ጌሻ ማጻፋ ማርቆሳ ምሽራቹዋ 14

ክርስቶሳ ቦላ ማቀቴድኖ

(ማቶሳ 26:1-5፤ ሉቃሳ 22:1-2፤ ዮሃ. 11:45-53)

1 ፓስጋ ባላ ግያዋ ቦንችያ ጋላሳይነ ጫልቤና ኡክꬃ ሙሳ ቦንችያ ባላ ጋላሳይ ጋካናዉ ላኡ ጋላሳይ አቴዳ፤ ቄሳቱዋ ካፓቱነ ህግያ ታማርስያዋንቱ አሳይ ኤረናን የሱሳ ኦይቂደ ዎꬋና ኦግያ ኮዪኖ። 2 “አሳይ ዋላሳ ከሰና ማላ፥ ፓስጋ ቦንችያ ጋላስ ሄዋ ኦꬆኮ” ያጌድኖ።

የሱሳ ሽቱዋ ኦኬዳ ምሽራቶ

(ማቶሳ 26:6-13፤ ዮሃ. 12:1-8)

3 የሱስ ቢታንያ ጋድያን ኦሉዋ ሀርግያ ስሞና ሶይን ቁማ ማናዉ ኡቴዳ ዎደ፥ እት ምሽራታ አልባስጽሮሳ ባሬታ ኩሜዳ ናርዶሳ ግያ ዳሪ አልኦ ሽቱዋ * አካደ ያዱ፤ ሄ አልባስጽሮሳ ባሬታ መንꬃደ ሽቱዋ የሱሳ ሁጲያን ትጋዱ። 4-5 ሄዋን ደእያ አሳፐ እቱ እቱ ሀንቀቲደ፥ “ሀ ሽቱዋ ጮ አያዉ ባይዛይ? ሀ ሽቱዋ ሄዙ ጼቱ ብራ ሳንትምያን † ዛልኢደ፥ ሚሻ ህዬሳዉ እማናዉ ዳንዳየቴ” ያጊደ ባረንቱ ግዶን ሃሳዪኖ፤ ያቲደ ሄ ምሽራቶ ዳርስ ሀንቀቴድኖ።

6 ሽን የሱስ ሀዋዳን ያጌዳ፤ “ሀ ምሽራቶ አይነ ጎፕተ፤ እዞ አያዉ መቶꬂቴ? እዛ ታዉ ሎኦባ ኦꬃዱ። 7 ህዬሳቱ ኡባ ዎደ ህንተንቱና ደኢኖ፤ ህንተ ኮዬዳ ዎደ አዉደነ ኡንቱንታ ማዳናዉ ዳንዳዪታ፤ ሽን ታን ኡባ ዎደ ህንተንቱና ደእከ። 8 እዛ ባረዉ ዳንዳየቴዳዋ ኦꬃዱ፤ ቃይ ታ አሳተꬃይ ሞገታናፐ ካሰታደ ሞጎ ጊግሳናዉ ሽቱዋ ኦካዱ። 9 ታን ህንተንቶ ቱሙዋ ኦዳይ፤ ሳኣ ኡባን ዎንጋላ ምሽራቹዋ ኦድያሳን ሀቃንኔካ፥ አሳይ እዞ ቆፓና ማላ፥ ሀ እዛ ኦꬄዳዌ ኦደታና” ያጌዳ።

ይሁዳ አስቆሮቱ የሱሳ አꬂደ እማናዉ ዞረታ ኤኖ ጌዳ

(ማቶሳ 26:14-16፤ ሉቃሳ 22:3-6)

10 ታማነ ላኡ የሱሳ ካልያዋንቱፐ እቱ ይሁዳ አስቆሮቱ ‡ ግያዌ፥ የሱሳ ቄሳቱዋ ካፓቶ አꬂደ እማናዉ ኡንቱንቱኮ ቤዳ። 11 ኡንቱንቱ ሄዋ ስሴዳ ዎደ ናሸቲደ፥ “ኑን ነዉ ሚሻ እማና” ያጌድኖ፤ ይሁዳ አስቆሮቱ የሱሳ አꬂደ እማናዉ እንጀትያ ዎድያ ዎቼ።

