14
ጻማቅያ ዮሃንሳ ሀይቁዋ
(ማር. 6:14-29፤ ሉቃሳ 9:7-9)
1 ሄ ዎደ ጋሊላ ጋድያ አይስያ ሄሮድሰ የሱሳባ ስሴዳ፤ 2 ያቲደ ባረ ቆማቶ፥ “ሀዌ ሀይቁዋፐ ደንዴዳ ጻማቅያ ዮሃንሳ፤ ጾሳይ ኦꬅያ ዎልቃማ ማላታ እ ኦꬅያዌ ሄዋሳ” ያጌዳ።
3 አያዉ ጎፐ፥ ሄሮድስ ባረ እሻ ፕልጶሳ ማቻት ሄሮድያድ ጋሶታን ዮሃንሳ ኦይꬅ ቃሽሲደ፥ ቃሾ ጎለን የግ ዎꬄዳ። 4 አያዉ ጎፐ፥ ዮሃንስ ሄሮድሳ፥ “ኔን ሄሮድያዶ፥ ነ እሻ ማቻቶ አካናዉ ህጊ ድጌ” ያጌዳ። ዎጋ 18:16፤ 20:21 5 ሄሮድስ ዮሃንሳ ዎꬋናዉ ኮዬዳ፤ ሽን ይሁዳ አሳይ ናብያዳን ዮሃንሳ ጼሌዳ ድራዉ፥ አሳዉ ያዬዳ።
6 ሽን ሄሮድስ የለቴዳ ጋላሳ ባላይ ጋክና፥ ሄሮድያድ ናታ አሳ ስንꬃን ዱራደ ሄሮድሳ ናሸቻዉ። 7 ሄሮድስ ናቶ፥ “ኔና ሎኤዳዋ አያነ ግዶፐ፥ ታና ኦቻ፤ ታን ነዉ እማና” ያጊደ እዝዉ ጫቄዳ። 8 ናታ ባረ ዳይ ዞርያ አካደ ሄሮድሳ፥ “ጻማቅያ ዮሃንሳ ሁጲያ ሀ ዎጪትያን ዎꬃደ ታዉ እማ” ያጋዱ። 9 ካቲ አዉ ቃረቴዳ፤ ሽን ባረ ጫቁዋ ድራዉነ ባረናና ማዳን ኡቴዳ እማꬃ ድራዉ፥ እዝዉ ዮሃንሳ ሁጲ እመታና ማላ አዛዜዳ። 10 ካቲ ኪቲደ፥ ዮሃንሳ ቆꬍያ ቃሾ ጎለን ሙጭሴዳ። 11 ሁጲያ ዎጪትያን ዎꬅ አሂደ፥ ናትዉ እሜድኖ፤ ናታ ሄ ሁጲያ ባረ አትኮ አፋዱ። 12 ዮሃንሳ ካልያዋንቱ ዪደ፥ አ አሃ አፊደ ሞጌድኖ፤ ሄዋፐ ስሚደ ሀ የዉዋ የሱሳዉ ቢደ ኦዴድኖ።
የሱስ እቼሹ ሻአ አሳ ምዜዳ
(ማር. 6:30-44፤ ሉቃሳ 9:10-17፤ ዮሃ. 6:1-14)
13 የሱስ ሄዋ ስሲደ፥ ዎንግርያን ገሊደ፥ ሄዋፐ ባረካ አሳይ ባይናሳ ቤዳ፤ አሳይ ሄዋ ስሲደ፥ ካታማፐ ደንዲደ፥ ገድያን አ ካሌድኖ። 14 የሱስ ዎንግርያፐ ከሴዳ ዎደ፥ ዳሮ አሳ በኢደ፥ ሄ አሳዉ ቃረቴዳ፤ ያቲደ ኡንቱንቱና ደእያ ሀርጋንቻቱዋ ፓꬄዳ።
15 ሳአይ ኦማርስያ ዎደ፥ የሱሳ ካልያዋንቱ አኮ ዪደ፥ “ሀዌ ሳአይ አሳይ ባይናሳ፤ ሀእ ሳአይ ቃም ድጌዳ፤ አሳይ ኡባይ ቄር ካታማቱዋ ቢደ፥ ባረንቶ ቁማ ሻማና ማላ፥ አሳ ሞይዛ” ያጌድኖ።
16 ሽን የሱስ ኡንቱንታ፥ “አሳይ ባናዉ ኮሸና፤ አሳዉ ሜተትያባ ህንተንቱ እምተ” ያጌዳ።
17 ኡንቱንቱ ዛሪደ አ፥ “ኑዉ ሀዋን እቼሹ ኡክꬃፐነ ላኡ ሞልያፐ አትን፥ ሀራይ ባዋ” ያጌድኖ።
