1 አ ካልያዋንቱ የሱሳኮ ሄ ዎደ ዪደ፥ “ሳሉዋ ካዉተꬃን ኡባፐ አꬍያዌ ኦኔ?” ያጌድኖ።

2 የሱስ እት ጉꬃ ናኣ ጼስ ኡንቱንቱ ግዶን ኤሲደ፥ ሀዋዳን ያጌዳ፤ 3 “ታን ህንተንቶ ቱሙዋ ኦዳይ፤ ጾሳኮ ህንተንቱ ስሚደ፥ ጉꬃ ናናዳን ሀናና ꬋዮፐ፥ ሳሉዋ ካዉተꬃ ኡባካ ገላናዉ ዳንዳይክታ። 4 ስም ሀ ጉꬃ ናኣዳን፥ ባረና ካዉሽያ ኦንነ ሳሉዋ ካዉተꬃን ኡባፐ አꬍያዋ። 5 ቃይ ሀዋ ማላ ናኣ ታ ሱንꬃን ሞክያ ኦንነ ታና ሞኬ። 6 ሽን ታና አማንያ ሀ ጉꬃ ናናፐ እቱዋ ባለꬅያ ኦንነ፥ ጋጭያ ዎጋ ዎጻ ባረ ቆꬍያን ቃቺደ፥ አባ ጪሙዋን ምተትያዌ አዉ ሎአ።

7 “አላሚ አሳ ꬉቢያ ድራዉ፥ ሳአዉ አየሮ፤ አያዉ ጎፐ፥ ꬉቢያባይ ዩሳ አገና፤ ሽን ꬉቡ አ ጋሶታን ይያ ኡራዉ አየሮ።

8 “ኔና ኩሺ ዎይ ነ ገዲ ኔና ባለꬆፐ፥ ኔፐ ቃንጻ ኦላ፤ ኔን ላኡ ኩሽያናነ ላኡ ገድያና መꬍና ታማን ኦለትያዋፐ ዎባ ዎይ ዱጻ ኩሽያና መꬍና ደኡዋ ገልያዌ ነዉ ሎአ። 9 ቃይ ነ አይፊ ኔና ባለꬆፐ፥ ኔፐ ዎጫ ከሳ ኦላ፤ ኔን ላኡ አይፍያና ጋናምያ ታማን ኦለትያዋፐ እት አይፍያና መꬍና ደኡዋ ገልያዌ ነዉ ሎአ።

10 “ህንተንቱ ሀ ጉꬃቱዋፐ እቱዋነ ካና ማላ፥ ህንተንታ ናግተ፤ አያዉ ጎፐ፥ ታን ህንተንቶ ኦዳይ፤ ሳሉዋን ኡንቱንቱ ኪታንቻቱ ኡባ ዎደ፥ ሳሉዋን ደእያ ታ አቡ ስንꬃን ደኢኖ። 11 አያዉ ጎፐ፥ ታን፥ አሳ ናአይ፥ ባዬዳዋ አሻናዉ ያድ።

12 “እት አሳዉ ጼቱ ዶርሳቱ ደእያዋንቱፐ እቱ ባዮፐ፥ ኡዱፑ ታማነ ኡዱፑኑዋ ደርያን አጊደ፥ ሄ ባዬዳዋ ኮያናዉ ቤኔ? ህንተንቱ ዋጊቴ? 13 ታን ህንተንቶ ቱሙዋ ጋይ፤ እ ደሞፐ፥ ባይቤና ኡዱፑ ታማነ ኡዱፑ ዶርሳቱዋፐ አꬂደ፥ ሄ እት ዶርሳን ናሸቴ። 14 ሄዋዳንካ፥ ሳሉዋን ደእያ ህንተንቱ አቡ ሀ ጉꬃቱዋፐ እቱ ባያናዋካ ኮየና።

15 “ነ እሻይ ኔና ናቆፐ፥ ኔረካ አኮ ባደ፥ አ ናቁዋ አዉ ኦዳ፤ እ ነዋ ስሶፐ፥ ነ እሻ ባላፐ ዛራዳ። 16 ሽን እ ነዋ ስሰናን እጾፐ፥ ላኡ ዎይ ሄዙ ማርካይ ማርካቶዋን የዉ ኡባይ ቱማትያ ድራዉ፥ ሀራ እት ዎይ ላኡ አሳ ኔናና እትፐ አፋ። 17 እ ኡንቱንቱባ ስሰናን እጾፐ፥ ኡባባ አማንያ አሳዉ ኦዳ፤ ቃይ አማንያ አሳይ ግያዋካ እ ስሰናን እጾፐ፥ አማነና አሳዳንነ ቃራጻ ሺሽያ አሳዳን አ ፓይዳ።

18 “ታን ህንተንቶ ቱሙዋ ጋይ፤ ኔን ሳኣን ሀኖ ጎዌ ኡባይ ሳሉዋን ጾሳ ስንꬃን ሀናና፤ ሽን ኔን ሳኣን ሀኖፖ ጌዳዌ ሳሉዋንካ ሀነና።

