15
አዎቱዋ ዎጋባ
(ማር. 7:1-13)
1 ሄዋፐ ጉይያን፥ ህግያ ታማርስያ እት እት አሳይነ ፓርሳዋቱ የሩሳላመፐ የሱሳኮ ዪደ፥ 2 “ኔና ካልያዋንቱ አያዉ ኑ አዎቱዋ ዎጋ ባይዚኖ? አያዉ ጎፐ፥ ኡንቱንቱ ቁማ ማናፐ ካሰቲደ፥ ባረንቱ ኩሽያ ሜጨትክኖ” ያጌድኖ።
3 የሱስ ዛሪደ፥ ኡንቱንታ ሀዋዳን ያጌዳ፤ “ህንተንቱ ህንተ ዎጋ ድራዉ፥ ጾሳ አዛዙዋ ፖልያዋ አያዉ እጺቴ? 4 አያዉ ጎፐ ጾሳይ፥ ‘ነ አባነ ነ ዳዮ ቦንቻ’ ቃይ፥ ባረ አባ ዎይ ባረ ዳዮ ቦርያዌ ሀይቆ ያጌዳ። ከሳ 20:12፤ 21:17፤ ዛረ. 5:16፤ ዎጋ 20:9 5-6 ሽን ህንተንቱ፥ ‘እት አሳይ ባረ አባ ዎይ ባረ ዳዮ ማድያባይ ባረዉ ደኢና፥ ሄዌ ጾሳዋ ጎፐ፥ ባረ አባ ዎይ ባረ ዳዮ ቦንቻናዉ በሰና’ ያጊታ፤ ያቲደ ህንተንቱ ህንተንቱ ዎጋ ፖላናዉ ጾሳ ቃላዉ አዛዘትክታ። 7 ሀ ሎአ ማላትያ ኢታ አሳቶ፥ እስያስ ባለናን ህንተንቱባዉ ትምቢትያ ኦዲደ፥
8 “ ‘ጾሳይ ሀዋዳን ያጌዳ፤
“ሀዌ አሳይ ታና፥
ባረ ቦላ ዶናን ቦንቼ፤
ሽን ኡንቱንቱ ዎዛናይ፥
ታፐ ሃኩዋን ደኤ።
9 አሳይ ታዉ መላ ጎይኔ፤
አያዉ ጎፐ፥ አሳይ ኦꬄዳ አዛዙዋ፥
ጾሳ ህግያ ማላትሲደ፥
ታማርሴድኖ” ጌዳ’ ”
ያጌዳ።ኢሳ. 29:13
አሳ ቱንስያዋንታ
(ማር. 7:14-23)
10 የሱስ ዳሮ አሳ ባረኮ ጼሲደ፥ “ስስተነ አኬክተ፤ 11 አሳ ቱንስያዌ ዶና ግዶ ገልያዋ ግደና፤ ሽን አሳ ቱንስያዌ ዶናፐ ከስያዋ” ያጌዳ።
12 ሄዋፐ ጉይያን፥ አ ካልያዋንቱ አኮ ዪደ፥ “ፓርሳዋቱ ኔን ሃሳዬዳዋ ስሲደ፥ ሀንቀቴዳዋ አኬካይ?” ያጌድኖ።
13 ሽን የሱስ ዛሪደ፥ “ሳሉዋን ደእያ ታ አቡ ቶክቤና ምꬃ ኡባይ ሾደታናዋ። 14 ኡንቱንቶ ህርጎፕተ፤ ኡንቱንቱ ቆቃ ካለꬅያ ቆቃቱዋ፤ ቆቃይ ቆቃ ካለꬆፐ፥ ላኡካ ኦላን ኩንዴ” ያጌዳ።
15 ጰጽሮስ ዛሪደ፥ “ሀ ሌምሱዋ ብለꬃ ኑዉ ኦዳርኪ” ያጌዳ።
16 የሱስ ኡንቱንታ ሀዋዳን ያጌዳ፤ “ህንተንቶ ቃይ ሀእ ጋካናዉካ ገልቤኔ? 17 ዶናና ገልያ ኡባይ ኡሉዋ ግዶ ቢደ፥ ቃይ ኡሉዋፐ ካረ ከስያዋ ኤርክቴ? 18 ሽን ዶናፐ ከስያዌ ዎዛናፐ ከሴ፤ አሳ ቱንስያዌ ሄዋ ማላ። 19 አያዉ ጎፐ፥ ዎዛና ግዶፐ ኢታ ቆፋይ፥ ዎꬍያዌ፥ ዎሹምያዌ፥ ቃይ ዎሹማናዉ ካጄልያዌ ኡባይ፥ ዉእያዌ፥ ዎርዱዋን ማርካትያዌ፥ ቦሪ ከሴ። 20 ሄዋ ማላትያዌ አሳ ቱንስያዋፐ አትን፥ ሜጭቤና ኩሽያን ምያዌ አሳ ቱንሰና” ያጌዳ።
ካናነ አሳ ግዴዳ እት ማጫዉን አማኑዋ
(ማር. 7:24-30)
