1 የሱስ ሀ ትምርትያ ኡባ ዉርሴዳ ዎደ፥ ባረና ካልያዋንታ፥ 2 “ላኡ ጋላሳፐ ጉይያን፥ ፓስጋ ባላ ቦንችያ ጋላሳ ግድያዋ ኤሪታ። ሄ ጋላስ ታና፥ አሳ ናኣ፥ አሳይ ማስቃልያ ቦላ ምስማርያን ꬍሺደ ካቃናዉ አꬂደ እማና” ያጌዳ። ከሳ 12:1-27

3 ሄ ዎደ ቄሳቱዋ ካፓቱነ ጋድያ ጭማቱ ቃያፋ ጌተትያ ቄሳቱዋ ኡባቱዋ ካፑዋ ዎጋ ጎልያን ሺቂደ፥ 4 አሳይ ኤረናን የሱሳ ኦይቂደ፥ ዎꬋናዉ ማቀቴድኖ። 5 ሽን ኡንቱንቱ፥ “አሳይ ዋላሳ ከሰና ማላ፥ ፓስጋ ቦንችያ ጋላስ ሄዋ ኦꬆኮ” ያጌድኖ።

6 የሱስ ቢታንያ ካታማን ኦሉዋ ሀርግያ ስሞና ሶይን ደእሽን፥ 7 እት ምሽራታ አልባስጽሮሳ ጌተትያ ሹቻፐ ኦሰቴዳ አልባስጽሮሳ ባሬታ ኩሜዳ ዳሪ አልኦ ሽቱዋ አካደ ዬዳዉና ቁማ እ ሚና፥ ሄ ሽቱዋ የሱሳ ሁጲያን ጫጫፋዱ። 8 ሽን የሱሳ ካልያዋንቱ ሄዋ በኢደ፥ “ሀ ሽቱዋ ጮ ባይዙሳይ አያሴ? 9 አያዉ ጎፐ፥ ሀ ሽቱዋ አልኦ ጋትያን ዛልኢደ፥ ሚሻ ህዬሳዉ እማናዉ ዳንዳየቴ” ያጌድኖ።

10 የሱስ ኡንቱንቱ ግያዋ ኤሪደ፥ ኡንቱንታ ሀዋዳን ያጌዳ፤ “ሀ ምሽራቶ አያዉ ዋይሲቴ? እዛ ታዉ ሎኦባ ኦꬃዱ። 11 ህዬሳቱ ኡባ ዎደ ህንተናና ደኢኖ፤ ሽን ታን ህንተናና ኡባ ዎደ ደእከ፤ ዛረ. 15:11 12 እዛ ሀ ሽቱዋ ታ ቦላ ትግያዌ ታና ሞጋናዉ ጊግሳናሳ። 13 ታን ህንተንቶ ቱሙዋ ኦዳይ፤ ሳኣ ኡባን ሀ ዎንጋላ ምሽራቹዋ ኦድያሳን ሀቃንነ፥ አሳይ እዞ ዎዛና አꬃና ማላ፥ እዛ ኦꬄዳዌ ኦደታናዋ” ያጌዳ።

14 ሄ ዎደ ታማነ ላኡ የሱሳ ካልያዋንቱፐ እቱ ይሁዳ አስቆሮቱ ያገትያዌ ቄሳቱዋ ካፓቱዋኮ 15 ቢደ፥ “ታን ህንተንቶ የሱሳ ኦይꬆፐ፥ ታዉ አያ እማንቴ?” ያግና ኡንቱንቱ አዉ ሀታሙ ብራ ቆፒደ እሜድኖ። ዛካ. 11:12 16 ሄዋፐ ጉይያን፥ ይሁዳይ የሱሳ አꬅ እማናዉ እንጀትያ ዎድያ ዎቼ።

17 ባላ ዳቡዋ ምያ ጋላሳ ቦንችያ ኮይሮ ጋላስ፥ የሱሳ ካልያዋንቱ አኮ ዪደ፥ “ፓስጋ ቦንችያ ጋላስ ኔን ማና ቁማ ሀቃን ጊግሳኔ?” ያጌድኖ።

