1 ዮሴፎ ዛራቱዋፐ፥ ምናሰ ናኣ ማኪራ ናኣ ጋላኣደ ያራቱዋ ካፓቱ ሙሴኮነ እስራኤላቱዋ ያራቱዋ ካፓቱዋኮ ዬድኖ። 2 ኡንቱንቱ ዪደ፥ “ኑ ጎዳዉ፥ እስራኤልያ አሳዉ ቢታ ኤጻን ሻካደ እማና ማላ፥ መꬍና ጎዳይ ኔና አዛዜዳ፤ ቃይ ጾሳይ ኑ እሻ ጻሎፍሃዳ ላታ አ ማጫ ናናዉ ኔን እማና ማላ፥ ኔና አዛዜዳ። ፓይ. 27:7 3 ሌምሶ ኡንቱንቱ ሀራ ዛረ ግድያ እስራኤልያ አሳ ገሎፐ፥ ኡንቱንቱ ላታይ ኑ አዎቱዋ ላታፐ አከቲደ፥ ኡንቱንቱ ገልያ ዛርያዉ ጉጀቴ። ሄዋ ድራዉ፥ ኑዉ ኤጻን እመቴዳ ላታይ ፓጫና። 4 ቃይ እስራኤላቶ እሻታማንꬆ ላይꬃ ባላይ ጋክያ ዎደ፥ ኡንቱንቱ ላታይ ኡንቱንቱ ገልያ አሳ ዛርያዉ ጉጀቴ፤ ኡንቱንቱ ላታይ ኑ አዎቱዋ ዛርያ ላታፐ ፓጫና” ያጌዳ።

5 ሄዋፐ ጉይያን፥ መꬍና ጎዳ ቃላዳን፥ ሙሴ እስራኤላቱዋ ሀዋዳን ያጊደ አዛዜዳ፤ “ዮሴፎ ዛራቱ ግያዌ ልከ። 6 መꬍና ጎዳይ ጻሎፍሃዳ ማጫ ናናቱዋባ አዛዜዳዌ ሀዋ፤ ኡንቱንቱ ባረንቱ ዶሴዳ አስና ገላናዉ ዳንዳዪኖ፤ ሽን ባረንቱ አዉዋ ዛርያፐ ግዳናዉ ኮሼ። 7 እስራኤላቱዋ ላታይ እት ዛርያፐ ሀራ ዛርያዉ አꬎፖ፤ እስራኤልያ ኡባይ ባረ ማይዛ አዎቱዋ ዛሪ ላቴዳ ቢታ ምንሲደ ኦይቆ። 8 እስራኤልያ አሳ ግዶን አይ ዛረፐ ግድናካ፥ ቢታ ላትያ ማጫ ናእ ኡባይ፥ እስራኤሊ ኡባይ ባረ ማይዛ አዎቱዋ ላታ ላታና ማላ፥ አ ባረ አዉዋ ዛረ ግድያ አሳ ገሉ። 9 ሄዋዳን ሀኒደ፥ ላታይ እት ዛርያፐ ሀራ ዛርያዉ ሙለካ አናን ደአና። ሄዋ ድራዉ፥ እስራኤልያ ኡባይ ባረ ማይዛ አዎቱዋ ዛሪ ላቴዳ ቢታ ምንሲደ ኦይቆ” ያጌዳ።

10 ጻሎፍሃዳ ማጫ ናናይ መꬍና ጎዳይ ሙሳ አዛዜዳዋዳን ኦꬄድኖ። 11 ጻሎፍሃዳ ማጫ ናናይ፥ ማህሎ፥ ትርጾ፥ ሆግሎ፥ ምልኮነ ኖኦ ጌተትያዋንቱ፥ ባረንቱ አዉዋ እሻንቱ ናናቱዋ ገሌድኖ። 12 ኡንቱንቱ ዮሴፎ ናኣ ምናሰ ናናቱ ዛርያ ግዶን አስና ገሌድኖ፤ ኡንቱንቱ ላታይ ኡንቱንቱ አዉዋ ዛርያዉነ ያራዉ አቴዳ።

13 ያርኮፐ ሄፍንꬃና፥ ዮርዳኖሳ ሻፋ ማታን ደእያ ሞኣባ ደምባን ሙሴ ባጋና መꬍና ጎዳይ እስራኤልያ አሳ አዛዜዳ ህገቱነ ዎጋቱ ሀዋንታ።