2
የሱስ ቦላይ ስሌዳ ብታንያ ፓꬄዳ
(ማቶሳ 9:1-8፤ ሉቃሳ 5:17-26)
1 አማሬዳ ጋላሳፐ ጉይያን፥ “የሱስ ቅፍርናሆማ ጉየ ስሚደ፥ ሶይን ደኤ” ግያ ሃሳያይ ስሰቴዳ። 2 ጎሊ አከናን እጽና፥ ሀራይ አቶ፥ ካሪካ ኡንአና ጋካናዉ ጮራ አሳይ ሺቄዳ፤ ሄዋንቶ የሱስ ቃላ ኦዴ። 3 ኦይዱ አሳቱ ቦላይ ስሌዳ እት ብታንያ ቶኪደ፥ አኮ አሄድኖ። 4 አሳይ ጮሬዳ ድራዉ፥ ብታንያ የሱሳኮ አፋናዉ ኡንቱንቶ ዳንዳየተናን እጽና፥ የሱስ ደእያ ባጋና ጎልያ ቃሪደ፥ ካራ ሉኬድኖ፤ ሄ ሉኬዳሳና ብታንያ እ ግሴዳ ሻንቻማና ዱገ ዎꬄድኖ። 5 የሱስ ኡንቱንቱ አማኑዋ በኢደ፥ ሄ ቦላይ ስሌዳ ብታንያ፥ “ታ ናአዉ፥ ነ ናጋራይ አቶ ጌተቴዳ” ያጌዳ።
6 ህግያ ታማርስያዋንቱፐ ሄዋን ኡቴዳ እቱ እቱ ባረንቱ ዎዛናን፥ 7 “ላ ሀ ብታኒ ሀዋ ማላ ኢታባ ጾሳ ቦላ አያዉ ሃሳዪ? ጾሳ ጻላላፐ አትን፥ ሀራይ ኦኔ ናጋራ አቶ ጋናዉ ዳንዳይያዌ?” ያጊደ ቆፔድኖ።
8 ኡንቱንቱ ባረንቱ ዎዛናን ሄዋዳን ቆፖዋ የሱስ ኤለካ ባረ አያናን ኤሪደ፥ ኡንቱንታ “ህንተንቱ ህንተ ዎዛናን አያዉ ሄዋዳን ቆፒቴ? 9 ቦላይ ስሌዳ ብታንያ፥ ‘ነ ናጋራይ አቶ ጌተቴዳ’ ግያዌ ማቴዬ? ዎይ፥ ‘ደንዳ ኤቃደ ነ ሻንቻማ ቶካደ ሀመታ’ ግያዌ ማቴ? 10 ሽን ታን፥ አሳ ናአዉ፥ ሳኣ ቦላን ናጋራ አቶ ጋናዉ ማታይ ደእያዋ ታን ህንተንታ ኤርሳና” ያጊደ ሄ ቦላይ ስሌዳ ብታንያ፥ 11 “ኔና ጋይ፤ ደንዳ ኤቃ፤ ያታደ ነ ሻንቻማ ቶካደ ነ ሶይ ባ” ያጌዳ።
12 ብታኒ ኤለካ ደንድ ኤቂደ፥ ባረ ሻንቻማ ቶኪደ፥ አሳይ ኡባይ ጼልሽን ቢና አሳይ ኡባይ ማላለቲደ፥ “ኑን ሀዋ ማላባ ኡባካ በእ ኤሮኮ” ያጊደ ጾሳ ጋላቴድኖ።
የሱስ ሌዊያ ጼሴዳ
(ማቶሳ 9:9-13፤ ሉቃሳ 5:27-32)
13 የሱስ ጉጅካ ጋሊላ አባ ዶና ቤዳ፤ አሳይ ኡባይ አኮ ዬዳዋንታ ታማርሴዳ። 14 ሄዋና አꬊደ፥ እልፕዮሳ ናኣ ሌዊያ፥ ግያዌ ቃራጻ ቃንጽያ ሳን ኡቴዳዋ ደሚደ፥ “ታና ካላ” ያጌዳ። ሄዋፐ ጉየ ሌዊ ደንድ ኤቂደ፥ አ ካሌዳ።
15 የሱስ ቁማ ማናዉ ሌዊያ ሶይን ኡቴዳ ዎደ፥ ቃራጻ አክያ ጮራ አሳይነ ናጋራንቻቱ አናናነ አ ካልያዋንቱና እትፐ ኡቴድኖ። አ ካልያዋንቱ ግዶን ሄዋንቱ ማላ አሳቱ ዳሬድኖ። 16 ህግያ ታማርስያ እት እት ፓርሳዋቱ የሱስ ናጋራንቻቱዋናነ ቃራጻ አክያዋንቱና ቁማ ሚሽን በኢደ፥ “እ አያዉ ናጋራንቻቱዋናነ ቃራጻ አክያዋንቱና ቁማ ሚ?” ያጊደ፥ አ ካልያዋንታ ኦቼድኖ።
