9
የሱስ ቦላይ ጉንዴዳ ብታንያ ፓꬄዳ
(ማር. 2:1-12፤ ሉቃሳ 5:17-26)
1 ሀዋፐ ካላ የሱስ ዎንግርያን ገሊደ፥ አባ ፕኒደ፥ ባረ ካታማ ዬዳ። 2 አማሬዳ አሳይ ቦላይ ጉንዴዳ እት ብታንያ ሻንቻማን ቶኪደ፥ የሱሳኮ አሄድኖ፤ የሱስ ኡንቱንቱ አማኑዋ በኢደ፥ ቦላይ ጉንዴዳ ብታንያ፥ “ታ ናአዉ፥ ያዮፓ፤ ነ ናጋራይ አቶ ጌተቴዳ” ያጌዳ።
3 ህግያ ታማርስያዋንቱፐ እቱ እቱ ባረንቱ ዎዛናን፥ “ላ ሀ ብታኒ ጾሳ ቦላ ኢታባ ሃሳዬቴ!” ያግ ቆፔድኖ።
4 የሱስ ኡንቱንቱ ቆፋ ኤሪደ፥ ኡንቱንታ ሀዋዳን ያጌዳ፤ “ህንተንቱ ህንተ ዎዛናን ሀዋ ማላ ኢታባ አያዉ ቆፒቴ? 5 ‘ነ ናጋራይ አቶ ጌተቴዳ’ ያግያዌ ማቴዬ? ዎይ፥ ‘ደንዳ ኤቃደ ሀመታ’ ያግያዌ ማቴ? 6 ሽን ሳኣ ቦላን ናጋራ አቶ ጋናዉ ታዉ፥ አሳ ናአዉ፥ ማታይ ደእያዋ ታን ህንተና ኤርሳና” ያጊደ፥ ሄዋፐ ጉየ እ ሄ ቦላይ ጉንዴዳ ብታንያ፥ “ደንዳ ኤቃ፤ ያታደ ነ ሻንቻማ ቶካደ፥ ነ ጎለ ባ” ያጌዳ።
7 ጉንዴዳ ብታኒካ ደንድ ኤቂደ፥ ባረ ጎለ ቤዳ። 8 ሽን ዳሮ አሳይ ሄዋ በኢደ ያዬድኖ፤ አሳዉ ሀዋ ማላ ማታ እሜዳ ጾሳ ጋላቴድኖ።
የሱስ ሌዊያ ማቶሳ ጼሴዳ
(ማር. 2:13-17፤ ሉቃሳ 5:27-32)
9 የሱስ ሄዋና አꬊደ፥ ማቶሳ ያግያዌ ቃራጻ ቃንጽያ ሳን ኡቴዳዋ ደሚደ አ፥ “ታና ካላ” ያጌዳ።
ማቶስካ ደንድ ኤቂደ፥ አ ካሌዳ።
10 የሱስ ማቶሳ ጎለን ቁማ ማናዉ ኡት ደእሽን፥ ቃራጻ አክያ ጮራ አሳይነ ናጋራንቻቱ ዪደ፥ አናናነ አ ካልያዋንቱና እትፐ ጋይታን ኡቴድኖ። 11 እት እት ፓርሳዋቱ ሄዋ በኢደ፥ የሱሳ ካልያዋንታ፥ “ህንተና ታማርስያዌ ቃራጻ ቃንጽያዋንቱናነ ናጋራንቻቱዋና ቁማ አያዉ እትፐ ሚ?” ያጌድኖ።
12 ሽን የሱስ ኡንቱንቱ ያግያዋ ስሲደ፥ “ሀርጋንቻቱዋፐ አትን፥ ፓጻቶ አክሚ ኮሸና። 13 ሽን ህንተንቱ ቢደ፥ ጾሳ ማጻፋይ፥ ‘ታን ማሮተꬃ ኮያይፐ አትን፥ ያርሹዋ ኮይከ’ ያግያዌ ዋግያዌንቶ ኤርተ፤ አያዉ ጎፐ፥ ታን ናጋራንቻቱዋ ጼሳናዉ ዬዳዋፐ አትን፥ ጽላቱዋ ጼሳናዉ ያበይከ” ያጌዳ።
