ጳዉሎስ
ፕልጵስዮሳ አሳዉ
ጻፌዳ ኪታ
ገሉዋ
ጳዉሎስ ፕልጵስዮሳ አሳዉ ጻፌዳ ኪታይ ጻፈቴዳዌ፥ ማቅዶንያ ግዱዋን ደእያ ሮመን ኦሞደቴዳ ፕልጵስዮሳ ጌተትያ ጋድያን ደእያ አማንያዋንቱሳ። ሀዋንቱ ጳዉሎስ ኮይሮ አማንꬂደ ሺሼዳዋንታ። ኡንቱንቱ ሮመ ጋደ የለታ ግዶ ድራዉነ ቃይካ ካረ ጋደፐ ዬዳ ዎጋንነ አማኑዋን ዳሮፐ አዪኖ። ጳዉሎሳ ቦላን ኡንቱንቱ ዳሮፐ ሀንቅቴዳ ጋሱካ ሀዋ (ኪታ 16:20)። ሀ ኪታይ ጻፈቴዳዌ፥ ሀራ አማንያ ኦሳንቻቱ ጳዉሎሳ ቆፋ ጳልቂ ጳልቂደ ዋይስያ ዎድያናነ ፕልጵስዮሳ አማንያዋንቱ ግዶን ደንዴዳ ዎርዶ ትምርትያ ጋሱዋን አ ዎዛናይ ዳሮ ካዮቲደ መኤዳ ዎደነ ቃሾ ጎልያን እ ደእያ ዎድያና። ግዶ ሽን፥ ጳዉሎስ የሱስ ክርስቶሳ ምንሲደ አማንያ አሳ ግዴዳ ድራዉ፥ ሀ ኪታ ቦላን ቆንጪደ ቤትያዌ ናሸቻነ ኩመንꬃ አማነትያዋ።
ጳዉሎስ ሀ ኪታ ጻፌዳ ኮይሮ ጋሱ አ መቱዋ ዎደ አ ማዳናዉ ፕልጵስዮሳ አማንያ አሳይ እሞታ አዉ ኪቴዳ ድራዉ፥ ኡንቱንታ ጋላታናሳ። አ ቦላንካ ኡንቱንቱ ቦላንካ ዱማ ዱማ መቱ ጋኬዳዋ ግዶፐካ፥ ኡንቱንቱ ጻላና ማላነ ኩመንꬃ አማነቲደ ደአና ማላ፥ ሀ ጋከቴዳ እንጅያን ኡንቱንታ መንꬄ። አዩዋነ ኦቶሩዋ ድጊደ፥ የሱስ ክርስቶሳ አሽከተꬃን ኡንቱንቱ ኩማና ማላ፥ ምንሲደ ኡንቱንታ ሀሳይሴዳ። የሱስ ክርስቶሳና እትፐ ግዴዳዋን ኡንቱንቱ ደሜዳ ደኡ ጾሳ አꬎ ኬካተꬃፐ ፑልቴዳዋነ ኡንቱንቱ አማኑዋን አኬዳዋ ግድያዋፐ አትን፥ አይሁዳቱዋ ዎጋቱዋ ፖልያዋን ቤቴዳዋ ግደናዋ ኡንቱንታ ሀሳይሴ። የሱስ ክርስቶሳና እቱዋ ግዲደ ደእያ ኡባቶ ጾሳይ እምያ ሳሮተꬃባነ ናሸቻባ ኡንቱንቶ ጻፌ።
ሀ ኪታይ ኤረትያዌ ናሸቻ፥ አማነትያዋ፥ እትፐተꬃነ ክርስትና አማኑዋንነ ደኡዋን ምኒደ ደእያዋ ጌሺደ በስያዋና። ሄዋ ቦላካ ጉጂደ፥ ጳዉሎስ ፕልጵስዮሳን ደእያ አማንያ አሳቱዋ ሲቅያ ዎልቃማ ሲቁዋ ቆንጭሴ።
ሸምፓቱዋ ኡባቶ እመቴዳ ቃንꬃ ቆፋቱዋ
ገሉዋ 1:1-11
ጳዉሎሳዉ ደኤዳ ደኡዋ ሀኖታ 1:12-26
ክርስትና ደኡዋ ሌምሱዋ 1:27—2:18
ጽሞቶሳዉነ ኤጳፍሮዲቱሳዉ ደእያ ቆፋ 2:19-30
አማኑዋ ኤቀትያዋንቱፐ ናገታና ማላ ኦደቴዳዋ 3:1—4:9
