ማርቆስ ጻፌዳ
ምሽራቹዋ ቃላ
ገሉዋ
ማርቆስ ጻፌዳ ምሽራቹ ኮይሮ ዶሚድካ፥ “ሀዌ ጾሳ ናኣ የሱስ ክርስቶሳ ምሽራቹዋ ቃላዉ ዶመꬃ” ያጌ። ሀ ምሽራቹዋ ቃላ ግዶን የሱስ ኦሱዋ አሳነ ማታይ ደእያ አሳ ግዲደ ሺቄዳ። የሱሳ ማታይ አ ትምርትያን፥ ጻላህያ ጭታ ቦላ አዉ ደእያ ዎልቃንነ አሳ ናጋራ አቶ ግያዋን በኤቴዳ። የሱስ፥ “ታን አሳ ናአይ ዬዳዌ፥ አሳ፥ ናጋራ አይለተꬃፐ ላአ ከሳናዉ ታ ደኡዋ አꬃደ እማናሳ” ያጊደ እ ባረ ሁጰዉ ሃሳዬዳ።
ማርቆስ የሱሳ ታርክያ ሱረነ ዎልቃ ኩሜዳ ኦግያን ኦዴዳ። እ ጋናዉ ኮዮ ቆፋይካ የሱሳ ቃላነ ትምርትያ ግደናን እ ኦꬄዳ ማላልስያ ኦሳቱዋ ቦላና። ጻማቅያ ዮሃንሳ ታርክያ፥ የሱሳ ጽንቃታነ ፓጭያ ቃንꬃን ኤርስ ስሚደ፥ የሱሳ ትምርትያነ ፓꬁዋባ አሲደ ኦዴዳ። ዎድያፐ ጉይያን የሱሳ ካልያዋንቱ አ ሎይꬅ ኤር ቤዳዋ ኬና አናና ኤቀትያዋንቱ አ ሎይꬅ እጼድኖ። ዉርሰꬃ ሸምፓቱ የሱሳ ደኡዋን ዉርሰꬃ ሳምንታ ግዶን ፖለቴዳ ኦሳቱዋ፤ ሄዋንቱካ አ ካቀꬃባነ አ ደንዱዋባ ኦድያዋንታ።
ማርቆሳ ምሽራቹዋ ዉርሰꬃን ቅንፍያ ግዶን ደእያ 16:9-20 ፓይዳቱ ጌሻ ቃላ እት እት ብለꬃ ጻላላን ደእያዋንታ።
ሸምፓቱዋ ኡባቶ እመቴዳ ቃንꬃ ቆፋቱዋ
ምሽራቹዋ ዶመꬃ 1:1-13
የሱስ ኦሱዋ ጋሊላን ዶሜዳዋ 1:14—9:50
የሱስ የሩሳላመን ኦꬆዋ 10:1-52
የሩሳላመንነ እዝ ዩሹዋን የሱሳ ዉርሰꬃ ሳምንታ 11:1—15:47
ጎዳ የሱሳ ደንዱዋ 16:1-8
ሀይቁዋፐ ደንዴዳ ጎዳ ቆንጨꬃነ ሳሉዋ ቡሳ 16:9-20
1
ጻማቅያ ዮሃንሳ አዋዩዋ
(ማቶሳ 3:1-12፤ ሉቃሳ 3:1-18፤ ዮሃ. 1:19-28)
1 ጾሳ ናኣ *ጾሳ ናኣ፦ በን ጻፈቴዳ እት እት ብለꬃን ሀዌ ባዋ። የሱስ ክርስቶሳ ዎንጋላ ምሽራቹዋ ዶመꬃ።
2 ናብያ እስያስ ጻፌዳ ማጻፋን ጾሳይ፥
“በአ፤ ታ ኪትያዋ ታን ኔፐ ስንꬃዉ የዳና።
እ ነዉ ኦግያ ከሳናዋ። ሚልክ. 3:1
3 እት ብታኒ ቢታ ባዙዋን ባረ ኮሻ ꬎቁ ኦꬂደ፥
‘ጎዳ ኦግያ ጊግስተ።
እ ሀመታና ሎሱዋካ፥
