11
ጻማቅያ ዮሃንሳፐ የሱሳኮ ኪተቴዳ አሳቱዋ
(ሉቃሳ 7:18-35)
1 የሱስ ባረ ታማነ ላኡ ካልያዋንታ አዛዝያዋ ፖሌዳ ዎደ፥ ሄዋፐ ደንዲደ፥ ካታማቱዋን ታማርሳናዉነ ኦዳናዉ ቤዳ።
2 ጻማቅያ ዮሃንስ ቃሾ ጎለን ደኢደ፥ የሱስ ኦꬄዳዋ ስሲደ፥ ባረና ካልያዋንታ አኮ ኪቲደ፥ 3 “ያናዌ ኔኔየ? ዎይ ሀራ ናጋኔ?” ያግ ኦቻናዳን ኦꬄዳ።
4 የሱስ ዛሪደ፥ ኡንቱንቶ ሀዋዳን ያጌዳ፤ “ቢደ ህንተንቱ በእያዋነ ስስያዋ ዮሃንሳዉ ኦድተ፤ 5 ቆቃቱ ጼሊኖ፤ ዎባቱ ሀመቲኖ፤ ኦሉ ኦይቄዳዋንቱ ፓጺደ ጌዪኖ፤ *ፓጺደ ጌዪኖ ግያዋ ሎይꬅ አኬካናዉ 8:2 ጻደና ደእያ ብለꬃን ጻፈቴዳዋ በአና ዳንዳየቴ። ቱላቱ ስሲኖ፤ ሀይቄዳዋንቱ ደንዲኖ፤ ህዬሳቱ ዎንጋላ ምሽራቹዋ ስሲኖ። ኢሳ. 35:5-6፤ 61:1 6 ታባ ስና ኡራይ አንጀቴዳዋ” ያጌዳ።
7 ዮሃንሳ ካልያዋንቱ ስም ቤዳ ዎደ፥ የሱስ ዮሃንሳባ ሺቄዳ አሳዉ ሀዋዳን ያግ ሃሳዬዳ፤ “አያ በአናዉ አሳይ ደኤና መላ ቢታ ከሴድቴ? ጫርኩ ቃꬅያ ማቃ በአናዉ ከሴድቴ? 8 ያትና፥ አያ በአናዉ ከሴድቴ? ሎእያ ማዩዋ ማዬዳ ብታንያ በአናዉ ከሴድቴ? ሎእያ ማዩዋ ማዬዳዋንቱ ካታቱዋ ጎለን ደኢኖ። 9 ያትና፥ አያ በአናዉ ከሴድቴ? ናብያ በአናዉ ከሴድቴ? ኤ፥ ታን ህንተዉ ኦዳይ፤ ናብያፐካ አꬍያዋ በኤድታ። 10 አያዉ ጎፐ፥ ጾሳ ማጻፋን፥
“ ‘ጾሳይ፥ “በአ፥ ታን ኪትያዋ
ኔፐ ስንꬃዉ የዳና።”
እ ነዉ ኦግያ ጊግሳናዋ’ ያጌዳ
ጌተቲደ ዮሃንሳባይ ጻፈቴዳ።”ሚልክ. 3:1
11 ታን ህንተንቶ ቱሙዋ ኦዳይ፤ አት ኡሉዋፐ የለቴዳ አሳ ኡባን ጻማቅያ ዮሃንሳፐ አꬍያዌ ኦንነ ደንድቤና፤ ሽን ሳሉዋ ካዉተꬃን ኡባፐ ላፍያዌ አፐ አꬋና። 12 ጻማቅያ ዮሃንሳ ዎድያፐ ዶሚደ፥ ሀቼ ጋካናዉ፥ ሳሉዋ ካዉተꬃታ ዳሮ ናቀታዉ፤ ምን ባጸትያዋንቱ እዞ ደሚኖ። 13 አያዉ ጎፐ፥ ናባቱ ኡባቱነ ሙሴ ህጊ ዮሃንሳ ዎዲ ጋካናዉ፥ ትምቢትያ ሃሳዬድኖ፤ 14 ስም ህንተንቱ ኡንቱንቱ ሃሳዮዋ አማናናዋ ግዶፐ፥ ያናዋ ጌተቴዳ ኤላስ ሀ ዮሃንሳ። ሚልክ. 4:5፤ ማቶሳ 17:10-13፤ ማር. 9:11-13 15 ስስያ ሀይꬃይ ደእያዌ ስሶ!
