27
የሱስ ጵላጾሳ ስንꬃ ፕርዳዉ ሺቄዳ
(ማር. 15:1፤ ሉቃሳ 23:1-3፤ ዮሃ. 18:28-32)
1 ዎንታ ጉራን ቄሳቱዋ ካፓቱ ኡባቱነ ጋድያ ጭማቱ የሱሳ ዎꬋናዉ ማቀቴድኖ፤ 2 ኡንቱንቱ የሱሳ ቃች አፊደ፥ ጋድያ አይስያ ጵላጾሳዉ አꬅ እሜድኖ።
3 የሱሳ ሄ ዎደ ኦይꬄዳ ይሁዳይ ጵላጾስ የሱሳ ቦላ ፕርዴዳዋ በኢደ፥ “አዬሮ! ኦይናን አጋርክታ!” ያጊደ፥ ሄ ማንእያን ሀታሙ ብራ ቄሳቱዋ ካፓቶነ ጋድያ ጭማቶ ጉየ ዛሪደ፥ 4 “ታን ጌሻ አሳ ኦይꬃደ ናጋራ ኦꬃድ” ያጌዳ።
ሽን ኡንቱንቱ አ፥ “ሄዌ ኑዉ አያ መቴ? ሄዌ ነ ሸነ” ያጌድኖ።
5 ይሁዳይ ብራ ጌሻ ጎልያን ኦል አጌዳ፤ ኡንቱንቱ ማታፐ ቢደ፥ ሱለት ሀይቄዳ።
6 ቄሳቱዋ ካፓቱ ብራ አኪደ፥ “ሀ ብራይ ሱꬃ ሚሻ ግድሽን፥ ኑን ጌሻ ጎልያ ሚሻና ጋꬅያዌ ዎጋ ግደና” ያጌድኖ። 7 ሄዋፐ ጉየ እትፐ ዞረቲደ፥ እማꬃ አሳዉ ሞጎ ጋድያ ኦꬃናዉ ኡርቃፐ ሚሻ መꬍያዋንቱ ጋድያ ሻሜድኖ። 8 ሄዋ ድራዉ፥ ሄ ጋዲ ሀቼ ጋካናዉካ፥ ሱꬃ ጋድያ ጌተቲደ ጼሰቴ።
9 ናብያ ኤርማስ፥ “ኡንቱንቱ አዉ እማናዉ ቆፔዳ ሀታሙ ሹቻ ብራ አኪደ፥ 10 ጎዳይ ታና አዛዞዋዳን፥ ኡርቃፐ ሚሻ መꬍያዋንቱ ጋድያ ሻማናዉ እሜድኖ” ጌተቶዌ ሄ ዎደ ፖለቴዳ ጌዳ። ዛካ. 11:12-13
ጵላጾስ የሱሳ ኡባባ ኦቼዳ
(ማር. 15:2-5፤ ሉቃሳ 23:3-5፤ ዮሃ. 18:33-38)
11 የሱስ ጋድያ አይስያዋ ስንꬃ ሺቅና፥ ጋድያ አይስያዌ አ፥ “ኔን አይሁዳቱዋ ካቴ?” ያጊደ ኦቼዳ።
የሱስ አ፥ “ኔንካ ጋደኣ” ያጌዳ።
12 ቄሳቱዋ ካፓቱነ ጋድያ ጭማቱ አ ሞትና፥ ኡንቱንቶ አይነ ዛሩዋ እምቤና። 13 ሄ ዎደ፥ ጵላጾስ የሱሳ፥ “ሀዋንቱ ኔና ሞትያባ ኡባ ስስኪ?” ያጌዳ።
14 የሱስ ሀራይ አቶ፥ እት ቃላካ ዛረናን እጽና፥ ጋድያ አይስያዋንቱ ዳሪ ማላለቴዳ።
የሱስ ሀይቆ ፕርደቴዳ