የሱስ ባረና ካልያዋንቱና ፓስጋ ቁማ ሜዳ

(ማቶሳ 26:17-25፤ ሉቃሳ 22:7-14፣ 21-23፤ ዮሃ. 13:21-30)

12 ጫልቤና ኡክꬃ ምያ ባላ ጋላሳ ቦንችያ ኮይሮ ጋላስ፥ ፓስጋ ቁማ ማናዉ ዶርሳ ሹክያ ዎደ፥ የሱሳ ካልያዋንቱ አ፥ “ፓስጋ ቦንችያ ጋላስ ኔን ማና ቁማ ኑን ሀቃ ቢደ ጊግሳኔ?” ያጊደ ኦቼድኖ።

13 የሱስ ባረና ካልያዋንቱፐ ላአቱዋ ሀዋዳን ያጊደ ኪቴዳ፤ “ካታማ ቢተ፤ ህንተ ቢሽን፥ ኦቱዋን ሃꬃ ቶኬዳ እት ብታኒ ህንተንቱና ጋከታናዋ፤ አ ካልተ። 14 እ ቢደ ገልያ ጎልያዉዋ፥ ‘ታማርስያዌ ኔና፥ “ታን ታና ካልያዋንቱና ፓስጋ ቁማ ማናዉ ታ እማꬃ ክፍሊ ሀቃኔ?” ያጌ’ ያግተ። 15 ጎልያዉ ህንተንታ ፖቅያ ቦላን ደእያ ጊግ ኡቴዳ አኮ ክፍልያ በሳና፤ ሄዋን ኑዉ ጊግስተ” ያጌዳ።

16 ሄ ላኡ የሱሳ ካልያዋንቱ ከሲደ፥ ካታማ ቤድኖ፤ የሱስ ባረንቶ ኦዴዳዋዳንካ ኡባባ ደሚደ፥ ፓስጋ ቁማ ጊግሴድኖ።

17 ሳአይ ኦማርስያ ዎደ የሱስ ታማነ ላኡ ባረና ካልያዋንቱና ያ ቤዳ። 18 ኡንቱንቱ ኡቲደ ሳምፓፐ ቁማ ሚሽን፥ የሱስ ኡንቱንታ፥ “ታን ህንተንቶ ቱሙዋ ኦዳይ፤ ህንተንቱፐ እቱ ታናና ምያዌ፥ ታና አꬂደ እማናዋ” ያጌዳ።

19 አ ካልያዋንቱ ሎይꬅ ስሰትና፥ ሁጲያን ሁጲያን አ፥ “ቱሙ ታኔሻ?” ግያዋ ዶሜድኖ።

20 የሱስ ዛሪደ፥ “እ ሀ ህንተንቱ ታማነ ላአቱዋፐ እቱዋ፤ እ ታናና እትፐ ቱሻናዉ ባረ ዳቡዋ ሻታን የድያዋ። 21 ታን፥ አሳ ናአይ፥ ጾሳ ማጻፋይ ሀይቃና ጌዳዋዳን ሀይቃና፤ ሽን ታና፥ አሳ ናኣ፥ አꬂደ እምያ ኡራዉ አዬሮ፤ ሄ ኡራይ የለተናን አቴደንቶ፥ አዉ ሎአ ሽን” ያጌዳ።

ጎዳ ካዉዋ አክያ ዎጋ

(ማቶሳ 26:26-30፤ ሉቃሳ 22:14-20፤ 1 ቆሮ. 11:23-25)

22 ኡንቱንቱ ሚሽን፥ የሱስ ዳቡዋ አኪደ፥ ጾሳ ጋላቴዳ፤ ሄ ዳቡዋ መንꬂደ፥ ባረና ካልያዋንቶ እሚደ፥ “ሄይተ፤ ሀዌ ታ አሹዋ” ያጌዳ።

