10
የሱስ ኪቴዳ ታማነ ላኡ አሳቱዋባ
(ማር. 3:13-19፤ ሉቃሳ 6:12-16)
1 የሱስ ባረ ታማነ ላኡ ካልያዋንታ ጼሲደ፥ ኡንቱንቱ ኢታ አያና ከሳና ማላ፥ ቃይ ሀርግያ ኡባነ ሳኩዋ ኡባ ፓꬃና ማላ፥ ኡንቱንቶ ማታ እሜዳ። 2 የሱስ ኪቴዳ ታማነ ላአቱዋ ሱንꬃይ፥ ኮይሮዌ ጰጽሮሳ ጌተትያ ስሞናነ አ እሻ እንድራሳ፥ ዛብድዮሳ ናና፥ ያቆባነ ዮሃንሳ፥ 3 ፕልጶሳ፥ ባርታላሞሳ፥ ቶማሳ፥ ቃራጻ አክያ ማቶሳ፥ እልፕዮሳ ናኣ ያቆባነ ታዶሳ፤ 4 ባረ ጋደዉ ቃረትያ ስሞናነ የሱሳ አꬅ እሜዳ አስቆሮቱ ይሁዳ።
የሱስ ኪቴዳ ታማነ ላአቱ ታማርሳናዉ ኪተቴድኖ
(ማር. 6:7-13፤ ሉቃሳ 9:1-6)
5 የሱስ ሀ ታማነ ላአቱዋ ሀዋዳን ያጊደ ኪቴዳ፤ “አይሁዳ ግደና አሳ ጋድያ ቦፕተ፤ ቃይ ሳማረቱዋ ካታማካ ገሎፕተ፤ 6 ሄዋ ድራ ባዬዳ ዶርሳኮ፥ እስራኤልያ አሳኮ 7 ቢደ፥ ‘ሳሉዋ ካዉተꬃይ ማቴዳ’ ያጊደ ኦድተ። ሉቃሳ 10:4-12 8 ሀርጋንቻቱዋ ፓꬅተ፤ አሃ ሀይቁዋፐ ደንꬅተ፤ ኦሉ ኦይቄዳዋንታ ፓꬅተ፤ ኢታ አያናቱዋካ ከስተ። ህንተንቱ ጮ አኬድታ፤ ጮ እምተ። 9 ዎርቃ ዎይ ብራ ዎይ ሳንትምያ ህንተንቱ ኪስያን ኦይቆፕተ፤ 10 ዎይ ኦገዉ ቃርጪትያ፥ ዎይ ላኤንꬅያ ማዩዋ፥ ዎይ ጫማ ዎይ ጻምኣ ኦይቆፕተ። አያዉ ጎፐ፥ ኦሳንቻዉ ኮሽያባይ ቁማ። 1 ቆሮ. 9:14፤ 1 ጽሞ. 5:18
11 “ህንተንቱ ገልያ ካታማን ዎይ ቄር ካታማ ኡባን ህንተና ሞካናዉ ናሸትያዌ ኦነንቶ አኬካን ጾሞስተ፤ ህንተንቱ ሄዋፐ ከሳና ጋካናዉ፥ ሄዋን ኡትተ። 12 ቃይ ጎለ ገሊደ ሳሮትተ። 13 ሄ ጎለን ደእያ አሳይ ህንተና ሞኮፐ፥ ህንተንቱ ሳሮቴዳ ሳሮታይ ኡንቱንታ ጋኮ። ሽን ኡንቱንቱ ህንተና ሞከናን እጾፐ፥ ህንተንቱ ሳሮቴዳ ሳሮታይ ህንተዉ ጉየ ስሞ። 14 ቃይ እት እት ጎሊ ዎይ ካታማይ ህንተና ሞከናን ዎይ ህንተንቱ ኦድያዋ ስሰናን እጾፐ፥ ሄ ጎለፐ ዎይ ሄ ካታማፐ ከሲደ፥ ህንተንቱ ገድያፐ ባና ሾጭተ። 15 ታን ህንተዉ ቱሙዋ ኦዳይ፤ ጾሳይ ፕርድያ ጋላስ ሄ ካታማ አሳፐ፥ ሶዶማ ካታማ አሳዉነ ጋሞራ ካታማ አሳዉ ፕርዳ ካዉሽሳና። ማቶሳ 11:24፤ ዶመꬃ 19:24-28
