1 የሱስነ አ ካልያዋንቱ አባፐ ሄፍንꬃዉ ፕኒደ፥ ገርገሰኖና ጌተትያ ጋድያ ጋኬድኖ። 2 አሳ ሞግያ ዱፉ ደኢያሳፐ ኢታ አያናይ ደእያ እት ብታኒ ከሲደ፥ የሱስ ዎንግርያፐ ከሴዳ ዎደ፥ የሱሳና ጋከቴዳ። 3 ብታኒ ሄ ዱፉ ደእያ ሳን አቅ ፔሺደ፥ ያን ደኤ፤ አ ኦንነ ሀራይ አቶ፥ ሳንꬃላታን ቃቻናዉካ ዳንዳይቤና። 4 አያዉ ጎፐ፥ እ ዳሮ ዎደ ኡቁናንነ ሳንꬃላታን ቃሸቲደ ደኤ፤ ሽን ሳንꬃላታ ዱሰረꬄዳ፤ ኡቁናካ መንሬꬄዳ፤ አ ጾናናዉ ዳንዳዬዳዌ ኦንነ ባዋ። 5 እ ኡባ ዎደ ጋላስነ ቃማ፥ ሄ ዱፉ ደኢያሳንነ ደርያ ቦላ ዋሴ፤ ባረ ቦላካ ሹቻን ጋሬ።

6 የሱሳ ሃኩዋን በኤዳ ዎደ፥ አኮ ዎጽ ዪደ አዉ ጎይኔዳ። 7 ሄ ብታኒ ባረ ኮሻ ꬎቁ ኦꬂደ፥ “ኡባፐ ቦላ ጾሳ ናአዉ፥ የሱሳ፥ ኔናነ ታና አዬ ጋꬂ? ታና ሙረና ማላ፥ ታን ኔና ጾሳ ሱንꬃን ዎሳይ” ያጌዳ። 8 እ ሄዋ አያዉ ጌዴ ጎፐ፥ የሱስ አ፥ “ላ ሀ ኢታ አያናዉ፥ ሀ ብታንያፐ ከሳ” ያጌዳዋሳ።

9 የሱስ አ፥ “ነ ሱንꬃይ ኦኔ?” ያጊደ ኦቼዳ።

እ፥ “ኑን ጮራ ግድያ ድራዉ፥ ታ ሱንꬃይ ሌግዮና” ያጌዳ። 10 ኢታ አያናቱዋ ሄ ጋድያፐ ከስ የደና ማላ፥ የሱሳ ምንሲደ ዎሴዳ።

11 ሄ ደርያ ቦላን ጮራ ጉዱንꬃ ዉዲ ሄመቴ፤ 12 ኢታ አያናቱ የሱሳ፥ “ኑና ህን ጉዱንꬃ ዉድያኮ የዳርኪ፤ ኡንቱንቱን ቢደ ገላና” ያጊደ ዎስና፥ 13 የሱስ፥ “ቢተ” ያጌዳ። ኢታ አያናቱ ብታንያፐ ከሲደ፥ ጉዱንꬃቱዋን ገሌድኖ፤ ላኡ ሻአ ግድያ ጉዱንꬃ ዉዲ ካካ ሁጲያና ካጆቲደ፥ አባን ገሊደ፥ ምተት አጌዳ።

14 ጉዱንꬃ ዉድያ ሄምያዋንቱ ባቃቲደ፥ ሀኔዳዋ ካታማንነ ካታማፐ ጋጻ ጋድያን ኦዴድኖ፤ ሄዋ በአናዉ አሳይ ዬዳ። 15 አሳይ የሱሳኮ ዪደ፥ ጮራ ኢታ አያናቱ በን ኦይቄዳ ብታኒ ባረ ዎዛናይ ስምና፥ ማዩዋ ማዪደ፥ ሄዋን ኡቴዳዋ በኢደ፥ ኡባይ ያዬዳ። 16 ሄዋ በኤዳ አሳቱ ኢታ አያናቱ ኦይቄዳ ብታኒ ሀኔዳዋነ ቃይ ጉዱንꬃ ዉድያባ ሄ አሳዉ ኦዴድኖ። 17 ሄዋ ድራዉ፥ አሳይ ባረንቱ ጋድያፐ የሱስ ባና ማላ፥ ዎሳ ዶሜዳ።