16 “ሽን ታን ሀ ዎድያ አሳ አያና ሌምሶ? ኡንቱንቱ ቆጫን ኡትያ ናና ማላቲኖ፤ ኡንቱንቱ ባረንቱ ላገꬃቱዋ ጼሲደ፥ 17 ‘ኑን ህንተንቶ ህጽጽያ ፑኔዶ፤ ሽን ዱርበይክታ፤ ዬኩዋ የꬃካ ከሴዶ፤ ሽን ዬክበይክታ’ ያጊኖ። 18 አያዉ ጎፐ፥ ዮሃንስ ጾሚደነ ዎይንያ ኤሳ ኡሸናን ዪና ኡንቱንቱ፥ ‘አ ቦላ ኢታ አያናይ ደኤ’ ያጌድኖ። 19 ታን፥ አሳ ናአይ፥ ማደነ ኡሻደ ዪና፥ ኡንቱንቱ ታና፥ ‘ሀ ናፍሳማነ ዎይንያ ኤሳ ኡሽያዋ በእተ፤ ቃራጻ ቃንጽያዋንቱናነ ናጋራንቻቱዋና ሲቀቴ’ ያጊኖ፤ ሽን ጾሳ አꬌዳ ኤራተꬃይ ባረ ኦሱዋን ቱማ ግዲደ ቤቴ” ያጌዳ።
አማነናን እጼዳ ድራዉ ቶሸቴዳ ካታማቱዋ
(ሉቃሳ 10:13-15)
20 ሄዋፐ ጉይያን፥ የሱስ ባረ ማላታፐ ዳርያ ባጋ ኦꬄዳ ካታማቱዋን ደእያ አሳይ ባረንቱ ናጋራፐ ስምቤና ድራዉ፥ ኡንቱንታ ሀዋዳን ያጊደ፥ ቶሽያ ዶሜዳ፤ 21 “ኮራዚነ ካታማዉ፥ ነዉ አየሮ፤ ቤተሳይዳ ካታማዉ፥ ነዉካ አየሮ፤ አያዉ ጎፐ፥ ህንተንቱ ቦላ ጾሳይ ኦꬄዳ ማላታይ ጺሮሳ ካታማንነ ሲዶና ካታማን ኦሰቶዋ ግድንቶ፥ ኡንቱንቱ ማቅያ ማዪደ፥ ብድንꬃ ኦከቲደ፥ በን ባረንቱ ናጋራፐ ስማናዋንታሽን። ኢሳ. 23:1-18፤ ህዝ. 26:1—28:26፤ ኢዩ. 3:4-8፤ አሞጻ 1:9-10፤ ዛካ. 9:2-4 22 ታን ህንተዉ ኦዳይ፤ ፕርዳ ጋላስ ጾሳይ ህንተፐ ጺሮሳ ካታማዉነ ሲዶና ካታማዉ ፕርዳ ካዉሽሳና። 23 ቃይ ቅፍርናሆማ ካታማዉ፥ ኔን ሳሉዋ ፑደ ꬎቁ ጋናዉ ኮያድ? ኔን ስኦልያ ዱገ የገታና፤ አያዉ ጎፐ፥ ነ ቦላ ጾሳይ ኦꬄዳ ማላታይ ሶዶማ ካታማን ኦሰቶዋ ግድንቶ፥ ሶዶማ ካታማይ ሀቼ ጋካናስካ ደአናዋሽን። ኢሳ. 14:13-15፤ ዶመꬃ 19:24-28 24 ታን ህንተዉ ኦዳይ፤ ፕርዳ ጋላስ ጾሳይ ኔፐ ሶዶማዉ ፕርዳ ካዉሽሳና” ያጌዳ።
የሱሳን ሸምፑዋ ደምያዋ
(ሉቃሳ 10:21-22)
25 የሱስ ሄ ዎደ ዛሪደ፥ ሀዋዳን ያጌዳ፤ “ታ አቦ፥ ሳሉዋ ሳኣ ጎዳዉ፥ ኔን ሀዋ አꬌዳ ኤራንቻቱዋፐነ አኬካንቻቱዋፐ ገንꬃደ፥ ኤረና ናናቶ ቆንጭሴዳ ድራዉ፥ ኔና ጋላታይ፤ 26 ኤ ታ አቦ፥ አያዉ ጎፐ፥ ሀዌ ነ ሸንያዳን ኦሰቴዳ።
27 “ታ አቡ ታዉ ኡባባ እሜዳ፤ አዉዋፐ ሀራይ ናኣ ኤረና፤ ናኣፐነ ናአይ አዉዋ ቆንጭሳናዉ ኮይያ አሳፐ አትን፥ ሀራይ አዉዋ ኤረና።
28 “ዳቡራንቻቶ፥ ዴጹዋ ቶኮዋንቶ ኡባቶ፥ ታኮ ሃ ዪተ፤ ታን ህንተንታ ሸምፕሳና። 29 ታን ጋራነ ታ ዎዛናን አሽከ ግዶ ድራዉ፥ ታ ሞርገ ምꬃን ዋጸትተ፤ ታፐ ታማርተ፤ ህንተንቱ ሼምፖካ ህንተ ሸምፑዋ ደማና። ኤር. 6:16 30 አያዉ ጎፐ፥ ታ ሞርገ ምꬃይ ጊጋ፤ ቃይ ታን ህንተንታ ቶሴዳዌካ ካዉሻ” ያጌዳ።