18 ሄዋፐ ጉየ የሱስ ኡንቱንታ፥ “ካታማ ቢደ፥ እት ብታንያ፥ ‘ታማርስያዌ ኔና፥ “ታዉ ዎዲ ጋኬዳ፤ ታን ታና ካልያዋንቱና ፓስጋ ቦንችያ ጋላሳ ነ ሶይን አꬃና” ጌዳ’ ጊተ” ያጌዳ።

19 አ ካልያዋንቱ የሱስ ባረንታ አዛዞዋዳን ኦꬂደ፥ ፓስጋ ቦንችያ ጋላስ ማና ቁማ ጊግሴድኖ።

20 ሳአይ ኦማርሴዳ ዎደ፥ የሱስ ታማነ ላኡ አ ካልያዋንቱና ቁማ ማናዉ ኡቴዳ። 21 ኡንቱንቱ ሚሽን፥ የሱስ ኡንቱንታ፥ “ታን ህንተንቶ ቱሙዋ ኦዳይ፤ ህንተፐ እት ኡራይ ታና አꬂደ እማናዋ” ያጌዳ።

22 ኡንቱንቱ ዳሪ ዳጋሚደ፥ ሁጲያን ሁጲያን፥ “ጎዳዉ፥ ቱሙ ታኔሻ?” ጉሳ ዶሜድኖ።

23 የሱስ ዛሪደ፥ “ባረ ኩሽያ ታናና እትፐ ዎጪትያፐ የዲደ ቱሽያዌ ታና አꬅ እማና። ማዝ. 41:9 24 ታን፥ አሳ ናአይ፥ ጾሳ ማጻፋይ ሀይቃና ጌዳዋዳን ሀይቃና፤ ሽን ታና፥ አሳ ናኣ፥ አꬅ እምያ ኡራዉ አየሮ፤ ሄ ኡራይ የለተናን አቴደንቶ አዉ ሎአ ሽን” ያጌዳ።

25 አ አꬅ እምያ ይሁዳይ ዛሪደ፥ “ታማርስያዎ፥ ኔን ግያዌ ታኔ?” ያጌዳ።

የሱስ ዛሪደ አ፥ “ኔን ነ ሁጲያን ጋዳ” ያጌዳ።

26 ኡንቱንቱ ሚሽን፥ የሱስ ዳቡዋ አኪደ፥ ጾሳ ጋላቴዳ፤ ሄ ዳቡዋ መንሬꬂደ፥ ባረና ካልያዋንቶ እሚደ፥ “ሄይተ፤ ሚተ፤ ሀዌ ታ አሹዋ” ያጌዳ።

27 ጹኣ አኪደ፥ ጾሳ ጋላቴዳ። ኡንቱንቶ እሚደ፥ “ኡባይ ሀዋፐ ኡሽተ፤ 28 አያዉ ጎፐ፥ ሀዌ ዳሮ አሳ ናጋራይ አቶ ጌተታና ድራዉ ጉክያ ታ ሱꬃ፤ ታ ሱꬃይ ኦራꬃ ጫቁዋ። ከሳ 24:8፤ ኤር. 31:31-34 29 ሽን ታን ህንተንቶ ኦዳይ፤ ታን ታ አቡ ካዉተꬃን ኦራꬃ ዎይንያ ኤሳ ህንተንቱና ኡሻና ጋላሳይ ጋካናዉ፥ ላኤንꬁዋ ሀ ዎይንያ ኤሳ ኡባካ ኡሽከ” ያጌዳ።