ጾማባ ኦቼዳ ኦሻ
(ማር. 2:18-22፤ ሉቃሳ 5:33-39)
14 ሄ ዎደ ዮሃንሳ ካልያዋንቱ የሱሳኮ ዪደ፥ “ኑንነ ፓርሳዋቱ ኡባ ዎደ ጾሜቶ፤ ሽን ኔና ካልያዋንቱ አያዉ ጾምክኖ?” ያጊደ አ ኦቼድኖ።
15 የሱስ ኡንቱንታ፥ “ቡላቻ ዬዳ አሳይ ማቻቶ አክያዌ ባረንቱና ደእሽን፥ ካዮታናዉ ዳንዳዪኖ? ዳንዳይክኖ፤ ሽን ማቻቶ አክያዋ ኡንቱንቱ ማታፐ አፋና ዎዲ ያና፤ ኡንቱንቱ ሄ ዎደ ጾማናዋንታ” ያጌዳ።
16 “ኤጫ ማዩዋ ቦላ ኦራꬃ ፍያ ዎꬂደ ስክያ አሳይ ባዋ፤ አያዉ ጎፐ፥ ኦራꬃ ፊ ኤጫ ማዩዋ ፔሬꬃና፤ ፔꬃይካ ካሰዋፐ ዳራናዋ። 17 ሆኦ ዎይንያ ኤሳ ኤጫ ኦጎሩዋን ናእያ አሳይ ባዋ። ሽን ናኦፐ፥ ሄ ዎይንያ ኤሳይ ኦጎሩዋ ዳካና፤ ባረዉካ ዎፈታና፤ ኦጎሩካ ባያናዋ። ሽን፥ ሆኦ ዎይንያ ኤሳ ኦራꬃ ኦጎሩዋን ናአናዉ በሴ፤ ላኡካ ባይክኖ” ያጌዳ።
ያእሮሳ ናትባነ የሱሳ ማዩዋ ቦቼዳ ምሽራትባ
(ማር. 5:21-43፤ ሉቃሳ 8:40-56)
18 የሱስ ኡንቱንቶ ሄዋ ኦድሽን፥ አይሁደ ዎሳ ጎለ ካፓቱዋፐ እቱ አኮ ይ አ ስንꬃን ጉልባቲደ፥ “ታ ናታ ሀእ ሀይቃዱ፤ ሽን ኔን ያደ ነ ኩሽያ እዝ ቦላ ዎꬃርኪ፤ እዛ ደኡዋን ደአናዉኑ” ያጌዳ።
19 የሱስ ደንዲደ፥ ባረና ካልያዋንቱና እትፐ ብታንያ ካሊደ ቤዳ። 20 ሄ ዎደ ታማነ ላኡ ላይꬃ ኩመንꬃ፥ እዝ ቦላፐ ሱꬃይ ጎግያ እት ምሽራታ ጉየና ሺቃደ፥ የሱሳ ማዩዋ ማጫራ ቦቻዱ። 21 ሀዋ እዛ ኦꬆዌ፥ እዛ ባረ ዎዛናን፥ “ታን አ ማዩዋ ጻላላ ቦቻንቶ ፓጻና” ያጋደ ቆፓዱ።
22 ሽን የሱስ ዩይ እዞ ጼሊደ፥ “ታ ናቴ፥ ያዮፓ፤ ኔና ነ አማኑ ፓꬄዳ” ያጌዳ። ሄ ማንእያን ምሽራታ ፓጻ አጋዱ።
23 የሱስ አይሁዳ ዎሳ ጎለ ካፑዋ ሶይ ጋኬዳ ዎደ፥ ዬኩዋን ድንካ ፑንያ አሳነ ዬክያ አሳ በኢደ፥ 24 “ካረ ከስተ፤ ጉꬃ ናታ ገምእሻዱፐ አትን፥ ሀይቃበይኩ” ያጌዳ። ሄዋፐ ጉይያን አሳይ አ ቦላ ዳሪ ሚጬዳ። 25 ሽን ጮራ አሳ ካረ እ ከሴዳዋፐ ጉይያን፥ ጎለ ገሊደ፥ ናት ኩሽያ ኦይቄዳ፤ ናታካ ደንዳ አጋዱ። 26 ሄ ዋሪ፥ ሄ ማንእያን ሄ ጋድያን ኡባን ስሰቴዳ።
