1 “ሳሉዋ ካዉተꬃይ ዎይንያ ጌተትያ ቱራ ግዱዋ ኦꬅያዋንታ ኡንያ ኦስሳናዉ፥ ዎንታ ጉራን ከሴዳ ዎይንያ ቱራ ጎዳ በሴ። 2 እ ሄ ኦሳንቻቶ ሀቼ ሀቼ ኦꬄዳዋ ዎልቃ ጋትያ ጭጋናዉ ኡንቱንቱና ጊጊደ፥ ባረ ዎይንያ ቱራ ግዱዋ ኦስሳናዉ ኡንቱንታ የዴዳ።

3 “ቃይ ሄዙ ሳትያ ግዶደ ከሲደ፥ ኦሱ ባይናን ቆጫን ኤቄዳ ሀራ አሳቱዋ በኢደ፥ 4 ኡንቱንታ፥ ‘ህንተንቱካ ቃይ ታ ዎይንያ ቱራ ግዱዋ ኦꬃናዉ ቢተ፤ ታን ህንተንቶ በስያ ጋትያ ጭጋና’ ያጌዳ፤ ሄዋፐ ጉይያን ኡንቱንቱ ቤድኖ። 5 ላኤንꬁዋካ ኡሱፑን ሳትያንነ ኡዱፑ ሳትያን ከሲደ፥ ሄዋዳን ኦꬄዳ። 6 ታማነ እት ሳትያ ሄራን እ ከስያ ዎደ፥ ሀራንቱ ሄዋን ኤቄዳዋንታ ደሚደ፥ ‘ኦሱዋ ኦናን ኩመንꬃ ጋላሳ ሀዋን አያዉ ኤቂ ፔሼድቴ?’ ያጌዳ።

7 “ኡንቱንቱ፥ ‘ኑና ኦስስያ አሳይ ꬋዬዳ ድራዉ ኤቂ ፔሼዶ’ ያጌድኖ።

“እ፥ ‘ኡንቱንታካ ቃይ ታ ዎይንያ ቱራ ግዱዋ ኦꬃናዉ ቢተ’ ያጌዳ።

8 “ሳአይ ኦማርስያ ዎደ፥ ዎይንያ ቱራ ጎዳይ ኦꬅያዋንቱ ካፑዋ፥ ‘ኦሳንቻቱዋ ጼሳደ፥ ዉርሰꬃን ኦሱዋን ገሌዳዋንቱፐ ዶማደ ኮይሮ ገሌዳዋንታ ጋካናዉ፥ ኡንቱንቱ ኦሱዋ ድርጉዋ ጭጋ’ ያጌዳ። ዎጋ 19:13፤ ዛረ. 24:15

9 “ታማነ እት ሳትያ ሄራን ኦሱዋ ዶሜዳዋንቱ ዪደ፥ ሁጲያን ሁጲያን ኦꬂደ ፔሼዳ ዎልቃ ጋትያ አኬድኖ። 10 ኮይሮ ኦሱዋ ዶሜዳ አሳይ ዬዳ ዎደ፥ ዳሩዋ አካናዉ ቆፔድኖ፤ ሽን ኡንቱንቱካ ሁጲያን ሁጲያን ባረንቱ ኦሱዋ ዎልቃ ጋትያ አኬድኖ። 11-12 ሄዋፐ ጉይያን፥ ‘ሀ ጉየፐ ዬዳዋንቱ እት ሳትያ ጻላላ ኦꬄድኖ፤ ኩመንꬃ ጋላሳ ዳቡሪደ ጫዎቴዳ ኑዋና ኡንቱንቱ ኦሱዋ ድርጉዋ ቃራ ኦꬃዳ’ ያጊደ ባረንታ ኦሱዋን ገልሴዳዋ ቦላ ዙዙሜድኖ።

13 “ሽን እ ኡንቱንቱፐ እቱዋ ሀዋዳን ያጌዳ፤ ‘ታ ላገዉ፥ ታን ኔና ናቃበይከ፤ ኦꬃደ ፔሼዳ ዎልቃ ጋትያ ታናና ጊጋበይክዬ? 14 ነዋ አካደ ባ፤ ታን ሀእ ዉርሰꬃን ኦሱዋን ገሌዳዎካ ነዋ ኬና እማናዉ ኮያይ። 15 ታን ታ ሚሻን ታ ኮዬዳዋዳን ኦꬃናዉ ታዉ ማታይ ባዌ? ዎይ ታን ሎአ ግዴዳ ድራዉ፥ ኔን ቃናታይ?’ ያጌዳ።

16 “ሄዋዳንካ፥ ቃይ ጉየቴዳዋንቱ ስንꬃታናዋንታ፤ ስንꬃቴዳዋንቱ ቃይ ጉየታናዋንታ፤ አያዉ ጎፐ፥ ጼሰቴዳዋንቱ ጮራ፤ ሽን ዶረቴዳዋንቱ ጉꬃ” ያጌዳ።

