17
የሱሳ ማላይ ላመቴዳ
(ማር. 9:2-13፤ ሉቃሳ 9:28-36)
1 የሱስ ኡሱፑን ጋላሳፐ ጉይያን፥ ባረናና ጰጽሮሳ፥ ያቆባነ፥ ያቆባ እሻ ዮሃንሳ አኪደ፥ ኡንቱንቱ ጻላላ ዎጋ ደርያ ሁጲያ ከሴዳ። 2 ጰጽ. 1:17-18 2 ቃይ ኡንቱንቱ ጼልሽን፥ ኡንቱንቱ ስንꬃን ላመቴዳ፤ አ ዴሙ አዋይፍያዳን ፖኤዳ፤ አ ማዩካ ፖኡዋዳን ጶሌዳ። 3 ሙሴነ ኤላስ የሱሳና ሃሳይሽን፥ ሀ ሄዙ አ ካልያዋንቱ በኤድኖ። 4 ጰጽሮስ የሱሳ፥ “ታ ጎዳዉ፥ ኑን ሀዋን ደእያዌ ኑዉ ሎአ፤ ኔን ዶሶፐ፥ ኑን ሀዋን ሄዙ ዳስያ እቱዋ ነዉ፥ እቱዋ ሙሴዉ፥ እቱዋ ኤላሳዉ ኬጻና” ያጌዳ።
5 እ ሃሳይሽን፥ ፖእያ ሻሪ ዪነ ኡንቱንታ ካም አጌዳ፤ ሻርያ ግዶፐ፥ “ሀዌ ታን ሲቅያ ታና ናሸችያ ታ ናኣ፤ እ ግያዋ ስስተ” ግያ ቃላይ ዬዳ። ዶመꬃ 22:2፤ ዛረ. 18:15፤ ማዝ. 2:7፤ ኢሳ. 42:1፤ ማቶሳ 3:17፤ 12:18፤ ማር. 1:11፤ ሉቃሳ 3:22
6 አ ካልያዋንቱ ሄ ቃላ ስሴዳ ዎደ፥ ዳሮ ያዪደ፥ ጉፋን አጌድኖ። 7 የሱስ ኡንቱንቱኮ ዪደ፥ ኡንቱንታ ቦቺደ፥ “ደንድተ፤ ያዮፕተ” ያጌዳ። 8 ኡንቱንቱ ꬎቁ ጊደ ጼልያ ዎደ፥ የሱሳ ጻላላፐ አትን፥ ሀራ አሳ ኦናነ በእበይክኖ።
9 ኡንቱንቱ ደርያፐ ዎꬍሽን፥ የሱስ ኡንቱንታ፥ “ታን አሳ ናአይ፥ ሀይቁዋፐ ደንዳና ጋካናዉ፥ ሀ ህንተንቱ በኤዳዋ ኦስነ ኦዶፕተ” ያጊደ አዛዜዳ።
10 አ ካልያዋንቱ የሱሳ፥ “ያትና፥ ህግያ ታማርስያዋንቱ አያዉ፥ ‘ኤላስ ካሰቲደ ያናዉ በሴ’ ጊኖ?” ያጊደ ኦቼድኖ። ሚልክ. 4:5
11 እ ዛሪደ ያጌዳ፤ “ኤላስ ካሰት ዪደ፥ ኡባባ ጊግሳናዋ። 12 ሽን ታን ህንተንቶ ኦዳይ፤ ኤላስ ሀዋፐ ካሰ ይ ድጌዳ። ሄ ዎደ አሳይ አ፥ ባረንቶ ኮዬዳዋዳን ኡባ ኦꬄዳዋፐ አትን አ ኤርበይክኖ፤ ሄዋዳንካ፥ ቃይ ታና፥ አሳ ናኣ፥ አሳይ ዋይሳናዋ” ያጌዳ።
13 አ ካልያዋንቱ ሄ ዎደ ባረንቶ የሱስ ጻማቅያ ዮሃንሳባ ኦድያዋ አኬኬድኖ።
የሱስ ኢታ አያናይ ኦይቄዳ ናኣ ፓꬄዳ
(ማር. 9:14-29፤ ሉቃሳ 9:37-43)
14 ኡንቱንቱ ዳሮ አሳኮ ዬዳ ዎደ፥ እት ብታኒ የሱሳኮ ዪደ፥ አ ስንꬃን ጉልባቲደ፥ 15 “ታ ጎዳዉ፥ ታ ናኣ ዎዛና ባይዝያ ሀርጊ ኦይቂና፥ እ ዳሮ ዎደ ታማን፥ ቃይ ዳሮ ዎደ ሃꬃን ኩንድያ ድራዉ፥ እ ዳሪ ሳከቴ፤ አ ፓꬃርኪ። 16 ኔና ካልያዋንቱኮካ አ አሃድ፤ ሽን ፓꬃናዉ ዳንዳይበይክኖ” ያጌዳ።