የሱስ ላኡ ቆቃቱዋ ፓꬄዳ
27 የሱስ ሄዋና አꬊደ ብያ ዎደ፥ ላኡ ቆቃቱ ባረንቱ ቃላ ꬎቁ ኦꬂደ፥ “ዳዊተ ናአዉ፥ ኑና ማራርኪ” ያጊደ አ ካሌድኖ።
28 የሱስ ጎለ ገሌዳ ዎደ፥ ቆቃቱ አኮ ዬድኖ፤ የሱስ ኡንቱንታ፥ “ታን ሀዋ ኦꬃናዉ ዳንዳይያዋ አማኒቴ?” ያጌዳ።
ኡንቱንቱ፥ “ኤ ጎዳዉ” ያግ ዛሬድኖ።
29 ሄዋፐ ጉይያን፥ የሱስ ኡንቱንቱ አይፍያ ባረ ኩሽያን ቦቺደ ኡንቱንታ፥ “ህንተዉ ህንተንቱ አማኑዋዳን ሀኖ” ያጌዳ። 30 ኡንቱንቱ አይፊ ዶየት አጌዳ፤ የሱስ ኡንቱንቶ፥ “ሀዋ ኦስነ ኦዶፕተ” ያጊደ ምንሲደ ኦዴዳ። 31 ሽን ኡንቱንቱ ቢደ፥ ሄ ጋድያ ኡባን የሱሳባ ኦዴድኖ።
የሱስ እት ዱድያ ፓꬄዳ
32 ኡንቱንቱ ከሲደ ብያ ዎደ፥ አማሬዳ አሳይ ኢታ አያናይ ኦይቂና ዱዴዳ ብታንያ የሱሳኮ አሄድኖ። 33 የሱስ ኢታ አያና ከሴዳዋፐ ጉይያን፥ ዱደ ብታኒ ሃሳዬዳ። አሳይ፥ “ሀዌ ኦራꬃባ፤ ሀዋ ማላባይ እስራኤልያ ጋድያን ኡባካ ሀንቤና” ያግ ማላለቴድኖ።
34 ሽን ፓርሳዋቱ፥ “እ ኢታ አያናቱዋ ካፑዋ ዎልቃን ጻላሀቱዋ ከሴ” ያጌድኖ። 10:25፤ 12:24፤ ማር. 3:22፤ ሉቃሳ 11:15
የሱስ አሳዉ ቃረቴዳ
35 የሱስ ኡንቱንታ አይሁዳ ዎሳ ጎለቱዋን ታማርሲደነ ካዉተꬃ ዎንጋላ ምሽራቹዋ ኦዲደ፥ ቃይ ሀርግያ ኡባፐነ ሳኩዋ ኡባፐ አሳ ፓꬂደ፥ ዎጋ ካታማቱዋንነ ቄር ካታማቱዋ ኡባን ዩዬዳ። ማቶሳ 4:23፤ ማር. 1:39፤ ሉቃሳ 4:44 36 ጮራ አሳ በኢደ፥ ሄምያ አሳይ ባይና ዶርሳዳን አሳይ ህርገትያ ድራዉነ አሳ ማድያባይ ባይና ድራዉ፥ አሳዉ ቃረቴዳ። ፓይ. 27:17፤ 1 ካታ. 22:17፤ 2 ኦዱዋ 18:16፤ ህዝ. 34:5፤ ማር. 6:34 37 ያቲደ ባረና ካልያዋንታ፥ “ቆይቻዉ ጋካ ካꬃይ ዳራ፤ ሽን ጫክያ አሳይ ጉꬃ። 38 ስም ካꬃ ጎዳይ ካꬃ ጫካናዉ ኦሳንቻቱዋ የዳና ማላ፥ አ ዎስተ” ያጌዳ።