(ማር. 15:6-15፤ ሉቃሳ 23:13-25፤ ዮሃ. 18:39-40፤ 19:1-16)
15 ጋድያ አይስያዌ ፓስጋ ቦንችያ ጋላሳን፥ አሳይ ኮይያ እት ኡራ ቃሹዋፐ ብልያ ዎጋይ ደኤ። 16 ሄ ዎደ እት ባርባና ጌተትያ የሱስ ዳሮ ኤረቴዳ ኢታ ብታኒ ቃሾ ጎለን ደኤ። 17 ሄዋ ድራዉ፥ ጮራ አሳይ እትሳ ሺቄዳሳን ጵላጾስ፥ “ታን ህንተንቶ ባርባና ግያ የሱሳ ብሎ፥ ዎይ ክርስቶሳ ጌተትያ የሱሳ ብሎ?” ያጊደ አሳ ኦቼዳ። 18 አያዉ ጎፐ፥ ኡንቱንቱ ቃናቲደ የሱሳ ኦꬄዳዋ እ ኤሬ።
19 ጵላጾስ ፕርዳ ጎለን ኡት ደእሽን፥ አ ማቻታ አዉ፥ “ሄ ጽሎ ብታንያ አይነ ኦꬆፓ፤ አያዉ ጎፐ፥ ታን ሀቼ ቃማ አኩሙዋን አባን ዳሮ መቶታድ” ያጋደ ኪታዱ።
20 ሽን ቄሳቱዋ ካፓቱነ ጋድያ ጭማቱ ጵላጾስ ባርባና ብሊደ፥ የሱሳ ዎꬋናዳን፥ ሺቄዳ አሳይ አ ዎሳና ማላ፥ አሳ ጭሜድኖ።
21 ጵላጾስ ዛሪደ ኡንቱንታ፥ “ታን ኡንቱንቱ ላአቱዋፐ ህንተዉ ኦና ብላናዳን ኮዪቴ?” ያግና ኡንቱንቱ፥ “ባርባና ብላናዳን ኮዬቶ” ያጌድኖ።
22 ጵላጾስ፥ “ያትና፥ ክርስቶሳ ጌተትያ የሱሳ ዎቶ?” ያጊደ ኡንቱንታ ኦችና ኡባይ፥ “ማስቃልያ ቦላ ምስማርያን ꬍሸቲደ ካቀቶ” ያጌድኖ።
23 ጵላጾስ አሳ፥ “አያዉ? አይ ኢታባ ኦꬄዴ?” ያጌዳ።
ሽን አሳይ ካሰዋፐካ ባረንቱ ኮሻ ꬎቁ ኦꬂደ፥ “ማስቃልያ ቦላ ምስማርያን ꬍሸቲደ እ ካቀቶ” ያጌድኖ።
24 ዋላሳይ ደንዳናዋፐ አትን፥ አይነ ሀነናዋ ጵላጾስ በኢደ፥ ሃꬃ አኪደ፥ “ሀ ብታኒ ሀይቂያዋን ታን ገልከ፤ ሄዋ ህንተንቱ ኤርተ” ያጊደ ሺቄዳ አሳ ስንꬃን ባረ ኩሽያ ሜጨቴዳ። ዛረ. 21:6-9
25 ሺቄዳ አሳይ ኡባይ ዛሪደ፥ “አ ሱꬃ ጎሚ ኑናነ ኑ ናና ጋኮ” ያጌዳ።
26 ሄዋፐ ጉይያን፥ ጵላጾስ ባርባና ኡንቱንቶ ብሌዳ፤ ልሱዋን የሱሳ ሾጪደ፥ ማስቃልያ ቦላ ምስማርያን ꬍሺደ ካቃናዉ ኡንቱንቶ አꬂደ እሜዳ።
ዎታዳራቱ የሱሳ ቦላ ቅሊጬድኖ