17 የሱስ የሩሳላመ ቢደ፥ ኦግያን ባረናና ብያ ታማነ ላኡ ባረና ካልያዋንታ ጋጻ ከሲደ፥ ዱማ ኡንቱንቶ ያጌዳ። 18 “በእተ፥ ኑን የሩሳላመ ሀእ ከሴቶ። ያን ታና፥ አሳ ናኣ ቄሳቱዋ ካፓቶነ ህግያ ታማርስያዋንቶ አꬂደ እማናዋንታ፤ ኡንቱንቱ ታ ቦላ ሀይቁዋ ፕርዳ ፕርዳናዋንታ። 19 ቃይ አይሁዳ ግደና አሳዉካ ታና አꬂደ እማናዋንታ፤ ሄ አይሁዳ ግደና አሳይ ታ ቦላ ቅሊጫናዋንታነ ታና ልሱዋን ሾጫናዋንታ፤ ያቲደ ማስቃልያ ቦላ ምስማርያን ꬍሺደ፥ ታና ካቃናዋንታ፤ ታን ሄዘንꬅያ ጋላስ ሀይቁዋፐ ደንዳና” ያጌዳ።

20 ሄ ዎደ ዛብድዮሳ ናና ዳያ ባረ ናናና የሱሳኮ ያዱ፤ አ ስንꬃን ጉልባታደ እትባ አ ዎሳዱ።

21 የሱስ እዞ፥ “አያ ኮያይ?” ያጊደ ኦቼዳ።

እዛ ዛራደ፥ “ሀ ታ ላኡ ናናይ ነ ካዉተꬃን እቱ ኔፐ ኡሸቻ ባጋና፥ ቃይ እቱ ኔፐ ሀድርሳ ባጋና ኡትኖ ያጋርኪ” ያጋደ ዎሳዱ።

22 ሽን የሱስ ዛሪደ ናና፥ “ህንተንቱ አያ ዎሳናዉ በስንቶ ኤርክታ። ታና ጋክያ ዎልቃማ መቱዋ መቶታንቴ? ታን ጻማቀታና ጽንቃታ ጻማቀታናዉ ዳንዳዪቴ?” ያጌዳ።

ኡንቱንቱ፥ “ኤ ዳንዳያና” ያጌድኖ።

23 የሱስ፥ “ታና ጋክያ ዎልቃማ መቱዋ ቱማካ ህንተንቱ መቶታንታ፤ ሽን ታፐ ኡሸቻ ባጋናነ ሀድርሳ ባጋና ኡታናዋንታ ዶራናዉ ታዉ ማታይ ባዋ፤ ሽን ሄ ሳአይ ታ አቡ እማናዉ ጊግስ ዎꬄዳዋንቱሳ” ያጌዳ።

24 የኮ ታሙ የሱሳ ካልያዋንቱ ሄዋ ስሴዳ ዎደ፥ ሄ ላኡ እሻቶ ሀንቀቴድኖ። 25 ሽን የሱስ ኡንቱንቱ ኡባቱዋካ ባረኮ ጼሲደ፥ ሀዋዳን ያጌዳ፤ “አህዛበ አሳቱዋ ካፓቱነ ሀዋንታ ካለꬅያ አሳቱ ባረንቱ አሳ አይስያዋ ኤሪታ። 26 ህንተንቱ ግዱዋን ሄዋ ማላ ግደና፤ ሽን ህንተንቱ ግዱዋን ꬎቃተꬃ ኮይያ ኦንነ ህንተንቶ ቆማ ግዳናዉ በሴ። 27 ቃይ ህንተንቱ ግዱዋን ኡባፐ ቦላ ግዳናዉ ኮይያዌ ኦንነ ህንተንቶ አይለ ግዳናዉ በሴ። 28 ሄዋዳን ታን፥ አሳ ናአይ፥ አሳዉ ኦꬃናዉነ ዳሮ አሳ ዎዛናዉ ታ ሸምፑዋ እማናዉ ዬዳዋፐ አትን፥ አሳይ ታዉ ኦꬃና ማላ ያበይከ” ያጌዳ።

29 የሱስነ አ ካልያዋንቱ እያርኮፐ ከስሽን፥ ዳሮ አሳይ ኡንቱንታ ካሌዳ። 30 ላኡ ቆቃ አሳቱ ኦግያ ዶናን ኡቴዳዋንቱ የሱስ ሄዋና አꬍያዋ ስሲደ፥ ባረንቱ ኮሻ ꬎቁ ኦꬂደ፥ “ጎዳዉ፥ ዳዊታ ናአዉ፥ ኑዉ ቃረታርኪ” ያጌድኖ።

31 ዳሮ አሳይ ኡንቱንታ፥ “ሀይዝተ” ጊደ ሀንቀቴዳ፤ ሽን ኡንቱንቱ ባረንቱ ኮሻ ዳሪ ꬎቁ ኦꬂደ፥ “ጎዳዉ፥ ዳዊታ ናአዉ፥ ኑና ማራርኪ!” ያጌድኖ።

32 የሱስ ኦግያን ኤቂደ፥ ኡንቱንታ ጼሲደ፥ “ታን ህንተንቶ አያ ኦꬃና ማላ ኮዪቴ?” ያጌዳ።

33 ቆቃቱ፥ “ጎዳዉ፥ ኑ አይፍያ ፓꬃርኪ” ያጌድኖ።

34 የሱስ ኡንቱንቶ ቃረቲደ፥ ኡንቱንቱ አይፍያ ቦቼዳ፤ ኤለካ ኡንቱንቱ አይፊ ጼል አግና፥ አ ካል አጌድኖ።