1 ታ ናአዉ፥ ታ ቃላ ናጋ፤ ታ አዛዙዋካ ነ ጋርሳን ቆሳ። 2 ነዉ ፓጻ ደአናዉ ታ አዛዝያዋ ኦꬃ፤ ታ ትምርትያካ ነ አይፍያ ቡሉዋዳን ናጋ። 3 ሀሳይስያዋዳን ኡንቱንታ ነ ብራቱዋን ቃቻ፤ ነ ዎዛናንካ ጻፋ። 4 አꬌዳ ኤራተꬃ ነ ምቻትዳን፥ አኬካካ ነ ማታ ዳቡዋዳን ጼላ። 5 ኡንቱንቱ ኔና ጫራትያ ምሽራትፐነ ባረ ቃላን ሸሌሽያ ሀራ ምሽራትፐ ናጋና።

6 እት ጋላስ ታን ታ ጎልያ ማስኮትያና ካረ ጼላድ፤ 7 ዎዛና ኩንꬅቤና ዎዳላ ናናቱዋ በኣድ። ኡንቱንቱ ግዶፐ እቱ ሎይꬅ ቦዛ። 8 ሄ ዎዳላይ ኦግያና ቢደ፥ እት ዎሹምያ ማጫ ምሽራት ጎልያ ማታና አꬌዳ፤ እ ጎለ አፍያ ኦግያኮ ፕኒደ፥ እ ጎልያ ሄራን ሀመቴ። 9 ሄ ዎደ ሳአይ ቃማናዉ ለምእለምኤ። 10 ሄዋፐ ጉይያን፥ ምሽራታ አ ደማዱ። እዛ ጫራቶ ግድያዋ እዝ ማዩ ኤርሴ። እዛ አሳ ጭማናዉ ቆፓደ ከሳዱ። 11 እዛ ጻላነ ዬላይ ባይና ማጫ አሳ፤ ሶን ዎፑ ጋደ ኡቱኩ። 12 እዛ እት ገደ ኦግያን፥ እት ገደ ገያን፥ ዳባባ ኡባን ኤቃደ ናጋዉ።

13 አ ሄ ናኣ ቆማደ የራዱ፤ እዛ አ አይፍያ ዬል ባይናን ትሽ ኦꬃ ጼላደ ሀዋዳን ያጋዱ፤ 14 “ታን ታ ያርሹዋ ያርሻደ፥ ታ ቃንገꬃ ሀእ ጋꬃ ስማይ። 15 ያታደ ኔና ጾሞሳናዉ ከሳድ፤ ኔና ሎይꬃ ኮያድ፤ ሀእ ስም ደማድ። 16 ታን ግብጼፐ ዬዳ፥ አሌቄዳ አንሶላ ታ ሂጻን የጋድ። 17 ታን ካዋራ፥ አልሙንያነ ቃራፋ ጌተትያ ቅማማቱዋፐ ከሴዳ ሽቱዋ ታ ሂጻን ጫጫፋድ። 18 ሃያ፤ አነ ዎንታና ጋካናዉ ሲቁዋ አሎይተ፤ ቆመቲደካ ናሸቶይተ፤ 19 አያዉ ጎፐ፥ ታ አስናይ ሶን ግደና፤ ሃኮ ሳ ቤዳ። 20 ሚሻ ቃርጪታ ኩንꬅ አኪደ ቤዳ ድራዉ፥ አገናይ ዶይሳና ጋካናዉ ጎለ ስመና” ያጋዱ።

21 ባረ ማልኦ ሃሳያን አ ሸሌሻዱ፤ ባረ ሊቆ እንጻርሳን ጭማዱ። 22 ያትና፥ ኤለካ እ እዞ ካሊደ፥ ብ አጌዳ። ቦራይ ሹክያሳ ላገትያዋዳን፥ ጋራይ ኤሌሊደ ጲርያን ገልያዋዳን፥ 23 ቶራይ አ ዎዛና ጫድያዋዳን ሀኔዳ። ዳባ ግዶ ገሌዳ ካፉዋ ማላቴዳ። ሀዌ ኡባይ አ ሸምፑዋ ባይዛናዉ ሀንያዋ ኤርቤና።

24 ታ ናናዉ፥ አነ ሀእ ስስተ፤ ታ ዶናፐ ከስያ ቃላካ ሀይዝተ። 25 ነ ቆፋይ ሄ ማጫ ምሽራትና ቦፖ፤ እ ኦግያን ገላደ ባለቶፓ። 26 አ ጫዳደ ኦሌዳዋንቱ ኡንደኔዳዋንታ፤ አ ዎꬌዳዋንቱካ ሎይꬅ ዳራ። 27 እ ሶያይ ዱፉዋኮ አፍያ ኦግያ፤ ሄ ኦጊ ዱገ ሀይቁዋ ጌሱዋ ካለꬄ።