ጳዉሎስ ፕልጵስዮሳ አማንያዋንቶ ሺሼዳ ጋላታነ ማቁዋ 4:10-20
ዉርሰꬃ ቁትያ 4:21-23
1
ሳሮታ
1 ኑን የሱስ ክርስቶሳ ኦሳንቻቱ ጳዉሎስነ ጽሞቶስ፥ ክርስቶሳ የሱሳን ደእያዋንቶ፥ ፕልጵስዮሳ ግያ ካታማን ደእያ ጌሻቶ ኡባቶ፥ አማንያዋንታ ካለꬅያዋንቶነ ማድያዋንቶ ሀ ዳብዳቢያ ጻፌቶ።
2 ኑ አዉዋ ጾሳፐነ ጎዳ የሱስ ክርስቶሳፐ አꬎ ኬካተꬃይነ ሳሮተꬃይ ህንተንቶ ግዶ።
ጳዉሎስ ዎሴዳ ጋላታ ዎሳ
3 ታን ህንተና ሀሳይያ ዎደ ኡባን ታ ጾሳ ጋላታይ። 4-5 ህንተ ኮይሮ ጋላሳፐ ሀኖ ጋካናዉ፥ ምሽራቹዋ ቃላ ኦድያዋን ታና ማዴዳ ድራዉ፥ ታን ኡባ ዎደ ህንተንቶ ኡባዉ ናሸቻን ጾሳ ዎሳይ። 6 ቃይ ህንተንቱ ግዶን ሎኦ ኦሱዋ ዶሜዳ ጾሳይ፥ ክርስቶስ የሱስ ስምያ ጋላሳይ ጋካናዉ ፖላናዋ ኤራይ።
7 ታን ህንተንቶ ኡባዉ ሄዋዳን ቆፓናዉ በሴ፤ አያዉ ጎፐ፥ ታን ህንተና ኡባ ዎደ ሀሳያይ። ሀእ ታን ቃሹዋን ደእያዋንነ ዎንጋላዉ ሞተትያዋን፥ ቃይ ዎንጋላ ምንሳ ኤስያዋንነ፥ ጾሳይ ታዉ ካጬዳ ካጫ ህንተካ ታናና ግሽ አኬድታ። 8 አያዉ ጎፐ፥ ታን ህንተና ኡባቱዋ ክርስቶስ የሱሳፐ ይያ ሲቁዋን አይ ኬና ሲቅንቶ፥ ጾሳይ ታዉ ማርካ።
9-10 ቃይ ታን ህንተንቶ ጾሳ ዎስያዌ ሀዋ፤ ሎኦባ አያኔካ ዶራናዉ ህንተንቱ ዳንዳያናዳንነ፥ ቃይ ህንተንቱ ሲቁ ቱሙ ኤራተꬃናነ አኬካ ኡባና እትፐ ጉጅ ጉጅ ድጫናዳን፥ ጾሳ ዎሳይ፤ ያቲደ ክርስቶስ ስምያ ጋላሳን ህንተንቱ ሱረነ ፖኩ ባይናዋንታ ግዳና። 11 ቃይ ህንተንቱ ሸምፑካ ጾሳ ቦንቾነ ጋላታዉ የሱስ ክርስቶሳ ባጋና ቤትያ ጽሎተꬃ አይፍያ አይፋና።
ጳዉሎሳ ቃሹ ዎንጋላይ አካናዋ ድግቤና
12 ታናዳን ጾሳ ካልያዋንቶ፥ ሀ ታና ጋኬዳዌ ምሽራቹዋ ቃላይ አካናዳን ቱሙ ማዴዳዋ ህንተንቱ ኤራና ማላ ኮያይ። 13 ታን ክርስቶሳ ድራዉ ቃሸቴዳዋ፥ ካትያ ጎልያ ናግያ ኡባቱነ ሀዋን ደእያ ሀራቱ ኡባቱ ኤሪኖ። 14 ቃይ ታን ቃሸቴዳዌ ኑ እሻቱዋፐ ዳርያዋንቱ ጎዳን ሎይꬅ አማነቲደ፥ ጾሳ ቃላ ያሽ ባይናን ካሰዋፐ ጻሊደ ኦዳናዳን ማዴዳ።
