1 የሱስ ደርያፐ ዎꬌዳ ዎደ፥ ጮራ አሳይ አ ካሌዳ። 2 ሄ ዎደ ኦሉ *ኦሉ ኦይቄዳ አሳ ቦላይ ቦጼ። ሀዌ ሳክያ አሳይ ሄ ዎደ ደኡዋን አሳና ደእያ ዎጋ ኡባፐ ሻከቲደ ደኤ። ቃይካ ጌሻ ግደና ጌተቲደ ሀራ አሳን ጼሰቴ። ኦይቄዳ እት ብታኒ የሱሳኮ ይ አ ስንꬃን ጉልባቲደ፥ “ጎዳዉ፥ ነ ሸነ ግዶፐ፥ ታና ፓꬃደ ጌሻናዉ ዳንዳያ” ያጌዳ።

3 የሱስ ባረ ኩሽያ የድ አ ቦቺደ፥ “ታን ኮያይ፤ ፓጻደ ጌያ!” ያጌዳ። ኤለካ ኦሉ ብታንያ የድ አጌዳ። 4 የሱስ አ፥ “ስም ሀዋ ኦስነ ኦዶፓ፤ ሽን ቄሳኮ ባደ ነ ፓጻደ ጌዬዳዋ አ በሳ፤ ነ ፓጻደ ጌዬዳዋ አሳ ኤርሳናዉ ሙሴ አዛዜዳ ያርሹዋ ጾሳዉ ያርሻ” ያጌዳ። ዎጋ 14:1-32

5-6 የሱስ ቅፍርናሆማ ካታማ ገሌዳ ዎደ፥ እት ሮማ ጋደ ጼቱዋ ካፑ አኮ ዪደ፥ “ታ ጎዳዉ፥ ታ ቆማ ቦላይ ጉንድና፥ ዳሮ ሳከቲደ፥ ሶይን ግሴዳ፤ ሀያ ጎዶ ታዉ ፓꬃርኪ” ያግ ዎሴዳ።

7 የሱስ፥ “ታን ባደ አ ፓꬃና” ያጌዳ።

8 ሽን ጼቱዋ ካፑ ዛሪደ፥ “ታ ጎዳዉ፥ ኔና ታ ሶይ ገልሳናዉ ታዉ በሰና፤ ሽን ኔን ቃላ ጻላላ ሃሳያ፤ ታ ቆማይ ፓጻናዋ። 9 አያዉ ጎፐ፥ ታን ታፐ ቦላና ደእያዋንቶ ኤኖ ግያ አሳ፤ ቃይ ታፐ ጋርሳና ዎታዳራቱ ደኢኖ። ታን እቱዋ፥ ‘ባ!’ ጎፐ ቤ፤ ቃይ የኩዋ፥ ‘ሃያ!’ ጎፐ ዬ፤ ታ ቆማ፥ ‘ሀዋ ኦꬃ!’ ጎፐ ኦꬄ” ያጌዳ።

10 የሱስ ሄዋ ስሴዳ ዎደ ማላለቲደ፥ ባረና ካልያ አሳ፥ “ታን ህንተዉ ቱሙዋ ኦዳይ፤ ታን ሀዋ ማላ አማኑዋ ሀራይ አቶ፥ እስራኤልያ ጋድያንካ በአበይከ። 11 ጮራ አሳይ አዋይፊ ዶልያ ባጋፐነ ዉልያ ባጋፐ ዪደ፥ አብራሃሞና፥ ይሳቃናነ ያቆባና ሳሉዋ ካዉተꬃ ጋይታን እትፐ ኡታናዋንታ ያጋይ። 12 ሽን ካዉተꬃን ደአናዉ በስያ አሳይ ዎልቃማ ꬉማ ጋርሳ ካረ ኦለታና፤ ሄዋን ኡንቱንቱ ዬካናነ ባረንቱ አቻ ꬋቃናዋንታ” ያጌዳ።

13 ሄዋፐ ካላ የሱስ ጼቱዋ ካፑዋ፥ “ነ ሶይ ባ፤ ኔን አማኔዳዋዳን ነዉ ሀኖ” ያጌዳ፤ ጼቱዋ ካፑዋ ቆማይ ሄ ሳትያንካ ፓጽ አጌዳ።

14 የሱስ ጰጽሮሳ ሶይ ቢደ፥ አ ቦሎታታ ቆጹዋ ሀርጋደ ግሴዳዉኖ በኤዳ። 15 እዝ ኩሽያ የሱስ ቦችና፥ ቆጹ እዞ ባሽ አጌዳ፤ እዛካ ደንዳደ አዉ ምያባ ጊግሳዱ።

