1 ሄዋፐ ጉይያን እስራኤልያ አሳይ ደንዲደ፥ እያርኮ ልክያን ዮርዳኖሳ ሄፍንꬃን ደእያ ሞኣባ ደምባን ዱንካኔዳ።

2 እስራኤልያ አሳይ አሞረቱ ቦላ ኦꬄዳዋ ኡባ ጽፖራ ናአይ ባላቅ ስሴዳ። 3 እስራኤልያ አሳይ ሎይꬅ ዳሮ ግዴዳ ድራዉ፥ ሞኣባቱ ሎይꬅ ዳጋሚደ ያዬድኖ። 4 ሞኣባቱ ምድያማ ጭማቱዋ፥ “ቦራይ ማታ ም ꬋይስያዋዳን ሀ ዉደ አሳይ ኑ ዩሹዋን ደእያ ኡባ ም ꬋይሳና” ያጌድኖ።

ሄ ዎደ ሞኣባ ካቲ፥ ጽፖራ ናአይ ባላቅ 5 አማዋ ጋድያን ኤፍራጺሳ ሻፋ ማታን ፓቶራ ካታማን ደእያ ብኦራ ናኣ ባላማኮ አሳ ኪቴዳ። ባላቅ፥ “በአ፥ ግብጼፐ ዳሮ አሳይ ከሴዳ፤ ኡንቱንቱ ቢታ ኡባ ማዪደ፥ ታፐ ያ ባጋን ደኢኖ። ፓይ. 31:8፤ 2 ጰጽ. 2:15-16፤ ይሁዳ 11 6 ኡንቱንቱ ታዉ ሎይꬅ ዎልቃምያ ድራዉ፥ ሀያና ሀእ ያደ፥ ኡንቱንታ ታዉ ሸቃርኪ! ኦን ኤሪ፥ ታን ኡንቱንታ ጾናናዉነ ጋድያፐ ከሳናዉ ዳንዳያነንቶነ። አያዉ ጎፐ፥ ኔን አንጄዳዌ አንጀቴዳዋነ ኔን ሸቄዳዌ ሸቀቴዳዋ ግድያዋ ታን ኤራይ” ያጌዳ።

7 ሞኣባ ጭማቱነ ምድያማ ጭማቱ ሸቂስያ ጋትያ አኪደ፥ ባላማኮ ቤድኖ። ባላቅ ጌዳዋ አዉ ኦዴድኖ። 8 ባላም ኡንቱንታ፥ “ሀቼ ቃማ ሀዋን አቅተ፤ መꬍና ጎዳይ ታዉ ኦድያዋ ታን ህንተንቶ ኦዳና” ያጌዳ። ሞኣባ ካፓቱ ባላማዋን ታኬድኖ።

9 ጾሳይ ባላማኮ ዪደ፥ “ሀዋንቱ ኔናና ደእያ አሳቱ ኦኔ?” ያጊደ ኦቼዳ።

10 ባላም ጾሳ፥ “ሞኣባ ካቲ፥ ጽፖራ ናአይ ባላቅ፥ 11 ‘ግብጼፐ ዳሮ አሳይ ከሴዳ፤ ኡንቱንቱ ቢታ ኡባ ማዬድኖ። ሀእ ኔን ያደ፥ ኡንቱንታ ታዉ ሸቃርኪ! ኦን ኤሪ፥ ታን ኡንቱንታ ጾናናዉነ ጋድያፐ ከሳናዉ ዳንዳያነንቶነ’ ያጊደ ኡንቱንታ ታኮ ኪቴዳ” ያጌዳ።

12 ጾሳይ ባላማ፥ “ኔን ኡንቱንቱና ቦፓ። እስራኤላቱ አንጀቴዳዋንታ ግድያ ድራዉ፥ ኔን ሄ አሳ ሸቆፓ” ያጌዳ።

13 ዎንተꬃ ጋላስ ዎንታ ባላም ደንዲደ፥ ባላቃ ካፓቱዋ፥ “ታን ህንተናና ቤናዳን መꬍና ጎዳይ ድጌዳ ድራዉ፥ ህንተ ቢታ ስምተ” ያጌዳ።

