13
የሱስ ጌሻ ጎሊ ኮለታናዋ ካሰቲደ ኦዴዳ
(ማቶሳ 24:1-2፤ ሉቃሳ 21:5-6)
1 የሱስ ጌሻ ጎልያፐ ከስሽን፥ አ ካልያዋንቱፐ እቱ አ፥ “ታማርስያዎ፥ ሀዌ አይበ ሎኦ ሹቻተንቶነ ቃይ አይበ ሎኦ ሹቻ ጎላቱዋ በአይ!” ያጌዳ።
2 የሱስ ዛሪደ፥ “ሀ ዎልቃማ ሹቻ ጎላቱዋ በአይ? ሀ ጎላቱዋን ደእያ እት ሹቻይነ አተናን ኡባይ ኮለታና” ያጌዳ።
ጎዳይ ያናፐ ካሰቲደ ጋካና የደርሱዋነ ዋይያ
(ማቶሳ 24:3-14፤ ሉቃሳ 21:7-19)
3 የሱስ ጌሻ ጎልያፐ ህን ባጋና ደብረ ዛይተ ደርያ ቦላን ኡቴዳ ዎደ፥ ጰጽሮስ፥ ያቆብ፥ ዮሃንስነ እንድራስ ባረንቱ ጻላላ አኮ ዪደ አ፥ 4 “ሄዌ አዉደ ሀናነንቶ፥ ኑዉ ኦዳርኪ፤ ቃይ ሄዌ ኡባይ ፖለታና ዎድያ ኤርስያ ማላቱ አያ ግዳኔ?” ያጊደ ኦቼድኖ።
5 የሱስ ቃይ ኡንቱንቶ ሀዋዳን ያጊደ፥ ኦዱዋ ዶሜዳ፤ ህንተንታ ኦንነ ባለና ማላ ናገትተ። 6 ጮራ አሳቱ ታ ሱንꬃን፥ “ታን ክርስቶሳ” ያጊደ ያናዋ፤ ጮራ አሳ ባለꬃና። 7 ማታን ደእያ ኦላ ኮሻነ ሃኩዋን ደእያ ኦላ ኦዱዋ ህንተ ስስያ ዎደ፥ ህርጎፕተ፤ ሄዋ ማላባይ ሀናናዉ በሴ፤ ሽን ዉርሰꬃይ ብራ። 8 አያዉ ጎፐ፥ እት ጋደ አሳይ ሀራ ጋደ አሳና ኦለታና፤ ቃይ እት ካዉተꬃይ ሀራ ካዉተꬃና ኦለታና፤ ቢታ ቃꬃይ ኡባ ሳን ደአና፤ ኮሻይካ ደአና፤ ሽን ሄዌ ኮይሮ የሉዋ ኦይꬃ ማላ።
9 ሽን ህንተ ህንተንቱ ሁጰዉ ናገትተ፤ አያዉ ጎፐ፥ አሳይ ህንተንታ ኦይቂደ፥ ፕርዳ ጎለዉ አꬂደ እማና፤ ቃይ ባረ አይሁዳ ዎሳ ጎለቱዋንካ ህንተንታ ልሱዋን ሾጫና፤ ጋድያ ሞድያዋንቱ ስንꬃንነ ካታቱዋ ስንꬃን ታ ድራዉ ህንተ ማርካታናዉ ኤቃና። 10 ምሽራቹዋ ቃላይ ኮይሮና አሳዉ ኡባዉ ኦደት ድጋናዉ በሴ። 11 ኡንቱንቱ ህንተንታ ፕርዳ ጎለ አህያ ዎደነ አꬂደ እምያ ዎደ፥ ዎት ሃሳያንተንቶ ኮይሮና ህርጎፕተ፤ ሄ ሳትያን ጾሳይ ህንተንቶ እምያባ ሃሳይተ። አያዉ ጎፐ፥ ጌሻ አያናይ ሃሳያናፐ አትን፥ ሃሳይያዋንቱ ህንተንታ ግድክታ።
