28
የሱስ ሀይቁዋፐ ደንዴዳ
(ማር. 16:1-10፤ ሉቃሳ 24:1-12፤ ዮሃ. 20:1-10)
1 ሳምባታይ አꬍና ዎጋ ጋላስ ዎንታ ባካልያን፥ ማግዳላ ጌተትያ ካታማፐ ዬዳ ማይራማነ የኮ ማይራማ የሱስ ሞገቴዳ ጎንጎሉዋ በአናዉ ቤድኖ። 2 ጎዳ ኪታንቻይ ሳሉዋፐ ዎꬌዳ ድራዉ፥ ሳአይ ዳሮ ቃጼዳ፤ ሄ ኪታንቻይ ዪደ፥ ሹቻ ጎንዶርስ ኦሊደ፥ አ ቦላ ከስ ኡቴዳ። 3 አ ማላይ ዋልቃንꬃ ማላቴ፤ አ ማዩካ ሻቻዳን ቦꬃ። 4 ናግያዋንቱ ኪታንቻዉ ያሻ ኮኮሪደ፥ ሀይቄዳ አሳዳን ሀኔድኖ።
5 ኪታንቻይ ማጫዋንታ ሀዋዳን ያጌዳ፤ “ያዮፕተ፤ አያዉ ጎፐ፥ ማስቃልያ ቦላ ምስማርያን ꬍሺደ ካቄዳ የሱሳ ህንተንቱ ኮይያዋ ታን ኤራይ። 6 እ ሀዋን ባዋ፤ አያዉ ጎፐ፥ እ ባረ ጌዳዋዳንካ ሀይቁዋፐ ደንድ ድጌዳ፤ ሃ ዪደ፥ እ ሞገት ግሶሳ በእተ። 7 ህንተንቱ ሀእ ኤለካ ቢደ፥ የሱሳ ካልያዋንቶ፥ ‘የሱስ ሀይቁዋፐ ደንድ ድጌዳ። ቃይ እ ህንተፐ ካሰቲደ፥ ጋሊላ ቤ፤ ህንተንቱ አ ያን በአና’ ያጊደ ኦድተ። በእተ፥ ታን ህንተንቶ ኦዳድ” ያጌዳ።
8 ኡንቱንቱ ያዪድነ ቃይ ዳሮ ናሸቲደ፥ የሱስ ሞገቴዳ ጎንጎሉዋ ማታፐ ኤለካ ክቺደ፥ የሱሳ ካልያዋንቶ ኦዳናዉ ዎጼድኖ።
9 ሄ ማንእያን የሱስ ኡንቱንቱና ጋከቲደ ኡንቱንታ፥ “ሳሮ ደኢቴ” ያግ አጌዳ፤ ኡንቱንቱ አኮ ሺቅ አ ገድያ ኦይቂደ፥ አዉ ጎይኔድኖ። 10 የሱስ ሄ ዎደ ኡንቱንታ፥ “ያዮፕተ፤ ታ እሻቱ ጋሊላ ባና ማላ፥ ቢደ ኡንቱንቶ ኦድተ፤ ኡንቱንቱ ታና ያን በአናዋንታ” ያጌዳ።
11 ሄ ማጫዋንቱ ብያ ዎደ፥ ጎንጎሉዋ ናግያ ዎታዳራቱዋፐ አማሬዳዋንቱ ካታማ ቢደ፥ ሀኔዳዋ ኡባ ቄሳቱዋ ካፓቶ ኦዴድኖ። 12 ቄሳቱዋ ካፓቱ ጭማቱዋና እትፐ ሺቅ ዞረቲደ፥ ዎታዳራቶ ዳሮ ሚሻ እሚደ፥ 13 “ ‘ኑን ገምእሹዋን ደእሽን አ ካልያዋንቱ ቃማ ዪደ፥ አ አሃ ዉኤድኖ’ ያግተ። 14 ሀ የዉዋ ጋድያ አይስያዌ ስሶፐ፥ ኑን አዉ ኦድ አማንꬃና፤ ቃይ ህንተንታ አይነ ህርግሰናዳን ኦꬃና” ያጌድኖ።
15 ዎታዳራቱ ሚሻ አኪደ፥ ባረንቶ ኦዴዳዋዳን ኦꬄድኖ። ሀ የዉ አይሁዳቱዋ ማታን ሀቼ ጋካናዉ፥ ኦደቲደ ደኤ።
የሱስ ባረና ካልያዋንቶ ቤቴዳ
(ማር. 16:14-18፤ ሉቃሳ 24:36-49፤ ዮሃ. 20:19-23፤ ኪታ 1:6-8፤ 1 ቆሮ. 15:3-8)
16-17 ሽን ታማነ እት አ ካልያዋንቱ የሱስ ባረንታ ቢተ ጌዳ ጋሊላ ጋድያ ቢደ አ በኤዳ ዎደ፥ አዉ ጎይኔድኖ፤ ሽን ኡንቱንቱፐ እቱ እቱ ስꬌድኖ።ማቶሳ 26:32፤ ማር. 14:28
18 የሱስ ኡንቱንቱኮ ሺቂደ፥ ኡንቱንታ ሀዋዳን ያጌዳ፤ “ማታይ ኡባይ ሳሉዋንነ ሳኣን ታዉ እመቴዳ። 19 ሄዋ ድራዉ፥ ህንተንቱ ቢደ፥ አሳ ኡባ ታና ካልያዋንታ ኦꬅተ፤ አዉዋ ሱንꬃን፥ ናኣ ሱንꬃንነ ጌሻ አያና ሱንꬃን ኡንቱንታ ጻማቅተ። ኪታ 1:8 20 ታን ህንተንታ አዛዜዳባ ኡባ ኡንቱንቱ ናጋና ማላ፥ ኡንቱንታ ታማርስተ፤ ታን ዎድያ ዉርሰꬃይ ጋካናዉካ ኡባ ዎደ ህንተንቱና ደእያዋ አኬክተ” ያጌዳ።