1 አꬌዳ ኤራተꬃታ ባረ ጎልያ ኬጻዱ፤ ሄ ጎልያዉ ላፑን ቱሳቱዋ ኤሳዱ። 2 እዛ ባረ ጊግስያ ሾብያዉ ሞꬎ መህያ ሹካዱ፤ ዎይንያ ኤሳካ አጋደ ጊግሳዱ። ማዳ ስንꬃዉ አꬃዱ። 3 ያታደ አሳ ጼሳናዉ ባረ ቆማቱዋ ኪታዱ። ቆማቱ ካታማዉ ꬎቃ ሳኣን ኤቂደ፥ 4 “ህንተኖ፥ ኤራይ ፓጬዳዋንቶ ሀዋ ገልተ!” ያጌድኖ። ቦዛቱዋካ እዛ ሀዋዳን ያጋዱ፤ 5 “ሃ ዪተ፤ ታ ቁማ ሚተ፤ ታን አጌዳ ዎይንያ ኤሳካ ኡሽተ! 6 ቦዛተꬃ አጊደ፥ ደኡዋን ደእተ፤ አኬካ ኦግያን ሀመትተ” ያጋዉ።

7 ቅሊጭያ ኡራ ሴርያ አሳይ ባረዉ ቦርያ አኬ፤ ኢታ ኡራ ዞርያዌካ ባረዉ ቆሄቴ። 8 ቅሊጭያ ኡራ ዞሮፓ፤ እ ኔና እጻና። አꬌዳ ኤራንቻ ኡራ ዞራ፤ እ ኔና ዶሳና። 9 አꬌዳ ኤራንቻ ኡራ ታማርሳ፤ ያቶፐ፥ እ ካሰዋፐካ አꬌዳ ኤራንቻ ግዳናዋ። ጽሎ ኡራካ ታማርሳ፤ ያቶፐ እ ኤራ ጉጃና።

10 አꬌዳ ኤራተꬃዉ ዶመꬃይ መꬍና ጎዳዉ ያይያዋ፤ ጌሻ ጾሳ ኤርያዌ አኬክያዋ። ኢዮባ 28:28፤ ማዝ. 111:10፤ ሌም. 1:7 11 ታናን ነ ላይꬃይ ዳራና፤ ነ ደኡዋ ላይꬃይካ አዱቃና። 12 ኔን አꬌዳ ኤራንቻ ግዶፐ፥ ነ ሁጲያዉ ጎኤታሳ። ኔን ቅሊጭያዋ ግዶፐካ፥ ነ ሁጲያዉ ቆሄታሳ።

13 ቦዛ ምሽራታ ዋላሳ ዳራዉ፤ እዛ ባረና ናገናዉኖ። እዛ አይነ ኤሩኩ። 14 እዛ ባረ ካረን፥ ዎይ ካታማዉ ꬎቃ ሳኣን ኦይድያን ኡታዉ። 15 ሱረ ባረንቱ ኦግያ ኦይቂደ ብያ አሳ ጼሳደ፥ 16 “ህንተኖ፥ ኤራይ ፓጬዳዋንቶ፥ ታኮ ሃ ዪተ” ያጋዉ። አኬካይ ባይናዋካ፥ 17 “ዉኢደ ኡሽያ ሃꬃይ ማልኤ፤ ጌማን ምያ ቁማይካ ናሸቼ” ያጋዉ። 18 ሽን እ ሀይቄዳ አሳይ ያን ደእያዋ፥ እዝ እማꬃቱካ ዱፉዋ ጪሞ ግዶን ደእያዋ ኤረና።