15
የሱሳ ጵላጾሳኮ አፌድኖ
(ማቶሳ 27:1-2፣ 11-14፤ ሉቃሳ 23:1-5፤ ዮሃ. 18:28-38)
1 ዎንታ ጉራን ኤለካ ቄሳቱዋ ካፓቱ ጭማቱዋናኔ ሙሴ ህግያ ታማርስያዋንቱና ሄዋን ሺቄዳ አይሁዳ ሻንጋቱዋ ኡባና ማቀቲደ፥ የሱሳ ቃች አፊደ፥ ጵላጾሳዉ አꬂደ እሜድኖ።
2 ጵላጾስ አ፥ “ኔን አይሁዳቱዋ ካቴ?” ያጊደ ኦቼዳ።
የሱስ ዛሪደ አ፥ “ነ ግያዋዳና” ያጌዳ።
3 ቄሳቱዋ ካፓቱ የሱሳ ዳሮባን ሞቴድኖ። 4 ጵላጾስ ሽረቲደ የሱሳ፥ “ነዉ ዛርያባይ ባዌ? ኡንቱንቱ ነ ቦላ ዎይሳ ሞቱዋ አህንቶ በእኪ?” ያጊደ ኦቼዳ።
5 ሽን የሱስ ሀራባ ዛረናን እጽና፥ ጵላጾስ ማላለቴዳ።
የሱሳ ቦላ ሀይቁዋ ፕርዴድኖ
(ማቶሳ 27:15-26፤ ሉቃሳ 23:13-25፤ ዮሃ. 18:39-40፤ 19:1-16)
6 ጵላጾሳዉ ፓስጋ ባላ ቦንችያ ጋላሳን አሳይ ኮይያ እት ኡራ ቃሹዋፐ ብልያ ዎጋይ ደኤ። 7 ሄ ዎደ እት ባርባና ግያ ብታኒ ዋላሳ ከሲደ ሸምፑዋ ዎꬌዳ አሳቱዋና እትፐ ቃሾ ጎልያን ደኤ። 8 ሺቄዳ ጮራ አሳይ ጵላጾስ ካሰ ኤረቶዋዳንካ ባረንቶ ማሮታ ኦꬃና ማላ፥ አ ኦቼድኖ። 9 ጵላጾስ አሳ ዛሪደ፥ “ታን ህንተንቶ አይሁዳቱዋ ካትያ ብልያዋ ኮዪቴ?” ያጊደ ኦቼዳ። 10 አያዉ ጎፐ፥ ቄሳቱዋ ካፓቱ የሱሳ ቃናቲደ አꬅ እሜዳዋ ጵላጾስ ኤሬዳ።
11 ሽን ቄሳቱዋ ካፓቱ የሱሳ ኮታ ባርባና ብላናዳን፥ ሄ ሺቄዳ አሳይ ጵላጾሳ ዎሳና ማላ፥ አሳ ማቄድኖ። 12 ጵላጾስ ላኤንꬁዋ ዛሪደ፥ “ያትና፥ ሀ አይሁዳ ካትያ ህንተንቱ ግያዋ ዎቶ?” ያጌዳ።
13 አሳይ ጵላጾሳዉ ዛር ዛር ባረንቱ ኮሻ ꬎቁ ኦꬂደ፥ “አ ካቃ” ያጌድኖ።
14 ጵላጾስ አሳ፥ “አያዉ? እ አይ ኢታባ ኦꬄዴ?” ያጌዳ።
ሽን አሳይ ካሰዋፐካ ባረ ኮሻ ꬎቁ ኦꬂደ፥ “አ ካቃ” ያጌድኖ።
15 ጵላጾስ አሳ ናሸቻናዉ ኮዪደ፥ ባርባና አሳዉ ብሌዳ፤ ያቲደ ልሱዋን የሱሳ ዎታዳራቱዋን ሾጭሲደ፥ ካቃና ማላ ኡንቱንቶ አꬅ እሜዳ።
ዎታዳራቱ የሱሳ ቅሊጬድኖ
(ማቶሳ 27:27-31፤ ዮሃ. 19:2-3)
16 ሄዋፐ ጉይያን፥ ዎታዳራቱ የሱሳ ጋድያ ሞድያዋ ግቢያ አፊደ፥ ሀራ ዎታዳራቱዋ ኡባ እትፐ ጼሴድኖ። 17 ቃይ ዞኦ ማዩዋ አ ማይዜድኖ፤ አጉንꬃ ካላቻ ጊግሲደ፥ አ ሁጲያን ዎꬄድኖ። 18 ሄዋፐ ጉይያን አ፥ “አይሁዳቱዋ ካተዉ፥ ሳሮታይ ነዉ ግዶ” ያግ ሳሮቲደ፥ አ ቅሊጩዋ ዶሜድኖ። 19 የሱሳ ሁጲያ ማቃ ጻምኣን ሾጬድኖ፤ ቃይ አ ቦላን ጩቼድኖ፤ ጉልባቲደ አዉ ጎይኔድኖ። 20 አ ቦላ ቅሊጬዳዋፐ ጉይያን፥ ዞኦ ማዩዋ አፐ ቃር አኪደ፥ አ ማዩዋ አ ማይዜድኖ፤ ያቲደ ማስቃልያ ቦላን ምስማርያን ꬍሺደ፥ አ ካቃናዉ አፌድኖ።