15 ቱሙፐ እቱ እቱ ቃናትያ ድራዉነ ፓሉምያ ድራዉ፥ ክርስቶሳዋ ኦዲኖ፤ ሽን ሀራንቱ ሎኦ አሙዋን ኦዲኖ። 16 ሀዋንቱ ጾሳይ ታዉ ዎንጋላ ናግያ ኦሱዋ እሜዳ ድራዉ፥ ሲቂደ ቃላ ኦዲኖ። 17 ሽን የኮንቱ ታን ቃሹዋን ደእሽን፥ ታ ቦላ ዋይያ አሀናዋ ኡንቱንቶ ማላትና፥ ባረና ሲቅያ ዎልቃማ አሙዋን ክርስቶሳዋ ኦድኖፐ አትን፥ ዎዛናፐ ኦድክኖ።
18 አይነ ባዋ፤ ማላትስያ ኦዶነ ግዶ ዎይ ቱሙ ኦዶነ ግዶ፥ አይ ኦግያንነ ክርስቶሳዋ ኦዶፐ፥ ታን ሄዋን ናሸታይ። ስንꬃናዉካ ቃይ ታን ናሸታና። 19 አያዉ ጎፐ፥ ታን ህንተንቱ ዎሳንነ የሱስ ክርስቶሳ አያናፐ ይያ ማዱዋን አታናዋ ኤራይ። 20 ታ ዎልቃማ አሙነ ጾሳፐ አካና ጋደ ታን ናሸቻን ናግያ ናጉ አዬ ጎፐ፥ ታን ፓጻ ደእናካ ዎይ ሀይቂናካ ያየናን፥ ካሰዋዳን ሀእካ ታ ኩመንꬃ አሳተꬃን ክርስቶስ ቦንቼታናዋፐ አትን፥ ታን ሀራይ አቶ እትባንካ ዬላተናን አታናሳ። 21 አያዉ ጎፐ፥ ታዉ ደኡ ክርስቶሳ፤ ቃይ ሀይቁካ ታዉ ጎአ። 22 ሽን ታን ፓጻ ደእያዋን ዳሮ ጎእያዋ ኦꬃናዋ ግዶፐ፥ ሀቃዋ ዶራነንቶ ታዉ ኤረተና። 23 ታን ሀ ላኡ የዋቱዋን መቶታይ፤ ሀ ደኡዋፐ ሻከታናዉነ ቃይ ክርስቶሳና እትፐ ደአናዉ አሞታይ፤ ክርስቶሳና እትፐ ደእያዌ ኡባፐ አꬌዳ ዳሮ ሎኦባ። 24 ሽን ታን ሀይቂያዋፐ ህንተንቱ ድራዉ ፓጻ ደእያዌ ህንተና ዳሮ ኮሽያዋ።
25 ሀዌ ቱማ ግድያዋ ታን ጌሻደ ኤራይ፤ ቃይ አማኑዋን ህንተንቱ ድጫናዳንነ ናሸታናዳን፥ ታን ህንተናና ኡባና ፓጻ ደአና። 26 ሄዋ ድራዉ፥ ታን ህንተናና ላኤንꬁዋ ይያ ዎደ፥ ክርስቶሳ የሱሳና ህንተ ደእያ ደኡዋን፥ ታባን ጬቀትያባይ ህንተንቶ ዳራና።
27 ግዶፐካ፥ ህንተንቱ ህንተንቱ ሁጰዉ ክርስቶሳ ዎንጋላዉ በስያ ደኡዋ ደእተ፤ ታን ህንተና ባደ ዎይ በአና ꬋይና፥ ህንተንቱ እት ቆፋን ምኒደ ኤቄዳዋነ፥ ቃይ ዎንጋላ አማኖ እት ዎዛና ግዲደ እትፐ ባጸትያዋ ስሳና። 28 ህንተ ሞርከቶ አያንካ ያዮፕተ፤ ሄዌ ኡንቱንቶ ኡንቱንቱ ባሻ ꬊሽሴ፤ ሽን ጾሳይ ህንተና ጾንስያ ድራዉ፥ ህንተንቶ አቶተꬃ ꬊሽሴ። 29 አያዉ ጎፐ፥ ክርስቶሳዉ ኦꬅያ ካጫይ ህንተና ጋኬዳዌ ህንተንቱ አን አማናና ጻላላሳ ግደናን አ ድራዉ ዋይያካ አካናሳ። 30 ታን ካሰ ባጸትሽን ህንተንቱ በኤዳዋ ማላ ባጺነ ቃይ ሀእካ ታን ባጸትያዋ ህንተንቱ ስስያዋ ማላይ ህንተና ጋኬዳ።