1 ሳምባታይ አꬌዳዋፐ ጉይያን፥ ማግዳላ ካታማፐ ዬዳ ማይራማ፥ ያቆባ ዳያ ማይራማነ ሳሎማ ቢደ፥ የሱሳ አሃ ኦካናዉ ሽቱዋ ሻሜድኖ። 2 ዎጋ ጋላስ ዎንቱማꬃ ዳሮ ጉራን ጻልቂ ከስሽን፥ ሄ ጎንጎሉዋ ቤድኖ። 3 ኡንቱንቱ ባረንቱ ግዶን እቱ እቱዋና፥ “ጎንጎሉዋ ዶናፐ ኑዉ ሹቻ ኦኔ ጎንዶርሲደ ድጋናዌሻ?” ያጊደ ሃሳዪኖ።

4 ኡንቱንቱ ጼልያ ዎደ፥ ሄ ዳሮ ዎልቃማ ሹቻ ጎንዶርስድጌዳዋ በኤድኖ። 5 የሱስ ሞገቴዳ ጎንጎሉዋ ግዶ ገልያ ዎደ፥ እት ዎዳላ ብታኒ ቦꬃ ማዩዋ ማዪደ፥ ኡሸቻ ባጋና ኡቴዳዋ በኢደ ዳጋሜድኖ።

6 ሽን እ ኡንቱንታ፥ “ዳጋሞፕተ። ማስቃልያ ቦላ ካቀቴዳ ናዝሬትያ የሱሳ ህንተንቱ ኮይያዋ ኤራይ። እ ሀዋን ባዋ፤ ደንድ ድጌዳ። ኡንቱንቱ አ ዎꬄዳሳ ሀዋ በእተ። 7 ሽን ቢደ የሱስ ባረና ካልያዋንቶነ ጰጽሮሳዉ፥ ‘የሱስ ህንተንቱፐ ካሰቲደ ጋሊላ ቤ፤ እ ህንተንቶ ኦዴዳዋዳንካ ህንተንቱ አ ያን በአና’ ያጊደ ሀዋ ኦድተ” ያጌዳ።

8 ማጫ አሳቱ ያሻን ኮኮሪደ፥ የሱስ ሞገቴዳ ጎንጎሉዋፐ ከሲደ ባቃት አጌድኖ፤ ቃይ ኡንቱንቱ ያዬዳ ድራዉ፥ አሳዉ ሄዋ ኦስነ አይነ ኦድበይክኖ።

ማጫ አሳቱ ቢደ፥ ባረንቶ ኦደቴዳባ ኡባ ጰጽሮሳዉነ አናና ደእያዋንቶ ቃንꬃን ኦዴድኖ፤ ሄዋፐ ጉይያን፥ የሱስ ባረ ሁጰዉ ባረና ካልያዋንቱ ቦላ፥ መꬍናዉ አሽያ ላመተና ጌሻ ምሽራቹዋ ቃላ፥ አዋይ ሞክያሳፐ ዉልያሳ ጋካናዉ ኪቴዳ።

9 የሱስ ሀይቁዋፐ ደንዴዳዋፐ ጉይያን፥ ዎጋ ጋላስ ጉራ፥ ላፑ ኢታ አያናቱዋ ከሴዳ ማግዳላ ካታማፐ ዬዳ ማይራምዉ ካሰቲደ ቤቴዳ። 10 እዛ ባደ ካሰ አናና ደእያዋንቶ፥ ቃረቲድነ ዬኪደ ኡቴዳዋንቶ ኦዳዱ፤ 11 ሽን የሱስ ፓጻ ደእያዋነ እዝዉ ቤቴዳዋ ኡንቱንቱ ስሴዳ ዎደ፥ እዝ ኦዱዋ ቱማ ግበይክኖ።

12 ሄዋፐ ጉይያን፥ ኡንቱንቱፐ ላአቱ ካታማፐ ከሲደ ቢሽን፥ ኦግያን የሱስ ኮይሮዋፐ ዱማቲደ፥ ኡንቱንቶ ቤቴዳ። 13 ኡንቱንቱ ጉየ ስሚደ፥ ሀራቶ ኦዴድኖ፤ ሽን ሄዋንቱ ኡንቱንቱ ኦዱዋ ቱማ ግበይክኖ።

14 ጉየፐ ታማነ እት የሱሳ ካልያዋንቱ ቁማ ሚሽን፥ የሱስ ኡንቱንቶ ቤቴዳ። ኡንቱንቶ አማኑ ባይና ድራዉ፥ እ ኡንቱንታ ሴሬዳ፤ ቃይ ሀይቁዋፐ እ ደንዴዳዋ በኤዳዋንቱ ኡንቱንቶ ኦድና፥ ኡንቱንቱ አማነናን እጼዳ ድራዉነ ኦድና ስሰናዋንታ ግድያ ድራዉ፥ እ ኡንቱንታ ሴሬዳ።

15 እ ኡንቱንታ ሀዋዳን ያጌዳ፤ “አላምያ ኡባ ቢደ፥ አሳ ኡባዉ ዎንጋላ ምሽራቹዋ ቃላ ኦድተ። 16 አማኖዌነ ጻማቀቶዌ አታና፤ ሽን አማነናዋ ቦላ ጾሳይ ፕርዳና። 17 ታናን አማንያዋንቱ ሀ ማላታቱዋ ኦꬃናዋንታ: ኡንቱንቱ ታ ሱንꬃን ኢታ አያናቱዋ ከሳናዋንታ፤ ቃይ ኡንቱንቱ ዱማ ዱማ ኦራꬃ ቃላን ሃሳያናዋንታ። 18 ኡንቱንቱ ሾሻ ኦይቆፐካ፥ ዎይ አያነ ዎꬍያ ማርዝያ ኡሽንቶካ ኡንቱንታ ቆሄና። ቃይ ኡንቱንቱ ባረንቱ ኩሽያ ሀርጋንቻቱዋ ቦላ ዎꬃና፤ ሄ ሀርጋንቻቱ ፓጻና” ያጌዳ።

19 ጎዳ የሱስ ባረና ካልያዋንቱና ሃሳዬዳዋፐ ጉይያን፥ ጾሳይ አ ፑደ ሳሉዋ አፍና፥ ጾሳፐ ኡሸቻ ባጋና ኡቴዳ። 20 አ ካልያዋንቱ ቢደ፥ ኡባ ሳን ዎንጋላ ምሽራቹዋ ኦዴድኖ። ጎዳይካ ኡንቱንቱና እትፐ ኦꬄ፤ ኡንቱንቱ ኦድያ ቃላይካ ቱማ ግዴዳዋ ኡንቱንቱ ኦꬅያ ማላታቱዋን ኤርሴዳ። *እት እት በን ጌሻ ማጻፋቱዋን ሀ ፓይዳቱ ባዋ።