1 እያርኮ ሄፍንꬃና፥ ዮርዳኖሳ ሻፋ ማታን ደእያ ሞኣባ ደምባን፥ መꬍና ጎዳይ ሙሳ ሀዋዳን ያጌዳ፤ ኢያሳ 21:1-42 2 “እስራኤላቱ ባረንቱ ላታፐ ሌዋቱዋ ደአና ካታማቱዋነ ኡንቱንቱ ዩሹዋን ደእያ ሄንꬃ ጋደቱዋ እማና ማላ፥ ኔን ኡንቱንታ አዛዛ። 3 ሄ ካታማቱዋን ኡንቱንቱ ደእኖ፤ ሄንꬃ ጋደቱ ኡንቱንቱ ሚዛሳ፥ ኡንቱንቱ ዶርሳሳነ ኡንቱንቱ ሀራ መህያ ኡባሳ ግድኖ። 4 ህንተ ሌዋቶ እማና ካታማ ዩሹዋን ደእያ ሄንꬃ ጋደቱ ካታማ ግምቢያ ድርሳፐ ካረኮ እት ሻአ ዋꬋ ግድኖ። 5 ካታማፐ ካረና፥ አዋይ ዶልያ ባጋና ላኡ ሻአ ዋꬋ፥ ገድሳ ባጋና ላኡ ሻአ ዋꬋ፥ አዋይ ዉልያ ባጋና ላኡ ሻአ ዋꬋነ ሁጲሳ ባጋና ላኡ ሻአ ዋꬋ ልክተ፤ ያቶፐ ካታማይ ግዶ ልክያን ደአና። ሌዋቱ ሄ ሄራ ባረንቱ ካታማዉ ሄንꬃ ጋደ ኦꬅኖ።

6 “ሌዋቶ ህንተ እማና ካታማቱ፥ አሳ ዎꬌዳ ኡራይ ባቃቲደ አትያ ኡሱፑን ካታማቱዋ፤ ሄዋንቱ ቦላ ጉጂደ፥ ኦይታማነ ላኡ ሀራ ካታማቱዋ ኡንቱንቶ እምተ። 7 ሌዋቶ ህንተ ኡባና ኦይታማነ ሆስፑን ካታማቱዋ ኡንቱንቱ ሄንꬃ ጋደቱዋና እትፐ እምተ። 8 እስራኤላቱዋ ላታፐ ሌዋቶ ህንተ እማና ካታማቱ እት እት ዛሪ ላቴዳዋ ኬሻ ግዳናዉ ኮሼ፤ ጮራ አሳይ ደእያ ዛርያፐ ጮራ ካታማቱዋ አኪተ፤ ሽን ፓይዱዋን ጉꬃ አሳይ ደእያ ዛርያፐ ጉꬃ ካታማቱዋ አኪተ” ያጌዳ።

9 ሄዋፐ ጉይያን፥ መꬍና ጎዳይ ሙሳ ሀዋዳን ያጌዳ፤ 10 “ኔን እስራኤልያ አሳ ሀዋዳን ያጋ፤ ‘ዮርዳኖሳ ሻፋ ፕኒደ፥ ካናነ ቢታ ህንተ ገልያ ዎደ፥ 11 ኤረናን አሳ ዎꬌዳ ኡራይ ባቃት ቢደ አታና ማላ፥ ካታማቱዋ ህንተንቶ ዶርተ። 12 ኤረናን አሳ ዎꬌዳዌ ሺቁዋ ስንꬃ ሙራናዉ ኤቃና ጋካናዉ፥ ሱꬃ አችያዌ አ ዎና ማላ፥ ሄ ካታማቱ ባቃት አትያሳ ግድኖ። 13 ሀ ህንተ እምያ ኡሱፑን ካታማቱ ህንተንቶ ባቃት አትያ ካታማቱዋ ግድኖ። 14 ዮርዳኖሳ ሻፋፐ ሀፍንꬃ ባጋና ሄዙ ካታማነ ካናነ ጋድያን ሄዙ ካታማቱዋ ህንተ ባቃት አታናዉ እምተ። 15 ሀ ኡሱፑን ካታማቱ ኤረናን አሳ ዎꬌዳ እስራኤላቱ፥ ሀራ ጋደ አሳቱነ ኡንቱንቱ ግዶን ደእያ በተቱ ባቃቲደ አትያሳ ግድኖ።

16 “ ‘እት አሳይ እት አሳ ብራታ ሚሻን ሾጭና፥ ሄ ኡራይ ሀይቆፐ፥ ሄዌ ሸምፑዋ ዎꬌዳዋ፤ ሸምፑዋ ዎꬌዳዌ ሀይቆ። 17 ቃይ ዎꬋና ዳንዳይያ ሹቻ ባረ ኩሽያን ኦይቄዳ አሳይ እት አሳ ሄ ሹቻን ጫድና፥ ሄ ኡራይ ሀይቆፐ፥ ሄዌ ሸምፑዋ ዎꬌዳዋ፤ ሸምፑዋ ዎꬌዳዌ ሀይቆ። 18 ቃይካ ዎꬋና ዳንዳይያ ምꬃ ባረ ኩሽያን ኦይቄዳ አሳይ እት አሳ ሄ ምꬃን ሾጭና፥ ሄ ኡራይ ሀይቆፐ፥ ሄዌ ሸምፑዋ ዎꬌዳዋ፤ ሸምፑዋ ዎꬌዳዌ ሀይቆ። 19 ሱꬃ አችያዌ ሄ ሸምፑዋ ዎꬌዳዋ ደሞፐ ዎꬎ።