23 ጹኣ አኪደ፥ ጾሳ ጋላቲደ፥ ኡንቱንቶ እሜዳ፤ ኡባይ ሄ ጹኣፐ ኡሼድኖ። 24 የሱስ፥ “ሀዌ ኦራꬃ ጫቁዋን § ጮራ አሳ ድራዉ ጉክያ ታ ሱꬃ። 25 ታን ህንተንቶ ቱሙዋ ኦዳይ፤ ታን ጾሳ ካዉተꬃን ኦራꬃ ዎይንያ ኤሳ ኡሻና ጋላሳይ ጋካናዉ፥ ላኤንꬁዋ ሀ ዎይንያ ኤሳ ኡባካ ኡሽከ” ያጌዳ።

26 ማዝሙርያ የጼዳዋፐ ጉይያን፥ ደብረ ዛይተ ደርያ ቤድኖ።

ጰጽሮስ ካዳናዋ የሱስ ካሰቲደ ኦዴዳ

(ማቶሳ 26:31-35፤ ሉቃሳ 22:31-34፤ ዮሃ. 13:36-38)

27 የሱስ ባረና ካልያዋንቶ፥

“ህንተንቱ ኡባይ ታና የጊደ ዎጻንታ፤ አያዉ ጎፐ፥

ጾሳ ማጻፋይ፥ ‘ጾሳይ ዶርሳ ሄምያዋ ዎꬋና፤

ሄዋፐ ጉይያን ዶርሳይ ኡባይ ላለታና ጌ’

ያጌዳ። 28 ሽን ታን ሀይቁዋፐ ደንዴዳዋፐ ጉይያን፥ ህንተንቱፐ ካሰታደ ጋሊላ ባና” ያጌዳ።

29 ጰጽሮስ ዛሪደ፥ “ኡንቱንቱ ኡባቱ ኔና የጊደ ቦፐካ፥ ታን ኔና ሙለካ የግከ” ያጌዳ።

30 የሱስ ጰጽሮሳ፥ “ታን ነዉ ቱሙዋ ኦዳይ፤ ሀቼ ቃማ ኩቱ ላኤንꬁዋ ዋሳናፐ ካሰ፥ ኔን ታና ሄዙ ገደ ካዳናሳ” ያጌዳ።

31 ሽን ጰጽሮስ ካሰዋፐካ ምንሲደ፥ “ታን ሀራይ አቶ፥ ኔናና እትፐ ሀይቂንቶካ፥ ኔና ሙለካ ካድከ” ያጌዳ። ቃይ ሀራቱ ኡባቱካ ሄዋዳን ጌድኖ።

የሱስ ጌተሰማንያን ዎሴዳ

(ማቶሳ 26:36-46፤ ሉቃሳ 22:39-46)

32 ጌተሰማነ ግያ ሳኣ ቤድኖ፤ የሱስ ባረና ካልያዋንታ “ታን ጾሳ ዎሳናዉ፥ ህንተንቱ ሀዋን ኡትሽተ” ያጌዳ።

33 የሱስ ጰጽሮሳ፥ ያቆባነ ዮሃንሳ ባረናና አፌዳ፤ ዳሪ ካዮቴዳነ መቶቴዳ። 34 ቃይ ኡንቱንታ፥ “ታን ሀይቃና ጋካናዉካ ካዮታይ፤ ሀዋን ታክሽተ፤ ገምእሾፕተ” ያጌዳ።

35 ጉꬃ ስንꬃኮ ሺቂደ፥ ሳኣን ጉፋኒደ፥ ዳንዳየትያዋ ግዶፐ፥ ሄ ዎዲ ባረፐ አꬋና ማላ፥ ጾሳ ዎሴዳ። 36 ቃይካ፥ “አባቦ፥* ታ አቦ፥ ኡባባይ ነዉ ዳንዳየቴ፤ ሀ ጹኣ ታፐ ድጋ፤ ሽን ነ ሸንያዳን ሀኖፐ አትን፥ ታ ሸንያዳን ሀኖፖ” ያጌዳ።