ጎዳይ ያናፐ ካሰቲደ፥ የደርሱነ መቱ ሀናና
(ማር. 13:9-13፤ ሉቃሳ 21:12-17)
16 “በእተ! ታን ህንተና ዶርሳ ዋላቱዋ ግዶ የድያዋዳን የዳይ። ሄዋ ድራዉ፥ ሾሻዳን ጭንጫ ግድተ፤ ቃይ ሀራጵያዳን፥ አሽከ ግድተ። 17 ሽን አሳፐ ናገትተ። አያዉ ጎፐ፥ አሳይ ህንተና ፕርዳ ጎለዉ አꬂደ እማና፤ ቃይ ባረ አይሁዳ ዎሳ ጎለቱዋንካ ህንተና ልሱዋን ፔዳና። ማር. 13:9-11፤ ሉቃሳ 12:11-12፤ 21:12-15 18 ጋድያ አይስያዋንቱ ስንꬃንነ ካታቱዋ ስንꬃን ታ ድራዉ ህንተንቱ ኤቂደ፥ ኡንቱንቶነ አይሁዳ ግደና አሳ ስንꬃን ታዉ ማርካ ግዳንታ። 19 ሽን ኡንቱንቱ ህንተና ፕርዳዉ አꬅያ ዎደ፥ ህንተንቱ ሃሳያናባ ሄ ሳትያን ጾሳይ ህንተዉ እምያ ድራዉ፥ ህንተንቱ ጋናባዉነ ዎይ ዋጊደ ሃሳያነንቶነ ህርጎፕተ። 20 አያዉ ጎፐ፥ ህንተንቱን አቂደ ሃሳይያዌ ህንተንቱ አዉዋ ጌሻ አያናፐ አትን፥ ሃሳይያዋንቱ ህንተንታ ግድክታ።
21 “እሻይ ባረ እሻ፥ አዉ ባረ ናኣ ቦላ ደንዳና፤ ናናይ ባረንቱ አትነ አዉዋ ቦላ ደንዲደ፥ ኡንቱንታ ዎꬍሳና። 22 ቃይ አሳይ ኡባይ ህንተንታ ታ ሱንꬃ ድራዉ እጻና፤ ሽን ዉርሰꬃይ ጋካናዉ ገንጭያዌ አታናዋ። 23 ኡንቱንቱ ህንተና እት ካታማፐ የደርሶፐ፥ ሀራ ካታማ ቢተ። አያዉ ጎፐ፥ ታን ህንተዉ ቱሙዋ ጋይ፤ ታን፥ አሳ ናአይ፥ ያና ጋካናዉ፥ ህንተንቱ ህንተ ኦሱዋ እስራኤልያ ካታማ ኡባን ኦꬂደ ዉርስክታ።
24 “ታማርያዌ ባረና ታማርስያዋፐ ዳረና፤ ቆማይካ ባረ ጎዳፐ ዳረና። 25 ታማርያዌ ባረና ታማርስያዋ ኬና ግድያዌ፥ ቆማይካ ባረ ጎዳ ኬና ግድያዌ አዉ ግዳና፤ ኡንቱንቱ ጎለ ጎዳ ብኤል-ዘቡላ ጊደ ጼሶፐ፥ አ ጎለ አሳ ዋግ ጼሳኔሻ!