21 ሄዋፐ ጉይያን፥ የሱስ ሄዋፐ አጊደ፥ ጺሮሳነ ሲዶና ጌተትያ ካታማቱ ደእያ ጋድያ ቤዳ። 22 ካናነ ጌተትያ ጋድያ ማጫዉና እትና ሄዋፐ የሱሳኮ ያደ፥ ባረ ኮሻ ꬎቁ ኦꬃደ፥ “ታ ጎዳዉ፥ ዳዊታ ናአዉ፥ ታዉ ቃረታርኪ፤ ታ ናቶ ኢታ አያናይ ሎኤና ኦይꬃ ኦይቄዳ” ያጋዱ።
23 ሽን የሱስ እዝዉ አይ ቃላነ ቃትቤና፤ አ ካልያዋንቱ አኮ ዪደ፥ “ሀ ምሽራታ ኑ ጌዱዋ ካላ ካላደ፥ ባረ ኮሻ ꬎቁ ኦꬃደ ኦዳዉ፤ ሄዋ ድራዉ፥ ኔን እዞ የዳርኪ” ያጊደ ዎሴድኖ።
24 የሱስ ዛሪደ፥ “ታን ባዬዳ ዶርሳዉ፥ እስራኤልያ አሳ ጻላላዉ ኪተታድ” ያጌዳ።
25 ሽን እዛ ያደ፥ “ታ ጎዳዉ፥ ታና ማዳርኪ!” ያጋደ አዉ ጎይናዱ።
26 ቃይ እ ዛሪደ፥ “ናና ቁማ አኪደ፥ ካና ማራዉ ኦልያዌ ሎአ ግደና” ያጌዳ።
27 ምሽራታ፥ “ኤ ታ ጎዳዉ፥ ሄዌ ቱማ፤ ሽን ሀራይ አቶ ካና ማራቱ ባረንቱ ጎዳቱ ሚና፥ ሳምፓፐ ላለቴዳ ሱፓ ሚኖተኔ” ያጋዱ።
28 የሱስ ዛሪደ እዞ፥ “ሀ ምሽራቴ፥ ነ አማኑ ዎልቃማ፤ ኔን ኮዬዳዋዳን ነዉ ሀኖ” ያጌዳ። እዝ ናታ ኤለካ ፓጻ አጋዱ።
የሱስ ጮራ ሀርጋንቻቱዋ ፓꬄዳ
29 የሱስ ሄዋፐ ደንዲደ፥ ጋሊላ አባ ማታ ቤዳ፤ ቃይ እት ደርያ ቦላ ከሲደ፥ ሄዋን ኡቴዳ። 30 ዳሮ አሳይ ዎባቱዋ፥ ቆቃቱዋ፥ ቁናቱዋነ ዱደቱዋ፥ ቃይ ሀራ ጮራቱዋ አኮ አሂደ፥ አ ማታን ዎꬄዳ። የሱስ ኡንቱንታ ፓꬄዳ። 31 ሄዋ ድራዉ፥ አሳይ ዱዳቱ ሃሳይሽን፥ ቁናቱ ሱርሽን ዎባቱ ሀመትሽን፥ ቆቃቱ ጼልሽን በእ ማላለቲደ፥ እስራኤልያ ጾሳ ጋላቴድኖ።
የሱስ ኦይዱ ሻአ አሳ ምዜዳ
(ማር. 8:1-10)
32 የሱስ ባረና ካልያዋንታ ባረኮ ጼሲደ፥ “ሀ ጮራ አሳይ ታናና ሄዙ ጋላሳይ ጋካናዉ ጋምኤዳ ድራዉ፥ ታን ሀ አሳዉ ቃረታይ፤ ኡንቱንቶ ሀእ ምያዌ ባዋ። ቃይ ኡንቱንቱ ኦግያን ዳቡሪደ ኩንደና ማላ፥ ቁማ ምዘናን ኡንቱንታ መላ የዳናዉካ ኮይከ” ያጌዳ።
33 አ ካልያዋንቱ ዛሪደ የሱሳ፥ “ኑን ሀ ባዙዋን ሀዋ ኬና አሳ ካልስያ ቁማ ሀቃፐ ደማኔ?” ያጌድኖ።
34 ቃይ የሱስ ኡንቱንታ፥ “ህንተንቶ አፑን ኡክꬃይ ደኢ?” ያጊደ ኦቼዳ።
ኡንቱንቱ፥ “ላፑ ኡክꬃይነ ሞለቱዋፐ አማሬዳዋንቱ ደኢኖ” ያጌድኖ።
35 የሱስ አሳ፥ “ሳኣን ኡትተ” ያጌዳ። 36 ሄ ላፑ ኡክꬃነ ሞልያ ኦይቂደ፥ ጾሳ ጋላቴዳ፤ መንሬꬂደ ባረና ካልያዋንቶ እሜዳ፤ ቃይ ኡንቱንቱ ጮራ አሳዉ እሜድኖ።
37 አሳይ ኡባይ ሚደ ካሌዳ፤ ሚና አቴዳ ላፑ ዛምቤልያ ኩሜዳ ሱፓ አ ካልያዋንቱ ደንꬄድኖ። 38 ሜዳ አሳይ ማጫ አሳነ ናና ፓይደናን፥ ኦይዱ ሻአ አቱማ አሳ። 39 የሱስ አሳ የዶዋፐ ጉይያን፥ ዎንግርያን ገሊደ፥ መገዶነ ጌተትያ ጋድያ ቤዳ።