18 የሱስ ዎንግርያን ገልሽን፥ ኢታ አያናቱ ኦይቄዳ ብታኒ የሱሳና ደአና ማላ፥ የሱሳ ዎሴዳ። 19 ሽን የሱስ እጺደ አ፥ “ነ ሶይ ስማደ፥ ጎዳይ ነዉ አይ ማላ ዎልቃማባ ኦꬄደንቶነ ቃይ እ ነዉ አይ ማላ ኬከንቶ ነ ሶይ አሳዉ ኦዳ” ያጌዳ። 20 ብታኒ ቢደ፥ ታሙ ካታማ *ታሙ ካታማ፦ ሀዋንቱ እት ጭታ ግዴዳ ካታማቱ ሳማርያፐነ ጋሊላ ጋድያ አዋይ ዶልያ ባጋና ደእያዋንታ ግዲደ፥ ሄዋንቱን ደእያ አሳቱዋ ኤሻይካ ግሪከ አሳቱዋ ደኡዋ ኦግያ ካልያዋ በሴ። ግያ ሳን ዩዪደ፥ የሱስ ባረዉ አይ ማላ ዎልቃማባ ኦꬄደንቶ፥ ኦዱዋ ዶሜዳ፤ እ ኦዴዳዋ ስሴዳ አሳይ ኡባይ ማላለቴዳ።

21 የሱስ ስሚደ፥ ዎንግርያን ገሊደ፥ አባ ፕኔዳዋፐ ጉይያን፥ ጮራ አሳይ አባ ማታን አኮ ዩይ አꬊደ ሺቄድኖ። 22 ያእሮሳ ግያዌ፥ አይሁዳ ዎሳ ጎልያ ካፓቱዋፐ እቱ፥ የሱሳ በኤዳ ዎደ አኮ ይ አ ገድያን ኩንዲደ፥ 23 “ታ ናታ ሀርጋደ ሀይቃናዉ፤ እዛ ፓጺደ ሎኦ ደአና ማላ፥ ያደ ነ ኩሽያ እዝ ቦላ ዎꬃርኪ” ያጊደ የሱሳ ምንሲደ ዎሴዳ።

24 የሱስ ያእሮሳና ቤዳ፤ እ ቢሽን ጮራ አሳይ አ ካሊደ መቶꬄድኖ።

25 ታማነ ላኡ ላይꬃ ኡባ እዝ ቦላፐ ሱꬃይ ጎግያ እት ምሽራታ ደአዉ። 26 ጮራ አክማቱ እዞ አክምሽንካ፥ እዛ ፓጻ ካኤታዱ፤ ባረ ሚሻ ኡባ ዉርስናካ እዝዉ ሃ ኢቴዳዋፐ አትን፥ አይነ እዞ ማድቤና። 27 ሄ ምሽራታ የሱሳባ ስሳደ፥ አሳ ግዶና የሱሳፐ ጉየና ያደ፥ አ ማዩዋ ቦቻዱ። 28 አያዉ ጎፐ እዛ፥ “ታን ሀራይ አቶ፥ አ ማዩዋ ቦቾፐካ ፓጻና” ያጋደ ቆፓዱ።

29 ኢፐ ጎግያ ሱꬃይ ኤለካ ኤቂ አጌዳ፤ እዛ ባረ ዋይያፐ ፓጼዳዋ ባረ ቦላን ኤራ አጋዱ። 30 የሱስ ባረፐ ዎልቃይ ከሴዳዋ ባረ ሁጰዉ ኤሪደ፥ ኤለካ ጮራ አሳ ግዶን ጉየ ስሚደ፥ “ታ ማዩዋ ቦቼዳዌ ኦኔ?” ያጌዳ።

