3
ኩሺ ስሌዳ ብታንያ
(ማቶሳ 12:9-14፤ ሉቃሳ 6:6-11)
1 የሱስ አይሁዳ ዎሳ ጎልያ ሽረትካ ገሌዳ፤ ሄዋን ኩሺ ስሌዳ እት ብታኒ ደኤ። 2 እት እት አሳይ የሱሳ ሞታናዉ ኮዪደ፥ ኩሺ ስሌዳ ብታንያ ሳምባታን እ ፓꬆፐ በአናዉ ናጌ። 3 የሱስ ሄ ኩሺ ስሌዳ ብታንያ፥ “ደንዳ ኤቃደ ስንꬃዉ ሃያ” ያጌዳ። 4 ሄዋፐ ጉይያን አሳ፥ “ሳምባታን ሎኦባ ኦꬅያዌ ዎጌየ ኢታባ ኦꬅያዌ ዎጌ? አሳ ሸምፑዋ አሽያዌ ዎጌየ ዎꬍያዌ ዎጌ?” ያጊደ ኦቼዳ።
ሽን አሳይ ጮኡ ጌዳ። 5 የሱስ ሀንቀቲደ፥ ኡንቱንታ ዩሽ አꬅ ጼሊደ፥ ኡንቱንቱ ኦድና ስሰናዋንታ ግድያ ድራዉ፥ ኡንቱንቶ ዳሪ ካዮቴዳ፤ ሄ ብታንያ፥ “ነ ኩሽያ ፕድ ኦꬃ” ያጌዳ፤ ብታኒ ፕድ ኦꬅና፥ አ ኩሺ ፓጽ አጌዳ። 6 ፓርሳዋቱ አይሁዳ ዎሳ ጎልያፐ ካረ ከሲደ፥ የሱሳ ዎት ዎꬋነንቶ ሄሮድሳና ደእያዋንቱና ማቀቴድኖ።
አሳይ አባ ላንቂያን የሱሳኮ ሺቄድኖ
7 የሱስ ባረና ካልያዋንቱና ጋሊላ አባ ቤዳ፤ ጋሊላፐ ጮራ አሳይ አ ካሌዳ። 8 ቃይካ ጮራ አሳይ ይሁዳፐ፥ የሩሳላመፐ፥ ኤዶምያሳፐ፥ ዮርዳኖሳ ሻፋፐ ሄፍንꬃ ባጋፐ፥ ጺሮሳ ካታማፐነ ሲዶና ካታማፐ የሱስ ኦꬄዳዋ ስሲደ፥ አኮ ዬዳ። 9 የሱስ ጮራ አሳይ ባረና ሱግ ኡንኤና ማላ፥ ባረና ካልያዋንታ ዎንግርያ ባረዉ ጋምኤꬃና ማላ አዛዜዳ። 10 ዳሮ አሳ እ ፓꬄዳ ድራዉ፥ ሀርግያ አሳይ ኡባይ አ ቦቻናዉ ሱገረቴ። 11 ኢታ አያናይ ደእያ አሳቱካ አ በኤዳ ዎደ ኡባን አ ስንꬃን ጉፋኒደ፥ ባረንቱ ቃላ ꬎቁ ኦꬂደ፥ “ኔን ጾሳ ናኣ ግድኪ!” ያጌድኖ።
12 የሱስ ሄ ኢታ አያናቱ ባረባ አሳዉ ኦዲደ፥ ባረና ቆንጭያ ከሰና ማላ፥ ኡንቱንታ ምንሲደ አዛዜዳ።
የሱስ ባረ ኪትያዋንታ ዶሬዳ
(ማቶሳ 10:1-4፤ ሉቃሳ 6:12-16)
13 የሱስ ደርያ ቦላ ከሲደ፥ ባረ ኮዬዳ አሳቱዋ ባረኮ ጼሴዳ፤ ሄዋፐ ጉየ አኮ ቤድኖ። 14-15 ኡንቱንቱ ባረናና ደአና ማላነ ቃላ ኦዳናዉ ኡንቱንታ ኪታና ማላ፥ ኢታ አያናቱዋ አሳፐ ከሳናዉ ኡንቱንቶ ማታይ ደአና ማላ፥ ታማነ ላኡ አሳቱዋ ዶሬዳ።
16 እ ዶሬዳ ታማነ ላአቱ ሀዋንታ: ጰጽሮሳ ያጊደ ሱንꬄዳ ስሞና፥ 17 ቦኣነርጌሳ ያጊደ ሱንꬄዳ ዛብድዮሳ ናና ያቆባነ ያቆባ እሻ ዮሃንሳ። “ቦኣነርጌሳ” ግያዌ “ዎልቃማ አሳቱዋ” ግያዋ። 18 እንድራሳነ ፕልጶሳ፥ ባርታላሞሳነ ማቶሳ፥ ቶማሳነ እልፕዮሳ ናኣ ያቆባ፥ ታዶሳነ ባረ ቢታዉ ሴለትያ ስሞና፥ 19 የሱሳ አꬅ እሜዳ ይሁዳ አስቆሮታ። 14:10