(ማር. 15:16-20፤ ዮሃ. 19:2-3)
27 ሄዋፐ ጉይያን፥ ጵላጾሳ ዎታዳራቱ የሱሳ ጋድያ አይስያዋ ቤሩዋ አፍና፥ ዎታዳራቱ ኡባይ አ ምይያን ዩይ አꬊደ ኤቄድኖ። 28 አ ማዩዋ ቃር አኪደ፥ ዞኦ ማዩዋ አ ማይዜድኖ። 29 ቃይ አጉንꬃ ካላቻ ጊግሲደ፥ አ ሁጲያን ዎꬄድኖ፤ አ ኡሸቻ ኩሽያን ማቃ ጻምኣ ኦይꬂደ፥ አ ስንꬃን ጉልባቲደ፥ “አይሁዳቱዋ ካተዉ፥ ሳሮ ደአይ!” ያጊደ፥ አ ቦላ ቅሊጬድኖ። 30 አ ቦላ ጩቼድኖ፤ ሄ ማቃ ጻምኣ አኪደ፥ አ ሁጲያ ሾጬድኖ። 31 ኡንቱንቱ አ ቦላ ቅሊጬዳዋፐ ጉይያን፥ ዞኦ ማዩዋ አፐ ቃር አኪደ፥ አ ማዩዋ አ ማይዜድኖ፤ ቃይ ማስቃልያ ቦላ ምስማርያን ꬍሺደ አ ካቃናዉ አፌድኖ።
የሱስ ካቀቴዳ
(ማር. 15:21-32፤ ሉቃሳ 23:25-43፤ ዮሃ. 19:17-27)
32 ኡንቱንቱ ካረ ከሲደ፥ እት ስሞና ጌተትያ ቀሬና ጋደ አሳ ደሚደ፥ የሱሳ ማስቃልያ ዎልቃን ቶሴድኖ። 33 ጎልጎታ ጌተትያሳ ጋኬድኖ። “ጎልጎታ” ያገትያዌ “ሁጲያሳ” ግያዋ። 34 ሄዋን ኡንቱንቱ ጫሜዳ ዎይንያ ኤሳ የሱሳዉ ኡሻናዉ እሜድኖ፤ እ ሄዋ ጋንጽ ጼሊደ፥ ኡሸናን እጼዳ። ማዝ. 69:21
35 ኡንቱንቱ ማስቃልያ ቦላ ምስማርያን ꬍሺደ አ ካቆዋፐ ጉይያን፥ አ ማዩዋ ሻኪደ፥ ሳማ የጊደ አኬድኖ። ማዝ. 22:18 36 ሄዋፐ ጉይያን፥ አ ናጋናዉ ሄዋን ኡት አጌድኖ። 37 ቃይ፥ “ሀዌ አይሁዳቱ ካትያ የሱሳ” ያጊደ ሞቱ ጻፈቶዋ አ ሁጰ ባጋና ዎꬄድኖ። 38 የሱሳና ሄ ዎደ ላኡ ካይሳቱዋ እቱዋ አፐ ኡሸቻ ባጋና፥ ቃይ እቱዋ አፐ ሀድርሳ ባጋና፥ ማስቃልያ ቦላ ምስማርያን ꬍሺደ ካቄድኖ።
39 ኦግያና አꬍያ አሳይ የሱሳ ካꬊደ፥ ባረንቱ ሁጲያ ቃꬂደ ቦሬድኖ። ማዝ. 22:7፤ 109:25 40 “ጌሻ ጎልያ ኮላደ ሄዙ ጋላሳ ግዶን ኬጽያዎ፥ ነ ሁጲያ አሻ፤ ኔን ጾሳ ናኣ ግዶፐ፥ አነ ማስቃልያ ቦላፐ ዎꬋ” ያጌድኖ። ማቶሳ 26:61፤ ዮሃ. 2:19
