1 የሱስ ሽረትካ ጋሊላ አባ ማታን ታማርሱዋ ዶሜዳ፤ ጮራ አሳይ ባረ ምይያን ዩይ አꬊደ ሺቅ ኡትና፥ አባን ደእያ ዎንግርያ ግዶ ገሊደ፥ አን ኡቴድኖ፤ ቃይ ሄ አሳይ ኡባይ አባ ምይያን ደኤ። ሉቃሳ 5:1-3 2 እ ኡንቱንታ ዳሮባ ሌምሱዋን ታማርሲደ፥

3 “ስስተ፤ እት ብታኒ ዘረꬃ ዘራናዉ ከሴዳ። 4 እ ዘርሽን፥ እት እት ዘረꬃይ ኦግያ ዶናን ዎꬌዳ፤ ሄዋ ካፉ ዪደ ሜዳ። 5 እት እት ዘረꬃይ አንጮ ቢታ ቦላ ዎꬌዳ፤ ዳሮ ቢታይ ባይና ድራዉ፥ ሄ ዘረꬃይ ኤለካ ሞኬዳ። 6 አዋይ ከሴዳ ዎደ ሹሌዳ፤ አዱሳ ጻጱዋ የድቤና ድራዉ፥ መል አጌዳ። 7 እት እት ዘረꬃይ አጉንꬃ ግዶን ዎꬌዳ፤ ሄዋን ሞኬዳዋ አጉንꬃይ ድጪደ ጩልና፥ አይፈናን አቴዳ። 8 እት እት ዘረꬃይ ቱኤ ቢታን ዘረቲደ ሞኬዳ፤ ድጪደ እቱ ሀታሙዋ፥ እቱ ኡሱፑን ታሙዋ አይፍና፥ እቱ ጼቱዋ አይፌዳ።” 9 ቃይካ የሱስ፥ “ስሳናዉ ሀይꬃይ ደእያ ኡራይ ስሶ” ያጌዳ።

10 ታማነ ላኡ የሱሳ ካልያዋንቱነ እ ኦዴዳዋ ስሴዳ ሀራ አሳቱ እ ባረካ ደእሽን አኮ ሺቂደ፥ ሄ ሌምሱዋ ብለꬃ አ ኦቼድኖ። 11-12 የሱስ ኡንቱንቶ፥ “ህንተንቶ ጾሳ ካዉተꬃ ጹራ የዉዋ ኤራይ እመቴዳ፤ ሽን ሀራቱ ካዉተꬃፐ ካረና ደእያዋንቱ፥ ጼላ ጼሊደ በኤና ማላ፥ ቃይ ስሳ ስሲድካ አኬከና ማላ፥ ኡንቱንቱ ሽረቲደ ጾሳኮ ስምና፥ እ ኡንቱንቱ ናጋራ አቶ ጌና ማላ፥ ኡንቱንቶ ኡባባይ ሌምሱዋን ኦደቴ” ያጌዳ። ኢሳ. 6:9-10

13 የሱስ ኡንቱንታ፥ “ሀ ሌምሱዋ ኤርክቴ? ያትና፥ ሌምሱዋ ኡባ ዎት ኤራንቴ? 14 ዘርያዌ ጾሳ ቃላ ዘሬ። 15 ቃላይ ዘረትያ ኦግያ ዶናን ደእያዋንቱ ሀዋንታ፤ ኡንቱንቱ ቃላ ስስያ ዎደ፥ ሴጻናይ ኤለካ ዪደ፥ ኡንቱንቱ ዎዛናን ዘረቴዳ ቃላ አፍ ድጌዳ። 16 ሀዋዳንካ ቃይ አንጮትያ ቢታን ዘረቴዳዋንቱ ሀዋንታ፤ ኡንቱንቱ ቃላ ስሲደ፥ ኤለካ ናሸቻን አኪኖ። 17 ኡንቱንቱ ሀእዉ ደኢኖፐ አትን፥ ኡንቱንቶ ምኖ ጻጱ ባዋ፤ ጉየፐ ቃላ ጋሱዋን ዋዪ ዎይ የደርሱ ይያ ዎደ፥ ኡንቱንቱ ኤለካ ꬉበት አጊኖ። 18 ቃይ አጉንꬃ ግዶን ዘረቴዳዋንቱ ሀዋንታ፤ ኡንቱንቱ ቃላ ስስያዋንታ። 19 ሽን ሀ ሳኣ ደኦ ህርግያዌ ዱረተꬃ ዶስያዌነ ሀራባ አሞትያዌ ኡንቱንቱ ዎዛናን ገሊደ፥ ቃላ ጩልና አይፈናን አት አጌዳ። 20 ሽን ቱኤ ቢታን ዘረቴዳዋንቱ ቃላ ስሲደ አክያዋንታ፤ እቱ ሀታሙዋ፥ እቱ ኡሱፑን ታሙዋ አይፍና፥ እቱ ጼቱዋ አይፌዳ” ያጌዳ።

