ ዎደ የሩሳላመፐ፥ ይሁዳ ጋድያ ኡባ ሳፐነ ዮርዳኖሳ ሻፋ ሄራን ደእያ ጋድያ ኡባፐ አኮ ዪኖ። 6 ባረንቱ ናጋራ ፓጽና፥ ዮርዳኖሳ ሻፋን አሳ ጻማቄዳ።

7 ሽን ዮሃንስ ዳሮ ፓርሳዋቱነ * ሳዱቃዋናቱ † ጻማቀታናዉ ባረኮ ይያዋንታ በኢደ፥ “ሀ ሾሻቶ፥ ጾሳ ሀንቁ ያና ሀንያዋፐ አታና ማላ፥ ህንተዉ ኦኔ ኦዴዳዌ? 8 ስም ህንተ፥ ህንተንቱ ናጋራፐ ስሜዳዋ ኤርስያ ኦሱዋ፥ ኦꬅተ። 9 ህንተ ህንተንቱ ዎዛናን፥ ‘አብራሃመ ኑ አባ’ ጊደ ቆፕያዋ ህንተዉ ማላቶፖ። አያዉ ጎፐ፥ ታን ህንተንቶ ኦዳይ፤ ጾሳይ ሀ ሹቻቱዋፐ አብራሃሞ ናና ኦꬅ ደንꬃናዉ ዳንዳዬ። 10 ቤጽ ምꬃ ጻጱዋን ቃንጻናዉ ጊግ ኡቴዳ፤ ሎኦ አይፍያ አይፈና ምꬃ ኡባይ ቃንጸቲደ፥ ታማን የገታና።

11 “ህንተ ህንተንቱ ናጋራፐ ስምያዋ በሳናዉ፥ ታን ህንተና ሃꬃን ጻማቃይ፤ ሽን ታፐ ጉየና ይያዌ፥ ህንተንታ ጌሻ አያናንነ ታማን ጻማቃና። ‡ እ ታፐ ዳሮ ምኔ፤ አ ጫማ ቶካናዉካ ታን በስያ አሳ ግድከ። 12 አ ኩሽያን ካꬃ ሰጽያ ላይዳይ ደኤ። ኡዱማን ደእያ ካꬃ ሎይꬅ ጌሼ፤ ባረ ዛርጋ ድይያን ቆላና፤ ሽን ዳላ ቶኤና ታማን ጉዳና” ያጌዳ።

የሱስ ጻማቀቴዳ

(ማር. 1:9-11፤ ሉቃሳ 3:21-22)

13 የሱስ ሄ ዎደ ዮሃንሳን ጻማቀታናዉ፥ ጋሊላፐ ዮርዳኖሳ ጌተትያ ሻፋ አኮ ቤዳ። 14 ሽን ዮሃንስ፥ “ታን ኔናን ጻማቀታናዉ በስያ ዎደ፥ ኔን ታኮ ያይ?” ያጊደ፥ አ ድጋናዉ ኮዬዳ።

15 ሽን የሱስ ዛሪደ አ፥ “ኑን ጽሎተꬃ ኦሱዋ ኡባ ሀዋዳን ፖላናዉ በስያ ድራዉ፥ ሀእ ታዉ ኤኖ ጋ” ያጌዳ። ዮሃንስካ አዉ ኤኖ ጌዳ።

16 የሱስ ጻማቀቶዋፐ ጉይያን፥ ኤለካ ሃꬃፐ ከሴዳ፤ ሳሉ ዶየትና፥ ጾሳ አያናይ ሀራጵያዳን ሳሉዋፐ ዎꬊደ ባረ ቦላ ይያ ዎደ በኤዳ፤ 17 ቃይ ሳሉዋፐ፥ “ታን ሲቅያ፥ ታና ናሸችያ፥ ታ ናአይ ሀዋ” ያግያ ቃላይ ዬዳ።

3:1-2 ማቶሳ 4:17፤ ማር. 1:15

3:3 ኢሳ. 40:3

3:4 1 ካታ. 1:8

*3:7 ፓርሳዋቱዋ፦ ጉሳይ አይሁዳ አሳቱዋ ካለꬅያ አሳቱዋ ግዶፐ ግዲደ ጌሻ ቃላን ካሰ ኤጫ ጫቁዋ ግዶን ደእያ ቃላ ዎጋ ኡባን አማንያዋንታ።

†3:7 ሳዱቃዋናቱዋ፦ ጉሳይ አይሁዳ አሳቱዋ ካለꬅያ አሳቱዋ ግዶፐ ግዲደ ጌሻ ቃላን ካሰ ኤጫ ጫቁዋ ግዶን ደእያ ቃላ ዎጋፐ ሙሴ ጻፌዳ ኮይሮ እቼሹ ማጻፋቱዋ ግዶን ደእያ ዎጋቱዋ ጻላላን አማንያዋንታ።

‡3:11 ጌሻ አያናንነ ታማን ጻማቃና፥ ጉሳይ የሱስ ዪደ አሳ ጋርሳ አያና አሳተꬃ ላምያዋ ታማርስያዋ።

3:17 ዶመꬃ 22:2፤ ማዝ. 2:7፤ ኢሳ. 42:1፤ ማቶሳ 12:18፤ 17:5፤ ማር. 1:11፤ ሉቃሳ 9:35