18 የሱስ ኡንቱንታ፥ “ሄዋንታ፥ ሃ ታኮ አህተ” ያጌዳ። 19 አሳይ ማታን ኡታና ማላ፥ የሱስ አዛዜዳ፤ እቼሹ ኡክꬃነ ላኡ ሞልያ ኦይቂደ፥ ሳሉዋ ፑደ ጼሊደ፥ ጾሳ ጋላቴዳ፤ ሄ ኡክꬃ መንꬂደ፥ ባረና ካልያዋንቶ እምና፥ ኡንቱንቱ ጮራ አሳዉ ግሼድኖ። 20 አሳይ ኡባይ ሚደ ካሌዳ፤ አቴዳ ሱፓ ዶካ ታማነ ላኡ ዛምቤልያ ኩሜዳዋ ደንꬄድኖ። 21 ሜዳ አሳይ ማጫ አሳነ ናና ፓይደናን፥ እቼሹ ሻኣ ግድያዋ ኬና።
የሱስ አባ ቦላና ሀመቲደ ቤዳ
(ማር. 6:45-52፤ ዮሃ. 6:15-21)
22 የሱስ ጮራ አሳ ሞይዚደ፥ ባረና ካልያዋንታ ዎንግርያን ገሊደ፥ ባረፐ ስንꬃቲደ፥ አባፐ ሄፍንꬃ ፕናና ማላ አዛዜዳ። 23 አሳ ሞይዚደ፥ ጾሳ ዎሳናዉ ደርያ ሁጲያ ባረካ ከሴዳ፤ ሳአይ ቃም ድግናካ ሄዋን ባረካ ደኤ። 24 ሽን ዎንግሪ ሄ ዎደ፥ አባ ቦላን ደእሽን፥ ስንꬃ ባጋና ጫርኩ ጫርክያ ድራዉ፥ ቤታይ ዎንግርያ ያነ ሃነ ሱጌ።
25 ባይራ ኩቱ ዋስ ስምና፥ የሱስ አባ ቦላ ሀመቲደ፥ ኡንቱንቱኮ ዬዳ። 26 አ ካልያዋንቱ አባ ቦላ እ ሀመትሽን በእ ዳጋሚደ፥ “ሀዌ ሞይትልያ ግደኔ!” ግ ያዪደ ዋሴድኖ።
27 ሽን የሱስ ኤለካ ኡንቱንታ፥ “አይነ ባዋ፤ ታናተ፤ ያዮፕተ!” ያጌዳ።
28 ጰጽሮስ ዛሪደ አ፥ “ታ ጎዳዉ፥ ሀዌ ኔና ግዶፐ፥ ታን ሃꬃ ቦላና ኔኮ ባና ማላ፥ ታና አዛዛርኪ” ያጌዳ።
29 የሱስ ጰጽሮሳ፥ “ሃያ!” ያጌዳ።
ጰጽሮስ ዎንግርያፐ ዎꬊደ፥ ሃꬃ ቦላና ሀመቲደ፥ የሱሳኮ ቡሳ ዶሜዳ። 30 ሽን ጫርኩዋ ዎልቃ በኢደ፥ ያዬዳ፤ ሃꬃይ ባረና ምቱዋ ዶሜዳ ዎደ፥ ባረ ኮሻ ꬎቁ ኦꬂደ፥ “ታ ጎዳዉ ታና አሻርኪ!” ያግ ዋሴዳ።
31 ሄ ማንእያን የሱስ ባረ ኩሽያ የድ ጰጽሮሳ ኦይቂደ፥ “ላ ሀ አማኑ ላፌዳዎ! አያዉ ስꬋዲ?” ያጌዳ።
32 ኡንቱንቱ ላኡ ዎንግርያን ገሌዳ ዎደ፥ ጫርኩ ዎፑ ጌዳ። 33 ዎንግርያ ግዶን ደእያ አ ካልያዋንቱ የሱሳ፥ “ኔን ጾሳ ናኣ ግዴዳዌ ቱማ” ያጊደ አዉ ጎይኔድኖ።
የሱስ ገንሳሬጸን ሀርጋንቻ ፓꬄዳ
(ማር. 6:53-56)
34 ኡንቱንቱ አባ ፕኒደ፥ ገንሳሬጻ ጌተትያ ጋድያ ጋኬድኖ። 35 ሄ ጋድያ አሳይ የሱሳ ግድያዋ ኤሬድኖ፤ ሄዋ ሄራ ጋድያ ኡባ ኪቲደ፥ ሀርግያ አሳ ኡባ አኮ አሄድኖ። 36 ሀርግያ አሳይ አ ማዩዋ ማጫራ ጻላላ ቦቻና ማላ፥ አ ዎሴድኖ፤ አ ማዩዋ ማጫራ ቦቼዳ ኡባይካ ፓጼዳ።