14 ሞኣባ ካፓቱ ያፐ ደንዲደ፥ ባላቃኮ ስሚደ አ፥ “ባላም ኑናና ዬናን እጼዳ” ያጌድኖ።

15 ዛሪደካ ባላቅ ካሰዋንቱፐ አꬍ ቦንቼቴዳነ ፓይዱዋንካ ጮራቴዳ ሀራ ካፓቱዋ አኮ ኪቴዳ። 16 ኡንቱንቱ ባላማኮ ዪደ፥ “ጽፖራ ናአይ ባላቅ ኔና፥ ‘ኔን ታኮ ያናዋ ኔና አያይነ ተኦፖ። 17 አያዉ ጎፐ፥ ታን ነዉ ዳሮ ዎይቱዋ እማና፤ ኔን ግያዋ ኡባ አያነ ታን ኦꬃና። ያደ ሀ አሳ ታዉ ሸቃርኪ’ ” ያጊደ ኦዴድኖ።

18 ሽን ባላም ኡንቱንቶ፥ “ባላቅ ሀራይ አቶ ብራይነ ዎርቃይ ኩሜዳ ባረ ካትያ ጎልያ ታዉ እሜዳዋ ግድንቶነ፥ መꬍና ጎዳ ታ ጾሳ አዛዙዋፐ አꬋደ፥ ታን አያነ ፓጭሳናዉ ዎይ ጉጃናዉ ዳንዳይከ። 19 መꬍና ጎዳይ ታዉ ኦድያ ሀራባይ ደኦፐ ታን ኤራናዳን፥ ህንተካ ሀች ቃማ ሀዋን አቅተ” ያጌዳ።

20 ሄ ጋላሳ ቃማ ጾሳይ ባላማኮ ዪደ፥ “ሀ አሳይ ኔና ጼሳናዉ ዬዳ ድራዉ፥ ኔን ኡንቱንቱና ባ። ሽን ታን ነዉ ኦድያዋ ጻላላ ኦꬃ” ያጌዳ።

21 ዎንተꬃ ጋላስ ባላም ባረ ሀራቶ ኮሪደ፥ ሞኣባ ካፓቱዋና ቤዳ። 22 ሽን እ ብያ ዎደ ጾሳ ሀንቁ ኤጽ ከሴዳ፤ ያትና መꬍና ጎዳ ኪታንቻይ አ ተአናዉ ኦግያን ኤቄዳ። ሄ ዎደ ባላም ባረ ሀራቶ ቶጎዋን፥ አ ላኡ ቆማቱ አናና ደኢኖ። 23 መꬍና ጎዳ ኪታንቻይ ማሻ ዛረꬅ ኦይቂደ፥ ኦግያን ኤቄዳዋ ሀራታ በአኔ፥ ኦግያ አጋደ፥ ጎሻ ግዶ ገላዱ። ባላም ኦግያ ዛራናዉ ሀራቶ ሾጬዳ።

24 ያትና መꬍና ጎዳ ኪታንቻይ ላኡ ዎይንያ ቱራ ሳአቱዋፐ ግዱዋን፥ ያ ባጋናነ ሀ ባጋና ግምቢያን ድረት ኡቴዳ ኡንኦ ኦግያን ኤቄዳ። 25 ሀራታ መꬍና ጎዳ ኪታንቻ በኤዳ ዎደ፥ ግምቢያ ድርሳኮ ሺቃደ፥ ባላማ ገድያ ግምቢያ ድርሳና ዳራጻዱ፤ እ ሀራቶ ላኤንꬁዋካ ሾጬዳ።

26 ሄዋፐ ጉይያን፥ መꬍና ጎዳ ኪታንቻይ ስንꬃዉኮ አꬊደ፥ ሀድርሳ ባጋናካ ኡሸቻ ባጋና አꬍያ ሳአይ ባይና ኡንኦ ሳኣን ኤቄዳ። 27 ሀራታ መꬍና ጎዳ ኪታንቻ በኣደ፥ ባላም ቶጎዋን ግሳዱ። ባላም ሎይꬅ ሀንቀቲደ፥ ባረ ጻምአን ሀራቶ ቡኬዳ። 28 ሄዋፐ ጉይያን፥ መꬍና ጎዳይ ሀራት ዶና ዶይና፥ ሀራታ ባላማ፥ “ታን ነዉ አይ ኦꬅኔ ኔን ታና ሀ ሄዙ ገደ ቡኬዳዌ?” ያጋዱ።