ኦስ ያያናዉ በስንቶ
(ሉቃሳ 12:2-7)
26 “ስም አሳዉ ያዮፕተ፤ አያዉ ጎፐ፥ ገንꬅ ዎꬄዳባይ ቆንጭያ ከሰናን አተና፤ ቆሴዳባይካ ኤረተናን አተና። 27 ታን ህንተንቶ ꬉማን ኦድያባ ፖኡዋን ሃሳይተ፤ ህንተዉ ሀይꬃን ሳሱኪደ ኦዴዳዋ፥ ꬎቃሳን አዋይተ። 28 አሹዋ ዎꬍያዋንቶ ያዮፕተ፤ ኡንቱንቱ፥ ሸምፑዋ ዎꬋናዉ ዳንዳይክኖ። ሽን ሸምፑዋነ አሹዋ ጋናምያን ꬋይሳናዉ ዳንዳይያ ጾሳዉ ያይተ። 29 ላኡ ሱንያ ካፋቱ ሳንትምያን ዛልኤትክኖ? ህንተንቱ አዉዋ ሸንያ ግዳና ꬋዮፐ፥ ሄ ሱንያ ካፋቱዋፐ እትናካ ሳኣን ዎꬋደ ባዩኩ። 30 ሽን ሀራይ አቶ፥ ህንተንቱ ሁጲያን ደእያ ብናናይ ኡባይካ ፓይዱዋን ደኤ። 31 ስም ያዮፕተ፤ ዳሮ ሱንያ ካፋቱዋፐ ህንተንቱ አꬊታ።
ክርስቶሳባ ማርካታናዉ በሴ
(ሉቃሳ 12:8-9)
32 “ሄዋ ድራዉ፥ አሳ ስንꬃን ታባ ማርካትያ ኦስ ግዶፐነ፥ ታንካ ሳሉዋን ደእያ ታ አቡ ስንꬃን ማርካታና፤ 33 ሽን አሳ ስንꬃን ታና ካድያ ኦናነ ታንካ ቃይ ሳሉዋን ደእያ ታ አቡ ስንꬃን አ ካዳና። 2 ጽሞ. 2:12
34 “ታን ሳአዉ ሳሮተꬃ አሀናዉ ዬዳዋ ህንተዉ ማላቶፖ፤ ታን ቶራ አሀናዉ ዬዳዋፐ አትን፥ ሳሮተꬃ አሀናዉ ያበይከ። 35 አያዉ ጎፐ፥ ታን ናኣ አ አቡፐ፥ ናቶ እዝ ዳይፐ፥ ናኣ ማቻቶካ እዝ ቦሎታትፐ ሻካናዉ ያድ፤ ሚክ. 7:6 36 አሳዉ ሞርከቱ አ ጎለ አሳቱዋ ግዳናዋንታ።
37 “ባረ አባ ዎይ ባረ ዳዮ ታፐ አꬂደ ሲቅያዌ ታዋ ግዳናዉ በሰና፤ ባረ አቱማ ናኣ ዎይ ባረ ማጫ ናቶ ታፐ አꬂደ ሲቅያዌ ታዋ ግዳናዉ በሰና። 38 ባረ ማስቃልያ ቶኪደ፥ ታ ጌዱዋ ካለናዌ ታዋ ግዳናዉ በሰና። 39 ባረ ሸምፑዋ አሽያዌ ባይዛናዋ፤ ሽን ታ ድራዉ ባረ ሸምፑዋ ባይዝያዌ አሻናዋ።
40 “ህንተንታ ሞክያዌ ታና ሞኬ፤ ቃይ ታና ሞክያዌ ታና ኪቴዳዋ ሞኬ። 41 ናብያ፥ ናብያ ሱንꬃን ሞክያዌ፥ ናብያ ጋትያ አናና ግሸታናዋ፤ ቃይ ጽሉዋ፥ ጽሉዋ ሱንꬃን ሞክያዌ፥ ጽሉዋ ጋትያ አናና ግሸታናዋ። 42 ኦንነ ሀ ታና ካልያዋንቱፐ ጉጽያ እቶ፥ ሀራይ አቶ ቡልያ ሃꬃ ጻላላ ኡሻናዉ እሞፐካ፥ ታን ህንተንቶ ቱሙዋ ጋይ፤ እ ባረ ጋትያ አካና” ያጌዳ።