41 ሄዋዳንካ፥ ቄሳቱዋ ካፓቱ ህግያ ታማርስያዋንቱናነ ጭማቱዋና እትፐ የሱሳ ቦላ ቅሊጪደ፥ ሀዋዳን ያጌድኖ፤ 42 “ሀራንታ አሼዳ፤ ሽን ባረና አሻናዉ ዳንዳየና። እ እስራኤልያ ካትያ፤ አነ ማስቃልያ ቦላፐ ሀእ ዎꬎ፤ ኑንካ ቃይ አን አማናና። 43 ጾሳን እ አማነቴ፤ ጾሳይ አ አሻናዉ ኮዮፐ አነ አሾ፤ አያዉ ጎፐ፥ እ ባረና፥ ‘ታን ጾሳ ናኣ’ ጌ” ያጌድኖ። ዛረ. 22:8
44 ቃይ ሀራይ አቶ፥ አናና ማስቃልያ ቦላ ምስማርያን ꬍሸቲደ ካቀቴዳ ካይሳቱካ ሄዋዳን ጊደ፥ አ ቦላ ቅሊጬድኖ።
የሱስ ሀይቄዳ
(ማር. 15:33-41፤ ሉቃሳ 23:44-49፤ ዮሃ. 19:28-30)
45 ኡሱፑን ሳትያፐ ዶሚደ፥ ኡዱፑ ሳትያ ጋካናዉ፥ ቢታይ ኡባይ ꬉሜዳ። 46 ኡዱፑ ሳተ ግድያ ሄራን የሱስ ባረ ቃላ ꬎቁ ኦꬂደ፥ “ኤሎሄ፥ ኤሎሄ፥ ላማ ሳባቅታኒ?” ያጌዳ። ሄዋ ጉሳይ፥ “ታ ጾሳዉ፥ ታ ጾሳዉ፥ ታና አያዉ ጮኡ ጋድ?” ጉሳ። ማዝ. 22:1
47 ሄዋን ኤቄዳ አሳፐ እቱ ሄዋ ስሲደ፥ “ሀ ብታኒ ኤላሳ ጼሴ” ያጌዳ። 48 ሄ ማንእያን ኡንቱንቱፐ እቱ ዎጺደ፥ እስፖንጅያ አኪደ፥ ጫላ ዎይንያ ኤሳ ግዶ የጊደ፥ ሄዋ ማቃ ጻምኣ ጼራን ዎꬂደ፥ ኡሻናዉ አ ዶናኮ ሺሼዳ። ማዝ. 69:21 49 ሽን የኮንቱ፥ “አነ ደአሻ፥ ኤላስ አ አሻናዉ ያናዌንቶ በአና” ያጌድኖ። 50 የሱስ ላኤንꬁዋ ባረ ቃላ ꬎቁ ኦꬅ ዋሲደ፥ ሀይቂ አጌዳ።
51 አኬክተ፤ ጌሻ ጎልያን ካቀቴዳ ጋርዱ ቆሞፐ ዱገ ጋካናዉ፥ ላኡ ከሲደ፥ ፖሸት ዎꬌዳ፤ ሳአይ ቃጼዳ። ቃይ ዛላይካ ጳልቀቴዳ፤ ከሳ 26:31-33 52 ጮራ ዱፉ ዶየቴዳ። ጾሳ አሳፐ ጮራቱ ሀይቄዳዋንቱ፥ ሀይቁዋፐ ደንዴድኖ። 53 ኡንቱንቱ ዱፉዋፐ ከሲደ፥ የሱስ ሀይቁዋፐ ደንዶዋፐ ጉይያን፥ ጌሻ ካታማ ቤድኖ፤ ሄዋን ኡንቱንታ ጮራ አሳይ በኤዳ።