29 ባላም ሀራቶ፥ “ኔን ታና ኤየꬄዳ ድራሳ። ታ ኩሽያን ማሻይ ደኤዳዋ ግድንቶነ፥ ታን ኔና ሀእ ዎꬋና ሽን!” ያጌዳ።

30 ሀራታ ባላማ፥ “ታን ነ ደኦ ኡባን ሀች ጋካናዉ ቶግያ ነ ሀራቶ ግድክታ? ታን ነዉ ሀዋዳን ሀና ኤራይታ?” ያጋዱ።

ባላም፥ “ሀና ኤራካ” ያጌዳ።

31 ሄዋፐ ጉይያን፥ መꬍና ጎዳይ ባላማ አይፍያ ዶይና፥ መꬍና ጎዳ ኪታንቻይ ሾኩዋፐ ሾዴዳ ማሻ ኦይቂደ፥ ኦግያን ኤቄዳዋ በኤዳ። እ ልጭ ጊደ፥ ሶምኡዋ ሳኣ ጋꬂደ ጉፋኔዳ። 32 መꬍና ጎዳ ኪታንቻይ አ፥ “ነ ሀራቶ ሀ ሄዙ ገደ አያዉ ቡካዲ? ነ ኦጊ ታ ስንꬃን ጌላ ግድያ ድራዉ፥ ታን ኔና ተአናዉ ሀዋ ያድ። 33 ሀራታ ታና በኣደ፥ ታ ስንꬃፐ ሄዙ ገደ ዎራ ስማዱ። ሀራታ ዎራ ስማቤናዋ ግድንቶነ፥ ታን ኔና ሀኖደ ቱሙ ዎꬋ ድጋደ፥ ሀራቶ አሻና ሽን” ያጌዳ።

34 ባላም መꬍና ጎዳ ኪታንቻ ዛሪደ፥ “ታን ናጋራ ኦꬃድ። ኔን ታና ተአናዉ ኦግያ ቦላን ኤቄዳዋ ታን ኤራበይከ። ኔን ዶሳቤናባ ግዶፐ፥ ታን ሀእ ጉየ ስማና” ያጌዳ።

35 መꬍና ጎዳ ኪታንቻይ ባላማ፥ “ኔን ሀ አሳቱዋና ባ፤ ሽን ታን ነዉ ኦድያዋ ጻላላ ሃሳያ” ያጌዳ። ባላም ባላቃ ቢታ ካፓቱዋና ቤዳ።

36 ባላም ይያዋ ባላቅ ስሴዳ ዎደ፥ አርኖና ሻፋ ዛዋን ባረ ቢታ ጋጻን ደእያ ሞኣባቱዋ ካታማን አናና ጋከታናዉ ቤዳ። 37 ባላቅ ባላማ፥ “ኔን ኤለካ ያናዳን ታን ኪታበይክታ? ኔን አያዉ ታኮ ኤለካ ያበይኪ? ታን ነዉ ዎይታናዉ ቱሙ ዳንዳይክታ?” ያጌዳ።

38 ባላም ባላቃ፥ “በአ፥ ሀእ ታን ኔኮ ያድ፤ ሽን ታን አያነ ጋናዉ ቱሙ ዳንዳይከ። ጾሳይ ታና ሃሳይስያዋ ጻላላ ታን ሃሳያና” ያጌዳ። 39 ሄዋፐ ጉይያን፥ ባላም ባላቃና ቅርያት-ሁጾታ ግያ ካታማ ቤዳ። 40 ባላቅ ሚዛነ ዶርሳ ያርሺደ፥ አሹዋፐ አማሬዳዋ ባላማዉነ አናና ደእያ ካፓቶ እሜዳ።

41 ዎንተꬃ ጋላስ ዎንታ ባላቅ ባላማ አኪደ፥ ባሞት-ባኣል ግያሳ ፑደ ከሴዳ፤ ሄዋን ኤቂደ፥ ባላም እስራኤልያ አሳፐ ባጋ በኤዳ።