16-17 ሳአይ ኦማርሴዳ ዎደ፥ አሳይ ኢታ አያናቱ ኦይቄዳ ጮራ አሳ የሱሳኮ አሄዳ፤ ናብያ ኢስያስ፥ “እ ኑ ዳቡራ ባረዉ አኬዳ፤ ቃይ ኑ ሀርግያካ ቶኬዳ” ያጌዳዌ ፖለታና ማላ፥ የሱስ ኢታ አያናቱዋ ባረ ቃላን ከሲደ፥ ሀርጌዳ አሳ ኡባካ ፓꬄዳ።ኢሳ. 53:4

18 የሱስ ጮራ አሳይ ባረ ዩሹዋን ደእያዋንታ በኢደ፥ አባፐ ሄፍንꬃ ፕናና ማላ፥ ባረና ካልያዋንታ አዛዜዳ። 19 ሄዋፐ ጉይያን ሙሴ ህግያ ታማርስያ እቱ አኮ ዪደ፥ “ታማርስያዎ፥ ኔን ብያሳ ኡባ ታን ኔና ካላና” ያጌዳ።

20 የሱስ አ፥ “ዎራካናቶ ኦላይ ደኤ፤ ካፋቱዋስካ ኬꬃይ ደኤ፤ ሽን ታዉ፥ አሳ ናአዉ፥ ሸምፓ አክያሳይካ ባዋ” ያጌዳ።

21 ቃይ ካልያዋንቱፐ እቱ የሱሳ፥ “ጎዳዉ፥ ታን ስንꬃታ ባደ ታ አባ ሞጋናዉ ባ ያጋርኪ” ያጌዳ።

22 ሽን የሱስ አ፥ “ኔን ታና ካላ፤ ሀይቄዳዋንቱ ባረንቱ አሃ ሞግኖ” ያጌዳ።

23 የሱስ ዎንግርያን ገሎደ፥ አ ካልያዋንቱ አናና ቤድኖ። 24 ቤታይ ዎንግርያ ምታና ጋካናዉ፥ አባን ዎልቃማ ሆቢ ደንዴዳ፤ ሽን የሱስ ገምእሼዳ። 25 አ ካልያዋንቱ አኮ ቢደ፥ ገምእሹዋፐ ደንꬄድኖ፤ ሄዋፐ ስሚደ አ፥ “ጎዳዉ፥ ኑን ꬋዬቶ፤ ኑና አሻርኪ” ያጌድኖ።

26 የሱስ ኡንቱንታ፥ “ሀ አማኑ ፓጬዳዋንቶ፥ አያዉ ያዪቴ?” ያጌዳ። ሄዋፐ ጉይያን ደንዲደ፥ ጎቱዋነ ቤታ አግተ ጊና፥ ጎቱነ ቤታይ ጮኡ ጌዳ።

27 አሳይ ማላለቲደ፥ “ሀዌ ላ ሀራይ አቶ፥ ጎቱነ ቤታይ አዛዘትያዌ አይባ አሴ?” ያጌድኖ።

28 የሱስ ጋሊላ አባፐ ሄፍንꬃን ደእያ ገርገሰኖና ጌተትያ ጋድያ ፕኔዳ፤ ኢታ አያናቱ ኦይቄዳ ላኡ አሳቱ ሄ ጋድያን ደእያዋንቱ ዱፉዋፐ ከሲደ፥ አናና ጋከቴድኖ። ኡንቱንቱ ዳሮ ኢታ ግድያ ድራዉ፥ ኦንነ ሄ ኦግያና አꬋናዉ ዳንዳይቤና። 29 ኡንቱንቱ ባረንቱ ቃላ ꬎቁ ኦꬂደ፥ “ጾሳ ናአዉ፥ ኑናና ነዉ አይ አላሊ ደኢ? ዎዲ ጋከናን ኑና ሙራናዉ ያዲ?” ያጌድኖ።

30 ኡንቱንቱፐ ላፋ ሃክያሳን ጉዱንꬃ ዉዲ ሄመቴ። 31 ኢታ አያናቱ የሱሳ፥ “ኔን ኑና ከስያዋ ግዶፐ፥ ህን ጉዱንꬃ ዉድያ ግዶ የዳርኪ” ያጊደ ዎሴድኖ።

32 የሱስ ኡንቱንታ፥ “ቢተ!” ጊና ኡንቱንቱ ብታናቱዋፐ ከስ ቢደ፥ ጉዱንꬃቱዋን ገሌድኖ። ጉዱንꬃ ዉዲ ኡባይ ካካ ላንቂያና ካጆቲደ፥ አባን ገሊደ፥ ምተት አጌድኖ።

33 ጉዱንꬃ ዉድያ ሄምያዋንቱ ባቃቲደ ካታማ ብ አጌድኖ፤ ቤዳሳን ኢታ አያናቱ ኦይቄዳ አሳቱ ሀኔዳባ ኡባ ኦዴድኖ። 34 ሄዋ ስሴዳ ካታማን ደእያ አሳይ ኡባይ የሱሳና ጋከታናዉ ከሴድኖ፤ አ በኤዳ ዎደ፥ ባረንቱ ጋድያፐ ባና ማላ ዎሴድኖ።