የሱሳ ካቄድኖ
(ማቶሳ 27:32-44፤ ሉቃሳ 23:26-43፤ ዮሃ. 19:17-27)
21 ኡንቱንቱ ቢደ፥ እስክንድራነ ሩፎሳ የሌዳ አዉዋ፥ እት ስሞና ግያ ቀሬና ጋድያ አሳይ፥ ጋጻፐ ካታማ ይያዋና ጋከቲደ፥ የሱሳ ማስቃልያ ዎልቃን ቶሴድኖ። ሮመ 16:13 22 ያቲደ ጎልጎታ ጌተትያሳ የሱሳ አፌድኖ። “ጎልጎታ” ግያዌ “ሁጲያ ጎስያሳ”*“ሁጲያ ጎስያሳ” ጌተትያዌ፥ አሳ ሁጲያ ማላትያ ሹቻይ ሄዋን ደእያ ድራዉ፥ ሁጲያ ጎስያሳ ጌተቴዳ። ግያዋ። 23 ካዋራ ግያ ꬋሊ ዋላከቴዳ ዎይንያ ኤሳ የሱሳዉ ኡሻናዉ እሜድኖ፤ ሽን እ ኡሸናን እጼዳ። 24 ኡንቱንቱ አ ካቄድኖ፤ ቃይ ኦና ኦና ጋካነንቶ ኤራናዉ አ ማዩዋ ሻኪደ፥ ሳማ የጌድኖ። ማዝ. 22:18
25 ኡንቱንቱ አ ካቂያ ዎደ፥ ዎንታፐ ሄዙ ሳተ። 26 “አይሁዳቱዋ ካትያ” ያግ አ ሞትያ ጻፉ ጻፌት ኡቴዳ። 27 የሱሳና ላኡ ካይሳቱዋ እቱዋ አፐ ኡሸቻ ባጋና፥ ቃይ እቱዋ አፐ ሀድርሳ ባጋና ማስቃልያ ቦላ ምስማርያን ꬍሺደ ካቄድኖ። 28 ጾሳ ማጻፋይ፥ “ኢታባ ኦꬄዳ አሳቱዋና እ ፓይደቴዳ” ያግያዌ ፖለቴዳ። ኢሳ. 53:12
29 ኦግያና አꬍያ አሳይ የሱሳ ካꬊደ፥ ባረንቱ ሁጲያ ቃꬂደ ቦሬድኖ፤ “ስም፥ ጌሻ ጎልያ ኮላደ ሄዙ ጋላሳ ግዶን ኬጽያዎ፥ ማዝ. 22:7፤ 109:25፤ ማር. 14:58፤ ዮሃ. 2:19 30 አነ ማስቃልያ ቦላፐ ዎꬋደ፥ ነ ሁጲያ አሻ” ያጌድኖ።
31 ሀዋዳንካ ቄሳቱዋ ካፓቱ ሙሴ ህግያ ታማርስያዋንቱና እትፐ የሱሳ ቦላ፥ “ሀራ አሳቱዋ አሼዳ፤ ሽን ባረና አሻናዉ ዳንዳየና፤ 32 ኑን በኢደ አማናና ማላ፥ ክርስቶስ እስራኤልያ ካቲ፥ አነ ማስቃልያ ቦላፐ ሀእ ዎꬎ” ጊደ ቅሊጬድኖ። ቃይ ሀራይ አቶ፥ አናና ማስቃልያ ቦላ ምስማርያን ꬍሸቲደ ካቀቴዳዋንቱካ አ ቦላ ቅሊጬድኖ።
የሱሳ ሀይቁዋባ
(ማቶሳ 27:45-56፤ ሉቃሳ 23:44-49፤ ዮሃ. 19:28-30)
