1 ቱሙ አꬌዳ ኤራተꬃታ ጼሰኬ?ሌም. 1:20-21 አኬካይካ ባረ ቃላ ꬎቁ ኦኔ? 2 ኦግያ ዶናን ደእያ ዞዘቱዋ ቦላነ ኦገቱ ዳንትያሳን እዛ ኤቃዉ፤ 3 ድርሳ ፐንግያ ማታን፥ ካታማ ገልያ ፐንግያን ኤቃደ፥ ባረ ቃላ ꬎቁ ኦꬃደ፥ ሀዋዳን ያጋዉ፤ 4 “ህንተኖ አሳቶ፥ ታን ህንተና ጼሳይ፤ ታን አሳ ኡባ ጼሳይ። 5 ህንተኖ አኬካይ ፓጬዳዋንቶ፥ ሂላ ደማናዉ ታማርተ። ህንተኖ ቦዛቶ፥ አኬካ ደምተ። 6 ታን ዳሮ ሎኦባ ኦድያ ድራዉ ስስተ፤ ታን ሱረባ ኦዳናዉ ታ መተርሻ ዶያይ። 7 ታ ዶናይ ቱሙዋ ሃሳዬ፤ ታ መተርሻይ ዎርዶባ እጼ። 8 ታ ዶናይ ሃሳይያዌ ኡባይ ቱማ፤ ጌላ ዎይ ምርቀꬃ ግደና። 9 አኬካይ ደእያ ኡራዉ ታ ሃሳያይ ልከ፤ ኤራይ ደእያዋንቶ ታ ሃሳያይ ቆንጨ።

10 “ብራ አጊደ፥ ታ ዞርያ ዶርተ፤ በርተ ዎርቃካ አጊደ፥ ኤራተꬃ ዶርተ። 11 አያዉ ጎፐ ታን፥ አꬌዳ ኤራተꬃታ፥ እንቁዋ ግያ ዳሮ አልኦ ሹቻፐካ አꬋይ፤ ኔን አሞትያዌ ኡባይካ ታናና ላገታናዉ ዳንዳየና።

12 “ታዉ፥ አꬌዳ ኤራተꬃትዉ አኬካይ ደኤ፤ ኤራተꬃይካ አዱሳ ቆፋይካ ታናና እትፐ ደኢኖ። 13 መꬍና ጎዳዉ ያይያዌ ኢታተꬃ እጽያዋ፤ ታን ኦቶሩዋነ አዩዋ እጻይ፤ ኢታሳ አፍያ ኦግያነ ዎርዱዋ ሃሳያ ዶስከ። 14 ዞሪነ ሎኦ ኤራይ ታዋንታ፤ አኬካይነ ዎልቃይነ ታዉ ደኢኖ። 15 ካተቱ ታናን ካዉቲኖ፤ ቃይ ሞድያዋንቱ ሱረ ህግያ ታናን ከሲኖ። 16 ካፓቱ ታን ማድና፥ አሳ ሞድኖ፤ ሳኣን ጋድያ ሞድያ ዎልቃማ አሳቱዋ ኡባካ ታን ማዳይ።

17 “ታን ታና ሲቅያዋንታ ሲቃይ፤ ታና ምንሲደ ኮይያዋንቱካ ደማና። 18 ዱረተꬃይነ ቦንቹ ታናና ደኢኖ፤ ዉረና አቁነ እንጂ ታ ማታና። 19 ህንተ ታፐ ደምያ አይፊ በርተ ዎርቃፐነ ታ ጫርሻይ ሙሽስ ከሴዳ ብራፐ አꬌ። 20 ታን ጽሎተꬃ ኦግያን ሀመታይ፤ ሱረ ፕርዳ ሎሱዋና አꬋይ። 21 ታና ሲቅያዋንቶ ታን ማጹዋ እማና፤ ኡንቱንቱ ጎልያካ ታን ሚሻን ኩንꬃና።

22 “መꬍና ጎዳይ ታና ባረ ኦሱዋ ኡባፐ ኮይሮ መꬌዳ፤ሳፃ 3:14 በንፐካ አ ኦሶ ዶመꬃይ ታና። 23 በን ዎደ፥ ቢታይ ሳአይ መታናፐ ካሰ ታን ሱንታድ። 24 ዎልቃማ አባቱ ባይና ዎደ፥ ሃꬃ ፑልቶቱ ꬉእቤና ዎደ፥ ሄ ዎደ ታን የለታድ። 25 ደረቱነ ደꬃቱ መታናፐ ካሰ ታን የለታድ። 26 መꬍና ጎዳይ ሳኣነ ሳኣን ደእያ ጋደቱዋ ኡባ መꬋናፐ ካሰ፥ ዎይ እት ኮጰ ግድያ ባናይ አላምያን ኦሰታናፐ ካሰ ታን የለታድ።

27 “መꬍና ጎዳይ ሳሎቱዋ ምጬዳ ዎደነ ዎልቃማ አባቱዋፐ ቦላና ደእያ ሳሉዋ ጊግሴዳ ዎደ፥ ታን ያን ደአይ። 28 መꬍና ጎዳይ ሻረቱዋ ቦላን ዎꬄዳ ዎደ፥ ዎልቃማ አባ ፑልቶቱዋ ꬉሴዳ ዎደ፥ 29 አባ ሃꬃቱ ባረንቶ እመቴዳ ዛዋፐ ፕኒደ፥ ቦላዉ አናዳን፥ እ ኡንቱንታ አዛዜዳ ዎደ፥ ሳኣ ባሱዋ እ ባሴዳ ዎደ፥ ታን ያን ደአይ። 30 ሄ ዎደ ታን አ ማታን ኤረቴዳ ኦሳንቻ፤ ኡባ ጋላስ ታን ናሸቻን ኩማይ፤ ታዉካ አ ስንꬃን ናሸታይ። 31 እ መꬌዳዌ ኡባይ፥ ሳአይካ አሳ ናናቱካ ታና ናሸቺኖ።

32 “ሀእካ ስም ታ ናቶ፥ ስስተ፤ ታን ኦድያዋዳን ኦꬅያዋንቱ አንጀቴዳዋንታ። 33 ታ ትምርትያ ስስተ፤ አꬌዳ ኤራንቻ ግድተ፤ ስሴዳዋ ሸነኮ ጎፕተ። 34 ታና ስስያ ኡራይ፥ ሀች ሀች ታ ፐንገን ቤትያ ኡራይ፥ ታ ጎለ ገልያሳንካ ናግያ ኡራይ አንጀቴዳዋ። 35 ታና ደምያዌ ደኡዋ ደሜ፤ መꬍና ጎዳፐ እ ሳባ ደሜ። 36 ሽን ታና ደመናን አግያ ኡራይ ባረና ቆሄ፤ ታና እጽያ ኡባቱ፥ ሀይቁዋ ሲቂኖ” ያጋዉ።