የሱሳነ ብኤል-ዘቡላ
(ማቶሳ 12:22-32፤ ሉቃሳ 11:14-23፤ 12:10)
20 የሱስ ሶይ ቤዳ፤ ላኤንꬁዋካ ቃይ ጮራ አሳይ ሺቅና፥ እነ አ ካልያዋንቱና ሀራይ አቶ፥ ቁማ ማናዉካ ዳንዳይበይክኖ፤ 21 አሳይ አ፥ “ጎዬ” ግያ ድራዉ፥ አ ዳባቱ ሄዋ ስሲደ፥ አ አካናዉ ቤድኖ።
22 ህግያ ታማርስያ እት እት አሳቱ የሩሳላመፐ ዪደ፥ “የሱሳ ቦላ ብኤል-ዘቡል ደኤ” ያጌድኖ፤ ቃይ፥ “ጻላሀቱዋ ካፑ ባረዉ ዎልቃ እምና፥ ኢታ አያናቱዋ ከሴ” ያጊደ ሃሳዬድኖ። ማቶሳ 9:34፤ 10:25
23 የሱስ አሳ ባረኮ ጼሲደ፥ ሌምሱዋ ኦዲደ፥ “ሴጻናይ ሴጻና ዎት ከሳናዉ ዳንዳይ? 24 እት ካዉተꬃይ ባረ ግዶን ሻከቶፐ፥ ሄ ካዉተꬃይ ኤቃናዉ ዳንዳየና፤ 25 ቃይ እት ጎለ አሳይካ ባረ ግዶን ሻከቶፐ፥ ሄ ጎለ አሳይካ ኤቃናዉ ዳንዳየና። 26 ሴጻናይ ባረናና ዋላቀቲደ ሻከቶፐ፥ ባያናፐ አትን፥ ደአና ዳንዳየና።
27 “ሽን ዎልቃማ አሳ ጎለ ገሊደ ካሰቲደ አ ቃቼናን ደኢደ፥ አ ሚሻ ቦንቃናዉ ዳንዳይያ አሳይ ባዋ፤ ቃቼዳዋፐ ጉይያን፥ አ ጎልያ ቦንቃናዉ ዳንዳዬ።
28 “ታን ህንተንቶ ቱሙዋ ጋይ፤ ጾሳይ አሳ ናናዉ ናጋራ ኡባነ ኡንቱንቱ ቦርያ ቦርያ *ቦርያ ቦርያ፦ ጉሳይ ጾሳ ቦላን አሳይ ሃሳይያ ኢታ፥ ባላነ ጌላ ሃሳያ። ኡባ አቶ ጋና፤ 29 ሽን ጌሻ አያና ቦላ ኢታ ቦርያ ሃሳይያ ኦስነ መꬍናዉ ናጋራ ግዳናፐ አትን፥ ጾሳይ ኡባካ አቶ ጌና” ያጌዳ። ሉቃሳ 12:10 30 የሱስ ሄዋ ጌዳዌ፥ እት እት አሳቱ፥ “የሱሳ ቦላ ኢታ አያናይ ደኤ” ያጌዳ ድራሳ።
የሱሳ ዳዮነ እሻቱዋ
(ማቶሳ 12:46-50፤ ሉቃሳ 8:19-21)
31 የሱሳ ዳያነ አ እሻቱ ዪደ፥ ካረን ኤቂ አኮ አሳ ኪቲደ፥ አ ጼስሴድኖ። 32 ጮራ አሳይ አ ማታን ኡቴድኖ፤ ሄ ኪተቴዳዌ አ፥ “በአ፤ ነ ዳያነ ነ እሻቱ ካረን ኤቂደ፥ ኔናና ጋከታናዉ ኮዪኖ” ያጌዳ።
33 የሱስ ዛሪደ፥ “ታ ዳያ ኦኔ? ቃይ ታ እሻቱ ኦኔ?” ያጌዳ። 34 ባረ ማታን ኡቴዳ አሳ ዩሽ አꬅ ጼሊደ፥ “በእተ፤ ታ ዳያነ ታ እሻቱ ሀዋንቱሽ። 35 ጾሳይ ኮይያዋ ኦꬅያ ኡባይ ታ እሻ፥ ታ ምቻቶነ ታ ዳዮ” ያጌዳ።