17 የሱስ ኡንቱንቱ ግያዋ ስሲደ፥ “ሀርጋንቻቱዋፐ አትን፥ ፓጻ አሳዉ አክሚ ኮሸና፤ ታን ናጋራንቻቱዋ ጼሳናዉ ዬዳዋፐ አትን፥ ጽላቱዋ ጼሳናዉ ያበይከ” ያጊደ ኡንቱንቶ ዛሬዳ።
ጾማባ ኤራናዉ ሺቄዳ ኦሻ
(ማቶሳ 9:14-17፤ ሉቃሳ 5:33-39)
18 ጻማቂያ ዮሃንሳ ካልያዋንቱነ ፓርሳዋቱ ጾሚኖ፤ አማሬዳ አሳቱ የሱሳኮ ዪደ፥ “ዮሃንሳ ካልያዋንቱነ ፓርሳዋቱዋ ካልያዋንቱ ጾሚኖ፤ ሽን ኔና ካልያዋንቱ አያዉ ጾምክኖ?” ያጌድኖ።
19 የሱስ ኡንቱንታ “ቡላቻ ዬዳ አሳቱ ማቻቶ አክያዌ ባረንቱና ደእሽን፥ ጾማናዉ ዳንዳዪኖ? ማቻቶ አክያዌ ኡንቱንቱና ደእሽን፥ ጾማናዉ ዳንዳይክኖ። 20 ሽን ማቻቶ አክያዋ ኡንቱንቱ ማታፐ አፋና ዎዲ ያናዋ፤ ኡንቱንቱ ሄ ዎደ ጾማናዋንታ።
21 “ኤጫ ማዩዋ ቦላ ኦራꬃ ፍያ ዎꬅ ስክያ አሳይ ባዋ፤ ኤጫ ዎꬅ ስኮፐ፥ ኦራꬃ ፊ ኤጫ ማዩዋ ፔሬꬄ፤ ፔꬃይካ ኮይሮዋፐ ዳራና። 22 ቃይ ሆኦ ዎይንያ ኤሳ ኤጫ ኦጎሩዋን ናእያ አሳይ ባዋ፤ ሽን ናኦፐ፥ ሄ ዎይንያ ኤሳይ ኦጎሩዋ ዳኬ፤ ባረዉካ ዎፈቴ፤ ኦጎሩካ ባዬ፤ ሽን ሆኦ ዎይንያ ኤሳ ኦራꬃ ኦጎሩዋን ናኤቴ” ያጌዳ።
ሳምባታባ ኤራናዉ ሺቄዳ ኦሻ
(ማቶሳ 12:1-8፤ ሉቃሳ 6:1-5)
23 የሱስ እት ሳምባታ ጋላስ ትሻ ባንጋ ግዶና አꬍሽን፥ አ ካልያዋንቱና አናና ቢደ፥ ባንጋ ትሻፐ ዱሳ ዶሜድኖ። ዛረ. 23:25 24 ፓርሳዋቱ የሱሳ፥ “በአ፤ ኔና ካልያዋንቱ ሳምባታ ጋላስ ህገ ግደናባ አያዉ ኦꬂኖ?” ያጌድኖ።
25 የሱስ ኡንቱንታ፥ “ዳዊተ ኮሻቲደ፥ ምያባ ኮዬዳ ዎደ፥ ባረናና ደእያዋንቱና ኦꬄዳዋ ኡባካ ናባብ በይክቴ?1 ሳሜላ 21:1-6 26 አብያታር ቄሳቶ ኡባቶ ካፖ ግዴዳ ዎደ፥ ዳዊተ ጾሳ ጎልያ ገሊደ፥ ቄሳቱዋ ጻላላይ ማናፐ አትን፥ ኦንነ ማናዉ ህገ ግደናዋ ጎዳ ስንꬃን ዎꬄዳ ቁማ ሚደ፥ ባረናና ደእያዋንቶካ እሜዳ” ያጌዳ። ዎጋ 24:9
27 ቃይካ የሱስ ኡንቱንታ፥ “ሳምባታይ አሳዉ መቴዳዋፐ አትን፥ አሳይ ሳምባታዉ መትቤና። 28 ሄዋ ድራዉ፥ ታን፥ አሳ ናአይ፥ ሀራይ አቶ፥ ሳምባታዉካ ጎዳ” ያጌዳ።