30 ማዝሙርያ የጾዋፐ ጉይያን፥ ደብረ ዛይተ ጌተትያ ደርያ ቤድኖ።

31 የሱስ ሄ ዎደ ኡንቱንታ፥ “ሀቼ ቃማ ህንተንቱ ኡባይ ታና አጊደ ክቻና፤ አያዉ ጎፐ፥ ጾሳ ማጻፋይ፥

33 ጰጽሮስ ዛሪደ፥ “ኡንቱንቱ ኡባቱ ኔና አጊደ ክቻናዋንታ፤ ታን ኔና ኡባካ የጋደ ክችከ” ያጌዳ።

34 የሱስ ጰጽሮሳ፥ “ታን ነዉ ቱሙዋ ኦዳይ፤ ሀቼ ቃማ ኩቱ ዋሳናፐ ካሰ፥ ኔን ታና ሄዙ ካላ ካዳናሳ” ያጌዳ።

35 ጰጽሮስ ዛሪደ፥ “ታን ሀራይ አቶ፥ ኔናና እትፐ ሀይቂንቶካ፥ ኔና ኡባካ ካድከ” ያጌዳ። ቃይ የሱሳ ካልያዋንቱ ኡባቱካ ሄዋዳን ጌድኖ።

36 የሱስ ሄ ዎደ ባረና ካልያዋንቱና ጌተሰማንያ ጌተትያሳ ቢደ ኡንቱንታ፥ “ታን ህን ባደ ጾሳ ዎስሽን፥ ህንተንቱ ሀዋን ኡትሽተ” ያጌዳ። 37 ሄዋፐ ጉየ ጰጽሮሳነ ዛብድዮሳ ናና ላኡዋ ባረናና አፊደ፥ ዳሮ ካዩዋነ ኡጋ ዶሜዳ። 38 ቃይ ኡንቱንታ፥ “ታን ሀይቃና ጋካናዉካ ካዮታይ፤ ሀዋን ቤጎቲደ፥ ታናና ናግተ” ያጌዳ።

39 ላፋ ስንꬃኮ ሺቂደ፥ ሳኣን ጉፋኒደ፥ “ታ አቦ፥ ዳንዳየትያዋ ግዶፐ፥ ሀ ጹኣ ታፐ ድጋ፤ ሽን ኔን ኮይያዋዳን ሀኖፐ አትን፥ ታን ኮይያዋዳን ሀኖፖ” ያጊደ ጾሳ ዎሴዳ።

40 የሱስ ባረና ካልያዋንቱኮ ስሚደ ዬዳ፤ ገምእሾዋንታ ደሚደ ጰጽሮሳ፥ “ህንተንቱ እት ሳተንቶነካ ገምእሸናን ታናና ናጋናዉ ዳንዳይበይክቴ? 41 ፓጭያን ህንተንቱ ገለና ማላ፥ ምንተነ ጾሳ ዎስተ፤ አያናይ ጊግ ኡቴዳ፤ ሽን አሳተꬃ ኤሻይ ዳቡራንቻ” ያጌዳ።

42 የሱስ ቃይ ላኤንꬁዋ ቢደ፥ “ታ አቦ፥ ታን ሀ ዎልቃማ መቱዋ አከናን ደእሽን ጹኣ ደንꬃናዉ ዳንዳየተናዋ ግዶፐ፥ ኔን ግያዌ ሀኖ” ያጊደ ጾሳ ዎሴዳ። 43 ቃይካ ስም ዪደ፥ አ ካልያዋንቱ አይፍያ ገምእሹ ጎዝ ዎꬄዳ ድራዉ፥ ገምእሾዋንታ ደሜዳ።

44 ቃይካ ኡንቱንታ የግ ቢደ፥ ሄዘንꬁዋ ካሰ ቃላ ዛሪደ፥ ጾሳ ዎሴዳ። 45 ሄዋፐ ጉይያን፥ ባረና ካልያዋንቶ ዪደ፥ “ሀእ ጋካናዉካ ገምእሺቴነ ሸምፒቴ? በእተ፥ ታና፥ አሳ ናኣ፥ ናጋራንቻ አሳቶ አꬂደ እምያ ዎዲ ጋኬዳ። 46 ደንድና ቦይተ፤ በእተ፥ ታና አꬅ እምያዌ ሀዌኩ ጋኬዳ” ያጌዳ።

47 የሱስ ሄዋ ብሮ ሃሳይሽን፥ ታማነ ላኡ አ ካልያዋንቱፐ እቱ፥ ይሁዳይ፥ ጋክ ዎꬌዳ፤ ቃይ ቄሳቱዋ ካፓቱነ ጋድያ ጭማቱ ኪትና፥ ማሻነ ጻምኣ ኦይቄዳ ጮራ አሳይ አናና እትፐ ዬዳ። 48 የሱሳ አꬅ እምያዌ ሄ ጮራ አሳ፥ “ታን የርያዌ አ፤ አ ኦይቂተ” ያጊደ ማላ ኦድ ዎꬄዳ።