37 የሱስ ባረና ካልያዋንቱኮ ስም ዪደ፥ ገምእሼዳዋንታ ደሚደ ጰጽሮሳ፥ “ስሞና፥ ገምእሻዲ? ኔን እት ሳተንቶነ ናጋናዉ ዳንዳያበይኪ? 38 ፓጭያን ህንተ ገለና ማላ፥ ናገትተነ ጾሳ ዎስተ፤ አያናይ ጊግ ኡቴዳ፤ ሽን አሹ ዳቡራንቻ” ያጌዳ።

39 ቃይካ ቢደ ካሰዋዳንካ ጾሳ ዎሴዳ። 40 አ ካልያዋንቱኮ ጉየ ስሚደ እ ይያ ዎደ፥ ገምእሼዳዋንታ ደሜዳ፤ ኡንቱንቱ አይፍያ ገምእሹ ጎዝ ዎꬄዳ ድራዉ፥ አዉ አያ ሃሳዪኖንቶካ ኤርበይክኖ።

41 ሄዘንꬁዋ ኡንቱንቱኮ ዪደ፥ “ሀእ ጋካናዉካ ገምእሺቴነ ሸምፒቴ? ግዳና፤ ዎዲ ጋኬዳ፤ በእተ፥ ታና፥ አሳ ናኣ፥ ናጋራንቻ አሳቱዋ ኩሽያን አꬂደ እምያ ዎዲ ጋኬዳ። 42 ደንድና ቦይተ፤ በእተ፥ ታና አꬂደ እምያዌ ሀዌኩ ጋኬዳ” ያጌዳ።

የሱስ ባረ ሞርከቱዋ ኩሽያን ኦይቀቴዳ

(ማቶሳ 26:47-56፤ ሉቃሳ 22:47-53፤ ዮሃ. 18:3-12)

43 የሱስ ሄዋ ብሮ ሃሳይሽን፥ ታማነ ላኡ አ ካልያዋንቱፐ እቱ፥ ይሁዳ አስቆሮቱ፥ ኤለካ ጋክ ዎꬌዳ፤ ቃይ ቄሳቱዋ ካፓቱ ህግያ ታማርስያዋንቱነ ጭማቱ ኪትና፥ ማሻነ ጻምኣ ኦይቄዳ ጮራ አሳይ አናና እትፐ ዬዳ። 44 የሱሳ አꬅ እምያዌ ሄ ጮራ አሳዉ፥ “ታን የርያዌ አ፤ አ ኦይቂደ ሎይꬅ ናጊደ፥ አፍተ” ያጊደ ማላ ኦድ ዎꬄዳ።

45 ይሁዳ አስቆሮቱ ጋኮሳናካ የሱሳኮ ሺቂደ፥ “ታማርስያዎ” ያጊደ የሱሳ የር አኬዳ። 46 ሄ ጮራ አሳይ የሱሳ ምንስ ኦይቄዳ። 47 ሽን ማታን ኤቄዳዋንቱፐ እቱ ባረ ጩብያ ሾድነ ቄሳቱዋ ኡባቱዋ ካፑዋ ቆማ ሾጪደ፥ አ ሀይꬃ ቃንጽ ኦሌዳ።

48 የሱስ ዛሪደ፥ ሄ ሺቄዳ ጮራ አሳ፥ “ታና ቦንቃንቻ ከሲደ፥ ቦንቃንቻ ኦይቂያዋዳን ኦይቃናዉ ጩብያነ ጻምኣ ኦይቂደ ዬድቴ? 49 ታን ጌሻ ጎልያን ታማርሳደ፥ ጋላሳን ጋላሳን ህንተንቱና ደእያ ዎደ ታና ኦይቂበይክታ፤ ሽን ጾሳ ማጻፋቱ ጌዳዌ ፖለታናዉ በሴ” ያጌዳ።