19 “ቃይካ ታን ህንተንቶ ኦዳይ፤ ህንተፐ ላኡ ኡራይ ሳኣን ጾሳ ዎስያዋን አይ የዉዋንነ እት ዎዛና ግዶፐ፥ ሳሉዋን ደእያ ታ አቡ ሄዋ ህንተንቶ እማና። 20 አያዉ ጎፐ፥ ላኡ ኡራይ ዎይ ሄዙ ኡራይ ታ ሱንꬃን ሺቅያሳን፥ ታን ሄዋን ኡንቱንቱ ግዱዋን ደአይ” ያጌዳ።

21 ጰጽሮስ፤ ሄ ዎደ የሱሳኮ ዪደ፥ “ጎዳዉ፥ ታ እሻይ ታና አፑ ካላ ናቆፐ ታን አዉ አቶ ጋናዉ በሲ? ላፑኑዋ ጋካናዉ ናቂኔዬ?” ያጊደ አ ኦቼዳ።

22 የሱስ ዛሪደ አ፥ “ግደና፥ ታን ኔና ላፑን ታሙ ካላ ላፑኑዋ ጋይፐ አትን፥ ላፑኑዋ ጻላላ ጊከ። ዶመꬃ 4:24

23 “አያዉ ጎፐ፥ ሳሉዋ ካዉተꬃይ ባረ ቆማቱዋና ሚሻ ሄተታናዉ ቆፔዳ ካትያ በሴ። 24 ሄ ካቲ ሚሻ ሄተታናዉ ዶሜዳ ዎደ፥ ዳሮ ሚሎነ ብራ አጩ ደእያ እት ብታንያ አኮ አሄድኖ። 25 ሽን ሄ ቆማዉ አጩዋ ጭግያዌ ꬋይና፥ አ ጎዳይ ሄ አጩዋ ጭጋናዉ፥ አ ማቻታነ እነ አ ናናይ፥ ቃይ አዉ ደእያ ኡባባይ ዛልኤታና ማላ፥ አ አዛዜዳ። 26 ሄዋ ድራዉ፥ ቆማይ ባረ ጎዳ ስንꬃን ጉልባቲደ፥ ‘ታ ጎዳዉ፥ ሀያ ጎዶ ጉꬃ ዎድያ ናጋርኪ፤ ታን ነዉ ኡባባካ ጭጋና ያጊደ አ ዎሴዳ።’ 27 አ ጎዳይ አዉ ቃረቲደ፥ አ የድ አጌዳ፤ አ አጩዋካ አዉ ማር አጌዳ።

28 “ሽን ሄ ቆማይ ከሲደ፥ ባረ ላገꬃ ቆማቱዋፐ እቱ ባረፐ ጼቱ ብራ ሳንትምያ ታልኤዳዋና ጋከቲደ፥ ‘ነ ቦላ ደእያ ታ ሚሻ ጭጋ’ ያግ ኦይቂደ፥ አ ጩሌዳ።

29 “ያትና ሄ አ ላገꬃ ቆማይ አ ስንꬃን ጉልባቲደ፥ ‘ሀእ ታይሻይ ጉꬃ ዎድያ ናጋርኪ፤ ታን ነዉ ኡባባካ ጭጋና’ ያጊደ አ ዎሴዳ።

30 “ሽን እጽ አክ ቢደ፥ አ ላገꬃይ ሄ አጩዋ ቃንጻና ጋካናዉ፥ ቃሾ ጎለ ገልሴዳ። 31 ሄዋ ድራዉ፥ አ ላገꬃ ቆማቱ ሄዋ በኢደ፥ ዳሮ ይሎቴድኖ፤ ባረንቱ ጎዳኮ ቢደ፥ እ ኦꬄዳ ኡባባ አዉ ኦዴድኖ።

32 “ሄዋፐ ጉይያን፥ ጎዳይ ሄ ቆማ ጼሲደ፥ ‘ሀ ኢታ ቆማዉ፥ ኔን ታና ዎሴዳ ድራዉ፥ ታን ሄ አጩዋ ኡባ ነዉ ማራ አጋድ። 33 ታን ነዉ ሄ አጩዋ ማሬዳዋዳን፥ ኔንካ ነ ላገꬃ ቆማዉ ማራናዉ በሰኔ?’ ያጌዳ። 34 ሄዋፐ ስሚደ አዉ ዳሮ ሀንቀቲደ፥ ባረ አጩዋ ኡባ እ ጭግ ዉርሳና ጋካናዉ፥ ፓጻ ካኤታና ማላ፥ ቃሾ ጎለ ገልሴዳ።

35 “ህንተንቱ ሁጲያን ሁጲያን ህንተንቱ እሻዉ ዎዛናፐ አቶ ጋና ꬋዮፐ፥ ሄ ጎዳይ ባረ ቆማ ኦꬄዳዋዳን፥ ሳሉዋን ደእያ ታ አቡካ ህንተንታ ሄዋዳን ኦꬃና” ያጌዳ።