1 መꬍና ጎዳይ ሙሳ ሀዋዳን ያጌዳ፤ 2 “ኔን እስራኤላቱዋ ሀዋዳን ያጋደ አዛዛ፤ ‘ላታዳን ህንተና ጋክያ ካናነ ቢታ ዛዋይ ሀዋ። 3 ገድሳ ባጋና ህንተ ዛዋይ ጺና መላ ቢታነ ኤዶማ ዛዋ ግዳናዋ። አዋይ ዶልያ ባጋና ህንተ ገድሳ ዛዋይ ማጽንያ አባ ገድሳፐ ዶሜ፤ 4 አቅራቢማ ፑደꬃና ገድሳ ባጋና ስሚደ፥ ጺና መላ ቢታ አꬊደ፥ ቃዴሳ-ባርነ ገድሳ ጋኬ፤ ሄዋፐ ሀዳር-አዳራ አꬊደ፥ አጽሞና ጋኬ። 5 አጽሞናፐ ግብጼ ሻፋኮ ስሚደ፥ ሜድተራነ አባ ጋኬ።

6 “ ‘አዋይ ዉልያ ባጋና ህንተ ዛዋይ ሜድተራነ አባ ጋጻ ግዳናዋ።

7 “ ‘ሁጲሳ ባጋና ህንተ ዛዋይ ሜድተራነ አባፐ ሆራ ደርያ ስት ኦꬅ ቢደ፥ 8 ሆራ ደርያፐ ሌቦ-ሀማታ ፕኑዋ ጋካናሳ፤ ሄዋፐ ጻዳዳን ዛዋቴ። 9 ቃይ ዝፍሮነፐ ቢደ፥ ሀጻር-ኤናና ጋኬ። ሁጲሳ ባጋና ህንተ ዛዋይ ሀዋ ግዳናዋ።

10 “ ‘አዋይ ዶልያ ባጋና ህንተ ዛዋይ ሀጻር-ኤናናፐ ሻፋማ ጋካናዉ ስት ኦꬅ ቢደ፥ 11 ሻፋማፐ ቢደ፥ አይናፐ አዋይ ዶልያ ባጋና ደእያ ርብላ ዎꬊደ፥ ጋሊላ አባፐ አዋይ ዶልያ ባጋና ደእያ ደርያ ጋኬ። 12 ሄዋፐ ዱገ ዮርዳኖሳ ሻፋ ዎꬍ ዛዋቲደ፥ ማጽንያ አባ ጋኬ። ህንተ ቢታ ዛዋይ ኡባ ባጋናካ ሀዋ’ ያጋ” ያጌዳ።

13 ሙሴ እስራኤላቱዋ ሀዋዳን ያጊደ አዛዜዳ፤ “ኤጻ የጊደ፥ ህንተ ላታና ማላ፥ ኡዱፑን ዛረቶነ ባጋ ዛረቶ ሄ ቢታይ እመታናዳን መꬍና ጎዳይ አዛዜዳ። ኢያሳ 14:1-5 14-15 አያዉ ጎፐ፥ ሮቤላ ዛራቱ ጋዳ ዛራቱነ፥ ምናሰ ዛራቱዋፐ ባጋይ ባረንቱ ላታ እያርኮ ሄፍንꬃን ዮርዳኖሳ ሻፋፐ አዋይ ዶልያ ባጋና አኬድኖ” ያጌዳ።

16 መꬍና ጎዳይ ሙሳ ሀዋዳን ያጌዳ፤ 17 “ሄ ቢታ ህንተንቶ ላታ ኦꬂደ፥ ሻክ እማና አሳቱ ሱንꬃይ ሀዋ፤ ቄስያ ኤልኣዛራነ ኔዌ ናኣ ኢያሳ። 18 ቃይ ቢታ ሻካናዉ ማዳና ማላ፥ ዛረ ኡባፐ እት እት ካፑዋ ሱንꬅተ። 19 ኡንቱንቱ ሱንꬃይ ሀዋፐ ካሊደ ደእያዋ።