50 የሱሳ ካልያዋንቱ ኡባቱ አ የጊደ ብ አጌድኖ።

51 ናጻላ ጻላላ ማዬዳ እት ያላጋ ብታኒ የሱሳ ካልያዋ አሳይ ኦይቄዳ። 52 ሽን ሄ ብታኒ ናጻላ ኦሊደ፥ ካሎ ጺራ ዎጼዳ።

የሱሳ ፕርድያ ሻንጋቱዋኮ አፌድኖ

(ማቶሳ 26:57-68፤ ሉቃሳ 22:54-55፣ 63-71፤ ዮሃ. 18:13-14፣ 19-24)

53 አሳይ የሱሳ ቄሳቱዋ ኡባቱዋ ካፑዋ ሶይ፥ ቄሳቱዋ ካፓቱዋ ኡባቱ፥ ጭማቱነ ህግያ ታማርስያዋንቱ ሺቄዳሳ አፌድኖ። 54 ጰጽሮስ ቄሳቱዋ ኡባቱዋ ካፑዋ ድርሳ ግዱዋ ጋካናዉ ሃኩዋን አ ካሌዳ፤ ያን ናግያዋና ታማ ካሺደ፥ ኡት አጌዳ።

55 ቄሳቱዋ ካፓቱነ ሄዋን ሺቄዳ አሳይ ኡባይ የሱሳ ዎꬋናዉ አ ቦላ ማርካ ኮዬድኖ፤ ሽን አይነ ደምበይክኖ። 56 አያዉ ጎፐ፥ ጮራ አሳቱ አ ቦላን ዎርዱዋ ማርካቴድኖ፤ ሽን ኡንቱንቱ ማርካተꬃይ እት ማላ ግደና።

57-58 እት እት አሳቱ ደንድ ኤቂደ የሱሳ ቦላ፥ “እ፥ ‘ታን አሳይ ኬጼዳ ሀ ጌሻ ጎልያ ኮላደ፥ አሳይ ኬጽቤና ሀራ ጌሻ ጎልያ ሄዙ ጋላሳ ግዶን ኬጻና’ ጊሽን፥ ኑን ስሴዶ” ያጊደ ዎርዱዋ ማርካቴድኖ። 59 ሽን ሀራይ አቶ ኡንቱንቱ ማርካተꬃይ ሄዋን እት ማላ ግድቤና።

60 ቄሳቱዋ ኡባቱዋ ካፑ አሳ ኡባ ስንꬃን ደንድ ኤቂደ የሱሳ፥ “ሀዋንቱ ኔና ሞትያ ሞቶ ነዉ ዛርያባይ ባዌ?” ያጊደ ኦቼዳ። 61 ሽን የሱስ ጮኡ ጊደ፥ አይነ ዛርቤና፤ ቄሳቱዋ ኡባቱዋ ካፑ አ፥ “አንጀቴዳ ጾሳ ናአይ ክርስቶስ ኔኔ?” ያጊደ ላኤንꬁዋ ኦቼዳ።

62 የሱስ ዛሪደ፥ “ኤ፥ ታና፤ ህንተ ታና፥ አሳ ናኣ፥ ዎልቃማ ጾሳፐ ኡሸቻ ባጋና ኡትደእሽናነ ሳሉዋ ሻርያና ዪሽን በአና” ያጌዳ።

63 ቄሳቱዋ ኡባቱዋ ካፑ ባረ ማዩዋ ፔꬍ ኦሊደ፥ “ኑና ሀዋፐ ስንꬃን አያዉ ሀራ ማርካ ኮሺ? 64 ህንተንቱ አ ቦርያ ስሴድታ፤ ህንተ ቆፋይ አዬ?” ያጌዳ፤ ኡንቱንቱ ኡባይ፥ “እ ሀይቃና በሴ” ያጊደ አ ቦላ ፕርዴድኖ።

65 ኡንቱንቱፐ እቱ እቱ አ ቦላ ጩሸꬃ ዶሜድኖ፤ አ አይፍያ ካም ደቺደ፥ “ኔና ደቼዳዌ ኦኔ? አነ ትምቢትያ ኦዳ!” ያጌድኖ፤ ቃይ ናግያዋንቱካ አ ቅንጻልያ ባቂደ አፌድኖ።