12 እሻይ ባረ እሻ፥ አዉ ባረ ናኣ ዎꬍሳና፤ ቃይ ናናይ ባረንቱ አዎቱዋ ቦላንነ ባረንቱ አየቱዋ ቦላ ደንዲደ፥ ኡንቱንታ ዎꬍሳና። 13 አሳይ ኡባይ ህንተንታ ታ ሱንꬃ ድራዉ እጻና፤ ሽን ዉርሰꬃይ ጋካናዉ ገንጭያዌ አታና።
የሩሳላመ ጋካና ዎልቃማ ኢታ መቱዋ
(ማቶሳ 24:15-28፤ ሉቃሳ 21:20-24)
14 ሽን ናብያ ዳኔል ኦዴዳ ባሻ ቱናተꬃይ ኤቃናዉ በሰናሳን ኤቂሽን ህንተ በእያ ዎደ፥ ሄዌ ዋግያዌንቶ፥ ናባብያዌ አኬኮ፤ ይሁዳ ጋድያን ሄ ዎደ ደእያዋንቱ ደርያኮ በትኖ። ዳኔላ 9:27፤ 11:31፤ 12:11 15 ጎልያ ሁጲያን ደእያ ኡራይካ እትባ አካናዉ ዱገ ዎꬊደ፥ ባረ ሶይ ገሎፖ። 16 ጋደን ደእያዌካ ባረ ማዩዋ አካናዉ ጉየ ስሞፖ። 17 ሄ ዎደ ሻሃራ ማጫዋንቶነ ꬋንꬅያ ማጫዋንቶ አዬሮ። 18 ሽን ሀዌ ኡባይ ሀንያ ዎዲ ባልጉዋ ግደና ማላ፥ ጾሳ ዎስተ፤ 19 አያዉ ጎፐ፥ ጾሳይ ሳኣ ኮይሮ መꬌዳዋፐ ዶሚደ፥ ሀእ ጋካናዉ፥ ኡባካ ደእቤና መቱ፥ ቃይ ሀዋፐ ስንꬃዉካ ኡባ ደኤና መቱ አሳ ቦላ ሄ ዎደ ደአና። ዳኔላ 12:1፤ ሳፃ 7:14 20 ጎዳይ ሄ ጋላሳቱዋ ፓይዱዋ ጉꬅያዌ ባዌንቶ፥ አሳ ግዴዳ ኦንነ አተና፤ ሽን እ ባረ ዶሬዳ አሳቱዋ ድራዉ፥ ሄ ጋላሳቱዋ ፓይዱዋ ጉꬄዳ።
21 ሄ ዎደ ኦንነ ህንተንታ፥ “በእተ፤ ክርስቶስ ሀዋን ደኤ” ዎይ፥ “በእተ፤ ክርስቶስ፥ ሄዋን ደኤ” ያጎፐ፥ ሄዋ አማኖፕተ። 22 አያዉ ጎፐ፥ ዎርዳንቻ ክርስቶሳቱነ ዎርዶ ናባቱ ደንዲደ ባረንቶ ዳንዳየቶፐ፥ ሀራይ አቶ ጾሳይ ዶሬዳዋንታካ ባለꬃናዉ ማላታነ ማላልስያባ በሳና። 23 ሽን ህንተ ናገትተ፤ ታን ህንተንቶ ኡባባ ካሰታደ ኦዳድ።
ክርስቶሳ ላኤንꬆ ዩሳ
(ማቶሳ 24:29-31፤ ሉቃሳ 21:25-28)
24 ሽን ሄ ዎደ ሄ ዋይያፐ ጉይያን፥
አዋይ ꬉማና፤
አገናይ ፖእያዋ አጋና፤ ኢሳ. 13:10፤ ህዝ. 32:7፤ ኢዩ. 2:10፣ 31፤ 3:15፤ ሳፃ 6:12