አዉ ሱርስተ’ ጌዳዋዳን”
ሀኔዳ።
4 ጻማቅያ ዮሃንስ አሳ ጻማቂድነ፥ “ጾሳይ ህንተ ናጋራ አቶ ጋና ማላ፥ ህንተንቱ ናጋራፐ ስሚደ ጻማቀትተ” ያግ ቃላ ኦዲደ ቢታ ባዙዋን ከስ ዎꬌዳ። 5 ይሁዳ ጋድያን ደእያ አሳይ ኡባይነ የሩሳላመ ካታማ አሳይ ኡባይ ዮሃንሳኮ ዬድኖ። ባረንቱ ናጋራካ ፓጽና፥ ዮሃንስ ሄ አሳ ዮርዳኖሳ ሻፋን ጻማቄዳ።
6 ዮሃንስ ጋሉዋ እስክያፐ ዳደቴዳ ማዩዋ ማዪደ፥ ባረ ጼሳን ዳፉዋ ዳንጬዳ፤ ቃይ ቦልያነ ዎራ ኤሳ ሜዳ። 2 ካታ. 1:8 7 ዮሃንስ ቃላ ኦዲደ፥ “ታፐ ጉየና ዳሮ ምንያዌ ዬ፤ ሀራይ አቶ፥ አ ጫማካ ገድያፐ ከሳ ቶካናዉ ታን በስከ። 8 ታን ህንተንታ ሃꬃን ጻማቃይ፤ ሽን እ ህንተንታ ጌሻ አያናን ጻማቃናዋ” ያጌዳ።
የሱስ ጻማቀቴዳዋነ ፓጨቴዳዋ
(ማቶሳ 3:13-17፤ 4:1-11፤ ሉቃሳ 3:21-22፤ 4:1-13)
9 የሱስ ሄ ዎደ ጋሊላ ጋድያን ደእያ ናዝሬተ ካታማፐ ዪና፥ ዮሃንስ ዮርዳኖሳ ሻፋን አ ጻማቄዳ። 10 የሱስ ሃꬃፐ ከሶሳና ሳሉ ዶየትሺናነ ጌሻ አያናይ ባረ ቦላ ሀራጵያዳን ዎꬍሽን በኤዳ። 11 ቃይ ሳሉዋፐ፥ “ታን ሲቅያ ታ ናአይ ኔና፤ ታና ነባይ ናሸቼ” ያግያ ቃላይ ስሰቴዳ። ዶመꬃ 22:2፤ ማዝ. 2:7፤ ኢሳ. 42:1፤ ማቶሳ 3:17፤ 12:18፤ ማር. 9:7፤ ሉቃሳ 3:22
12 ኤለካ ጌሻ አያናይ አሳይ ባይና መላ ሳ አ የዴዳ። 13 የሱስ አሳይ ባይና ሳን ባረና ሴጻናይ ፓጭሽን፥ ኦይታሙ ጋላሳ ጋꬄዳ፤ ዱኣናካ ደኤዳ፤ ኪታንቻቱካ ዪደ፥ አዉ ኦꬄድኖ።
የሱስ ሞልያ ኦይቂያ ኦይዱ አሳቱዋ ጼሴዳ
(ማቶሳ 4:12-22፤ ሉቃሳ 4:14-15፤ 5:1-11)
14 ዮሃንስ ቃሸቶዋፐ ጉይያን፥ የሱስ ጾሳ ካዉተꬃ ዎንጋላ ምሽራቹዋ ኦዲደ፥ ጋሊላ ጋድያ ቢደ፥ 15 “ዎዲ ጋኬዳ፤ ጾሳ ካዉተꬃይካ ማታቴዳ። ህንተንቱ ናጋራፐ ስሚደ፥ ዎንጋላ ምሽራቹዋ አማንተ” ያጌዳ።