ጰጽሮስ የሱሳ ካዴዳ

(ማቶሳ 26:69-75፤ ሉቃሳ 22:56-62፤ ዮሃ. 18:15-18፣ 25-27)

66 ጰጽሮስ ድርሳ ግዶን ህርክና ደእሽን፥ ቄሳቱዋ ኡባቱዋ ካፑዋ ማጫ ቆማቱዋፐ እትና ያዱ። 67 ጰጽሮስ ታማ ካሽያዋ በኣደ፥ ጫዳ ጼላደ፥ “ኔንካ ናዝሬትያ የሱሳና እትፐ ደኣ” ያጋዱ።

68 ሽን ጰጽሮስ፥ “ኔን ግያዌ አየንቶ ታን ኤርከ፤ ታዉ አኬከተና” ያጊደ ካዴዳ፤ ያቲደ ድርሳ ፐንግያኮ ከሴዳ፤ ኩቱካ ዋሴዳ። †

69 ሄ ቆማታ ጰጽሮሳ በኣደ፥ አ ማታን ኤቄዳ አሳቱዋ፥ “ሀ ብታኒካ ኡንቱንቱና ደኤ” ጋደ ጉጃደ ኦዱዋ ዶማዱ። 70 ሽን ጰጽሮስ ቃይካ ካዴዳ።

ጉꬃ ጋምእሽን፥ ማታን ኤቄዳ አሳቱ ላኤንꬁዋ ጰጽሮሳ፥ “ኔን ቱማ ኡንቱንቱና እትፐ ደኣ፤ አያዉ ጎፐ፥ ኔን ጋሊላ ጋድያ አሳ” ያጌድኖ።

71 ሽን ጰጽሮስ፥ “ታን ሄዋ ህንተ ግያ ብታንያ ኤርከ!” ያጊደ ባረና ሸቃነ ጫቁዋ ዶሜዳ።

72 ኤለካ ኩቱ ላኤንꬁዋ ዋስ አጌዳ፤ ጰጽሮስ ባረና የሱስ፥ “ኔን ኩቱ ላኤንꬁዋ ዋሳናፐ ካሰ ሄዙ ገደ ታና ካዳናሳ” ጌዳዋ ሀሳዪደ፥ ዳሪ ዬኬዳ።

14:1 ከሳ 12:1-27

*14:3 ዳሪ አልኦ ሽቱዋ፦ ጉሳይ ሎይꬅ ሳዊያዋ ጉሳ።

†14:4-5 ብራ ሳንትምያ፦ 6:37 ጼልተ።

14:7 ዛረ. 15:11

‡14:10 ይሁዳ አስቆሮቱ፦ 3:19 ጼልተ።

14:18 ማዝ. 41:9

§14:24 ኦራꬃ ጫቁዋ፦ ጾሳይ ባረ አሳዉ የሱሳ ሀይቁዋ ባጋና ቃላ ገሌዳ ኦራꬃ ቃላ ጫቁዋ። ሄዌኔካ አ ጋክያ ጹኣ፥ እ ባረ ሱꬃ ጉሲደ አꬅ እሜዳ አ ደኡዋ። ሄዌኔካ፥ ኑ ኤጫ አሳተꬃይ ኡባይ ላመትና፥ ኦራጼዳ ጾሳ ህጊ ኑ ዎዛናን ጻፈቴዳዋ ኦዴ።

14:24 ከሳ 24:8፤ ኤር. 31:31-34

14:27 ዛካ. 13:7

*14:36 አባ፦ ጉሳይ ግሪከ ቃላንካ “አባ” ግድያ ዎደ፥ አራማይከ ቃላን “አባ” ግያዋ።

14:62 ዳኔላ 7:13

14:64 ዎጋ 24:16

†14:68 ኩቱካ ዋሴዳ፦ ሀ ቃላይ በን ብለቴዳ እት እት ብለꬃን ባዋ።