17 የሱስ ዛሪደ ኡንቱንታ፥ “አማነና ሀ ዎድያ ጌላ አሳዉ! ታን ህንተናና አዉደ ጋካናዉ ደአኔ? ቃይ ህንተንቱባ አዉደ ጋካናዉ ዳንዳያኔ? ናኣ ታኮ ሃ አኪደ ዪተ” ያጌዳ። 18 የሱስ ኢታ አያና፥ “አፐ ከሳ” ጊደ አዛዝና፥ ኢታ አያናይ ናኣፐ ከስ አጌዳ፤ ኤለካ ናአይ ፓጽ አጌዳ።
19 ሄዋፐ ጉይያን፥ አ ካልያዋንቱ ባረንቱ ጻላላ የሱሳኮ ዪደ፥ “ኑን ኢታ አያና ከሳናዉ አያዉ ዳንዳይበይኮ?” ያጌድኖ።
20 የሱስ ኡንቱንታ ያጌዳ፤ “ሄዌ ህንተንቱ አማኑ ጉጼዳ ድራሳ፤ ታን ህንተንቶ ቱሙዋ ኦዳይ፤ ህንተንቶ ሳናፍጭያ ጌተትያ ጉꬃ ምꬃት አይፍያ ኬና አማኑ ደእንቶ፥ ህንተንቱ ሀ ደርያ፥ ‘ሀዋፐ ያ ሺቃ’ ያግንቶ እ ሺቃና፤ ህንተንቱ አያነ ኦꬃናዉካ ዳንዳያንታ። 21 ሽን ሀዋ ማላ ዎሳፐነ ጾማፐ ሀራባይ ከሳናዉ ዳንዳየና” ያጌዳ።
የሱስ ባረ ሀይቁዋባ ላኤንꬁዋ ኦዴዳ
(ማር. 9:30-32፤ ሉቃሳ 9:43-45)
22 አ ካልያዋንቱ ጋሊላን፥ እትፐ ሺቅ ኡት ደእሽን፥ የሱስ ኡንቱንታ፥ “ታና፥ አሳ ናኣ፥ አሳይ አሳዉ አꬂደ እማና። 23 አሳይ ታና ዎꬋናዋ፤ ሄዋፐ ጉይያን ታን ሄዘንꬅያ ጋላስ ሀይቁዋፐ ደንዳና” ያጌዳ። አ ካልያዋንቱ ዳሮ ቃረቴድኖ።
ጌሻ ጎልያ ጊራ ጊርያዋ
24 የሱስነ አ ካልያዋንቱ ቅፍርናሆማ ካታማ ዬዳ ዎደ፥ ጌሻ ጎልያስ ቃራጻ አክያዋንቱ ጰጽሮሳኮ ዪደ፥ “ህንተንታ ታማርስያዌ ጌሻ ጎልያ ጊራ ጊረኔ?” ያጌድኖ። ከሳ 30:13፤ 38:26
25 እ ዛሪደ፥ “ጊሬ” ያጌዳ።
ጰጽሮስ ሶይ ገሌዳ ዎደ፥ የሱስ ካሰቲደ አ፥ “ስሞና፥ ነ ቆፋይ አዬ? ሀ ሳኣ ካታቱ ቃራጻ ዎይ ጊራ ኦፐ አኪኖ? ባረንቱ ጋድያ አሳፐ አኪኖ ዎይ ሀራ ጋድያ አሳፐ አኪኖ?” ያጌዳ።
26 ጰጽሮስ፥ “ሀራ ጋድያ አሳፐ አኪኖ” ያጌዳ።
የሱስ ጰጽሮሳ፥ “ያቶፐ፥ ጋድያ አሳይ ጊራናዉ በሰና። 27 ሽን ኑን ሀ አሳቱዋ ሀንቀꬃናዉ ኮዮኮ፤ ኔን አባ ባደ አን ዳባ የጋ፤ ያታደ ኮይሮ ከስያ ሞልያ ኦይቃደ፥ አ ዶና ፖቅያ ዎደ፥ ጊራዉ ግድያ ሚሻ ኔን ደማና። ሄዋ አካደ፥ ታ ጊራነ ነ ጊራ ኡንቱንቶ እማ” ያጌዳ።