49 ኤለካ የሱሳኮ ሺቂደ፥ “ታማርስያዎ፥ ሳሮ ደአይ” ያጊደ አ የር አኬዳ።

50 የሱስ ይሁዳ፥ “ታ ላገዉ፥ ኔን ኦꬃናባ ኦꬃ አጋ” ያጌዳ።

ሄዋፐ ጉይያን፥ ሄ ጮራ አሳይ ሺቂደ፥ የሱሳ ሎይꬅ ኦይቄዳ። 51 የሱሳና ደእያዋንቱፐ እቱ ባረ ማሻ ከሲደ ቄሳቱዋ ኡባቱዋ ካፑዋ ቆማ ሀይꬃ ቃንጽ ኦሌዳ። 52 የሱስ ሄ ዎደ አ ሀዋዳን ያጌዳ፤ “ነ ማሻ አኬዳሳን ዛራደ ዎꬃ፤ አያዉ ጎፐ፥ ማሻ ደንꬅያ ኡባይ ማሻን ሀይቃና። 53 ታ አቡ ዳሮ ሻአ ኪታንቻቱዋ እት ኩꬃን የዲደ፥ ታና ማዳና ማላ፥ ታን አ ዎሳናዉ ዳንዳይያዋ ኤርኪ? 54 ያትና፥ ጾሳ ቃላይ ሀዋዳን ሀናናዉ በሴ ያጌዳዌ ዋኒደ ፖለታናዉ ዳንዳዪ?” ያጌዳ።

55 ሄዋፐ ጉይያን፥ የሱስ ሄዋን ሺቄዳ ጮራ አሳ ሀዋዳን ያጌዳ፤ “ታና ካይሶ ከሲደ፥ ካይሱዋ ኦይቂያዋዳን ኦይቃናዉ ማሻነ ጻምኣ ኦይቂደ ዬድቴ? ታን ጌሻ ጎልያን ታማርሳደ፥ ጋላሳን ጋላሳን ህንተንቱና ኦꬅያ ዎደ ታና ኦይቂበይክታ፤ 56 ሽን ሀዌ ኡባይ ሀኔዳዌ ናባቱ ጾሳ ቃላን ጻፌዳዌ ፖለታናሳ” ያጌዳ።

የሱሳ ካልያዋንቱ ሄ ዎደ ኡባቱ አ የግ ቤድኖ።

57 የሱሳ ኦይቄዳዋንቱ ቄሳቱዋ ኡባቱዋ ካፑዋ ቃያፋኮ፥ ህግያ ታማርስያዋንቱነ ጭማቱ ሺቄዳሳ አኪደ ቤድኖ። 58 ሽን ጰጽሮስ ቄሳቱዋ ኡባቱዋ ካፑዋ ድርሳ ግዶ ጋካናዉ፥ ሃኩዋን አ ካሌዳ፤ የዉዋ ዉርሰꬃ በአናዉ ድርሳ ግዶ ገሊደ፥ ናግያዋንቱና ኡት አጌዳ።

59 ቄሳቱዋ ካፓቱነ ሺቄዳ አሳይ ኡባይ የሱሳ ዎꬋናዉ አ ቦላ ዎርዱዋ ማርካ ደማናዉ ኮዬድኖ። 60 ሽን ሀራይ አቶ ጮራ አሳይ ዪደ፥ አ ቦላ ዎርዱዋን ማርካትናካ አፐ አይነ ደምበይክኖ። ጉየፐ ላአቱ ዪደ፥ 61 “ሀ ብታኒ፥ ‘ታን ጾሳ ጌሻ ጎልያ ኮላደ፥ ሄዙ ጋላሳን ዛራደ ኬጻናዉ ዳንዳያይ’ ጌዳ” ያጌድኖ።