33 ኡሱፑን ሳትያፐ ዶሚደ፥ ኡዱፑ ሳትያ ጋካናዉ፥ ጋድያ ኡባይ ꬉሜዳ። 34 ኡዱፑ ሳትያን የሱስ ባረ ቃላ ꬎቁ ኦꬂደ፥ “ኤሎሄ፥ ኤሎሄ፥ ላማ ሳባቅታኒ?”†ኤሎሄ፥ ኤሎሄ፥ ላማ ሳባቅታኒ፦ ሀ ቃላቱ የሱስ ሀ አላምያን አሹዋ ማዪደ ስመረትያ ዎደ ሃሳየትያ አራማይከ ጌተትያ ቃላን ሃሳየቶዋ። ያጌዳ። ሄዋ ግያዌ፥ “ታ ጾሳዉ፥ ታ ጾሳዉ፥ ታና አያዉ አጋዲ?” ግያዋ። ማዝ. 22:1
35 ሄዋን ኤቄዳ አሳፐ እቱ እቱ ሄዋ ስሲደ፥ “በእተ፤ ኤላሳ ጼሴ” ያጌዳ። 36 ሄ አሳፐ እቱ ዎጽ ዪደ፥ ዛንዛ ማላትያዋን ጫላ ዎይንያ ኤሳ ኩንꬄዳ፤ ሄዋ ማቃ ጋትማ ጼራን ዎꬂደ፥ “ደእሽተ አነ፤ ኤላስ ማስቃልያፐ አ ዎꬃናዉ ያነንቶነ አነ በኦይተ” ያጊደ የሱሳ ዶናኮ ኡሻናዉ ሺሼዳ። ማዝ. 69:21
37 የሱስ ቃላ ꬎቁ ኦꬅ ዋሲደ፥ ሀይቂ አጌዳ።
38 ጌሻ ጎልያን ቃሸቴዳ ጋርዱ ቆሞፐ ዱገ ጋካናዉ፥ ላኡ ከሲደ ፖሸት ዎꬌዳ።ከሳ 26:31-36 39 ማስቃልያፐ ስንꬃ ባጋና ሄዋን ኤቄዳ እት ጼቱዋ ካፑ፥ ሄዋ ኬና የሱስ ዋሲደ ሀይቄዳዋ በኤዳ ዎደ፥ “ሀ ብታኒ ቱሙ ጾሳ ናኣ” ያጌዳ።
40 ሄዋን ሃኩዋን ኤቂደ ጼልያ አማሬዳ ማጫዋንቱ ደኢኖ፤ ኡንቱንቱ ግዶን ማግዳላ ግያ ካታማፐ ዬዳ ማይራማ፥ ቴፋ ያቆባነ ዮሳ ዳያ ማይራማነ ሳሎማ ደኢኖ። 41 ሄ ማጫ አሳቱ የሱስ ጋሊላን ደእያ ዎደ፥ አ ካሌዳዋንታነ አ ማዴዳዋንታ፤ ቃይ የሱሳና እትፐ የሩሳላመ ቤዳ ሀራ ጮራ ማጫ አሳቱ ሄዋን ደኢኖ።
የሱሳ ሞጉዋባ
(ማቶሳ 27:57-61፤ ሉቃሳ 23:50-56፤ ዮሃ. 19:38-42)
42-43 ሳአይ ኦማርሴዳ ዎደ፥ ሄዋን ሺቄዳ አሳን ቦንቼቴዳ እት ዮሴፎ ግያ ብታኒ፥ ጾሳ ካዉተꬃይ ያናዋ ናግ ኡቴዳዌ፥ አርማትያሳ ግያ ካታማ አሳይ ዬዳ፤ ሄ ጋላሳይ ዎንተꬃ ሳምባታዉ ጊገትያ ጋላሳ ግዴዳ ድራዉ፥ ዮሴፎ ጻሊደ ጵላጾሳኮ ቢደ፥ የሱሳ አሃ አካናዉ ዎሴዳ። 44 ጵላጾስ፥ የሱስ ኤለካ ሀይቂ ድጌዳዋ ስሴዳ ዎደ ማላለቴዳ፤ ጼቱዋ ካፑዋ ጼሲደ፥ “እ ሀይቆደፐ ጋምኤዴ?” ያጊደ ኦቼዳ። 45 ጵላጾስ የሱስ ሀይቄዳዋ ጼቱዋ ካፑዋፐ ስሲደ፥ አ አሃ ዮሴፎ አካናዳን ኦꬄዳ። 46 ዮሴፎ ሞጉዋ ማዩዋ ሻሜዳ፤ የሱሳ አሃ ማስቃልያፐ ዎꬅ ማዩዋን ጻጺደ፥ ሹቻ ዎጬዳ አሳ ሞግያ ጎንጎሉዋ ግዶን አ አሃ ዎꬄዳ፤ ቃይ ሄ ጎንጎሉዋ ዶናን ዎልቃማ ሹቻ ጎንዶርሲደ ዎꬄዳ። 47 ማግዳላ ካታማፐ ዬዳ ማይራማነ ዮሳ ዳያ ማይራማ የሱሳ አሃ ኡንቱንቱ ሀቃን ዎꬅንቶ በኢኖ።