31 የሱሳ ካልያዋንቱ አ፥ “አሳይ ኔና ሱግያ ዎደ በኣደ፥ ‘ታና ኦኔ ቦቼዳዌ?’ ያጋይ?” ጌድኖ።

32 የሱስ ሄዋ ኦኔ ኦꬄደንቶነ በአናዉ ዩሽ አꬂደ ጼሌዳ፤ 33 ሽን ምሽራታ ባረዉ ሀኔዳዋ ኤራደ፥ ያሻ ኮኮራደ ያደ የሱሳ ስንꬃን ጉፋናዱ፤ ቃይ ቱማተꬃን ሀኔዳዋ ኡባ አዉ ኦዳዱ። 34 የሱስ እዞ፥ “ታ ናቴ፥ ኔና ነ አማኑ ፓꬄዳ፤ ሳሩዋን ባ፤ ነ ዋይያፐነ ፓጻ” ያጌዳ።

35 የሱስ ብሮ ሄዋ ጊሽን፥ አይሁዳ ዎሳ ጎልያ ካፑዋ ሶይፐ ኪተቴዳ አሳቱ ዪደ፥ “ነ ናታ ሀይቃድጋዱ፤ ስም ታማርስያዋ አያዉ ዳቡርሳይ?” ያጌድኖ።

36 ሽን የሱስ ኡንቱንቱ ግያዋ ስሲደ፥ አይሁዳ ዎሳ ጎልያ ካፑዋ፥ “አማኖ ጻላላ አማናፐ አትን፥ ያዮፓ” ያጌዳ። 37 የሱስ ጰጽሮሳፐ፥ ያቆባፐነ ያቆባ እሻ ዮሃንሳፐ ሀራይ ኦንነ ባረና ካለና ማላ ድጌዳ። 38 ኡንቱንቱ አይሁዳ ዎሳ ጎልያ ካፑዋ ሶይ ጋኬዳ ዎደ፥ የሱስ አሳይ ሎይꬅ ዬክያዋነ ዝላልያዋ በኤዳ። 39 ገሊደ አሳ፥ “አያዉ ሎይꬅ ዬኪቴ? ናታ ገምእሻዱፐ አትን፥ ሀይቃበይኩ” ያጌዳ።

40 ሄዋፐ ጉየ አሳይ አ ቦላ ሚጬዳ፤ ሽን አሳ ኡባ ካረ ከሲደ፥ ናት አዉዋነ አቶ ሄዋን ባረናና ደእያ አ ካልያዋንታነ አኪደ፥ ናታ ደኢያሳ ገሌዳ። 41 የሱስ ናት ኩሽያ ኦይቂደ፥ “ጻልታ፥ ቁሚ”†ጻልታ፥ ቁሚ፦ ሀ ቃላቱ አራማይከ ጌተትያ ቃላን የሱሳ ዎድያን ፓላስቲነ ጋደን ሃሳየትያዋ። ጻልታ ግያዌነ ቁም ግያዌ አማራꬁዋ ቃላ ግደና። ሽን ግሪክያ ቃላ። ያጌዳ፤ ሄዋ ብለꬃይ፥ “ጉꬃ ናቴ፥ ታን ኔና ደንዳ ጋይ” ግያዋ።

42 ናታ ኤለካ ደንዳ ኤቃደ ሀመታዱ፤ እዛ ታማነ ላኡ ላይꬃ ናቶ፤ ሄዌ ሀንያዋን አሳይ ዳሮ ማላለቴዳ። 43 የሱስ ሄዋ ኡንቱንቱ ኦስነ ኦደና ማላ፥ ኡንቱንታ ምንስ አዛዚደ፥ “እዝዉ ምያባ እምተ” ያጌዳ።