54 ጼቱዋ ካፑነ አናና የሱሳ ናግያ ዎታዳራቱ ሳአይ ቃጽያዋነ ሄዋን ሀኔዳዋ ኡባ በኤዳ ዎደ ዳሮ ያዬድኖ፤ ያሻ ጋሱዋን፥ “ቱሙ ሀዌ ጾሳ ናኣ” ያጌድኖ።
55 ሄዋን ጮራ ማጫዋንቱ፥ ጋሊላፐ ዶሚደ፥ የሱሳ ማዲደ ካልያዋንቱ፥ ሃኩዋን ኤቂደ ጼሊኖ። 56 ኡንቱንቱ ግዶን ማግዳላ ጌተትያ ካታማፐ ዬዳ ማይራማ፥ ያቆባነ ዮሴፎ ዳያ ማይራማነ ዛብድዮሳ ናና ዳያ ደኢኖ።
የሱስ ሞገቴዳ
(ማር. 15:42-47፤ ሉቃሳ 23:50-56፤ ዮሃ. 19:38-42)
57 ሳአይ ኦማርስያ ዎደ፥ ዮሴፎ ጌተትያ እት ዱረ ብታኒ፥ አርማትያሳ ካታማ ብታኒ ዬዳ፤ እ ባረ ሁጰዉካ የሱሳ ካልያዋ። 58 ዮሴፎ ጵላጾሳኮ ቢደ፥ የሱሳ አሃ አካናዉ ዎሴዳ፤ ጵላጾስ ዮሴፎ እመታና ማላ አዛዜዳ። 59 የሱሳ አሃ አኪደ፥ ጌሻ ሞጉዋ ማዩዋን 60 ጻጺደ ባረዉ ሞገታናዉ ሹቻ ዎጬዳ ኦራꬃ ጎንጎሉዋ ግዶን አ አሃ ዎꬄዳ፤ ቃይ ሄ ጎንጎሉዋ ዶናን ዎጋ ሹቻ ጎንዶርስ ዎꬂደ፥ ባሽ ቤዳ። 61 ማግዳላ ካታማፐ ዬዳ ማይራማነ የኮ ማይራማ ሄዋን ጎንጎሉዋኮ ስሚደ ኡቴድኖ።
62 ሳምባታዉ ጊገትያ ጋላሳፐ ዎንተꬃ ጋላስ፥ ቄሳቱዋ ካፓቱነ ፓርሳዋቱ ጵላጾሳና ጋከቲደ፥ ሀዋዳን ያጌድኖ፤ 63 “ጎዳዉ፥ ሄ ዎርዱ ፓጻ ደእያ ዎደ፥ ‘ታን ሄዙ ጋላሳፐ ጉይያን፥ ሀይቁዋፐ ደንዳና’ ያጎዋ ኑን ሀሳዬዶ። ማቶሳ 16:21፤ 17:23፤ 20:19፤ ማር. 8:31፤ 9:31፤ 10:33-34፤ ሉቃሳ 9:22፤ 18:31-33 64 ሄዋ ድራዉ፥ አ ሞጌዳ ጎንጎሉዋ ሄዙ ጋላሳ ጋካናዉ፥ ሎይꬅ ናጋና ማላ አዛዛርኪ፤ ሄዌ ꬋዮፐ አ ካልያዋንቱ ቢደ፥ አ አሃ ዉኢደ አሳዉ፥ ‘ሀይቁዋፐ ደንዴዳ’ ያጋናዋንታ፤ ላኤንꬅያ ባላይ ካሰ ባላፐ ኡባ ያ ኢታና” ያጌድኖ።
65 ጵላጾስ ኡንቱንታ፥ “ህንተንቶ ናግያዋንቱ ደኢኖ፤ ቢደ ህንተንቶ ዳንዳየትያ ኬና ናግሽተ” ያጌዳ።
66 ሄዋፐ ጉየ ኡንቱንቱ ቢደ፥ ሹቻ ቦላ ማታፋ አታሚደ፥ ቃይ ናግያዋ ያን ዎꬂደ፥ የሱሳ ሞጌዳ ጎንጎሉዋ ናግሴድኖ።