21 የሱስ ጉጂደ፥ “ጾምፕያ አሂደ፥ ግላፐ ዎይ አርሳፐ ጋርሳና ዎꬅያ አሳይ ደኢ? ꬎቃሳን ዎኔ? 22 አያዉ ጎፐ፥ ቆሴዳባይ ኡባይ ቆንጭያ ከሳናዋ፤ ቃይ ጌማን ዎꬄዳባይ ኡባይ ቤተናን አተና። 23 ስሳናዉ ሀይꬃይ ደእያ ኡራይ ደኦፐ ስሶ” ያጌዳ።

24 ቃይካ ኡንቱንታ፥ “ህንተንቱ ስስያዋ አኬኪደ ስስተ፤ ጾሳይ ህንተ ማኬዳ ቁንኣን ህንተንቶ ማካናዋ። እ ህንተንቶ ዳርሲደ እማና፤ 25 ደእያ ኡራዉ ጉጅ እማና፤ ባይናዋፐ ሀራይ አቶ፥ አዉ ደእያ ሄ ጉꬃቶካ አክ ድጋና” ያጌዳ።

26 የሱስ ቃይካ፥ “ጾሳ ካዉተꬃይ ጋደን ካꬃ ዘርያ አሳ ማላ። 27 ሄ ብታኒ ቃማ ገምእሼ፤ ጉራ ደንዴ፤ እ ባረ ሁጰዉ ዋንንቶ ኤረናን፥ ሄ ዘረꬃይ ሞኬነ ድጬ። 28 ቢታይ ካꬃ ባረካ ሞኬነ አይፌ፤ ኮይሮ ጫርሻይ ጫሬ፤ ጉየፐ አይፋናዉ ኩኩሜ፤ ቃይ ዉርሰꬃን ኩመንꬃ አይፍያ አይፌ። 29 ሽን ካꬃይ ጋክያ ዎደ፥ ካꬃ ሺሽያ ዎዲ ጋኬዳ ድራዉ፥ ብታኒ ኤለካ ባጫን ጫኩዋ ገል አጌዳ” ያጌዳ። ኢዩ. 3:13

30 የሱስ፥ “ኑን ጾሳ ካዉተꬃ አያ ማላቴ ጋኔ? ዎይ አያና ሌምሳኔ? 31 ጾሳ ካዉተꬃይ ሳናፍጭያ አይፋቶ ማላቴ። ሄ አይፋታ ዘርያ ዎደ፥ ሳኣን ደእያ ምꬃ አይፊያ ኡባፐካ ጉጻዉ፤ 32 ሄኖ ዘርና ሞካደ ሀራ አታክልትያ ኡባፐ ዳራዉ፤ ዳሮ ዳሻ ዳሻዉ። ካፉ እዝ ቃንካ ኩዋን ጎልያ ኬጻና ዳንዳዬ” ያጌዳ።

33 የሱስ ሀዋ ማላ ዳሮ ሌምሱዋን አሳይ ስሳናዉ ዳንዳይያዋ ኬና፥ ባረ ቃላ ኦዴዳ። 34 አሳዉ ሌምሱ ባይናን ኦደና፤ ሽን የሱስ ባረና ካልያዋንቱ ጻላላና ደእያ ዎደ፥ ኡንቱንቶ ኡባባ ብሊደ ኦዴ።

35 ሄ ጋላስ ሳአይ ኦማርስና፥ የሱስ ባረና ካልያዋንታ “አባፐ ሄፍንꬃ ፕኖይተ” ያጌዳ። 36 አ ካልያዋንቱ አሳ አጊደ፥ የሱስ ካሰ ገል ኡቴዳ ዎንግርያን ገሊደ፥ የሱሳ ባረንቱና አፌድኖ፤ ሀራ ዎንግራቱካ ሄዋን ደኢኖ። 37 ዎልቃማ ጎቱ ደንድና፥ ቤታይ ዎንግርያ ሾጭና፥ ሃꬃይ ኩማና ጋካናዉ ዎንግርያ ግዶ ገሌዳ። 38 ሄ ዎደ የሱስ ዎንግርያን ጉየ ባጋና ቦርኮꬃ ቦርኮቲደ ገምእሼዳ። የሱሳ ካልያዋንቱ አ ደንꬂደ፥ “ታማርስያዎ፥ ኑን ꬋይያ ዎደ ጮኡ ጋደ ጼላይ?” ያጌድኖ።

39 እ ቤጎቲደ ጎቱዋ፥ “ጮኡ ጋ” ጊደ፥ አባካ፥ “ዎፑ ጋ” ጌዳ፤ ጎቱካ ጮኡ ጊና፥ ኡባባይካ ዎፑ ጌዳ። 40 የሱስ ባረና ካልያዋንታ “አያዉ ሀዋዳን ያዪቴ? ህንተንቱ ዋን አማንክቴ?” ያጌዳ።

41 ኡንቱንቱ ዳሮ ያዪደ ባረንቱ ግዶን፥ “ሀዌ ላ ሀራይ አቶ፥ ጎቱነ አባይ አዛዘትያዌ ኦኔ?” ያጌድኖ።