25 ጾልንታቱ ሳሉዋፐ ኩንዳና።
ቃይ ሳሉዋን ደእያ ዎልቃቱካ ቃጸታና። ኢሳ. 34:4፤ ኢዩ. 2:10፤ ሳፃ 6:13
26 ሄ ዎደ ታን፥ አሳ ናአይ፥ ዎልቃማ ዎልቃናነ ቦንቹዋና ሻርያ ግዶና ዪሽን፥ ኡንቱንቱ በአና። ዳኔላ 7:13፤ ሳፃ 1:7 27 ሄ ዎደ ታን ኪታንቻቱዋ ሳኣ ኦይዱ ባጋ ኪታና፤ ሳኣ ጋጻፐ ሳሉዋ ጋጻ ጋካናዉ፥ ጾሳይ ዶሬዳ አሳ ሺሻና።
ዎድያ ዉርሰꬃይ ጋኬዳዋ ማላታ በስያ ባላስያ ምꬃቶ
(ማቶሳ 24:32-35፤ ሉቃሳ 21:29-33)
28 ሌምሱዋ ባላሳቶ ግያ ምꬃትፐ ታማርተ፤ ባላሳታ አጭያ ዎደነ እዝ ሀይꬃይ ሀይትያ ዎደ፥ ቦኒ ማቴዳዋ ህንተ ኤሪታ። 29 ሀዋዳንካ ህንተ ሄ ኡባባይ ሀንያዋ በእያ ዎደ፥ እ *እ፦ የሱሳ ጉሳ። ማታቲደ ፐንግያ ሺቄዳዋ †ማታቲደ ፐንግያ ሺቄዳዋ፦ ጉሳይ፥ የሱሳ ዩሳይ ማቴዳ ጉሳ። ኤርተ። 30 ታን ህንተንቶ ቱሙዋ ኦዳይ፤ ሀ ኡባባይ ሀናና ጋካናዉ፥ ሀ ዎድያ የለታይ ሀይቂድገና። 31 ሳሉነ ሳአይ አꬋና፤ ሽን ታ ቃላይ ኡባካ አና።
ዉርሰꬃ ጋላሳነ ሳትያ ኦንነ ኤረና
(ማቶሳ 24:36-44)
32 ሽን ሄ ጋላሳነ ሄ ሳትያ አዉዋ ጻላላፐ አትን፥ ሀራይ አቶ ሳሉዋን ደእያ ኪታንቻቱዋ ግድና፥ ዎይ ታና ናኣ ግድናካ ኦንነ ኤርያባይ ባዋ። 33 ሄ ዎዲ አዉደ ግዳነንቶ፥ ህንተ ኤረና ድራዉ፥ ናገትተ፤ ምንተ፤ ጾሳ ዎስተ። 34 ታ ዩሳይ ባረ ጎልያ አጊደ፥ ኦግያ ብያ ብታንያ ማላ፤ ብታኒ ባረ ቆማቶ ሁጲያን ሁጲያን ኦሱዋ እሚደ፥ ኡንቱንታ ባረ ኦሶ ካፖ ኦꬄዳ፤ ቃይ ካርያ ናግያዌካ ምንሲደ ናጋና ማላ አዛዜዳ።
35 ሄዋ ድራዉ፥ ምንተ፤ አያዉ ጎፐ፥ ጎልያዉ ኦማርሳ ግድና፥ ዎይ ቃማ ብላሄ ግድና፥ ዎይ ኩቱ ዋስያ ዎደ ግድና፥ ዎይ ጉራ ዎንቱማꬃን ግድና አዉደ ያነንቶ፥ ህንተ ኤርክታ። 36 ህንተንቱ አኬከናን እ ዮፐ፥ ህንተንታ ገምእሼዳዋንታ ደመና ማላ ምንተ። 37 ታን ህንተንቶ ኦድያዋ አሳ ኡባዉ ኦዳይ፤ ምንተ።