16 የሱስ ጋሊላ አባ ላንቂያና አꬊደ፥ ሞልያ ኦይቂያዋንታ፥ ስሞናነ አ እሻ እንድራሳ፥ ባረንቱ ዳባ አባን የግያዋንታ በኤዳ። 17 ያቲደ ኡንቱንታ፥ “ታና ካልተ፤ ታን ህንተንታ ሞልያ ኦይቂያዋዳን አሳ ታኮ አህያ ኦግያ ታማርሳና” ያጌዳ። 18 ሄዋፐ ጉይያን ኡንቱንቱ ኤለካ ባረንቱ ዳባ አጊደ፥ የሱሳ ካሌድኖ።
19 የሱስ ጉꬃ ስንꬃዉኮ ቢደ፥ ዛብድዮሳ ናና ላኡ እሻቱዋ፥ ያቆባነ ዮሃንሳ ዎንግርያ ግዶን ባረንቱ ዳባ ጊግስያዋንታ በኤዳ። 20 እ በኦሳንካ ኡንቱንታ ጼስና፥ ባረንቱ አዉዋ፥ ዛብድዮሳ፥ አ ኦሳንቻቱዋና ዎንግርያ ግዶን አጊደ፥ የሱሳ ካሊደ ቤድኖ።
ኢታ አያናይ ኦይቄዳ ብታኒ ፓጼዳ
(ሉቃሳ 4:31-37)
21 ኡንቱንቱ ቅፍርናሆማ ጌተትያ ካታማ ዪደ ገሌድኖ፤ የሱስ ሳምባታ ጋላሳይ ጋኮ ዎደ፥ አይሁዳ ዎሳ ጎለ ገሊደ፥ ታማርሱዋ ዶም አጌዳ። 22 ባረዉ ማታይ ደእያ አሳዳን፥ አሳ እ ታማርስያዋፐ አትን፥ ህግያ ታማርስያዋንቱዳን ታማርሰና ድራዉ፥ አሳይ አ ትምርትያን ማላለቴዳ።
23 ሄ ዎደ ኢታ አያናይ ደእያ እት ብታኒ አይሁዳ ዎሳ ጎለ ገሎሳናካ ባረ ኮሻ ꬎቁ ኦꬂደ፥ 24 “ናዝሬትያ የሱሳ፥ ኔን ኑፐ አያ ኮያይ? ኑና ꬋይሳናዉ ያድ? ኔን ኦነንቶ ኤራይ፤ ኔን ጾሳፐ ኪተቴዳ ጌሻ ግድኪ!” ያጌዳ።
25 የሱስ ሄ ኢታ አያና፥ “ሀይዛ፤ ብታንያፐ ከሳ” ያጊደ አዛዜዳ።
26 ኢታ አያናይ ብታንያ ቡጨሬꬅ፥ ዳሪ ዋስሲደ፥ አፐ ከስ አጌዳ። 27 አሳይ ኡባይ ማላለቲደ፥ “ሀዌ አዬ? ሀ ብታኒ ባረ ማታን ሀራይ አቶ፥ ኢታ አያናቱዋካ አዛዜዳ፤ ኡንቱንቱካ ቃይ አዉ አዛዘቲኖ፤ ሀዌ አይበ ኦራꬃ ትምርቴ?” ያጊደ፥ ባረ ግዶን እቱ እቱዋ ኦቼዳ።
28 ጋሊላ ጋድያን ደእያ ሄራይ ኡባይ ኤለካ የሱሳ ዋርያ ሲሴድኖ።
የሱስ ዳሮ ሀርጋንቻቱዋ ፓꬄዳ
(ማቶሳ 8:14-17፤ ሉቃሳ 4:38-41)
29 የሱስ አይሁዳ ዎሳ ጎልያፐ ከሶሳን፥ ያቆባናነ ዮሃንሳና እትፐ ስሞናነ እንድራሳ ሶይ ብ አጌዳ። 30 ስሞና ቦሎታታ ቆጹዋ ሀርጋደ ግሴዳዉንባ እ ያ ጋኮሳናካ አዉ ኦድ አጌድኖ። 31 እ እዝኮ ሺቂደ፥ እዝ ኩሽያ ኦይቂደ፥ እዞ ደንꬅ ኤሴዳ፤ ቆጹ እዞ አግና፥ እዛ ኡንቱንቶ ኦꬃዱ።