62 ቄሳቱዋ ኡባቱዋ ካፑ ደንድ ኤቂደ የሱሳ፥ “ሀዋንቱ ኔና ሞትያ ሞቶ ነዉ ዛርያባይ ባዌ?” ያጌዳ። 63 ሽን የሱስ ጮኡ ጌዳ፤ ቃይካ ቄሳቱዋ ኡባቱዋ ካፑ አ፥ “ታን ኔና ደኡዋ ጾሳ ሱንꬃን ጫላይ፤ ኔን ጾሳ ናኣ ክርስቶሳ ግዶፐ ኑዉ ኦዳ” ያጌዳ።

64 የሱስ ዛሪደ፥ “ኔን ነ ሁጰዉካ ጋዳ፤ ሽን ታን ህንተንቶ ኦዳይ፤ ሀዋፐ ስንꬃን፥ ህንተንቱ ታና፥ አሳ ናኣ፥ ዎልቃማ ጾሳፐ ኡሸቻ ባጋና ኡቴዳዋነ ሳሉዋ ሻርያና ዪሽን በአና” ያጌዳ። ዳኔላ 7:13

65 ሄዋፐ ጉይያን፥ ቄሳቱዋ ኡባቱዋ ካፑ ባረ ማዩዋ ፔꬍ ኦሊደ፥ “ሀዌ ቦሬዳ፤ ኑና ሀዋፐ ስንꬃን አያዉ ሀራ ማርካ ኮሺ? እ ሀእ ቦርያዋ ህንተንቱ ስሴድታ። 66 ህንተንቱ ቆፋይ አዬ?” ያጌዳ።

ኡንቱንቱ፥ “አዉ ሀይቁ በሴ” ያጊደ ዛሬድኖ። ዎጋ 24:16

67 ሄዋፐ ጉይያን፥ ኡንቱንቱ አ ዴሙዋን ጩቺደ፥ አ ደቼድኖ፤ ሀራንቱ ቃይ አ ባቂደ፥ ኢሳ. 50:6 68 “ክርስቶሳ! ኔን ኔና ናበ ጋሳሽን፥ ኔና ሾጬዳዌ ኦነንቶ አነ ኑዉ ኦዳ!” ያጌድኖ።

69 ጰጽሮስ ጎልያፐ ካረና ድርሳ ግዶን ኡት ደእሽን፥ እት ቆማታ አኮ ያደ፥ “ኔንካ ጋሊላ የሱሳና እትፐ ደኣ” ያጋዱ።

70 ሽን እ ኡንቱንቱ ኡባ ስንꬃን ሄ ቆማቶ፥ “ኔን ግያዌ አየንቶ ታን ኤርከ” ያጊደ ካዴዳ።

71 ቃይ ቢደ ድርሳ ፐንግያኮ ከስሽን፥ ሀራ ቆማታ አ በኣደ፥ ሄዋን ደእያ አሳቶ፥ “ሀ ብታኒ ናዝሬትያ የሱሳና ደኤ” ያጋዱ።

72 ጰጽሮስ ላኤንꬁዋ ጫቂደ፥ “ታን ሄዋ ብታንያ ኤርከ” ያጌዳ።

73 ላፋ ጋምእሽን፥ ሄዋን ኤቄዳ አሳይ ጰጽሮሳኮ ዪደ፥ “ኔንካ ቱማ ኡንቱንቱና እትፐ ደኣ፤ አያዉ ጎፐ፥ ኔን ሃሳይያ ሃሳያይካ ኔና ኤርሴ” ያጌድኖ።

74 ሄዋፐ ጉይያን ጰጽሮስ፥ “ታን ሄዋ ብታንያ ኤርከ!” ያጊደ፥ ባረና ሸቃነ ጫቁዋ ዶሜዳ።

ሄ ዎደ ኤለካ ኩቱ ዋስ አጌዳ። 75 ጰጽሮስ ባረና የሱስ፥ “ኔን ኩቱ ዋሳናፐ ካሰ ሄዙ ካላ ታና ካዳናሳ” ጌዳዋ ሀሳዪደ፥ ካረ ከሲደ፥ ሴለት ዬኬዳ።