20 “ ‘እት አሳይ እት አሳ ሞርኪደ ጫድና፥ ዎይ ዙጊድ እትባ አ ቦላ ኦልና፥ ሄ ኡራይ ሀይቆፐ፥ 21 ዎይ ሞርኪደ ባረ ኩሽያን ቦክስና፥ ሄ ኡራይ ሀይቆፐ፥ እ ሸምፑዋ ዎꬌዳዋ፤ ሸምፑዋ ዎꬌዳዌ ሀይቆ። ሱꬃ አችያዌ ሸምፑዋ ዎꬌዳዋ ደሞፐ ዎꬎ።

22 “ ‘ሽን ሞርከተꬃይ ባይናን፥ እት አሳይ እት አሳ አኬከናን ሱጎፐ፥ ዎይ ዙጊድ ናገናን እትባ አ ቦላ ኦሎፐ፥ 23 ዎይ አ ዎꬋና ዳንዳይያ ሹቻ እ በኤናን አ ቦላ የጎፐነ ሄ ኡራይ ሀይቆፐ፥ ሄዌ አ ሞርከ ግደና ድራዉነ አ ቆሀናዉ ሀልችቤና ድራዉ፥ 24 ያአይ ኤረናን ዎꬌዳዋፐነ ሱꬃ አችያዋፐ ግዱዋን ሀ ዎጋቱዋዳን ፕርዶ። 25 ኤረናን ዎꬌዳዋ ሱꬃ አችያዋ ኩሽያፐ ያአይ አሺደ፥ እ ባቃቲደ አትያ ካታማ ዛሮ። ጌሻ ዛይትያን ኦከቲደ፥ ቄሲ ኡባቱ ካፑ ሀይቃና ጋካናዉ፥ እ ያን ደኦ።

26 “ ‘ሽን ኤረናን ዎꬌዳዌ ባቃቲደ አትያ ካታማ ዛዋፐ ካረ ከስያዋ ግዶፐነ፥ 27 ባቃት አትያ ካታማፐ ካረና ሱꬃ አችያዌ አ ደሚደ ዎꬎፐ፥ እ ዎꬌዳዎ ኦሸተና። 28 አያዉ ጎፐ፥ ቄሲ ኡባቱ ካፑ ሀይቃና ጋካናዉ፥ ሄ ኤረናን ዎꬌዳዌ ባረ ባቃቴዳ ካታማን ኡታናዋሽን አጌዳ። ሽን ቄሰ ኡባቱ ካፑ ሀይቄዳዋፐ ጉይያን፥ ኤረናን ዎꬌዳዌ ባረ ላታ ጋደ ስማናዉ ዳንዳዬ።

29 “ ‘ህንተዉነ ብሮ የለታና የለታዉ፥ ህንተ ደኢያሳ ኡባን ሀዌ ህገ ግዶ።

30 “ ‘አሳ ዎꬌዳ ኦንነ ሸምፑዋ እ ዎꬌዳዋዳን ማርካቱ ማርካትና ሀይቆ፤ ሽን እት አሳ ጻላላይ ማርካትና፥ አይ አሳይነ ሀይቆፖ። ዛረ. 17:6፤ 19:15 31 ሸምፑዋ ዎꬌዳ ድራዉ ሀይቃናዉ በስያ አሳ ፓጻ አሻናዉ አጫ አኮፕተ፤ እ ሀይቆ። 32 አትያ ካታማ ባቃቴዳ ኦፐነ ቄሰ ኡባቱ ካፑ ሀይቃናፐ ካሰ፥ እ ጉየ ስሚደ፥ ባረ ጋድያን ደአናዳን ኦꬃናዉ አጫ አኮፕተ።

33 “ ‘ሄዋዳን ኦꬂደ፥ ህንተ ደእያ ቢታ ቱንሶፕተ። አያዉ ጎፐ፥ ሱꬃ ጉስያዌ ቢታ ቱንሴ፤ ሱꬃ ጉሴዳዋ ሱꬃናፐ አትና፥ ቢታ አቶ ጊሳናዉ ሀራ ኦግያን ዳንዳየተና 34 ታን፥ መꬍና ጎዳይ፥ እስራኤልያ አሳ ግዱዋን ደእያ ድራዉ፥ ህንተ ደእያ ቢታ፥ ታንካ ደእያ ቢታ ቱንሶፕተ’ ያጋደ ኦዳ” ያጌዳ።