32 ሀርጌዳ አሳ ኡባነ ኢታ አያናቱ ኦይቄዳ አሳ ኡባ ኦማርስ አዋይ ዉሌዳዋፐ ጉይያን፥ አሳይ አኮ አሄድኖ። 33 ካታማን ደእያ አሳይ ኡባይ ሄ ካርያ ሺቄዳ። 34 የሱስ ዱማ ዱማ ሀርግያን ኦይቀቴዳ ጮራ አሳ ፓꬂደ፥ ጮራ ጻላሀቱዋካ ከሴዳ። እ ክርስቶሳ ግድያዋ ኢታ አያናቱ ኤሬዳ ድራዉ፥ ኡንቱንታ ሃሳይሰናን ድጌዳ።
የሱስ ጋሊላን ታማርሴዳ
(ሉቃሳ 4:42-44)
35 የሱስ ጉራ ዎንቱማꬃን ደንዲደ፥ ሶይፐ ከሲደ፥ አሳይ ባይናሳ ቢደ ያን ጾሳ ዎሴዳ። 36 ስሞንነ አናና ደእያዋንቱ አ ኮዪደ ቤድኖ። 37 ኡንቱንቱ አ ደሚደ፥ “አሳይ ኡባይ ኔና ኮዬ” ያጌድኖ።
38 ሄዋፐ ጉየ የሱስ ቃይ ኡንቱንታ፥ “ሄዋ ሄራን ደእያ ሀራ ካታማቱዋ ቦይተ፤ ታን ሄዋን ቃላ ኦዳናዉ በሴ፤ አያዉ ጎፐ፥ ታን ዬዳዌ ሄዋሳ” ያጌዳ። 39 አይሁዳ ዎሳ ጎለቱዋን ቃላ ኦዲድነ ኢታ አያናቱዋ ከሲደ፥ ጋሊላ ጋድያ ኡባ ዩዬዳ።
የሱስ ኦሉ ኦይቄዳ ብታንያ ፓꬄዳ
(ማቶሳ 8:1-4፤ ሉቃሳ 5:12-17)
40 ኦሉ ኦይቄዳ እት ብታኒ የሱሳኮ ዪደ፥ አ ስንꬃን ጉልባቲደ፥ “ኔን ኮዮፐ፥ ታና ጌሻ ፓꬃናዉ†ታና ጌሻ ፓꬃ፦ ሀዋ ጉሳይ፥ ሀ ሀርጊ ቆፈቴዳዌ ላመታናዉ ዳንዳየና ኤረቴዳ ጋደ ዎጋነ ማራን፥ ሀራ አሳ ቆፋን እት አሳይ ጌሻ ግደና ጋና ማላ ኦድያዋ። ዳንዳያ” ያጊደ ዎሴዳ።
41 የሱስ አዉ ቃረቴዳ፤ ባረ ኩሽያ የድ፥ አ ቦቺደ፥ “ታን ኮያይ፤ ጌያ፤ ፓጻ!” ያጌዳ። 42 ኤለካ ኦሉ ብታንያ የድ አግና፥ ብታኒ ጌይ ፓጽ አጌዳ። 43 የሱስ ዳሪ ሀንቀቲደ፥ ኤለካ አ ከስ የዴዳ። 44 እ ብታንያ፥ “ኔና ኤራ! ሀዋ ኦስነ ኦዶፓ፤ ሽን ባደ ነ ቦላ ቄሳ በሳ፤ ቃይ ኔን ሀእ ጌሻ ግዴዳዋ አሳ ኤርሳናዉ፥ ሙሴ አዛዜዳ ያርሹዋ ያርሻ” ያጌዳ።
45 ሽን ብታኒ ቢደ፥ የዉዋ ኡባ ሳን አሳ ኡባዉ ኦዱዋነ ላለꬃ ዶሜዳ፤ ሄዋ ድራዉ፥ የሱስ ቆንጭያ ከሲደ፥ ካታማ ገላናዉ ዳንዳይቤና፤ ሽን አሳይ ባይናሳ ጋጻን ደኤዳ፤ ቃይ አሳይ ኡባ ሳፐ አኮ ዬድኖ።